‘Mu Si Tuheleli Minahano Ya Mina Ku Lyanganiswa Ka Bubebe’!

“Mizwale, lu mi kupa kuli mu si ke mwa tuhelela minahano ya mina ku lyanganiswa ka bubebe.”—2 MATES. 2:1, 2.

LISUPO ZA KU NAHANISISA

Ki litemuso mañi ze swanela za naa file Paulusi mwa mañolo a hae a naa ñolezi Bakreste ba mwa Tesalonika?

Ki lika mañi ze kona ku lu tusa kuli lu si ke lwa pumiwa?

Ku kutaza ka tukufalelo ku kona ku lu sileleza cwañi?

1, 2. Ki kabakalañi bupumi ha bu atile hahulu, mi ki bupumi bwa mufuta mañi bo lu iponela kacenu? (Mu bone siswaniso se si fahalimu.)

BUPUMI ni buhata bu atile hahulu mwa lifasi le lu pila ku lona. Taba yeo ha i swaneli ku lu komokisa. Bibele i bulela ka ku utwahala kuli Satani Diabulosi u na ni yeloseli ye tuna ya mwa ku pumela batu ni kuli ki yena mubusi wa lifasi le. (1 Tim. 2:14; 1 Joa. 5:19) Ha lu nze lu sutelela hahulu kwa mafelelezo a lifasi le li maswe le, Satani u sweli wa filikana hahulu “ka ku ziba kuli u siyalezwi ki nako ye nyinyani.” (Sin. 12:12) Kacwalo, lwa kona ku libelela kuli batu ba ba kukuezwa ki Satani ba ka zwelapili ku sa sepahala. Ba ka lika mo ba konela kaufela kuli ba pume batu ba ba sebeleza Jehova.

² Babihi ba makande ha ba bihanga za batanga ba Jehova ni litumelo za bona, fokuñwi ba bulelanga feela lika li sikai za niti kamba mane ba bulelanga litaba za buhata. Batu ba itusisa litoho za makande za mwa mitende, liprogilamu za fa TV, ni Mawebusaiti kwa ku hasanya litaba za buhata. Batu ba bañwi ba nyemanga kamba mane ku filikana hahulu bakeñisa kuli ba kolwanga litaba zeo pili ba si ka ziba kale buniti.

 3. Ki nto mañi ye kona ku lu tusa kuli lu si ke lwa pumiwa?

³ Lwa itumela kuli lwa kona ku ikayutula kwa litaba za buhata za lu tameleza Satani. Kuli lu si ke lwa pumiwa, lu na ni Bibele ye lu ‘tusa kwa ku lu hakulula.’ (2 Tim. 3:16) Za naa ñozi muapositola Paulusi li bonisa kuli Bakreste ba bañwi mwa Tesalonika ne ba kozwi litaba za buhata. Naa ba ñolezi kuli: “Mizwale, lu mi kupa kuli mu si ke mwa tuhelela minahano ya mina ku lyanganiswa ka bubebe.” (2 Mates. 2:1, 2) Ki lika mañi ze lu kona ku ituta kwa temuso ye lilato ya naa file Paulusi, mi lu kona ku latelela cwañi temuso yeo?

LITEMUSO ZE SWANELA

 4. Bakreste ba mwa Tesalonika ne ba lemusizwe cwañi ka za ku taha kwa “lizazi la Jehova,” mi luna lu lemuswa cwañi?

⁴ Mwa liñolo la hae la pili la naa ñolezi Bakreste ba kwa Tesalonika, Paulusi naa ba lemusize za “lizazi la Jehova” le li taha. Paulusi naa sa bati kuli mizwale ba hae ba lyanganiswe kamba kuli ba palelwe ku itukiseza lizazi leo. Naa ba bulelezi kuli ne ba li “bana ba liseli” mi hape naa ekelize ku bulela kuli: “Kono lu toneñi ni ku buluka minahano ya luna i nze i iketile.” (Mu bale 1 Matesalonika 5:1-6.) Kacenu, lu libelezi ku sinyiwa kwa Babilona yo Mutuna, bona bulapeli kaufela bwa buhata. Ku sinyiwa kwa Babilona yo Mutuna i ka ba ona makalelo a lizazi le lituna la Jehova. Lwa utwisisa hande mwa ka petela mulelo wa hae Jehova. Mwa puteho, lu fiwanga likupuliso ze nde ka nako kaufela ili ze kona ku lu tusa ku itukiseza lizazi la Jehova. Haiba lu teeleza ka tokomelo kwa litemuso ze lu fiwanga ka nako kaufela zeo, lu ka ba ni takazo ye tuna ya ku sebeleza Mulimu ka ‘maata a luna a ku nahana.’—Maro. 12:1.

5, 6. (a) Ki lika mañi za naa ñozi Paulusi mwa liñolo la bubeli la naa ñolezi Bakreste ba kwa Tesalonika? (b) Jesu u tuha a ezañi, mi lu swanela ku ipuza lipuzo mañi?

⁵ Paulusi naa ñolezi Bakreste ba mwa Tesalonika liñolo la bubeli. Mwa liñolo leo, naa ñozi za ñalelwa ye taha ili fo Jesu u ka peta buikalabelo bwa filwe ki Mulimu bwa ku atula “ba ba sa zibi Mulimu ni ba ba sa ipeyi ku utwa taba ye nde.” (2 Mates. 1:6-8) Mwa kauhanyo 2 ya liñolo leo, Paulusi u ñola kuli batu ba bañwi mwa puteho ne ba ikutwile ku “filikanywa” ka za lizazi la Jehova kuli mane ne ba nga kuli lizazi la Jehova ne li li fakaufi hahulu. (Mu bale 2 Matesalonika 2:1, 2.) Bakreste ba kwa makalelo ne ba sa utwisisi hande mwa naa ka petela mulelo wa hae Jehova. Paulusi naa lemuhile nto yeo kakuli hamulaho naa ñozi cwana ka za bupolofita: “Zibo ya luna ha i si ka talelela ni ku polofita kwa luna ha ku si ka kwanelela; kono muta zibo ya luna i talelela ni muta lu polofita ka ku tala, zibo ye si ka talelela i ka fela ni ku polofita ko ku si ka kwanelela ku ka fela.” (1 Makor. 13:9, 10) Kono Bakreste bao ne ba kona ku zwelapili ku sepahala ka ku teeleza kwa litemuso za naa file Jehova ili ze ne ñozwi ki Paulusi, muapositola Pitrosi, ni mizwale ba bañwi ba ba tozizwe ili ba ba sepahala ba ne ba pila mwa linako zeo.

⁶ Kuli Jehova a hakulule mubonelo wa batu bao, naa susumelize Paulusi ku talusa kuli pili lizazi la Jehova li si ka taha kale, ne ku ka ba ni bukwenuheli bo butuna, mi hape ne ku ka ba ni “mutu ya sa mameli mulao.”a Hasamulaho wa fo, ili ka nako ya ketile Mulimu, Jesu u ka “yundisa” batu kaufela ba ba lumezi litaba za buhata. Paulusi naa talusize kuli katulo yeo i ka ba teñi bakeñisa kuli batu bao “ne ba si ka amuhela ni ku lata niti.” (2 Mates. 2:3, 8-10) Lu swanela ku ipuza kuli: ‘Ni lata cwañi niti? Kana na itutanga magazini ye ni lihatiso ze ñwi ze lukiselizwe batu ba Mulimu mwa lifasi kaufela ilikuli ni zibe kutwisiso ya luna ya cwale ya lituto za mwa Bibele?’

MU KETE HANDE BALIKANI

7, 8. (a) Ki butata mañi bo ne ba talimana ni bona Bakreste ba kwa makalelo? (b) Ki butata mañi bo butuna bo ba kona ku talimana ni bona Bakreste kacenu?

⁷ Lituto za bukwenuheli haki zona feela ze ne ka kenya Bakreste mwa butata. Paulusi naa ñolezi Timotea kuli “lilato la masheleñi ki mubisi wa ze maswe za mufuta kaufela.” Hape naa bulezi kuli “ka ku ndongwama lilato leo ba bañwi ba keluhile mwa tumelo mi ba itabakile ka lika ze ñata ze utwisa butuku.” (1 Tim. 6:10) Nto ye ñwi ye ne ka kenya Bakreste mwa butata ki “misebezi ya nama.”—Magal. 5:19-21.

⁸ Paulusi naa lemusize Bakreste ba mwa Tesalonika ka za batu ba naa nga kuli “ki baapositola ba buhata.” Ba bañwi ku bona ne ba bulezi “litaba ze kopami kuli ba yembulule balutiwa, ba ba latelele.” (2 Makor. 11:4, 13; Lik. 20:30) Jesu naa babalize mizwale ba mwa puteho ya mwa Efese kakuli ne ba si ka lumeleza “batu ba ba maswe” mwa puteho. Mizwale ba mwa puteho yeo ne ba ikolwisize kuli batu ba ba maswe bao ne li baapositola ba buhata mi hape ne ba bulelanga litaba za buhata. (Sin. 2:2) Mwa liñolo la bubeli la naa ñolezi Bakreste ba mwa Tesalonika, Paulusi naa file kelezo ye: “Cwale lu mi fa litaelo, mizwale, ka libizo la Mulena Jesu Kreste, kuli mu kauhane ni muzwale kaufela ya sa zamayi ka mukwa o swanela.” Paulusi kihona a ba bulelela kuli ne ba tokwa ku ambuka Bakreste ba ne ba sa “lati ku sebeza.” (2 Mates. 3:6, 10) Haiba kuli ne ba tokwa ku ambuka mutu ya buzwa ili ya naa sa lati ku sebeza, mu zibe he ne li kwa butokwa hahulu kuli ba ambuke mutu ya naa kalile ku eza lika ka bukwenuheli. Ku swalisana ni batu ba ba cwalo ne ku sa swaneli mi Bakreste ne ba swanela ku ambuka mukwa wo. Ni kacenu taba yeo ha i swaneli.—Liprov. 13:20.

 9. Ki kabakalañi ha lu swanela ku tokomela haiba mutu yo muñwi a kalisa ku bulela mibonelo ya hae fa lika ze si ka taluswa mwa Bibele kamba haiba a nyaza kopano ya Jehova?

⁹ Ñalelwa ye tuna se i li fakaufi mi lifasi le li maswe le, li tuha li fela. Litemuso za naa file Jehova kwa Bakreste ba kwamulaho ki za butokwa hahulu sihulu kacenu. Kaniti, ha lu bati ku ‘amuhela sishemo sa Mulimu ni ku shuta mulelo wa sona.’ Haiba lu shuta mulelo wa sishemo sa Mulimu, lu ka latehelwa ki tohonolo ya ku pila ku ya ku ile. (2 Makor. 6:1) Lu swanela ku tokomela hahulu haiba mutu yo muñwi ya fumanehanga kwa mikopano ya luna a lika ku lu kukueza kuli lu bulele mibonelo ya luna fa lika ze si ka taluswa mwa Bibele kamba ku lwanisa baana-bahulu ni batu ba bañwi ba ba sebeleza Mulimu.—2 Mates. 3:13-15.

“MU KUMALELE KU ZE NE MU LUTILWE”

10. Bakreste ba mwa Tesalonika ne ba susuelizwe ku latelela lituto lifi?

¹⁰ Paulusi naa elelize mizwale ba hae ba mwa Tesalonika kuli ba ‘yeme inze ba tiile’ ni kuli ba kumalele kwa lika ze ne ba itutile. (Mu bale 2 Matesalonika 2:15.) Ki lika mañi ze ne ba “lutilwe”? Ne li lituto za Jesu ni litaba za naa ñozi Paulusi ni ba bañwi ka ku susumezwa ki Mulimu. Paulusi naa sa ami kwa lituto ze ne lutwa mwa bulapeli bwa buhata. Paulusi naa babalize mizwale ba hae ba mwa Korinte, kakuli mane naa ñozi cwana ka za mizwale bao: “Mwa linto kaufela mwa ni hupula mi mu mamela lituto za ka ku likana ni mo ne ni mi fezi zona.” (1 Makor. 11:2) Bakeñisa kuli lituto zeo ne li zwa ku Jehova ni Mwanaa hae, lituto zeo ne li za niti mi ne li kona ku sepiwa.

11. Batu ba bañwi ba ezangañi ha ba pumiwanga?

¹¹ Paulusi ha naa ñolezi Maheberu, naa bulezi kuli Mukreste wa kona ku latehelwa ki tumelo ni ku tuhela ku sepahala. (Mu bale Maheberu 2:1; 3:12.) Paulusi naa itusisize linzwi la ku “yauluka” habeli. Ku “yauluka” ko, ku kona ku ezahala mwa linzila ze peli. Pili, mutu u kona ku yauluka hanyinyani-hanyinyani. Mukreste ya yauluka ku Jehova, u kona ku eza cwalo ka ku sa lemuseha. Ku zwa fo, Mukreste u kona ku yauluka ku Jehova bakeñisa likezo za hae. Lika ze peli zeo za kona ku ezahala ku mutu ya lumela litaba za buhata, ili ya kakanya litaba za niti ze lu itutile.

12. Ki nto mañi ye kona ku sinya bulikani bwa luna ni Jehova?

¹² Ku bonahala kuli Bakreste ba bañwi mwa Tesalonika ne ba lumezi litaba za buhata. Kana nto yeo ya kona ku ezahala kacenu? Ku na ni lika ze ñata ze kona ku lu cela nako. Ka mutala, lwa kona ku tanda nako ye ñata kwa lika ze lu itabisa ka zona, kwa ku itusisa Intaneti, kwa ku bala ni ku alaba mashango, kamba kwa ku bata ku ziba litaba ze nca ka za lipapali. Ye ñwi ni ye ñwi kwa lika zeo ya kona ku yaulula Mukreste ni ku fukuza cisehelo ya na ni yona ku Jehova. Ku kona ku ezahalañi haiba Mukreste a ipumana mwa muinelo o cwalo? Mukreste yo mwendi u ka tuhela ku lapelanga litapelo ze zwelela kwa pilu. Hape ha na ku fumananga nako ye ñata ya ku ituta Bibele, ya ku fumaneha kwa mikopano, ni ya ku kutaza taba ye nde. Lu kona ku ezañi kuli lu si ke lwa tuhelela minahano ya luna ku lyanganiswa ka bubebe?

ZE KONA KU LU TUSA KULI LU SI KE LWA LYANGANISWA

13. Sina mo ne ku polofitezwi mwa Bibele, ki mubonelo mañi o ba na ni ona batu ba bañata, mi ki nto mañi ye kona ku sileleza tumelo ya luna?

¹³ Lu swanela ku hupulanga kuli lifasi la Satani li tuha li fela ni kuli haiba lu keta ku tandanga nako ni batu ba ba sa lumeli kuli lu pila mwa “mazazi a maungulelo,” lu ka kena mwa butata. Muapositola Pitrosi naa ñozi cwana ka za nako ye lu pila ku yona: “Ku ka taha basheununi ni busheununi bwa bona, ba ba ya ka litakazo za bona ba nze ba li: ‘I kai sepiso ya ku ba teñi kwa hae? Hanili ku zwa fo ba itobalela bo kukwaa luna ka lifu, lika kaufela li itulezi feela honacwalo sina mo ne li inezi kwa makalelo ha li eziwa.’” (2 Pit. 3:3, 4) Ku balanga Bibele ka zazi ni zazi ni ku ituta yona kamita ku ka lu tusa ku hupulanga kuli lu pila mwa “mazazi a maungulelo.” Bukwenuheli bo ne bu polofitilwe mwa Bibele ne bu kalile kale-kale ko mi ni kacenu bu sa zwelapili. “Mutu ya sa mameli mulao” u sa li teñi ni kacenu mi u lwanisa batanga ba Mulimu. Ka mabaka ao kaufela, ha lu swaneli ku libala kuli lizazi la Jehova li fakaufi.—Zef. 1:7.

14. Lu silelezwa cwañi haiba lu zwelapili ku sebeleza Mulimu mo lu konela kaufela?

¹⁴ Nto ye ñwi ye kona ku lu tusa kuli lu si ke lwa lyanganiswa, ki ku kutazanga taba ye nde kamita. Kacwalo, Jesu ha naa laezi balateleli ba hae kuli ba tuse batu ba macaba kaufela ku ba balutiwa ni ku ba luta ku mamela lika za naa ba lutile, naa ba fa taelo ye ne ka ba sileleza. (Mat. 28:19, 20) Kuli lu mamele taelo yeo, lu tokwa ku tukufalelwa mwa musebezi wa ku kutaza. Mizwale ba mwa Tesalonika ne ba si ke ba ba ni tabo kambe kuli ne ba ezeza feela mulao musebezi wa ku kutaza ni ku luta. Mu hupule za naa ñozi Paulusi kwa mizwale bao, ha naa ize: “Mu si ke mwa tima mulilo wa moya wa Mulimu. Mu si ke mwa nyefula bupolofita.” (1 Mates. 5:19, 20) Bupolofita bo lu itutanga ni ku ikambota ni ba bañwi ka za bona ki bo bunde luli!

15. Ki lika mañi ze lu kona ku nyakisisa ka nako ya ku lapela sina lubasi?

¹⁵ Kaufelaa luna lu bata ku tusa batu ba mwa lubasi lwa luna kuli ba be bakutazi ba bande ba taba ye nde. Kuli ba eze cwalo, mizwale ni likaizeli ba bañata ba itukisezanga mwa ku kutaleza ha ba lapela sina lubasi. Mwendi mwa kona ku itukiseza mwa ku ezeza misipili ya makutisezo. Ki lika mañi ze mu lela ku yo bulela ha mu eza musipili wa makutisezo? Ki lika mañi ze mu kona ku yo bulela ze kona ku yo susueza muñaa ndu kuli a tabele ku ituta ze ñata? Ki ifi nako ye swanela ye mu swanela ku potela hape mutu ya tabela? Ba bañata hape ba itukisezanga mikopano ya puteho ha ba lapela sina lubasi. Kana mwa kona ku eza cwalo mwa lubasi lwa mina? Haiba mu alaba kwa mikopano, mu ka tiisa tumelo ya mina, mi nto yeo i ka mi tusa ku sa lyanganiswa. (Samu 35:18) Ku lapela sina lubasi ku ka lu tusa kuli lu si ke lwa bulela mibonelo ya luna fa litaba ze si ka taluswa mwa Bibele mi ku ka lu tusa ku sa kakanyanga litaba za niti.

16. Bakreste ba ba tozizwe ba susuezwa kiñi kuli ba si ke ba lyanganiswa?

¹⁶ Jehova u fuyauzi batu ba hae ka lilimo ze ñata ka ku ba tusa ku utwisisa hande bupolofita bwa mwa Bibele. Taba yeo i lu kolwisa kuli kwapili lu ka fuyaulwa hahulu. Bakreste ba ba tozizwe ba nyolezwi ku yo pila kwa lihalimu ni Kreste. Kaniti, ku ba ni sepo ye cwalo ku ba tusa kuli ba si ke ba lyanganiswa! Za naa ñozi Paulusi kwa Bakreste ba mwa Tesalonika li sa ama ni kwa Bakreste ba ba tozizwe kacenu. Naa ize: “Lu tamehile ku itumela ku Mulimu kamita kabakala mina, mizwale ba ba latwa ki Jehova, kakuli Mulimu naa mi ketile . . . ka ku mi kenisa ka moya wa hae ni ka ku lumela kwa mina mwa niti.”—2 Mates. 2:13.

17. Ki susuezo mañi ye mu fumana kwa liñolo la 2 Matesalonika 3:1-5?

¹⁷ Ka ku swana ni Bakreste ba ba tozizwe, batu ba ba ka pila fa lifasi ku ya ku ile ni bona ba swanela ku eza ka mo ba konela kaufela kuli ba si ke ba tuhelela minahano ya bona ku lyanganiswa ka bubebe. Haiba mu na ni sepo ya ku to pila fa lifasi ku ya ku ile, haike mu zwelepili ku utwa kelezo ye lilato ya naa file muapositola Paulusi kwa Bakreste ba ba tozizwe mwa Tesalonika. (Mu bale 2 Matesalonika 3:1-5.) Lu swanela ku itebuha bakeñisa ze ñozwi kwa liñolo leo. Ze mwa mañolo a naa ñozi Paulusi kwa Bakreste ba mwa Tesalonika li lu lemusa kuli ha lu swaneli ku fanga mibonelo ya luna fa lika ze si ka taluswa mwa Bibele mi ha lu swaneli ku lumela litaba ze si na hande bupaki. Bakeñisa kuli lu pila mwa linako za mafelelezo, lu itebuha hahulu litemuso zeo.

[Litaluso za kwatasi]

[Siswaniso se si fa likepe 7]

Mwa mañolo a hae, Paulusi naa file litemuso ze swanela kwa Bakreste (Mu bone maparagilafu 4 ni 5)

[Siswaniso se si fa likepe 10]

Ku itukiseza hande bukombwa ni ku kutaza kwa kona ku lu tusa ku sa “lyanganiswa ka bubebe” (Mu bone maparagilafu 14 ni 15)