“U ni Tuse mwa ku sa Lumela kwa Ka”

“Ndat’ahe mwana a huwa inz’a li: Na lumela; u ni tuse mwa ku sa lumela kwa ka.”—MAREKA 9:24.

 1. Ki sifi se ne si tisize kuli ndate yo muñwi a bulele kuli, “U ni tuse mwa ku sa lumela kwa ka”?

NDAT’AHE mushimani ya n’a kenwi ki sidimona na yemi fapil’a Jesu Kreste. Ki cisehelo kwa butuna yeo munn’a y’o na bile ni yona ya kuli mwan’a hae yo munyinyani a foliswe! Balutiwa ba Jesu ne ba si na tumelo ye likani ya kuli ba kone ku zwisa sidimona seo, kono ndat’ahe a huwa a li: “Na lumela; u ni tuse mwa ku sa lumela kwa ka.” Ka m’ata a n’a filwe ki Mulimu, Jesu cwale a lelekisa sidimona, ku si na ku kakanya seo ne si tiisize tumelo ya ndat’ahe mushimani y’o.—Mareka 9:14-29.

 2. Kwa neku la tumelo, ki mwa linzila lifi ze peli m’o Bakreste ba si na maswabi?

² Ka ku swana sina yena ndat’ahe mwan’a mushimani y’o ili ya n’a na ni sepo, mutang’a Jehova ya sepahala h’a swabeli ku bulela kuli: “Na lumela.” Banyefuli ne ba kana ba hana m’ata a Mulimu, buniti bwa Linzwi la hae, mane nihaiba ku ba teñi kwa hae. Kono Bakreste ba niti ba itukiselize ku lumela kuli ba na ni tumelo ku Jehova Mulimu. Niteñi, ha ba bulela kwa mukunda ku Ndat’a bona wa kwa lihalimu mwa tapelo, bona batu bao ka buñwi ne ba kana ba kupa kuli: “U ni tuse mwa ku sa lumela kwa ka.” Seo hape ba si eza ku si na ku ikutwa maswabi, ka ku izibela kuli nihaiba baapositola ba Jesu Kreste ne ba kupile kuli: “U lu ekeleze kwa tumelo.”—Luka 17:5.

 3. Ki ifi nto ye zwile mubano ka m’o Joani a itusiselize linzwi la “tumelo” mwa buka ya hae ya Evangeli, mi ki kabakalañi seo ha ne si swanela?

³ Mañolo a Sigerike a Sikreste sihulu a na ni ze ñata za ku bulela ka za tumelo. Ka buniti fela, buka ya Evangeli ya Joani i itusisa manzwi a Sigerike a fitana-fitana a swalisana ni “tumelo” ka buñata bo bu fitelela 40 pesenti ku fita mwa libuka ze ñwi ze talu za Evangeli ha li kopanywa hamoho. Joani u koñomeka kuli ku ba ni tumelo haki nto ye likani; ku i sebelisa ki kwa butokwa hahulu. Ha n’a ñola ibata i ba bukaufi ni 98 C.E., n’a boni mihato ye li mulyashinji ya bakwenuheli ha ne inze i fita fa ku ba teñi ili ku kweceka Bakreste ba ne ba fokola mwa tumelo. (Likezo 20:28-30; 2 Pitrosi 2:1-3; 1 Joani 2:18, 19) Kacwalo ne ku li kwa butokwa hahulu ku sebelisa tumelo, ku fa bupaki bwa yona ka likezo za buineelo bwa bumulimu. Linako ze t’ata ne li li kwapili.

 4. Ki kabakalañi ha ku si na nto ye sa konahali ku bao ba ba na ni tumelo?

⁴ Tumelo i konisa Bakreste ku talimana ni butata bufi kamba bufi. Jesu n’a taluselize balutiwa ba hae kuli kambe ne ba na ni “tumelo ye likana ni peu ya masitete kwa butuna,” ha ku na nto ni ye kana ye ne i si ke ya konahala ku bona. (Mateu 17:20) Ka yona nzila yeo, n’a koñomekile m’ata a tumelo, muselo wa moya o kenile. Kacwalo Jesu n’a koñomekile, isiñi seo batu ba kona ku si eza, kono seo moya wa Mulimu, kamba m’ata a sebeza a kona ku si eza. Bao ba ba zamaiswa ki yona ha ba ezisi kuli butata bo bu swana sina nalumbwa bu fite fa ku ba sina lilundu le lituna. Ku sebelisa butali bo bu tiswa ki moya wa Mulimu ku ba tusa ku buluka lika mwa mubonelo o lukile. Nihaiba butata bo butuna bu fita fa ku nyinyafala ha bu tiswa kwa m’ata a tumelo a bukeleza.—Mateu 21:21, 22; Mareka 11:22-24; Luka 17:5, 6.

Ku Lapela Kuli Tumelo i si ke ya Palelwa

 5-7. (a) Ki manzwi afi a temuso ka za tumelo a n’a bulezi Jesu ha na tomile Kupuzo? (b) Tumelo ya Pitrosi ne i mu konisize cwañi ku tiisa mizwale ba hae?

⁵ Ka 33 C.E., Jesu na ezize mukiti wa Paseka ni balutiwa ba hae lwa mafelelezo. Cwale, hamulaho wa ku fundula Judasi Isikariota, a toma mukiti wa Kupuzo, ka ku bulela kuli: “Ni ka mi fa mubuso, sina Ndate h’a ni file ona, . . . Simoni, Simoni, bona, Satani u mi kupile kuli a mi uluse sina buloto; Kono na, ni ku lapelezi kuli tumelo ya hao i si ke ya fela. Mi wena ha u sikuluhile, u tiise banabahenu.”—Luka 22:28-32.

⁶ Jesu n’a lapezi kuli tumelo ya Simoni Pitrosi i si ke ya fela. Nihaike kuli Pitrosi ka buikolwiso bo bu fitelezi n’a itumbaeta kuli ni kamuta n’a si ke a latula Jesu, hamulaho fela wa f’o n’a ezize cwalo halalu. (Luka 22:33, 34, 54-62) Ka buniti fela, bakeñisa ku bulaiwa kwa Mulisani ko ne ku talusizwe cimo, lingu za fita fa ku hasana. (Zakaria 13:7; Mareka 14:27) Niteñi, Pitrosi h’a sa kutezi mwa muinelo o munde ku zwa mwa ku wela kwa hae mwa lilaba la sabo, a tiisa mizwale ba hae ba kwa moya. N’a tisize taba ya ku yoliwa kwa Judasi Isikariota ya n’a si ka sepahala. Ka ku sebeza sina mubuleli wa baapositola fa Pentekonta ya 33 C.E., Pitrosi a itusisa i liñwi ya “linotolo” za n’a mu file Jesu, ili ku kwalula nzila ya kuli Majuda ba be lilama za Mubuso. (Mateu 16:19; Likezo 1:15–2:41) Satani n’a kupile ku fiwa baapositola kuli a ba uluse sina buloto, kono Mulimu n’a boni teñi kuli tumelo ya bona ha i palelwi.

⁷ A mu hupule ka mwa n’a ikutwezi Pitrosi ha n’a utwile Jesu ha bulela kuli: “Ni ku lapelezi kuli tumelo ya hao i si ke ya fela.” A mu hupule ka za seo! Mulena ili Muñ’a hae na lapezi kuli tumelo ya Pitrosi i si ke ya palelwa. Mi ne i si ka palelwa, kamba ku fela. Ka buniti fela, fa lizazi la Pentekonta, Pitrosi ni ba bañwi ne ba bile batu ba pili mwa ku toziwa ka moya o kenile ni ku fita fa ku ba bana ba Mulimu ba kwa moya, ba ne ba ka ba bacalifa ni Kreste mwa kanya ya kwa lihalimu. Bakeñisa kuli moya o kenile ne u sebeza fahalimw’a bona cwale ili ka sipimo se ne si si ka zibiwa kale kwa makalelo, ne ba kona ku bonisa miselo ya ona, ku kopanyeleza cwalo ni tumelo, ku fita l’ili kaufela. Ki kalabo ye makaza hakalo kwa kupo ya bona ya kuli: “U lu ekeleze kwa tumelo”!—Luka 17:5; Magalata 3:2, 22-26; 5:22, 23.

Ku Talimana ni Litiko ze Kwapili ka Tumelo

 8. Ki temuso ifi ya ka nako ye swanela yeo kopano se i lu file yona ka ku ama fa ku talelezwa kwa 1 Matesalonika 5:3?

⁸ Mwa ku talelezwa kwa bupolofita bwa Bibele, lu ka tuha lu utwa muhuwo wa “Kozo ni buiketo!” (1 Matesalonika 5:3) Kana seo si kona ku beya tumelo ya luna fa tiko? Ee, kakuli lu mwa kozi ya ku pitihanywa ki mihato ye bonahala ku kondisa lika yeo macaba n’a kana a ba ni yona mwa ku tahisa kozo. Kono ha lu na ku abana mwa moya o cwalo wa bashaeli ba kozo haiba lu beya mwa munahano kuli Jehova Mulimu h’a itusisi kopano ifi kamba ifi ya lifasi le kwa neku la ku tahisa seo. U na ni nzila ya hae ya ku tahisa ka yona kozo ye buniti, mi seo ki ka Mubuso fela wa hae o mwatas’a Jesu Kreste. Kacwalo, ku si na taba ni mihato ifi kamba ifi ya ku kondisa lika yeo macaba n’a kana a ba ni yona mwa ku tahisa kozo, i ka ba ya makutela-kaufi ni ya mbwashula fela. Ku lu tusa kuli lu be ba ba itukisize kwa neku la seo, “mutanga ya sepahala, ya na ni kutwisiso” u ka zwelapili ku hatisa litemuso za ka nako ye swanela ilikuli batanga ba Jehova ba si ke ba pitihanywa ki muhuwo o taha o si na mayemo wa “Kozo ni buiketo” o’ ka eziwa ki macaba a muinelo wo wa linto wa kale.—Mateu 24:45-47.

 9. Ki kabakalañi ku timezwa kwa Babilona yo Mutuna ha ku ka tokwa bundume ni tumelo kwa neku la luna?

⁹ Muhuwo wa “Kozo ni buiketo!” u ka ba sisupo sa ku “tulukelwa ki sinyehelo” kwa neku la Babilona yo Mutuna, kopano ya lifasi kamukana ya bulapeli bwa buhata. (Sinulo 17:1-6; 18:4, 5) Seo ni sona si ka beya tumelo ya Sikreste fa tiko. Bakeñisa kuli bulapeli bwa buhata bu ka shandaulwa, kana Lipaki za Jehova ba ka siyala inze ba tiile mwa tumelo? Ka mo ku inezi fela ba ka siyala inze ba tiile. Yona kezahalo yeo—ili ye si ka libelelwa ni ye sa hupulelwi kwa batu ba bañata—ha i na ku simuluha ku mutu. Batu ba lukela ku ziba kuli ka mutomo tota ki katulo ya Jehova, mwa ku kenisa libizo leo bulapeli bwa buhata se bu li shubauzi ka nako ye telele. Kono batu ba ka ziba seo kamukwaufi kwand’a kuli mutu yo muñwi a ba taluseze? Mi ki bomañi kwand’a Lipaki za Jehova ba ba konwa ku libelelwa ku ba taluseza seo?—Mu bapanye Ezekiele 35:14, 15; Maroma 10:13-15.

10. Twaniso ya Gogo fahalimw’a batu ba Jehova ni yona i ka ba cwañi tiko ya tumelo?

¹⁰ Lipaki za Jehova ba ba tozizwe ni balikani ba bona ba ba na ni sepo ya fa lifasi-mubu se ba bile ni bundume bwa ku taluseza ba bañwi ka za muhato o na ni ku taha wa katulo ya Jehova fahalimw’a Babilona yo Mutuna hamohocwalo ni muinelo wa linto wa Satani kamukan’a ona. (2 Makorinte 4:4) Mwa kalulo ya hae sina Gogo wa Magogo, ili ku talusa muinelo wa hae wa cwale o kwatasi, Satani u ka puta limpi za hae za fa lifasi-mubu ka mulelo wa ku lwanisa batu ba Mulimu ka ndwa ya meto-mafubelu. Tumelo mwa m’ata a bumulimu a ku sileleza Lipaki za Jehova i ka beiwa fa tiko. Kono lwa kona ku ba ni tumelo kuli sina ka mo li taluselize cimo Linzwi la Mulimu, Jehova u ka punyusa batu ba hae.—Ezekiele 38:16; 39:18-23.

11, 12. (a) Ki sifi se ne si file buniti bwa ku punyuha kwa Nuwe ni lubasi lwa hae mwahal’a Munda? (b) Ki sifi seo lu si ke lwa bilaela ka za sona mwahal’a ñalelwa ye tuna?

¹¹ Kacenu, ha lu zibi ka ku tala ka m’o Jehova a ka sileleza batu ba hae mwahal’a “ñalelwa ye tuna,” kono leo haki libaka la ku honona ka za kuli u ka eza cwalo. (Mateu 24:21, 22) Muinelo wa batanga ba Jehova ba mwa lizazi la cwale u ka swana sina w’o Nuwe ni lubasi lwa hae ne ba ipumani ku ona mwahal’a Munda. Ka ku kwalelwa mwa aleka ni ku potolohiwa ki mezi a timezo a n’a buba ñolonde ili ka m’ata, ka mo ku inezi fela ne ba mbwetukisizwe ki poniso yeo ya m’ata a bumulimu mi ne ba lukela ku ba ba ne ba lapezi ka tundamo. Ha ku na bupaki mwa Mañolo bo bu bonisa kuli ne ba na ni sabo ni ku ipuza ili bona kuli: ‘Kana aleka i tiile luli kuli ya kona ku punyuha m’ata a timezo? Kana lu na ni sico se si likani mane ku yo fita kwa mafelelezo a Munda? Kana lu ka kona ku talimana ni miinelo i sili fa lifasi-mubu hamulaho?’ Likezahalo ze ne li bile teñi hasamulaho ne li bonisize kuli lipilaelo za mufuta o cwalo ne li ka ba ze si na mayemo.

¹² Mwa ku itukiseza ka ku tala punyuho ya bona, Nuwe ni lubasi lwa hae ne ba tokwa ku bonisa tumelo. Seo ne si talusa ku latelela litaelo ni susuezo ya moya wa Mulimu o kenile. Mwahal’a ñalelwa ye tuna, hape i ka ba nto ye butokwa hahulu kuli lu latelele susuezo ya moya o kenile ni ku ipeya ku utwa litaelo za Jehova ze taha ka kopano ya hae. Ka ku eza cwalo ha lu na ku ba ni libaka la ku bilaela ni ku buza kuli: ‘Butokwi bwa luna bwa kwa moya ni kwa mubili bu ka talelezwa kamukwaufi? Ki tukiso ifi ye ka ezwa kwa neku la basupali kamba bao ba ba tokwa pabalelo kamba kalafo ye ipitezi? Jehova u ka lu konisa cwañi ku punyuha ni ku kena mwa lifasi le linca? Ka tumelo ye tiile, batanga ba Jehova kamukana ba ba sepahala ba ka siya lika kaufela mwa mazoho a hae ili a’ kona ku peta lika.—Mu bapanye Mateu 6:25-33.

13. Ñalelwa ye tuna i sa kalisa fela, ki kabakalañi ha lu ka tokwa tumelo ye swana sina ya Abrahama?

¹³ Ñalelwa ye tuna i sa kala fela, ku si na ku kakanya tumelo ya luna ku Mulimu i ka tiiswa ka butuna luli. Hailif’o, lu ka bona kuli Jehova u zusezapili sa n’a bulezi kuli u ka si eza. Lu ka bona muhato wa hae wa katulo ka meto a luna! Kono kana luna ka butu lu ka ba ni tumelo ye likani ya ku lumela kuli Mulimu h’a nze a timeza ba ba maswe, u ka punyusa batu ba hae? Kana lu ka swana sina Abrahama, ya n’a na ni tumelo kuli ‘Muatuli wa lifasi kamukana u ka eza se si lukile,’ isiñi ku timeza ba ba lukile hamohocwalo ni ba ba maswe?—Genese 18:23, 25.

14. Ki lipuzo lifi ze swanela ku lu ezisa kuli lu tatubisise tumelo ya luna ni ku sebeza ka t’ata mwa ku i tiisa?

¹⁴ Ki kwa butokwa hakalo kuli lu hulise tumelo ya luna cwale! Bakeñisa kuli mafelelezo a muinelo wo o maswe wa linto se a li bukaufi, haike lu tuhelele moya wa Mulimu kuli u lu zamaise mwa ku “pila ka mizamao ye kenile hahulu, ni ka bulapeli.” (2 Pitrosi 3:11-14) Kacwalo mwahal’a ñalelwa ye tuna ha lu na ku sisitwa ki mihupulo ye zwafisa ye cwale ka ye: ‘Kana n’a swanelwa ki silelezo ya Jehova? Kana ne ni swanela ku eza ka nzila ye tuna ni ku fita mwa sebelezo ya hae? Kana ne ni sebelize ka t’ata luli mwa ku apala mutu “yo munca”? Kana ni mutu y’o Jehova a tokwa mwa lifasi le linca?’ Lipuzo za nahanisiso ye tibile ze cwalo li swanela ku lu ezisa kuli lu tatube tumelo ya luna ni ku sebeza ka tata mwa ku i tiisa ona cwale!—Makolose 3:8-10.

Tumelo ye Lu Bisa Hande

15. Ki sikamañi seo Jesu fokuñwi na talusezanga bao n’a folisize, kono ki kabakalañi seo ha si sa yemeli ku folisa ka tumelo kwa mwa lizazi la cwale?

¹⁵ Jesu n’a si ka ciñekiseza misebezi ya hae ya ku folisa batu kwa mubili ku bao fela ba ne ba na ni tumelo. (Joani 5:5-9, 13) Kacwalo musebezi wa hae ha u fi kemelo kwa tuto ye si ya mwa mañolo ya ku foliswa ka tumelo. Ki niti, Jesu fokuñwi n’a taluselize bao n’a folisize kuli: “Tumelo ya hao i ku pilisize.” (Mateu 9:22; Mareka 5:34; 10:52; Luka 8:48; 17:19; 18:42) Kono ka ku bulela seo, n’a supa fela kwa nto ye li ya niti ili ye utwahala ya kuli: Kambe bao ba ne ba swenyeha ne ba si na tumelo mwa buikoneli bwa Jesu bwa ku ba folisa, ne ba si ke ba taha ku yena kuli ba to foliswa.

16. Ki tukiso ifi ya ku foliswa yeo Jesu a etelezi kacenu?

¹⁶ Kacenu, Jesu Kreste u etelezi tukiso ya ku foliswa kwa neku la kwa moya, mi batu ba ba fitelela 4,000,000 ka buñwi se ba ipeile ili bona mwa mayemo a ku fumana tuso ku zwelela ku seo. Ka ku ba Lipaki za Jehova, ba ikola buikangulo bwa kwa moya ku si na taba ni mapongo a kwa mubili a ne ba kana ba ba ni ona. Bakreste ba ba tozizwe mwahal’a bona ba na ni sepo ya kwa lihalimu, mi ba ‘beile meto a bona fa lika za ku ya ku ile ze sa bonwi.’ (2 Makorinte 4:16-18; 5:6, 7) Mi Bakreste ba ba na ni sepo ya fa lifasi-mubu ba talimela kwapili kwa likezo ze makaza za ku foliswa kwa mubili ko ku ka ezahala mwa lifasi le linca la Mulimu.

17, 18. Ki tukiso ifi ya Jehova ye talusizwe kwa Sinulo 22:1, 2, mi tumelo i tokwahala cwañi ku luna kuli lu fumane tuso ku zwelela ku seo?

¹⁷ Muapositola Joani n’a amile kwa litukiso za Mulimu kwa neku la bupilo bo bu sa feli ka manzwi ao a kwa Sinulo 22:1, 2 kuli: “La ni bonisa nuka ya mezi a bupilo, ye benya sina kristale, ye zwa mwa Lubona lwa Mulimu ni lwa Ngunyana. Mwahali a patelo ya munzi, ni fa likamba la nuka, buse bwa kwanu ni mwa buse, ku na ni kota ya bupilo ye beya miselo ha 12, inz’e buzwisa miselo ka kweli ni kweli; mi matali a kota yeo ki a ku folisa macaba.” “Mezi a bupilo” a kopanyeleza cwalo ni Linzwi la niti la Mulimu ni tukiso kamukana ya Jehova ya ku yangwela batu ba ba ipeya ku utwa ku zwa kwa sibi ni lifu ni ku ba fa bupilo bwa ku ya ku ile fa mutomo wa tiululo ya sitabelo sa Jesu. (Maefese 5:26; 1 Joani 2:1, 2) Balateleli ba Jesu ba 144,000 ili ba ba tozizwe ha ba sa li fa lifasi-mubu, ba nwa mwa tukiso ya Mulimu ya bupilo ka Kreste mi ba bizwa “likota ze na ni niti.” (Isaya 61:1-3; Sinulo 14:1-5) Se ba tisize miselo ye miñata fa lifasi-mubu. Ka ku zusezwa kwa lihalimu, mwahal’a Puso ya Lilimo ze Sikiti ya Kreste, ba ka abana mwa ku hasanya litukiso za tiululo ili ze ka sebeza mwa ku “folisa macaba” kwa sibi ni lifu.

¹⁸ Haiba lu na ni tumelo ye tiile hahulu mwa litukiso zeo za Mulimu, kacwalo hape buitateli bwa luna mwa ku latelela susuezo ya moya wa hae kuli lu abane ku zona bu ka ba bo butuna ni ku fita. Ku petahala kwa neku la kwa mubili ku kabe ku bile teñi mutu h’a nze a bonisa tumelo ku Kreste ni ku eza zwelopili ya kwa moya. Nihaike kuli mutu ka buñwi n’a kana a folisizwe buyanga bo butuna, u ka tiswa bukaufi hahulu ni bupetehi h’a nze a zwelapili ku eza se si lukile. Kamita u ka abana mwa litukiso za Mulimu za ku folisa ka sitabelo sa Kreste. Kacwalo tumelo i ka zamaisa ku foliswa ni ku petahaliswa kwa luna kwa neku la kwa mubili.

“Mu Pilisizwe ka . . . Tumelo”

19. Ki kabakalañi ha ku li kwa butokwa hahulu ku siyala ka ku tiya mwa tumelo?

¹⁹ Ku fitela masa a lifasi le linca la Mulimu a zwisa lififi la lifasi la cwale le li maswe, ki kwa butokwa hahulu hakalo kuli batanga ba Jehova ba siyale inze ba tiile mwa tumelo! Batu “ba ba sa lumeli” ba ka yumbelwa mwa “lisa le li tuka la mulilo ni sulufula,” ili lifu la bubeli. Ka ku ba sina muhato wa mafelelezo, seo si ka ezahala hamulaho wa tiko ya kaungu-ungu ili kwa mafelelezo a Puso ya Kreste ya Lilimo ze Sikiti. (Sinulo 20:6-10; 21:8) Ki muinelo o fuy’ozwi hakalo wa bao ba ba zwelapili ku bonisa tumelo ni ku punyuha ili ku ikola nako ya kwapili ye si na maciñekelo!

20. 1 Makorinte 13:13 i ka ba ni taluso ifi ye ipitezi kwa mafelelezo a Puso ya Kreste ya Lilimo ze Sikiti?

²⁰ Cwale manzwi ao a Paulusi kwa 1 Makorinte 13:13 a ka ba ni taluso ye ipitezi: “Ze ina; ki tumelo, ni sepo, ni lilato, ze talu zeo. Kono ye tuna ku zona ki lilato.” Cwale ha lu sa na ku tokwa ku bonisa tumelo ya kuli sepiso ya bupolofita bo bu kwa Genese 3:15 bu ka fita fa ku ba kezahalo tota kamba ku sepa kuli bu ka talelezwa. Seo si kabe si ezahalile kale. Ka ku ba babuluki ba busepahali, lu ka zwelapili ku sepa Jehova, ku bonisa tumelo ku yena ni ku Mwan’a hae, ni ku ba lata sina bona ba ba tisize ku talelezwa kwa bupolofita b’o. Fahalimw’a seo, lilato le li tungile ni buitumelo bo bu zwelela kwa pilu fa puluso ya luna li ka lu tama hamoho ku Mulimu ka buineelo bo bu sa kuyuki ku ya ku ile.—1 Pitrosi 1:8, 9.

21. Ki sifi seo luna kacenu lu swanela ku si eza ili kuli lu ‘piliswe ka tumelo’?

²¹ Ka kopano ya hae ye bonahala, Jehova u ezize litukiso ze makaza za ku tiisa tumelo. Mu itusise zona kaufela ka nzila ye tezi. Kamita mu fumanehe kwa mikopano ya batu ba Mulimu ni ku abana ku yona. (Maheberu 10:24, 25) Mu itute Linzwi la hae ni lihatiso za Sikreste ka tukufalelo. Mu kupe Jehova moya wa hae o kenile. (Luka 11:13) Mu likanyise tumelo ya bao ba ba etelela ka buikokobezo mwa puteho. (Maheberu 13:7) Mu pime miliko ya silifasi. (Mateu 6:9, 13) Ee, mu tibise swalisano ya mina ya ka butu ni Jehova ka nzila kamukana ye konahala. Fahalimw’a zeo kaufela, mu zwelepili ku bonisa tumelo. Cwale mu ka ba mwahal’a bao ba ba tabisa Jehova ni ku fumana puluso, kakuli Paulusi n’a talusize kuli: “Kakuli mu pilisizwe ka sishemo, ka tumelo; ha ku zwi ku mina, ki mpo ye zwa ku Mulimu.”—Maefese 2:8.

Ki Lifi Likalabo za Mina?

◻ Ki litiko lifi za tumelo z’e lu libelezi luli fapili?

◻ Ki mwa linzila lifi ze peli zeo tumelo ya luna i kona ku lu bisa hande?

◻ Ka ku ya ka 1 Pitrosi 1:9, lu lukela ku buluka tumelo ya luna ka butelele bwa nako ye fita kai?

◻ Ki litukiso lifi ze lu na ni zona mwa ku tiisa tumelo ya luna?

[Siswaniso se si fa likepe 29]

Ka ku swana sina ndate y’o mwan’a hae n’a folisizwe ki Jesu, kana mwa itemuhela butokwi bwa ka butu bwa ku ba ni tumelo ye tuna ni ku fita?