Mu Fe Matabelo A Tabisa Jehova

“Ka Jesu [Kreste], lu tiseze Mulimu sitabelo sa milumbeko, kikuli bupaki bo bu zwa mwa milomo ye lumba libizo la hae.”—MAHEBERU 13:15.

 1. Ki sifi seo Jehova n’a susuelize Maisilaele ba baezalibi ku si eza?

JEHOVA ki Mutusi wa bao ba ba fa ku yena matabelo a amuheleha. Kacwalo, sishemo sa hae ne si li fahalimw’a Maisilaele ba ne b’a fa matabelo a lifolofolo. Kono ki sifi se ne si ezahezi ha ne ba ezize sibi ka ku kutakutela? Ka mupolofita Hosea, ne ba susuelizwe kuli: “Mawe Isilaele! u kutele ku [Jehova] Mulimu wa hao; kakuli se si ku wisize ki bumaswe bwa hao. Mu ye ni manzwi, mi mu kutele ku [Jehova], mu mu bulelele, mu li: ‘U swalele bumaswe kaufela, mi u lu amuhele ka sishemo! Mi cwale bakeñisa lipoho, lu ku tiseze matabelo a manzwi a mwa milomo ya luna.’”—Hosea 14:1, 2.

 2. ‘Matabelo a lipoho za manzwi a mwa milomo ya bona’ ne li afi, mi muapositola Paulusi n’a amilwe kwa bupolofita bwa Hosea kamukwaufi?

² Kacwalo batu ba Mulimu ba kwaikale ne ba susuelizwe ku fa Jehova Mulimu ‘matabelo a lipoho za manzwi a mwa milomo ya bona.’ Ne li afi ona ao? Ee, matabelo a milumbeko ye buniti! Ka ku supa ku bona bupolofita b’o, muapositola Paulusi n’a susuelize Bakreste ba Maheberu ku “[tiseza] Mulimu sitabelo sa milumbeko, kikuli bupaki bo bu zwa mwa milomo ye lumba libizo la hae.” (Maheberu 13:15) Ki sifi se si kona ku tusa Lipaki za Jehova mwa ku fa matabelo a cwalo kacenu?

“Mu Likanyise Tumelo ya Bona”

 3. Ka mutomo, ki sifi seo muapositola Paulusi n’a si bulezi kwa Maheberu 13:7, ili ku zusa puzo mañi?

³ Ku sebelisa kelezo yeo Paulusi n’a i file kwa Maheberu ku ka lu konisa ku fa matabelo a amuheleha ku Mutusi wa luna yo Mutuna, Jehova Mulimu. Sina ka mutala, muapositola n’a ñozi kuli: “Mu hupule ba ba mi zamaisa, ba ba mi bulelezi linzwi la Mulimu; mu likanyise tumelo ya bona, mi mu lemuhe mafelelezo a bupilo bwa bona.” (Maheberu 13:7) Paulusi n’a ama ku bo mañi ha n’a bulezi kuli, “Mu hupule ba ba mi zamaisa,” kamba “babusisi ba mina”?—New World Translation Reference Bible, litaluso za kwatasi.

 4. (a) Ka ku ya ka liñolo la Sigerike, “ba ba zamaisa” ba eza nto mañi? (b) Ki bomañi “ba ba zamaisa” mwahal’a Lipaki za Jehova?

⁴ Paulusi n’a bulela bao “ba ba zamaisa,” kamba ba ba busa. (Litimana 7, 17, 24) Linzwi la Sikuwa le li talusa “ku busa” li ngilwe fa Silatini ili ka ku simuluha ku la Sigerike la ky·ber·naʹo, le li talusa ku “zamaisa sisepe, ku supeza, ku busa.” Maeluda ba Sikreste b’a busa ka ku itusisa “mata a ku supeza” (Sigerike, ky·ber·neʹseis) mwa ku fa tamaiso ni ketelelo mwa liputeho za fa sibaka. (1 Makorinte 12:28) Kono baapositola ni maeluda ba bañwi mwa Jerusalema ne ba sebeza sina sitopa mwa ku fa ketelelo ni kelezo kwa liputeho kamukana. (Likezo 15:1, 2, 27-29) Kacwalohe, kacenu, sitopa se si busa sa maeluda si fa okamelo ya kwa moya kwa neku la Lipaki za Jehova lifasi kamukana.

 5. Ki kabakalañi mi ki kamukwaufi w’o lu swanela ku lapelela maeluda mwa puteho ni lilama za Sitopa se si Busa?

⁵ Maeluda ba fa sibaka ni lilama za Sitopa se si Busa b’a etelela mwahal’a luna; kacwalohe, lu swanela ku ba kuteka ni ku lapela kuli Mulimu a ba fe butali bo bu tokwahala mwa ku busa puteho. (Mu bapanye Maefese 1:15-17.) Ki ko ku swanela hakalo kuli lu hupule mañi ni mañi ‘y’a lu bulelezi linzwi la Mulimu’! Timotea n’a si ka lutiwa fela ki bom’ahe ni bo kuku wa hae kono hape hamulaho n’a lutilwe ki Paulusi ni ba bañwi. (2 Timotea 1:5, 6; 3:14) Kacwalo Timotea n’a kona ku nahanisisa mafelelezo a muzamao wa bao be ne ba etelela mi n’a kona ku likanyisa tumelo ya bona.

 6. Ki tumelo ya bomañi ye lu swanela ku likanyisa, kono ki mañi ye lu latelela?

⁶ Batu ba ba cwale ka Abele, Nuwe, Abrahama, Sara, Rahaba, ni Mushe ne ba bonisize tumelo. (Maheberu 11:1-40) Kacwalo, lwa kona ku likanyisa tumelo ya bona ku si na ku katakata kakuli ba shwile ka busepahali ku Mulimu. Kono lwa kona hape ku ‘likanyisa tumelo’ ya banna ba ba sepahala ba ba etelela mwahal’a luna cwale. Ka mo ku inezi fela, ha lu lateleli batu ba ba si ka petahala, kakuli meto a luna a talimile ku Kreste. Ku swana sina mutoloki wa Bibele Edgar J. Goodspeed ya n’a bulezi kuli: “Lindwalume za kwaikale haki zona mitala ya mulumeli, kakuli mutala o munde ni ku fita ki Kreste . . . Mulandamani wa Mukreste u swanela ku lubukiseza meto a hae ku Jesu.” Ee, ‘Kreste u utwile butuku bakeñisa luna, a lu siyela mutala kuli lu hate mw’a n’a hatile.’—1 Pitrosi 2:21; Maheberu 12:1-3.

 7. Maheberu 13:8 i swanela ku ama mubonelo wa luna kamukwaufi kwa neku la ku nyanda kabakala Jesu Kreste?

⁷ Ka ku fa mamelelo ya luna ku Mwan’a Mulimu, Paulusi n’a ekelize kuli: “Jesu Kreste inz’e li yena, ni mabani, ni kacenu, ni ku ya ku ile.” (Maheberu 13:8) Lipaki ba ba sepahala ba ba cwale ka Setefani ni Jakobo ne ba bonisize busepahali bo bu sa zikinyehi, ka ku latelela mutala o tiile wa Jesu. (Likezo 7:1-60; 12:1, 2) Bakeñisa kuli ne ba itatezi ku shwa sina balateleli ba Kreste, tumelo ya bona i swanelwa ku latelelwa ki luna. Mwa linako za kwamulaho, za cwale, nihaiba za kwapili, batu ba bumulimu ha ba picuki manyando a isa kwa lifu ka ku ba balutiwa ba Jesu.

Mu Pime Lituto za Buhata

 8. Mu kona ku bulela kamukwaufi manzwi a Paulusi kwa Maheberu 13:9 ka bukuswani?

⁸ Ku sa cinceha kwa butu ni lituto za Jesu ku swanela ku lu ezisa ku ndondwela ku seo yena ni baapositola ba hae ne ba si lutile. Maheberu ne ba taluselizwe kuli: “Mu si ke mwa keluswa ki lituto ze ñata za kusili; kakuli se sinde ki pilu ha i itiisa ka sishemo sa Mulimu; isi ku tokomela ze ciwa, kakuli ba ba ya ka zona ha ba tuswi se siñwi.”—Maheberu 13:9.

 9. Ki lifi lika ze tuna ni ku fita zeo Paulusi n’a bonisize mwa liñolo la hae kwa Bakreste ba Maheberu?

⁹ Majuda ne ba supa kwa lika ze cwale ka ku fiwa kwa Mulao kwa Lilundu la Sinai ko ne ku makaza ni bulena bwa ku ya ku ile bwa Davida. Kono Paulusi n’a bonisize Bakreste ba Maheberu kuli nihaike ku tomiwa kwa bulikani bwa Mulao ne ku mbwetukisa, Jehova ka m’ata ni ku fita n’a file bupaki ka lisupo, limakazo, ze m’ata za mifuta ye miñata, ni limpo ze abiwa ki moya o kenile bulikani bo bunca ha ne bu tomilwe. (Likezo 2:1-4; Maheberu 2:2-4) Mubuso wa lihalimu wa Kreste ha u konwi ku nyanganyiswa, ka ku fapahana ni se ne si ezahezi kwa bulena bwa fa lifasi-mubu bwa babusi ba lusika lwa Davida ka 607 B.C.E. (Maheberu 1:8, 9; 12:28) Fahalimw’a seo, Jehova u kubukanya ba ba tozizwe ka ku ba tisa fapil’a nto ye mbwetukisa hahulu ku fita poniso ya makazo ya kwa Lilundu la Sinai, kakuli ba taha fapil’a Lilundu la Sione wa lihalimu.—Maheberu 12:18-27.

10. Ka ku ya ka Maheberu 13:9, pilu i kona ku tiiswa ka sikamañi?

¹⁰ Maheberu kacwalo ne ba tokwa ku pima ku “keluswa ki lituto ze ñata za kusili” za ba bulapeli bwa Sijuda. (Magalata 5:1-6) Haki ka lituto ze cwalo kono ‘ka sishemo sa Mulimu se si si ka libelelwa k’o na pilu i kona ku tiiswa’ ili kuli mutu a siyale inze a tiile mwa niti. Ba bañwi ka mo ku bonahalela ne ba kananisana ka za lico ni matabelo, kakuli Paulusi u bulela kuli pilu ha i tiiswi ki “ze ciwa, kakuli ba ba ya ka zona ha ba tuswi se siñwi.” Lituso za kwa moya li tiswa ki buineelo bwa bumulimu ni buitebuho kwa tiululo, isiñi mamelelo ye sa tokwahali fa ku ca lico za mufuta o muñwi ni ku buluka mazazi a mañwi. (Maroma 14:5-9) Fahalimw’a seo, sitabelo sa Kreste ne si tahisize kuli matabelo a Malivi a fite fa ku sa sebeza.—Maheberu 9:9-14; 10:5-10.

Matabelo A Tabisa Mulimu

11. (a) Ki sifi sisupo sa manzwi a Paulusi kwa Maheberu 13:10, 11? (b) Ki ifi aletare ya swanisezo ye ba na ni yona Bakreste?

¹¹ Baprisita ba Malivi ne ba ca nama ku zwelela fa lifolofolo ze ne li fiwa sina sitabelo, kono Paulusi n’a ñozi kuli: “Lu na ni aletare ya luna, mi ba ba eza sebelezo mwa tabernakele, ha ba na tukelo ya ku ca za yona. Muprisita yo mutuna h’a ya ni mali a lifolofolo mwa sibaka se si kenile, ku a tahisa kabakala libi, litupu za lifolofolo, zona, li na ni ku y’o ciswa kwand’a mafulo” fa Lizazi la Tifo ya Libi. (Maheberu 13:10, 11; Livitike 16:27; 1 Makorinte 9:13) Bakreste ba na ni aletare ya swanisezo ye talusa ku atumela Mulimu ka ku toma fa sitabelo sa Jesu se si lifela sibi ni ku tahisa ku swalelwa ki Jehova ni puluso ya ku ba ni bupilo bo bu sa feli.

12. Ki sifi seo Bakreste ba ba tozizwe ne ba susuelizwe ku si eza kwa Maheberu 13:13-14?

¹² Paulusi h’a koñomeki swalisano ka sibili ni Lizazi la Tifo ya Libi, niteñi u ekeza kuli: “Kabakaleo, Jesu ni yena, kuli a kenise sicaba ka mali a hae, u utwile butuku kwand’a munyako wa munzi” wa Jerusalema. Teñi k’o Kreste a shwa ni ku fa sitabelo sa tifo se si na ni m’ata a tezi. (Maheberu 13:12; Joani 19:17; 1 Joani 2:1, 2) Muapositola Paulusi n’a susuelize Bakreste ba ba tozizwe sina yena kuli: “Hakulicwalo, lu zwele ku yena [Kreste] kwand’a mafulo, lu nze lu lwezi ku shubulwa kwa hae. Kakuli kwanu, ha lu na munzi o tiile, kono lu bata o ka taha.” (Maheberu 13:13, 14; Livitike 16:10) Nihaike lwa shubulwa sina mwa n’a ezelizwe Jesu, lwa tiyela seo ka ku ba Lipaki za Jehova. Lwa ‘hana muinelo wa ku tokwa bumulimu ni litakazo za silifasi ni ku pila ka munahano o nepahezi ni ku luka ni buineelo bwa bumulimu mwa muinelo wa cwale wa linto’ ha lu nze lu talimela kwapili kwa lifasi le linca. (Tite 2:11-14; 2 Pitrosi 3:13; 1 Joani 2:15-17) Mi ba ba tozizwe ba ba mwahal’a luna ba talimezi ka cisehelo “munzi,” Mubuso wa kwa lihalimu.—Maheberu 12:22.

13. Matabelo a tabisa Mulimu ha ami fela nto mañi?

¹³ Paulusi cwale ka ku zwelapili u bulela ka za matabelo a tabisa Mulimu, ka ku ñola kuli: “Cwale, ka Jesu, lu tiseze Mulimu sitabelo sa milumbeko, kikuli bupaki bo bu zwa mwa milomo ye lumba libizo la hae. Mu si ke mwa libala ku eza ba bañwi hande, ni ku fana; kakuli Mulimu u tabela matabelo a cwalo.” (Maheberu 13:15, 16) Matabelo a Sikreste ha ami fela misebezi ya ku tusa ba batu ba bañwi. Batu ka nañungelele ba eza lika za mufuta o cwalo. Sina ka mutala, seo ne si ezahezi muta batu ba macaba a mañata ha ne ba file lituso ku bao be ne ba ipumani mwa kozi ye ne i tisizwe ki zikinyeho mwa kalulo ye bizwa Armenia mwa Soviet bukaufi ni mafelelezo a 1988.

14. Ku fa Mulimu sitabelo se si amuheleha ku tahisa koñomeko fa nto mañi?

¹⁴ Sebelezo ye kenile ye lu fa ku Jehova ka “likute [la bumulimu] ni sabo” i tomile fa lilato la ku ifana sitabelo leo Jesu n’a bonisize. (Maheberu 12:28; Joani 13:34; 15:13) Yona sebelezo yeo i koñomeka musebezi wa luna wa ku kutaza, kakuli ka Kreste sina Muprisita wa luna yo Mutuna ‘lu tiseza Mulimu sitabelo sa milumbeko, bupaki bo bu zwa mwa milomo ye lumba libizo la hae.’ (Hosea 14:2; Maroma 10:10-15; Maheberu 7:26) Ka mo ku inezi fela, ha lu “[libali] ku eza ba bañwi hande, ni ku fana,” ku kopanyeleza cwalo, nihaiba, ba bañwi be si “banabahabo luna ba balumeli.” (Magalata 6:10) Sihulu muta Bakreste sina luna ba ipumana mwa butata bo butuna kamba ba mwa butokwi kamba mwa manyando, lu tokwa ku fa tuso ya kwa mubili ni kwa moya. Ki kabakalañi? Kakuli lwa latana. Hape lu ba tokwa kuli ba zwelepili ku swala ka tata fa buipelezo bwa sepo ya bona ku si na ku zikinyeha, “kakuli Mulimu u tabela matabelo a cwalo.”—Maheberu 10:23-25; Jakobo 1:27.

Mu Ipeye Kwatasi

15. (a) Kelezo ya kwa Maheberu 13:17 mu kona ku i bulela ka bukuswani kamukwaufi? (b) Ki kabakalañi ha ku lukela ku boniswa likute ku bao ba ba zamaisa?

¹⁵ Ku fa matabelo a amuheleha, lu lukela ku sebelisana hamoho ka ku tala ni kopano ya Mulimu. Ku si na ku londoloza-londoloza fa taba ya m’ata a tamaiso, Paulusi n’a ñozi kuli: “Mu utwe bazamaisi ba mina, mi mu ipeye kwatas’a bona; kakuli ba tonela mioya ya mina, hailifo ba ka buzwa za yona. Mu ba utwe; kuli ba eze musebezi wo ka tabo, isi ka ku tonga ko ku si na ku mi tusa se siñwi.” (Maheberu 13:17) Lu swanela ku kuteka maeluda ba ba ketilwe ba ba fa ketelelo mwa puteho, ili kuli ba si ke ba tongiswa ki mukatala wa ku palelwa kwa luna ku sebelisana hamoho ni bona. Haiba lu palelwa ku ipeya kwatasi seo si ka ba se si buima fahalimw’a baokameli mi si ka tahisa kozi kwa mayemo a luna a kwa moya. Moya wa ku sebelisana hamoho u bisa ku ba ko ku bunolo kwa maeluda mwa ku fa tuso mi ku ekeza kwa swalisano ni zwelopili ya musebezi wa ku kutaza Mubuso.—Lisamu 133:1-3.

16. Ki kabakalañi ha ku li ko ku swanela ku ipeya kwatas’a bao ba ba zamaisa mwahal’a luna?

¹⁶ Ki ko ku swanela hakalo kuli lu ipeye kwatas’a bao ba ba nga ketelelo! Ba lu luta kwa mikopano ni ku lu tusa mwa bukombwa. Ka ku ba balisana, ba tokomela ka za buiketo bwa luna. (1 Pitrosi 5:2, 3) Ba lu tusa ku buluka silikani se sinde ni Mulimu ni puteho. (Likezo 20:28-30) Ka ku ipeya kwatas’a okamelo ye butali ni ye lilato, lu bonisa likute ku Muokameli yo Mutuna ka ku Fitisisa, Jehova Mulimu, ni Muokameli Ya Mu Bakwela, Jesu Kreste.—1 Pitrosi 2:25; Sinulo 1:1; 2:1–3:22.

Mu Be Ba Litapelo

17. Ki litapelo mañi zeo Paulusi n’a kupile, mi ki kabakalañi ha n’a na ni tukelo ya ku li kupa?

¹⁷ Bakeñisa kuli Paulusi ni balikani ba hae ne ba kauhanyizwe kwa Maheberu, mwendi kabakala nyandiso, n’a bulezi kuli: “Mu [lu] lapelele; lwa kolwa kuli lizwalo la luna ki le linde, ni kuli mwa lika kaufela lu lata ku eza se si lukela. Ni kupa hahulu luli kuli mu eze cwalo, kuli ni mi kutisezwe kapili.” (Maheberu 13:18, 19) Kabe Paulusi n’a li mutu wa muzamao o si ka luka ya n’a na ni lizwalo le li cile, n’a na ni tukelo mañi ya ku kupa Maheberu kuli ba lapele kuli a t’o kopana ni bona? (Liproverbia 3:32; 1 Timotea 4:1, 2) Ka mo ku inezi fela, n’a li sikombwa se si sepahala, ili y’o ka lizwalo le linde n’a yemi ka ku tiya mwa ku talimana ni ba bulapeli bwa Sijuda. (Likezo 20:17-27) Paulusi hape n’a na ni sepo ya kuli n’a ka kona ku to kopana ni Maheberu ka bubebe haiba ne ba ka lapela kuli seo si ezahale.

18. Haiba lu libelela ba bañwi ku lu lapelela, ki lipuzo mañi ze ne lu kana lwa ipuza isali luna?

¹⁸ Kupo ya Paulusi ya litapelo za Maheberu i bonisa kuli ku lukile kwa Bakreste ku lapelelana yo muñwi ku yo muñwi, nihaiba ka ku bulela yo muñwi fa libizo. (Mu bapanye Maefese 6:17-20.) Kono haiba lu libelela ba bañwi ku lu lapelela, kana ha lu swaneli ku ba sina muapositola ni ku ba ni buniti bwa kuli ‘lizwalo la luna ki le linde, ni kuli mwa lika kaufela lu eza se si lukile’? Kana mwa sepahala mwa likezo za mina kaufela? Kana mu na ni buikolwiso mwa tapelo bo bu swana ni b’o Paulusi n’a na ni bona?—1 Joani 5:14, 15.

Manzwi a Mafelelezo ni Likelezo

19. (a) Ki ifi takazo ya Paulusi ya ka tapelo kwa neku la Maheberu? (b) Ki kabakalañi bulikani bo bunca ha bu li bulikani bwa ku ya ku ile?

¹⁹ Hamulaho a ku kupa litapelo za Maheberu, Paulusi u bonisa takazo ya hae ya ka tapelo, ka ku bulela kuli: “Mulimu wa kozo, yena ya kutisize kwa bafu Mulen’a luna Jesu, mulisana yo mutuna wa lingu, ka mali a bulikani bo bu sa feli, a mi eze ba ba petehile mwa misebezi ye minde kaufela, kuli mu eze se si latwa ki yena; a sebeze mwa lipilu za mina litaba z’a katelwa, ka Jesu Kreste ye ka yena lu li: Kanya ki ya hae mwa linako ni linako. Amen!” (Maheberu 13:20, 21) Ka ku beya mwa pono lifasi-mubu la kozo, “Mulimu wa kozo” n’a zuselize Kreste kwa bupilo bwa ku s’a shwa kwa lihalimu, ili k’o Jesu n’a tahisize teko ya mali a hae a n’a suluzwi ili a n’a tisize kuli bulikani bo bunca bu kalise ku sebeza. (Isaya 9:6, 7; Luka 22:20) Ki bulikani bwa ku ya ku ile kakuli bao ba ba inzi fa lifasi-mubu ba fumana lituso ze inelela ku zwelela kwa lisebelezo za bana ba Mulimu ba kwa moya ba 144,000 ba ba ka busa ni Jesu mwa lihalimu mi ili ba ba inzi mwa bulikani bo bunca. (Sinulo 14:1-4; 20:4-6) Ki ka Kreste kuli Mulimu, y’o lu bulela kuli kanya i be ku yena, ‘a lu eza ba ba petehile mwa misebezi ye minde kaufela ye tokwahala mwa ku eza se si latwa ki yena ni z’a katelwa.’

20. Mu kona ku bulela cwañi ka bukuswani ni ku talusa kelezo ya mafelelezo ya Paulusi kwa Bakreste ba Maheberu?

²⁰ Ka ku sa lemuha hande muhato o ne ba k’a nga Maheberu kwa neku la liñolo la hae, Paulusi n’a bulezi kuli: “Banabahesu, ni kupa kuli mu amuhele hande manzwi a kutazo yeo [mu teeleze ku Mwan’a Mulimu, isiñi kwa balateleli ba bulapeli bwa Sijuda], kakuli liñolo le ni mi ñolezi ki le likuswani [ka ku beya mwa munahano manzwi a lona a’ buima]. Mu zibe kuli mwanahabo luna, Timotea, u lukuluzwi [mwa tolongo]; h’a ka taha kapili, ni ka y’o mi bona ni yena.” Mwendi ka ku ñola ili ku zwelela kwa Roma, muapositola n’a sepile kuli yena hamohocwalo ni Timotea ne ba ka potela Maheberu kwa Jerusalema. Cwale Paulusi n’a bulezi kuli: “Mu lumelise bazamaisi [sina maeluda ba ba sebeza ka tata] ba mina kaufela, ni balumeli [bao ba ba na ni sepo ya lihalimu] kaufela. Ba ba mwa Italia ba mi lumelisa. Sishemo [sa Mulimu] si be ni mina kamukana.”—Maheberu 13:22-25.

Liñolo la Butokwa bo bu Inelela

21. Liñolo la kwa Maheberu li lu tusa ku utwisisa lisupo lifi ze tuna?

²¹ Mwendi ka ku fita buka ifi kamba ifi ya mwa Mañolo a Kenile, liñolo la kwa Maheberu li lu tusa ku utwisisa butokwa bwa matabelo a n’a fiwa mwatas’a Mulao. Liñolo le li bonisa fo ku sweu kuli sitabelo sa Jesu Kreste ki sona fela se si fa tiululo ye tokwahala kwa neku la mufuta wa mutu o mwa sibi. Mi taba ye kona ku lemuhiwa mwa liñolo leo ki ya kuli lu swanela ku teeleza ku Mwan’a Mulimu.

22. Ki afi mabaka a mañwi ha lu swanela ku ba ni buitebuho fa liñolo la Maheberu?

²² Ka ku ekeza, sina ha se lu boni mwa likalulo ze peli ze felile, lu na ni mabaka a mañwi a ku ba ba ba na ni buitebuho fa liñolo le li buyelezwi ka bumulimu la kwa Maheberu. Li lu tusa ku sa katala mwa bukombwa bwa luna, mi li lu fa bundume ka ku tala, kakuli lwa ziba kuli Jehova ki Mutusi wa luna. Fahalimw’a seo, li lu susueza ku itusisa milomo ya luna ni minahano ya luna kamukana ka nzila ye si na buitati mwa ku fa sebelezo ye kenile musihali ni busihu ni ku fa matabelo a zwelela kwa pilu a tabisa Mulimu wa luna ya swanelwa ki tumbo ni ya lilato, Jehova.

Ne Mu Ka Alaba Kamukwaufi?

◻ Liñolo la kwa Maheberu ne li ba tusize ku pima lituto za buhata kamukwaufi?

◻ Matabelo a tabisa ku Mulimu a fa mamelelo fa musebezi ufi wa butokwa?

◻ Ki bomañi “ba ba zamaisa,” mi ki kabakalañi ha ku swanelwa ku ipeya kwatas’a bona?

◻ Liñolo la kwa Maheberu li tunafaza tapelo kamukwaufi?

◻ Ki kabakalañi ha lu kona ku bulela kuli liñolo la kwa Bakreste ba Maheberu li na ni tuso ye inelela?

[Maswaniso a fa likepe 31]

Matabelo a tabisa ku Mulimu a kopanyeleza cwalo ni ku eza misipili ya bulisana ni ku yaha Bakreste sina luna ka kelezo ye lilato