Maeluda, Mu Atule ka ku Luka

“Mu utwe mizeko ya banabahabo mina, mi mu atulele mutu ni wa habo, . . . ka ku ya ka niti ya taba.”—DEUTERONOMA 1:16.

 1. Mwa litaba za katulo, ki ku fiwa mañi kwa m’ata a tamaiso ko se ku ezahezi, mi se si talusañi kwa baatuli ba butu?

SINA Muatuli ya pahami ka ku fitisisa, Jehova u file m’ata a ku atula ku Mwan’a hae. (Joani 5:27) Mi hape, sina Toho ya Kopano ya Sikreste, Kreste u itusisa sitopa sa mutanga ya sepahala ya na ni kutwisiso hamohocwalo ni Sitopa sa sona se si Busa mwa ku keta maeluda, bao ka linako ze ñwi ba sebeza sina baatuli. (Mateu 24:45-47; 1 Makorinte 5:12, 13; Tite 1:5, 9) Sina baatuli ba ba na ni m’ata a manyinyani ka tikanyo, ba inzi mwa tamo ya ku latelela ka ku tala mutala wa Baatuli ba kwa lihalimu, Jehova ni Kreste Jesu.

Kreste—Muatuli ya lu File Mutala

 2, 3. (a) Ki bupolofita mañi bwa Bumesiya bo bu sinula tulemeno twa Kreste sina Muatuli? (b) Ki mabaka mañi sihulu a tokwa ku fiwa mamelelo?

² Ka za Kreste sina Muatuli, ne ku ñozwi ka bupolofita kuli: “Moya wa [Jehova, NW] u ka ina fahalimw’a hae: Moya wa butali ni wa ngana, Moya wa kelezo ni wa mata, Moya wa ku ziba ni wa ku saba [Jehova, NW]. Ku saba [Jehova, NW] ki sona s’a ka tabela; h’a na ku atula ka sobozi ya meto, nihaiba ku puma taba ya kutwi. Kono u ka atula babotana ka ku ya ka niti ya taba, a bulele litaba za ba ba ishuwile ba mwa lifasi, ka ku sepahala.”—Isaya 11:2-4.

³ Mwa bupolofita bo mu lemuhe tulemeno to tu konisa Kreste ku “atula lifasi ka ku luka.” (Likezo 17:31) U atula ka ku ya ka moya wa Jehova, butali bwa bumulimu, ni ngana, kelezo, ni zibo. Ha mu lemuhe hape, kuli u atula ka sabo ya Jehova. Kacwalo he, “situlo sa Katulo, sa Kreste” ka swanisezo, ki “situlo sa Mulimu sa katulo” (2 Makorinte 5:10; Maroma 14:10) U fa mamelo kwa ku atula litaba mwa nzila yeo Mulimu a atula ka yona. (Joani 8:16) H’a atuli fela ka ponahalo ya meto kamba ka taba ya kutwi. U atula ka ku sepahala kwa neku la ba ba ishuwile ni babotana. Ki Muatuli ya makaza! Mi ki mutala o makaza hakalo kwa batu ba ba si ka petahala bao ba beilwe mwa likalulo za ku sebeza sina baatuli kacenu!

Baatuli mwa Lifasi

 4. (a) Ki ufi o ka ba o muñwi wa misebezi ya ba 144,000 mwahal’a Puso ya Kreste ya Lilimo ze Sikiti? (b) Ki bupolofita bufi bo bu bonisa kuli Bakreste ba bañwi ba ba tozizwe ba ka ketwa sina baatuli ha ba sa li fa lifasi?

⁴ Mañolo a bonisa kuli palo ye nyinyani ya Bakreste ba ba tozizwe, ku kala ka baapositola ba 12, ikaba baatuli hamoho ni Kreste Jesu mwahal’a Lilimo ze Sikiti. (Luka 22:28-30; 1 Makorinte 6:2; Sinulo 20:4) Bomasiyaleti ba sitopa se si tozizwe sa Isilaele wa kwa moya fa lifasi ni bona ka sibili ne ba atuzwi ni ku kutisezwa sinca fa libaka za bona mwa 1918-19. (Malaki 3:2-4) Kwa neku la za ku kutiswa sinca kwa Isilaele wa kwa moya, ne ku polofitilwe kuli: “Ni ka tiisa baatuli ba hao, ba be sina ba sapili, ni baelezi ba hao sina ba kwa makalelo.” (Isaya 1:26) Kacwalo, sina ka mwa n’a ezelize “kwa makalelo” a Isilaele wa kwa nama, Jehova u file bomasiyaleti ba ba kutisizwe sinca baatuli ni baelezi ba ba lukile.

 5. (a) Ki bomañi ba ne ba filwe “kuli ba . . . atule” hasamulaho wa ku kutiswa sinca kwa Isilaele wa kwa moya, mi ba swaniselizwe cwañi mwa buka ya Sinulo? (b) Baokameli ba ba tozizwe kacenu ba tusiwa ki bomañi mwa musebezi wa buatuli, mi banna bao ba lutiwa cwañi ku ba baatuli ba bande ni ku fita?

⁵ Ka ku kala, ‘banna ba ba butali’ ba ne ba filwe “kuli ba . . . atule” kaufela ne ili bann’a bahulu kamba maeluda ba ne ba tozizwe. (1 Makorinte 6:4, 5) Baokameli ba ba sepahala, ba ba kutekeha ili ba ba tozizwe, ba bonisizwe mwa buka ya Sinulo sina ba ba swelwi mwa lizoho la bulyo la Jesu, f’o kikuli, mwatas’a tamaiso ni ketelelo ya hae. (Sinulo 1:16, 20; 2:1) Hailisa ku zwiwa ka 1935 ba ba tozizwe ba fumani kemelo ye sepahala ya sitopa sa “buñata bo butuna” bo bu zwelapili ku ekezeha, mi bao sepo ya bona ki ya ku punyuha “ñalelwa ye tuna” ni ku pila ku ya ku ile mwa Paradisi fa lifasi-mubu. (Sinulo 7:9, 10, 14-17) “Linyalo la Ngunyana” ha li nze li atumela, buñata-ñata bwa bona bao ba swelwi ba ketwa ki ba Sitopa se si Busa sa ba ba tozizwe ku sebeza sina maeluda ni baatuli mwa liputeho za Lipaki za Jehova ze fitelela 66,000 fa lifasi-mubu kamukana.a (Sinulo 19:7-9) Ka ku itusisa likolo ze ipitezi, ba swelwi ba lutwa ku talima buikabelo mwa minelo wa “lifasi le linca.” (2 Pitrosi 3:13) Sikolo sa Bukobwa bwa Mubuso, se ne si zamaisizwe kwa mafelelezo a 1991 mwa manaha a mañata, ne si file koñomeko ka za tamaiso ye swanela ya litaba za mwa buatuli. Maeluda ba ba sebeza sina baatuli ba mwa tamo ya ku likanyisa Jehova ni Kreste, ili bao likatulo za bona ki za niti mi ki ze lukile.—Joani 5:30; 8:16; Sinulo 19:1, 2.

Baatuli ba ba ‘Zamaya ka Sabo’

 6. Ki kabakalañi maeluda ba ba sebeza mwa tutengo twa buatuli ha ba swanela ku ‘zamaya ka sabo’?

⁶ Haiba Kreste yena ka sibili u atula ka sabo ya Jehova mi ni ka tuso ya moya wa Hae, maeluda ba ba si ka petahala ba swanela ku eza seo hahulu ni ku fita! Ha ba filwe ku sebeza mwa tutengo twa buatuli, ba tokwa ku ‘zamaya ka sabo,’ ku biza “ku Ndat’a mina . . . ya atula . . . a si na sishweka,” kuli a ba tuse ku atula ka ku luka. (1 Pitrosi 1:17) Ba swanela ku hupula kuli ba sebelisana ni bupilo bwa batu, “mioya” ya bona, sina bao ba “ba ka buzwa za yona.” (Maheberu 13:17) Ka ku beya se mwa munahano, kaniti ba ka buzwa fapil’a Jehova ka za lifoso ze ne li konwa ku ambukiwa ze ne ba kana ba eza mwa likatulo. Ka mutalusezo wa hae fa liñolo la Maheberu 13:17, J. H. A. Ebrard na ñozi kuli: “Ki swanelo ya mulisana ku tonela mioya ye beilwe mwa tokomelo ya hae, mi . . . u swenela ku buziwa kwa neku la bona kaufela, ni ka bao hape ba ba latehile kabakala mulatu wa hae. Le ki linzwi le lituna. Haike sikombwa kaufela sa linzwi si nahanisise, kuli ka ku itatela u’ ngile musebezi o buima [o’ li shemaeto] w’o.”—Mu bapanye Joani 17:12; Jakobo 3:1.

 7. (a) Ki sika mañi seo baatuli ba kacenu ba swanezi ku si hupula, mi ki sifi se si swanela ku ba sona sikonkwani sa bona? (b) Ki lituto mañi zeo maeluda ba swanela ku ituta ku zwa kwa Mateu 18:18-20?

⁷ Maeluda ba ba sebeza mwa likalulo za buatuli ba lukela ku hupula kuli Baatuli ba niti ba taba kaufela ki Jehova ni Kreste Jesu. Mu hupule seo baatuli mwa Isilaele ne ba taluselizwe: “Ha mu atula, ha mu ezezi batu, kono mu ezeza [Jehova, NW]; mu ka ba ni Yena mwa litaba kaufela ze mu ka atula. Mi cwale mu sabe [Jehova, NW]. . . . Mu eze cwalo kuli mu tokwe mulatu.” (2 Makolonika 19:6-10) Ka likute le lituna la sabo, maeluda ba ba atula taba ba lukela ku eza ka mo ba konela kaufela ku ba ni buniti bwa kuli Jehova ka sibili ‘u inzi ni bona mwa litaba za katulo.’ Katulo ya bona i swanela ku bonisa nzila yeo Jehova ni Kreste ba bonela taba. Zeo ka swanisezo ba ka ‘tama’ (ku fa mulatu) kamba ku ‘lukulula’ (ku sa fa mulatu) fa lifasi-mubu si swanela ku ba se si tamilwe kamba ku lukululwa kale mwa lihalimu—sina ka mo si sinulezwi ka ze ñozwi mwa Linzwi la Mulimu. Haiba ba lapela ku Jehova ka libizo la Jesu, Jesu u ka ba “mwahal’a bona” ku ba tusa. (Mateu 18:18-20, manzwi a talusizwe kwatasi; The Watchtower, February 15, 1988, likepe 9) Muinelo wa fa ku utwiwa kwa taba ya mwa buatuli u swanala ku bonisa kuli luli Kreste u inzi mwahal’a bona.

Balisana ba ka Nako ye Tezi

 8. Ki sifi seo si li buikalabelo bo butuna bwa maeluda kwa mutapi, sina ka mo Jehova ni Jesu Kreste ba boniselize mutala? (Isaya 40:10, 11; Joani 10:11, 27-29)

⁸ Maeluda ha ba atuli nako ye tezi. Ki balisana ba nako ye tezi. Ki baalafi, isiñi ba ba fa likoto. (Jakobo 5:13-16) Muhupulo wa mutoma wa linzwi la Sigerike le li itusisizwe mwa sibaka sa muokameli (e·piʹsko·pos) ki la ku ba ni mamelelo ya silelezo. Buka ye bizwa Theological Dictionary of the New Testament i bulela kuli: “Ku ekeza kwa taluso ya mulisana [kwa 1 Pitrosi 2:25], lizwi leo [e·piʹsko·pos] li talusa musebezi wa bulisana wa ku libelela kamba ku mamela.” Ee, buikalabelo bwa bona bo bu mutomo ki ku libelela lingu ni ku li mamela, ku li buluka mwahal’a mutapi.

 9, 10. (a) Paulusi na koñomekile cwañi musebezi wa pili wa maeluda, mi cwale ki puzo mañi ye konwa ku buziwa? (b) Ki sifi seo manzwi a Paulusi fa Likezo 20:29 a si talusa, kacwalo maeluda ba ba kana ba lika cwañi ku fukuza palo ya litaba za mwa buatuli?

⁹ Ha n’a bulela kwa maeluda ba mwa puteho ya kwa Efese, muapositola Paulusi na beile koñomeko fo i swanela ha na inze: “Cwale mina, mu itibelele, mi mu lise mutapi kaufela o mu beilwe balibeleli ba ona ki Moya o Kenile, ku uta Keleke ya Mulimu, ye a itekezi ka mali a [Mwan’a, NW] hae luli.” (Likezo 20:28) Paulusi u tunafaza ku lisa, isiñi ku fa koto. Maeluda ba bañwi ne ba ka eza hande ku nahanisisa ka tokomelo fa puzo ye tatama: ‘Kana ne lu ka babalela nako ye tuna ye tokwahala mwa ku tatuba ni ku talima litaba za mwa buatuli haiba ne lu ka beya nako ni buikatazo bo butuna mwa bulisana?’

¹⁰ Kaniti, Paulusi na file temuso kwa neku la “litongwani ze buhali.” Kono kana na si ka nyaza bao ‘ka ku sa utwela mutapi butuku’? (Likezo 20:29) Nihaike u talusa kuli baokameli ba ba sepahala ba swanela ku zwisa “litongwani” ze, kana manzwi a hae h’a bonisi kuli maeluda ba lukela k’u nga lilama ze ñwi za mutapi ka ku ba ‘utwela butuku’? Muta ngu i ba ye fokola kwa moya ni ku tuhela ku sebeleza Mulimu, ki sika mañi s’a tokwa—ku natwa kamba ku foliswa, ku fiwa koto kamba ku lisiwa? (Jakobo 5:14, 15) Kacwalo, maeluda kamita ba swanela ku tomahanya nako ya musebezi wa bulisana. Seo si kana sa tisa ze zwa mwateñi ze nde za nako ye nyinyani ni ku fita ku sebeliswa mwa litaba za mwa buatuli z’e nga nako ze ama Bakreste ba ba yauluzwi ka sibi. Ka buniti fela, mamelelo ya pili ya eluda i swanela ku ba ku fumanehisa simbule sa kimululo ni ku wetulusa, kacwalo ku susueza kozo, muinelo wa ku tokwa lipilaelo, ni buiketo mwahal’a batu ba Jehova.—Isaya 32:1, 2.

Ku Sebeza Sina Balisana ni Baatuli ba ba na ni Tuso

11. Ki kabakalañi maeluda ba ba sebeza fa tutengo twa buatuli ha ba tokwa ku sa ba ni sobozi ni ku ba ni “butali bo bu zwa kwahalimu”?

¹¹ Bulisana bo bu tiile ni ku fita pili Mukreste a si ka eza kale mulatu ne bu kana bwa fukuza palo ya litaba za buatuli mwahal’a batu ba Jehova. (Mu bapanye Magalata 6:1.) Nihakulicwalo, bakeñisa sibi sa butu ni ku sa petahala, baokameli ba Sikreste ka linako ze ñwi ne ba kana ba talimana ni litaba za bufosi. Ki milao mañi ye swanela ku ba etelela? Yeo ha i si ka cinca haisali ku zwiwa fa nako ya Mushe kamba ya Bakreste ba kwa makalelo. Manzwi a Mushe a na bulezwi kwa baatuli mwa Isilaele a sa li a butokwa a’ li: “Mu utwe mizeko ya banabahabo mina, mi mu atulele mutu ni wa habo, . . . ka ku ya ka niti ya taba. Mu si ke mwa eza mutu ka sobozi mwa likatulo za mina.” (Deuteronoma 1:16, 17) Ku tokwa sobozi ki kalemeno ka “butali bo bu zwa kwahalimu,” butali bo bu li bwa butokwa hahulu kwa maeluda ba ba sebeza fa tutengo twa buatuli. (Jakobo 3:17; Liproverbia 24:23) Butali bo bu cwalo bu ka ba tusa ku utwisisa fapahano ye mwahal’a bufokoli ni bumaswe.

12. Ki mwa nzila mañi m’o baatuli ba sa tokwi fela ku ba banna ba ba eza ka ku luka kono hape banna ba bande?

¹² Maeluda ba lukela ku atula “ka niti ya taba” ka swalisano ni lipimo za Jehova za se si lukile ni se si fosahezi. (Samu 19:9) Niteñi, nihaike kuli ba lika ka t’ata ku ba banna ba ba eza ka ku luka, ba swanela hape ku ba banna ba bande, mwa kutwisiso ya fapahano yeo Paulusi a bonisa kwa Maroma 5:7, 8. Ka ku ama fa litimana zeo mwa taba ya yona ya za “Righteousness” (Ku Luka), buka ye bizwa Insight on the Scriptures i talusa kuli: “Ku itusiswa kwa linzwi la Sigerike ku bonisa kuli mutu ya zibahala, kamba ya lemuhiwa, ka bunde ki yo ya musa (ya tengamezi kwa ku eza hande kamba ku tisa tuso ku ba bañwi) ni ya eza ka musa (ku bonisa bunde bo bu cwalo ka cisehelo). Ha fi fela mamelelo kwa ku eza fela lika ze lukile kono u eza ka ku fitelela seo, ku susuezwa ki mamelelo ye nde kwa neku la ba bañwi ka takazo ya ku ba fa tuso ni ku ba tusa.” (Volyumu 2, likepe 809) Maeluda ba ba si fela ba ba lukile kono hape ba ba eza bunde ba k’a nga sifosi ka nahanisiso ye sishemo. (Maroma 2:4) Ba swanela ku bata ku bonisa mukekecima ni mufelañeke. Ba swanela ku eza se ba kona kaufela ku tusa sifosi ku bona tokwahalo ya ku baka, mane nihaika kuli kwa makalelo n’a ka bonahala ku s’a nga muhato wa ka cisehelo kwa buikatazo bwa bona.

Mubonelo o Swanela fa ku Utwa Taba

13. (a) Muta eluda a sebeza sina muatuli, ki sika mañi sa si ke a tuhela ku ba? (b) Ki kelezo mañi ya Paulusi ye ama kwa ku utwiwa kwa litaba za mwa buatuli?

¹³ Haiba muinelo u tokwa ku utwiwa kwa taba ya mwa buatuli, baokameli ha ba swaneli ku libala kuli isali balisana, ba ba sebeza ni lingu za Jehova, mwatas’a “mulisana yo munde.” (Joani 10:11) Taelo ya na file Paulusi ka za tuso ya ka nako kaufela ye ne filwe kwa lingu ze inzi mwa but’ata i ama ka m’ata a swana fa ku utwiwa kwa taba ya mwa buatuli. Na ñozi kuli: “Banabahesu, mutu h’a swelwi a eza mulatu, mina ba ba na ni Moya, mu mu kutise ka moya o musa; mi u tokomele, u ka suhana u likwa ni wena. Mu lwalisane milwalo, mi mu pete cwalo mulao wa Kreste.”—Magalata 6:1, 2.b

14. Baokameli ba swanela ku bona cwañi ku utwiwa kwa litaba za mwa buatuli, mi mubonelo wa bona u swanela ku ba o cwañi kwa neku la sifosi?

¹⁴ Ku fita ku ikunga sina baatuli ba batuna ili bao ba kopana hamoho ku bona teñi kuli koto ya fiwa, maeluda ba ba sebeza fa katengo ka buatuli ba lukela ku bona ku utwiwa kwa taba sina kalulo ye ñwi ya musebezi wa bona wa bulisana. Yo muñwi wa lingu za Jehova u inzi mwa but’ata. Ki sika mañi se ba kona ku eza kuli ba mu puluse? Kana ha ku sa konahala ku tusa ngu ye zwile mwa mutapi bakeñisa kuli se i yongobezi hahulu? Ne lu ka sepa kuli hakucwalo. Maeluda ba swanela ku buluka mubonelo o’ tiile kwa neku la ku bonisa mukekecima ha ne ku ka ba ko ku swanela. Haki kuli ba swanela ku nyinyafaza lipimo za Jehova haiba foso ye tuna i ezahezi. Kono ku ba kwa bona ni zibo ya mabaka a nyinyafaza butuna bwa foso ku ka ba tusa ku ba ni mufelañeke fo ku konahala. (Samu 103:8-10; 130:3) Ka bumai, ba bañwi ba lifosi ba na ni muñañatoho hahulu mwa mubonelo wa bona kuli mane maeluda ba mwa tamo ya ku bonisa ku tiya, kono isiñi buhali ni kamuta.—1 Makorinte 5:13.

Mulelo wa ku Utwiwa kwa Litaba za mwa Buatuli

15. Haiba taba ye tuna i ba teñi mwahal’a batu ka buñwi, ki sika mañi se si lukelwa ku nyakisiswa pili?

¹⁵ Muta taba ye tuna i ba teñi mwahal’a batu ka buñwi, maeluda ba ba butali pili ba ka batisisa ku bona haiba ba ba amilwe ba likile ku tatulula taba kwa mukunda, mwa moya o kwa Mateu 5:23, 24 kamba Mateu 18:15. Haiba seo si palile, mwendi taelo ya eluda a li muñwi kamba ba babeli ikaba ye likani mwa ku fa taba. Muhato wa buatuli ki o’ tokwahala haiba fela sibi se situna si ezizwe se si kona ku isa mutu kwa ku zwisiwa. (Mateu 18:17; 1 Makorinte 5:11) Ku lukela ku ba ni mutomo wa mwa Mañolo o’ utwahala wa ku puta katengo ka buatuli. (Mu bone Tora ya ku Libelela, August 1, 1990, likepe 25.) Haiba ka putiwa, maeluda ba ba fitile hande ka ku fitisisa ku ze konisa ba swanela ku ketiwa kwa neku la taba ye nongile.

16. Ki sika mañi seo maeluda ba lika ku si peta mwa ku utwiwa kwa litaba za mwa buatuli?

¹⁶ Ki sika mañi seo maeluda ba lika ku si peta mwa ku utwiwa kwa litaba za mwa buatuli? Sa pili, ha ku konahali kuli mutu a atule ka ku luka konji haiba niti ya zibwa. Sina mwa Isilaele, litaba ze tuna ne li lukelwa ku ‘batisiswa hande.’ (Deuteronoma 13:14; 17:4) Kacwalo mulelo o muñwi wa ku utwiwa kwa taba ki ku bata buniti bwa taba. Kono seo si konwa mi si swanelwa ku ezwa ka lilato. (1 Makorinte 13:4, 6, 7) Buniti ha se bu zibahezi, maeluda ba ka eza ze tokwahala kaufela mwa ku sileleza puteho ni ku buluka mwahal’a yona lipimo za Jehova ze pahami ni ku zwelapili kwa moya wa hae. (1 Makorinte 5:7, 8) Nihakulicwalo, o muñwi wa milelo ya ku utwiwa kwa taba ki ku punyusa haiba ku konahala, muezalibi ya inzi mwa muinelo o lubeta.—Mu bapanye Luka 15:8-10.

17. (a) Mutu ya tamilwe taba u swanela k’u ngiwa cwañi ka nako ya ku utwiwa kwa taba, mi ki ka mulelo ufi? (b) Seo si ka tokwa nto mañi kwa neku la lilama za katengo ka buatuli?

¹⁷ Mutu ya tamilwe taba ni kamuta ha swaneli k’u ngiwa ka nzila ye fapahana ku y’e ngiwa ka yona ngu ya Mulimu. U swanelwa k’u ngiwa ka mufelañeke. Haiba sibi (kamba libi) li ezizwe, mulelo wa baatuli ba ba lukile ikaba ku tusa muezalibi ku kutela mwa sibaka se sinde, ku utwisisa bufosi bwa nzila ya hae, ku baka, mi kacwalo kuli a “iswasulule kwa liteo za Diabulosi.” Ku ka tokwa ku “talusa” lika, ku “kutaza ka pilu-telele.” (2 Timotea 2:24-26; 4:2) Ku cwani haiba muezalibi kacwalo a lemuha kuli u ezize sibi, u tabehile kwa pilu ka buniti, mi u kupa Jehova kuli a mu swalele? (Mu bapanye Likezo 2:37.) Haiba katengo ka ikolwisa luli kuli u tokwa tuso, ka nañungelele ne ku si ke kwa ba ni tokwahalo ya ku mu zwisa.—Mu bone The Watchtower, January 1, 1983, likepe 31, paragilafu 1.

18. (a) Ki lili f’o katengo ka buatuli ka swanezi ku bonisa ku tiya mwa ku zwisa sifosi? (b) Ki ka ku beya muinelo o utwisa butuku kwa pilu ufi maeluda ha ba swanela ku eza ka mo ba konela kwa neku la ngu ye lateha?

¹⁸ Kwa lineku le liñwi, haiba lilama za katengo ka buatuli ba talimana ni taba ye iponahaza ya ku tokwa buinyazo ka bukwenuheli, bufetuheli bwa ka mabomu kwa milao ya Jehova, kamba ku itatela fela kwa bumaswe, musebezi wa bona ki ku sileleza lilama ze ñwi za kopano ka ku zwisa sifosi ya sa baki. Katengo ka buatuli ha ka yo mwa tamo ya ku kopana ka ku kuta-kutela ni sifosi kamba ku talusa maikuto a hae ku si na buniti bwa seo, ku lika ku mu hapeleza ku baka, haiba ku iponahaza kuli h’a na maswabi a bumulimu.c Mwa lilimo za cwanoñu fa batu ba ne ba zwisizwe mwa lifasi kaufela i bat’o eza 1 pesenti ya bahasanyi. Se si talusa kuli mwa kalulo ye eza mwanda ya lingu ze siyala mwa mutapi, i liñwi ya lateha—ka nako ye kuswani fela. Ku nahanisa ka za nako ni buikatazo bo bu itusiswa mwa ku tisa mutu mwa mutapi, kana haki nto ye utwisa butuku kwa pilu ku ziba kuli likiti za mashumi-shumi ba ‘fiwa ku Satani’ silimo ni silimo?—1 Makorinte 5:5.

19. Ki sika mañi seo maeluda ba ba sebeza mwa katengo ka buatuli ba sa swaneli ku libala, mi cwale ki sifi se si ka ba sikonkwani sa bona?

¹⁹ Maeluda ba ba tateka fa taba ya mwa buatuli ba lukela ku hupula kuli buñata bwa litaba za sibi mwa puteho li ama bufokoli, isiñi bumaswe. Ha ba lukeli ku libala nguli ya Jesu ya ngu ye latehile, ya na unguzi ka manzwi a li: “Na mi bulelela, ni li: Kamukwaocwalo tabo i ka ba teñi kwa lihalimu ka muezalibi a li muñwi ya baka, ye fita ye ka ba teñi ka ba ba lukile ba ba mwanda fo ku tokwahezi a li muñwi, ba ba sa tokwi kuli ba bake.” (Luka 15:7) Kaniti, “[Jehova, NW] . . . h’a lati ba bañwi ha ba ka timela, kono u lata kuli kaufela ba kene mwa ku baka.” (2 Pitrosi 3:9) Ka tuso ya Jehova, haike tutengo twa buatuli mwa lifasi kaufela ba eze ka mo ba konela kaufela ku tisa tabo mwa lihalimu ka ku tusa baezalibi mwa ku baka ni ku zamaisa mahutu a bona ka ku tiya ku kutela hape mwa nzila ye kumbani ye isa kwa bupilo bwa kamita.—Mateu 7:13, 14.

[Litaluso za kwatasi]

Lipuzo za Lundululo

◻ Ka ku latelela mutala wa Mulisana yo Mutuna ni Mulisana yo Munde, ki ifi ye lukela ku ba cisehelo ye tuna ya maeluda?

◻ Ki ka nzila mañi yeo maeluda ba kona ku fukuza palo ya litaba za mwa buatuli?

◻ Ki ka nzila ifi m’o baatuli ba tokwa ku sa ba fela ba ba eza ka ku luka kono hape ba bande?

◻ Sifosi u lukela k’u ngiwa cwani mwa nako ya ku utwiwa kwa taba ya mwa buatuli, mi ki ka mulelo mañi?

◻ Ki kabakalañi ku zwisa mutu ha ku li muhato wa mafelelezo o’ ngiwa muta lika kaufela li palile?

[Siswaniso se si fa likepe 16]

Bulisana bwa ka ku itahanela ha bu eziwa, litaba ze ñata za mwa buatuli ne li kana pimiwa

[Siswaniso se si fa likepe 18]

Nihaiba mwa nako ya ku utwiwa kwa taba ya mwa buatuli, maeluda ba lukela ku sikulula muezalibi ka moya o musa