Mu Tome Bupilo bwa Mina fa Sebelezo ya Jehova

¹ Jesu n’a swaniselize bateelezi ba hae kwa mifuta ye mibeli ya bayahi. Yo muñwi n’a tomile mupilelo wa hae fa licwe la ku utwa Kreste mi n’a konile ku tiyela mañungwa a twaniso ni ziezi. Yo muñwi a u toma fa mushabati wa ku sa ipeya ku utwa kwa ka ku itata mi a yenduka muta sineneketo i zuha. (Mat. 7:24-27) Ka ku pila kwa mafelelezo a muinelo wo wa linto, lu ipumana mwa mañungwa a mañata a maziezi. Miinelo i bonisa kuli ñalelwa ye tuna i sweli ya atumela kapili. Kana lu ka fita kwa mafelelezo tumelo ya luna i sa kondile? (Mat. 24:3, 13, 21) Seo si itingile ka mo lu sweli ku yahela bupilo bwa luna cwale. Kacwalo, ki kwa ka putako ku ipuza kuli, ‘Kana ni sweli ku toma bupilo bwa ka bwa Sikreste ka ku tiya fa ku sebeleza Mulimu ka ku mu utwa?’

² Ku toma bupilo bwa luna fa sebelezo ya Jehova ku talusañi? Ku talusa ku bisa Jehova yena wa butokwa ka ku fitisisa mwa bupilo bwa luna. Ku ama ku bisa Mubuso buiyakato bwa luna bo butuna ka ku fitisisa. Ku ama ku utwa Mulimu mwa likezo kamukana za bupilo bwa luna bwa ka zazi. Ku tokwa ku eza ka moyo kaufela mwa tuto ya luna ya Bibele ya ka butu, ya lubasi, ni ya puteho hamohocwalo ni mwa bukombwa bwa luna bwa mwa simu, ili ku bisa zona zeo za butokwa hahulu mwa bupilo bwa luna. (Muek. 12:13; Mat. 6:33) Mupilelo o cwalo wa ka ku ipeya ku utwa u ka lu tahiseza tumelo ye tiile inge licwe, ye si ke ya yendulwa ki mañungwa afi kamba afi a maziezi a n’a ka taha.

³ Kwa nyakalalisa ku bona bolule ba batu ba nze ba toma ka buikolwiso bupilo bwa bona ni sepo ya bona ya za kwapili fa sebelezo ya Mulimu, sina mwa n’a ezelize Jesu. (Joa. 4:34) Ba eza lika ka tomahanyo ya kamita ya misebezi ya teokratiki mi ba ikola limbuyoti ze tuna kabakala seo. Me yo muñwi n’a talusize ka m’o yena ni munn’a hae ne ba kondiselize mwa ku hulisa bana ba bona ku fita fa ku sebeleza Jehova: “Bupilo bwa luna ne lu bu talize ka niti—ili ku yanga kwa mikopano ya sikiliti kaufela, ku itukisezanga ni ku fumanehanga kwa mikopano ya puteho, ni ku yanga mwa sebelezo ya mwa simu kamita.” Munn’a hae n’a ekelize kuli: “Niti haki kalulo ya bupilo bwa luna, ki yona bupilo bwa luna. Lika ze ñwi kaufela li tomilwe ku yona.” Kana ni mina ka ku swana mu ezisize sebelezo ya Jehova ku ba yona nto ya butokwa ka ku fitisisa mwa lubasi lwa mina?

⁴ Mu Ikezeze Tomahanyo ye Sebeza ya ka Viki: Kopano ya Jehova i lu tusa ku ba ni muezezo o munde wa kwa moya ka ku lukisa mikopano ye ketalizoho ka viki. Bakreste ba ba sweli ku toma bupilo bwa bona fa ku lapela Jehova ba lukisa za bona za silifasi ni za lubasi ka nzila ye ba lumeleza ku fumaneha kwa mikopano kaufela yeo ye butokwa. Ha ba tuheleli litaba ze si za butokwa hahulu kuli li pukutise ku fumaneha teñi kamita kwa bona.—Mafil. 1:10; Maheb. 10:25.

⁵ Bakreste ba ba tiile ba lemuha kuli ka mo ba tokwela ku ca sico ka linako ze ñwi za lizazi, ki kwa butokwa cwalo ku ba ni tomahanyo luli ya tuto ya ka butu ni ya lubasi, hamohocwalo ni ku itukiseza mikopano. (Mat. 4:4) Kana mwa kona ku tomahanya nihaiba fela mizuzu ye 15 kamba 20 ya tuto ya ka butu ka zazi? Nto ye tuna ki ku sa tuhelela lika ze ñwi ku kena mwa nako ye tomahanyelizwe tuto. Mu be ni mukwa o cwalo o tusa. Seo ne si kana sa tokwa ku pakelanga ku fita mo mu ezeza cwale zazi ni zazi. Lilama ba lubasi lwa Betele ba ba eza 17,000 mwa lifasi kamukana ba pakelanga kuli ba nyakisise liñolo la zazi. Ka mo ku inezi fela, ku pakelanga ku tokwa ku n’o itahanelanga kwa ku lobala ilikuli mutu a ikutwe ku katuluha habusa.

⁶ Haiba mu bondate-lubasi, m’u nge muhato wa ku singanyeka ni ku lukisa tomahanyo ya lubasi lwa mina ya za teokratiki. Mabasi a mañwi a balanga hamoho Bibele, Yearbook, kamba hatiso ye ñwi ha nze a pumula hamulaho wa mulalelo. Bashemi ba bañata ba ba hulisize bana ba ba bile Bakreste ba ba tiile kwa moya ba li nto ye ñwi ye ba tusize ku kondisa lika ne li mukwa wa lubasi wa ku ba ni manzibwana a mañwi a viki a ku ikola ku ituta hamoho. Ndate ya cwalo yo muñwi n’a ize: “Ni bona kuli zwelopili ya kwa moya ya bana ba luna ne i tisizwe hahulu ki tuto ya luna ya lubasi ye ne lu eza kamita la Bulalu, ili ye ne lu kalile lilimo ze 30 kwamulaho.” Bana ba hae ba balalu kaufela ne ba kolobelizwe ba sa li banana, mi hamulaho mwa bulalu bwa bona ba kena mwa bukombwa bwa nako ye tezi. Fahalimu a tuto ya lubasi, mitahisezo ya mwa sebelezo ya mwa simu kamba lingambolo za fa mukopano za kona ku lundululwa, mi likezo ze ñwi ze nde za kona ku ikoliwa hamoho.

⁷ Mwa tomahanyo ya mina ya ka viki ni viki, kana se mu ‘yolisize linako’ kuli mu kutaze Mubuso? (Makolo. 4:5) Buñata bwa luna lu patehile hahulu, ka ku ba ni buikalabelo bwa mwa lubasi ni mwa puteho bo lu swanela ku peta. Haiba lu sa ezi litukiso tota za ku abana mwa musebezi wa ku kutaza ni ku luta ka viki, ku ka ba bunolo hahulu kuli lika ze ñwi li kene mwa nako ya yona misebezi ya butokwa yeo. Muluwi wa famu ye tuna ya likomu n’a ize: “Ibat’o ba ka 1944 na lemuha kuli ne ni ka kona fela ku yanga mwa sebelezo ha ne ni ka i tomahanyeza lizazi. Ni kacenu ni sa ketanga lizazi li li liñwi mwa viki la ku ya mwa sebelezo ya mwa simu.” Eluda yo muñwi wa Sikreste u fumana kuli ku ba ni tomahanyo tota ya ku fa bupaki ku mu konisa ku kwanisanga lihora ze 15 ka kweli mwa musebezi wa ku kutaza. Haiba a ba ni za ku eza za silifasi la Mukibelo, u li tomahanya hamulaho wa sebelezo ya hae ya mwa simu ya kakusasana. Kana mina ni lubasi lwa mina mwa kona ku tomahanya nihaiba lizazi li li liñwi fela ka viki la sebelezo, ku li bisa mupilelo wa mina kwa moya?—Mafil. 3:16.

⁸ Mu Tatubisise Mupilelo wa Mina: Ku na ni lika ze lwanisa ku toma bupilo bwa luna fa sebelezo ya Jehova. Miinelo ye si ka libelelwa neikana ya pitihanya tukiso ya luna ye lukisizwe hande ya tuto, mikopano, ni sebelezo. Satani Sila sa luna u ka eza mwa konela kaufela kuli a ‘lu hanise’ ni ku shandaula milelo ya luna. (1 Mates. 2:18; Maef. 6:12, 13) Mu si ke mwa tuhelela yona mikwalelo yeo ku mi zwafisa, kuli mu palelwe. Mu eze licinceho ze tokwahala kaufela kuli mu pete misebezi ya teokratiki ye mu tomahanyize. Tundamo ya tokwahala kuli lu pete ze swanela luli.

⁹ Ha lu lukeli ku tuhelela likukuezo za silifasi ni za nama ya luna ye si ka petahala ku tisa likezo ze si za kwa moya ze ne ka kala ku feza nako ni mamelelo ya luna ze nze li ekezeha. Ku itatuba kwa tokwahala, ili ku itusisa lipuzo ze cwale ka: ‘Kana mupilelo wa ka se u bile o si na buitikanelelo kamba o lyangani? Kana se ni kalile ku toma bupilo bwa ka fa lika za lifasi le ze fela? (1 Joa. 2:15-17) Ni itusisa nako ye kuma kai mwa lindongwamo za ka butu, misipili ya ku ikatulusa, lipapali, kamba za ku itabisa ze ñwi—hamohocwalo ni ku buha televishini kamba ku shwashwata fa Intaneti—ha i bapanyiwa ni nako ye felezwa mwa lika za kwa moya?’

¹⁰ Haiba mu bona kuli bupilo bwa mina se bu tezi hahulu likezo ze sa tokwahali, ki sifi se mu ka eza? Sina Paulusi ha n’a lapezi kuli mizwale ba hae ba “be ba ba petehile,” kamba “ba kondiswe,” ni mina mu kupe Jehova tuso ya kuli mu kutele mwa ku toma za mina fa sebelezo ya hae. (2 Makor. 13:9, 11, NW, litaluso za kwatasi) Ku zwa f’o mu ikatulele ku pila ka katulo ya mina ni ku eza licinceho ze tokwahala. (1 Makor. 9:26, 27) Jehova u ka mi tusa ku pima ku biukela kwa bulyo kamba kwa nzohoto mwa ku mu sebeleza ka ku ipeya ku utwa.—Mu bapanye Isaya 30:20, 21.

¹¹ Mu Zwelepili ku Pateha mwa Sebelezo ya Mulimu ya ka Tabo: Bolule-lule ba ndongwama hahulu tabo konji ku yo fumana fela kuli bupilo bwa bona ha bu nze bu fita kwa mafelelezo, za kwa mubili ze ne ba cisehezi ha li si ka ba tiseza tabo ye inelela. Li bile “musebezi o si na tuso.” (Muek. 2:11) Kwa neku le liñwi, ha lu toma bupilo bwa luna ku Jehova, ili ‘ku mu beya fapil’a luna kamita,’ lu ba ni tabo ye tuna. (Samu 16:8, 11) Ku cwalo kakuli lu pilela Jehova. (Sin. 4:11) Ha lu sa mu ami, yena Muleli Yo Mutuna, bupilo bu ba bo bu si na taluso. Ku sebeleza Jehova ku taza bupilo bwa luna ka misebezi ye swanela, ye mulelo ili ye tusa luna ni ba bañwi ka nzila ye inelela, ee, ye sa feli.

¹² Ki kwa butokwa kuli lu si ke lwa ba ni ndembwe ni ku latehelwa ki maikuto a luna a putako ka za mafelelezo a lifasi la Satani a sweli ku atumela kapili. Bupilo bwa luna bwa ka zazi bu susuezwa ki mo l’u ngela nako ya kwapili. Batu ba mwa lizazi la Nuwe, ba ne ba sa lumeli kuli ku ka ba ni munda wa mwa lifasi kamukana, ne “ba si ka lemuha se siñwi,” mi ba toma bupilo bwa bona bwa ka zazi fa lindongwamo za ka butu—ili ku ca, ku nwa, ni manyalo—mane munda “wa ba kukisa kaufela.” (Mat. 24:37-39) Kacenu, ba ba toma bupilo bwa bona fa lifasi le ba ka iponela litibelelo za bona za kwapili li nze li shanyauka mwa sinyeho ye tuna ka ku fitisisa yeo mutu a kile a bona, lona “lizazi la Mulimu.”—2 Pit. 3:10-12.

¹³ Kacwalo he, mu zwelepili ku toma bupilo bwa mina ku Jehova, Mulimu ya pila, ni fa ku eza tato ya hae. Mwa bupilo bwa cwale, ha ku na pulukelo ye mu kona ku eza ye zamaiswa ki mutu ya sepahala sina Jehova. Ha koni ku puma—u ka taleleza lisepiso za hae. (Tite 1:2) Ha koni ku shwa—ha ku na se si bulukezwi ku Jehova se si lateha. (Hab. 1:12; 2 Tim. 1:12) Bupilo bwa ku ipeya ku utwa ni tumelo bo lu sweli ku toma cwale ki makalelo fela a bupilo bo bu ka ina ku ya ku ile mwa sebelezo ya ka tabo ya Mulimu wa luna ya tabile!—1 Tim. 1:11; 6:19.

[Manzwi a fa likepe 3]

“Niti haki kalulo ya bupilo bwa luna, ki yona bupilo bwa luna. Lika ze ñwi kaufela li tomilwe ku yona.”