Mu Itusise ka Butali Tukuluho ya Mina ya Sikreste

“Mu ba ba lukuluhile, . . . kono mu [zamaise tukuluho ya mina, “NW”] sina batanga ba Mulimu.”—1 PITROSI 2:16.

 1. Ki tukuluho ifi ya na latehezwi ki yona Adama, mi ki kwa tukuluho ifi Jehova a ka kutisa sinca mufuta wa mutu?

MUTA bashemi ba luna ba pili ne ba ezize sibi mwa simu ya Edeni, ne ba palelisizwe bana ba bona ku fumana sanda se si nde ka ku fitisisa—tukuluho ya ku zwa kwa sibi ni kwa ku sa petahala. Ka se si zwile mwateñi, kaufel’a luna lu pepilwe lu li batanga kwa ku sa petahala ni kwa lifu. Ka ku tabisa, nihakulicwalo, Jehova u lela ku kutisa sinca batu ba ba sepahala kwa tukuluho ye makaza luli. Kacenu, batu ba lipilu ze lukile ba libelezi ka cisehelo “ku patululwa kwa bana ba Mulimu,” ili nto ye ka ba tahiseza ku “lukululwa kwa butanga bwa ku bola, [ni ku fiwa] tukuluho ya kanya ya bana ba Mulimu.”—Maroma 8:19-21.

‘Ba Tozelizwe ku Kutaza’

 2, 3. (a) Ki bomañi “bana ba Mulimu”? (b) Ki afi mayemo a makaza e ba ikola, ili a’ tisa buikalabelo bufi?

² Ki bomañi bona “bana ba Mulimu” bao? Ki banyani ba ba tozizwe ka moya ba Jesu ba ba ka busa ni yena mwa Mubuso wa kwa lihalimu. Ba pili ba ku bona bao ne ba bonahezi mwa lilimo za mwanda wa pili C.E. Ne ba amuhezi niti ye lukulula ya n’a lutile Jesu, mi ku zwa fa Pentekonta ya 33 C.E., ne ba ikungezi matohonolo a’ kanya ao Pitrosi n’a bulezi ka za teñi muta n’a ba ñolezi kuli: “Mina mu lusika lo lu ketilwe, mu na ni buprisita bwa silena, mu mushobo o kenile, mu sicaba sa hae tota.”—1 Pitrosi 2:9a; Joani 8:32.

³ Ku ba sicaba tota sa Mulimu—ki mbuyoti ye makalisa hakalo! Mi bomasiyaleti ba mwa lizazi la cwale ba bana ba Mulimu ba tozizwe ba ikola mayemo a swana a fuyauzwi ku Mulimu. Kono hamoho ni tohonolo ye pahami cwalo ku tahisa buikalabelo. Pitrosi na hohezi mamelelo ku bo buñwi bwa bona b’o ha n’a zwezipili ku bulela kuli: “Mu bulele ze nde za hae Yena ya mi bizelize ku zwa mwa lififi, ni ku kena mwa liseli la hae le li komokisa.”—1 Pitrosi 2:9b.

 4. Bakreste ba ba tozizwe ba talelelize cwañi buikalabelo bo bu tiswa ki tukuluho ya Sikreste?

⁴ Kana Bakreste ba ba tozizwe se ba talelelize buikalabelo b’o bwa ku zibahaza kwahule ze nde za Mulimu? Ee. Ka mubulelelo wa bupolofita ku bao ba ba tozizwe haisali ku zwiwa ka 1919, Isaya na bulezi kuli: “Moya wa Mulena [Jehova, NW] u ku na; kakuli [Jehova, NW] u ni tozize kuli ni tiseze babotana litaba ze nde; u ni lumile ku tiisa ba ba lobehile lipilu, ku bulelela ba ba hapilwe kuli ba lukuluhile, ku zibisa ba ba tamilwe mwa tolongo kuli ba kwalululezwi; Ku huweleza kuli mwaha wa sishemo sa [Jehova, NW] ki wo; ki le lizazi l’a ka likanyisa batu Mulimu wa luna; ni ku omba-omba ba ba lila kaufela.” (Isaya 61:1, 2) Kacenu, bomasiyaleti ba ba tozizwe, ka ku latelela mutala wa Jesu, ili ku y’o lona liñolo le ka mutomo li ama, ka cisehelo ba zibahaza ku ba bañwi taba ye nde ya tukuluho.—Mateu 4:23-25; Luka 4:14-21.

 5, 6. (a) Ki sikamañi se si zwile mwa ku kutaza ka mafulo-fulo kwa Bakreste ba ba tozizwe? (b) Ki matohonolo ni buikalabelo bufi b’o buñata bo butuna ba ikola?

⁵ Kabakala ku kutaza kwa bona ka mafulo-fulo, buñata bo butuna bwa lingu ze ñwi se li bile teñi fa lifasi-mubu fa ku ona mazazi a, a mafelelezo. Ba zwile mwa macaba kaufela ku t’o swalisana ni ba ba tozizwe mwa ku sebeleza Jehova, mi niti se i lukuluzi ni bona bao hape. (Zakaria 8:23; Joani 10:16) Ka ku swana sina Abrahama ba zibahazwa ba ba lukile fa mutomo wa tumelo mi se ba keni mwa swalisano ye tiile ni Jehova Mulimu. Mi ka ku swana sina Rahaba ku zibahazwa ku luka kwa bona ku ba beya mwa mundandwe wa ku punyuha—ku bona, ki ku punyuha Armagedoni. (Jakobo 2:23-25; Sinulo 16:14, 16) Kono matohonolo a pahamisizwe cwalo a ama buikalabelo bwa ku taluseza ba bañwi ka za kanya ya Mulimu. K’o na libaka Joani ha n’a ba boni ba lumbeka Jehova fa nyangela, “inze ba huwa ka manzwi a tiile, ba li: Ku pilisa ki kwa Mulimu wa luna ya inzi mwa Lubona, ni kwa Ngunyana!”—Sinulo 7:9, 10, 14.

⁶ Ñohola buñata bo butuna, ili b’o cwale se bu fitelela bolule ba bane, hamohocwalo ni sikwatanyana sa bomasiyaleti ba Bakreste ba ba tozizwe, ne ba neezi lihora ze bat’o fita fa bilioni i liñwi mwa ku zibahaza kwahule ze nde za Jehova. W’o ne i li ona muitusisezo o munde ka ku fitisisa o konahala wa tukuluho ya bona ya kwa moya.

“Mu Kuteke Mulena”

 7, 8. Tukuluho ya Sikreste i tisa buikalabelo bufi kwa neku la m’ata a tamaiso a silifasi, mi ka sona seo, ki ufi mubonelo o maswe o lu lukela ku pima?

⁷ Tukuluho ya luna ya Sikreste i tisa buikalabelo bo buñwi. Pitrosi n’a supile ku bo buñwi muta n’a ñozi kuli: “Mu fanane likute ni batu kamukana; mu late banabahabo mina; mu sabe Mulimu; mu kuteke mulena.” (1 Pitrosi 2:17) Ki sikamañi se si taluswa ka mubulelelo wa “mu kuteke mulena”?

⁸ “Mulena” u yemela babusi ba silifasi. Kacenu, moya wa ku tokwa likute kwa m’ata a tamaiso se u hulile mwa lifasi, mi u kona ku ama ka bunolo Bakreste. Mukreste n’a kana a komoka libaka ha swanela ku kuteka “mulena,” hailif’o “lifasi kamukana li lapalezi mwatas’a ya maswe.” (1 Joani 5:19) Ka ku beya mwa munahano ona manzwi ao, n’a kana a ikutwa ku ba ya lukuluhile kwa ku sa ipeya ku utwa milao ye miñwi ye bonahala ku mu sinanisa fela mi ni ku sa lifa mitelo haiba a kona ku picuka ku lemuhiwa ka za seo. Kono seo neikaba ku lwanisa taelo ya Jesu ye utwahala hande ya kuli “mu kutiseze Sesare ze li za Sesare.” Ne ikaba, ka mo ku inezi fela, ‘ku itusisa tukuluho ya hae sina kubo ya ku apesa bumaswe.’—Mateu 22:21; 1 Pitrosi 2:16.

 9. Ki afi mabaka a mande a mabeli a ku bela ba ba ipeya ku utwa m’ata a tamaiso a silifasi?

⁹ Bakreste ba mwa tamo ya ku kuteka m’ata a tamaiso ni ku ipeya kwatas’a ona—nihailikuli seo si eziwa ka nzila ye na ni maciñekelo. (Likezo 5:29) Ki kabakalañi? Kwa 1 Pitrosi 2:14, 15, Pitrosi u supa kwa mabaka a malalu h’a bulela kuli babusisi “ba lumilwe ki [Mulimu] ku fa ba ba eza maswe mulatu, ni ku kuteka ba ba eza hande.” Sabo ya ku fiwa koto ki libaka le li likani la ku ipeya ku utwa m’ata a tamaiso. Ki ku swabisa ko ku cwañi ko ne ku kaba yo muñwi wa Lipaki za Jehova ha n’a ka fiwa mulatu kamba ku lengiwa mwa tolongo kabakala ku nata mutu, busholi, kamba ka bukebenga bo buñwi! Mu nahane ka m’o ba bañwi ne ba ka tabela ku hasanya nto ye cwalo yeo! Kwa lineku le liñwi, ha lu nze lu zwelapili ku zibahala sina ba ba ipeya ku utwa ka mombela, lu fiwa tumbo ki bazamaisi ba ba si na sobozi. Ne lu kana lwa fiwa tukuluho ya ku zwelapili mwa musebezi wa luna wa ku kutaza taba ye nde. Fahalimu a seo, ‘ka ku eza bunde lu tiba milomo ya likuba.’ (1 Pitrosi 2:15b) Leo ki libaka la bubeli la ku ipeya ku utwa m’ata a tamaiso.—Maroma 13:3.

10. Ki lifi libaka le li tiile ka ku fitisisa la ku ipeya ku utwa m’ata a tamaiso a silifasi?

¹⁰ Kono ku na ni libaka le li tiile ni ku fita. M’ata a tamaiso a ba teñi ka tumelezo ya Jehova. Sina ka mwa bulelela Pitrosi, babusi ba mibuso ya bupolitiki ba “lumilwe ki” Jehova, mi ki “s’a lata Mulimu” kuli Bakreste ba siyale ba ipeile ku ona. (1 Pitrosi 2:15a) Ka ku swana, muapositola Paulusi u bulela kuli: “Bo bu li teñi bu tomilwe ki Mulimu.” Kamukwaocwalo, lizwalo la luna le li lutilwe ka Bibele li lu susueza ku ipeya ku utwa ba m’ata a tamaiso. Haiba lu hana ku ipeya kwatas’a bona, lu “[lwanisa, NW] se si tomilwe ki Mulimu.” (Maroma 13:1, 2, 5) Ki mañi mwahal’a luna ya na ka bata ku lwanisa tukiso ya Mulimu ka ku itatela? Fo neikaba ku itusisa cwañi ka mafosisa tukuluho ya Sikreste!

‘Mu Be ni Lilato kwa Mizwale’

11, 12. (a) Ki buikalabelo bufi kwa neku la balumeli sina luna bo bu tiswa ki tukuluho ya Sikreste? (b) Ki bomañi sihulu ba ba swanelwa ki mamelelo ya luna ye tuna ye lilato, mi ki kabakalañi?

¹¹ Pitrosi hape n’a bulezi kuli Mukreste u swanela ku ‘lata banabahabo yena.’ (1 Pitrosi 2:17) B’o ki buikalabelo bo buñwi bo bu tiswa ki tukuluho ya Sikreste. Buñata bwa luna lu silama sa puteho. Ka mo ku inezi fela, kaufel’a luna lu lilama za swalisano kamba kopano, ya mwahal’a macaba, ya mizwale. Ku bonisa lilato ku bona bao ki muitusisezo o butali wa tukuluho ya luna.—Joani 15:12, 13.

¹² Muapositola Paulusi na taluhanyize sikwata sa Bakreste seo sihulu se si swanelwa ki lilato la luna. Na bulezi kuli: “Mu utwe bazamaisi ba mina, mi mu ipeye kwatas’a bona; kakuli ba tonela mioya ya mina, hailifo ba ka buzwa za yona. Mu ba utwe; kuli ba eze musebezi wo ka tabo, isi ka ku tonga ko ku si na ku mi tusa se siñwi.” (Maheberu 13:17) Bao ba b’a nga ketelelo mwa puteho ki maeluda. Ki niti kuli, banna ba ha ba si ka petahala. Nihakulicwalo, ba ketiwa mwatas’a ketelelo ya Sitopa se si Busa. Ba etelela ka mutala ni ka pabalelo ye tungile, mi ba filwe ku tonela mioyo ya luna. Ki kalulo ye buima cwañi! (Maheberu 13:7) Ka ku tabisa luli, buñata bwa liputeho li na ni moya o munde, wa swalisano, mi ki tabo kwa maeluda ku sebeza ni bona. Ku ba ko ku t’ata hahulu haiba batu ka buñwi ba sa lati ku swalisana. Eluda niteñi u sa eza musebezi wa hae, kono sina mw’a bulelela Paulusi, u’ eza ka ku “tonga.” Ka buniti luli, ha lu lati ku ezisa maeluda ku tonga! Lu bata kuli ba fumane tabo mwa musebezi wa bona ilikuli ba kone ku lu tiisa.

13. Ki lifi linzila ze ñwi ze lu kona ku swalisana ni maeluda?

¹³ Ki lifi ze ñwi za linzila ka zeo lu kona ku swalisana ni maeluda? Ye ñwi ki ka ku tusa mwa ku babalela ni ku kenisa Ndu ya Mubuso. Ye ñwi ki ka ku swalisana mwa musebezi wa ku lekula bakuli ni ku tusa lianga. Hape, lu kona ku lika ku siyala lu li ba ba tiile kwa moya, ilikuli lu si ke lwa ba mulwalo. Kalulo ye ñwi ya butokwa ya swalisano ki mwa ku buluka muzamao o munde ni bukeni bwa kwa moya bwa puteho, ka buipuluko bwa luna hamohocwalo ni ka ku biha litaba za libi ze tuna ze lu fita fa ku izibela.

14. Lu swanela ku swalisana cwañi ni muhato wa kalimelo o’ ngilwe ki maeluda?

¹⁴ Ka linako ze ñwi, ku buluka puteho inz’e li ye kenile, maeluda ba na ni ku zwisa sifosi ya sa baki. (1 Makorinte 5:1-5) Seo si sileleza puteho. Ne si kana hape sa tusa sifosi. Hañata, kalimelo ye cwalo i tusize muezalibi ku fita fa ku ba ni kutwisiso. Ku cwañi, cwale he, haiba ya zusizwe ki mulikani kamba wahabo luna? Ku cwañi haiba mutu ka buñwi y’o ki bondat’a luna kamba bom’a luna kamba mwan’a luna. Kana nihakulicwalo lwa fa likute kwa muhato o’ ngilwe ki maeluda? Ki niti kuli, ne ku kana kwa ba ko ku t’ata. Kono ki ku itusisa maswe cwañi tukuluho ya luna ko ne ku kaba ku s’a amuhela katulo ya maeluda ni ku zwelapili ku swalisana kwa neku la kwa moya ni y’o ya iponahalize ku ba kukuezo ya bumaswe mwa puteho! (2 Joani 10, 11) Batu ba Jehova kaufela ba na ni ku babaziwa kabakala nzila ya swalisano ye ba swalisana ka yona mwa litaba ze cwalo. Ka se si zwa mwateñi, kopano ya Jehova i siyala i si na katowati mwa lifasi le li si ka kena le.—Jakobo 1:27.

15. Haiba mutu ka buñwi a eza sibi se situna, ki sikamañi s’a swanela ku eza kapili-pili?

¹⁵ Ku cwañi haiba lu eza sibi se situna? Mulena Davida na talusize ka za bao b’a lata Jehova muta na bulezi kuli: “Ki mañi ya ka kona ku kambamela fa lilundu la [Jehova, NW]? Ki mañi ya ka kona ku pila mwa Sibaka sa hae se si kenile? Ki ya na ni mazoho a’ si na milatu, wa pilu ye kenile, ya sa isi moya wa hae ku za lishano mi ya sa itami ka buhata.” (Samu 24:3, 4) Haiba ka mabaka a mañwi ha lu sa li ‘ba ba si na milatu ni ba ba kenile mwa pilu,’ lu lukela k’u nga muhato ka putako. Bupilo bwa luna bwa ku ya ku ile bu mwa likayamana.

16, 17. Ki kabakalañi mutu ya na ni mulatu wa libi ze tuna ha sa swaneli ku lika ku tatulula taba ka ili yena?

¹⁶ Ba bañwi se ba wezi mwa muliko wa ku pata libi ze tuna, mwendi ka ku nahanisisa kuli: ‘Ni ipulezi ku Jehova mi ni bakile. Kacwalo ki kabakalañi ku kenya teñi maeluda?’ Sifosi n’a kana a swabiswa kamba ku ba ni sabo ya se ne ba kana ba eza maeluda. Nihakulicwalo, u swanela ku hupula kuli nihaike ki Jehova a nosi ya kona ku lu kenisa kwa sibi, U file maeluda ku ba ni buikalabelo bo bu mutomo kwa bukeni bwa puteho. (Samu 51:2) Ki ba ba li teñi kwa ku folisa, kwa ‘ku sikulula balumeli.’ (Maefese 4:12) Ku s’a ya ku bona ha lu tokwa tuso ya kwa moya ku swana sina ku sa ya ku mualafi ha lu kula.

¹⁷ Ba bañwi ba ba lika ku talima litaba ka ili bona ba fumana kuli hamulaho wa likweli kamba lilimo, lizwalo la bona li sa ba kataza hahulu. Mane ka bumaswe ni ku fita, ba bañwi ba ba pata bufosi bo butuna ba wela mwa sibi lwa bubeli kamba mane lwa bulalu. Muta taba cwale i fita fa mamelelo ya maeluda, se ili taba ya bufosi bo bu kuta-kutezwi. Ki ko ku nde cwañi ku latelela kelezo ya Jakobo! N’a ñozi kuli: “Ku mina, kana ku na ni ya kula? A bize ba bahulu ba Keleke, ba t’o mu lapelela ni ku mu toza oli ka Libizo la [Jehova, NW].” (Jakobo 5:14) Mu ye kwa maeluda ha ku sa na ni nako ya ku foliswa. Haiba lu liyeha hahulu, ne lu kana lwa fita fa ku cinela mwa nzila ya sibi.—Muekelesia 3:3; Isaya 32:1, 2.

Mubonahalelo ni ku Ishumusa

18, 19. Ki kabakalañi muprisita ha n’a bulezi hande ka za Lipaki za Jehova?

¹⁸ Lilimo ze ketalizoho ze felile, mwa magazini ye ñwi ya bulapeli, muprisita wa Katolika mwa Italy n’a bulezi ka mufutamala ka za Lipaki za Jehova.a Na bulezi kuli: “Na ka butu, ni lata Lipaki za Jehova; ni itumelela seo fo ku sweu. . . . Bao be ni ziba ki ba ba sa nyazahali mwa mikwa, ba ba bunolo mwa mubulelelo . . . [ni] ba ba susueza hahulu. Ki l’ili fo lu ka utwisiseza kuli niti i tokwa mutahisezo o’ amuheleha? Kuli bao ba ba zibahaza niti ha ba tokwi ku ba ni buikatazo bo bu si bwa ka pilu-kaufela, kaunko ka ka maswe, ponahalo ye busafa, buimukuka?”

¹⁹ Ka ku ya ka manzwi ao, muprisita n’a tabisizwe, mwahal’a lika ze ñwi, ki nzila ye ne ba tina ka yona Lipaki ni ka mo ne ba itahiseza ili bona. Ka buniti fela, bao ba na katani ba utwile kelezo ye filwe ki “mutanga ya sepahala, ya na ni kutwisiso” mwahal’a lilimo-limo. (Mateu 24:45) Bibele i bulela kuli mutinelo wa basali u swanela ku ba ‘o swaneleha ni wa buikokobezo.’ (1 Timotea 2:9) Mwa nako ye ya mafelelezo, kelezo yeo ki ye butokwa ni kwa banna. Kana haki taba ya luli kuli bayemeli ba Mubuso wa Mulimu ba swanela ku itahisa ka bukeni ku ba kwande?

20. Ki kabakalañi Mukreste ha swanela ku iyakatwa ka za mutinelo wa hae ka nako kaufela?

²⁰ Ba bañwi ne ba kana ba lumela kuli kwa mikopano ni mwa sebelezo ya mwa simu, ba swanela ku ba ni tokomelo ka za mutinelo wa bona, kono ne ba kana ba ikutwa kuli likuka za Bibele ha li sebezi ka linako ze ñwi. Kana luna, nihakulicwalo, lw’a tuhel’anga ku ba bayemeli ba Mubuso wa Mulimu? Ki niti kuli, miinelo ya fapahana-fapahana. Haiba lu tusa kwa ku yaha Ndu ya Mubuso, lu ka tina ka ku fapahana luli niha lu fumaneha kwa mukopano mwa Ndu ya Mubuso ye swana yeo. Muta lu pumula, mwendi ne lu kana lwa tina ka mutinelo wa ku ikatulusa. Kono nako kaufela ye lu bonwa ki ba bañwi, mutinelo wa luna u swanela ku ba o swaneleha ni wa buikokobezo kamita.

21, 22. Lu silelelizwe cwañi kwa ku ishumusa ko ku holofaza, mi lu swanela k’u nga kelezo yeo ka nzila ifi fa litaba ze cwalo?

²¹ Kalulo ye ñwi ye se filwe hahulu mamelelo ki ku ishumusa. Batu—sihulu-hulu ba banyinyani—ba tokwa ku ishumusa. Haki sibi kamba ku sinya nako ku tomahanya nako ya ku ikatulusa ya lubasi. Nihaiba Jesu n’a memile balutiwa ba hae kuli ba “katuluhe hanyinyani.” (Mareka 6:31) Kono mu be ni tokomelo kuli ku ishumusa ha ku kwaluli nzila ya silafazo ya kwa moya. Lu pila mwa lifasi m’o ku ishumusa ku tunafaza muzamao wa buhule, mifilifili ye mituna, sabo ye tuna, ni tumelo ya za mioya. (2 Timotea 3:3; Sinulo 22:15) Mutanga ya sepahala ni ya na ni kutwisiso ki ya lemuha likozi zeo mi ka nako ni nako u lu fa temuso ka za zona. Kana mu ikutwa kuli likupuliso zeo li mi amuha tukuluho ya mina? Kamba kana mwa itumela kuli kopano ya Jehova ya mi babalela hahulu ka ku tisa likozi ze cwalo ka nako ni nako kwa mamelelo ya mina?—Samu 19:7; 119:95.

²² Ni kamuta mu si ke mwa libala kuli nihaike kuli tukuluho ya luna i zwa ku Jehova, lu na ni buikalabelo ka mo lu itusiseza yona. Haiba lu keshebisa kelezo ye nde ni ku eza likatulo ze fosahezi, ha lu koni ku nyaza mutu yo muñwi. Muapositola Paulusi n’a bulezi kuli: “Mutu kaufela ku luna u ka ba ni ku ikalabela ku Mulimu, ka za hae.”—Maroma 14:12; Maheberu 4:13.

Mu Libelele Tukuluho ya Bana ba Mulimu

23. (a) Ki limbuyoti lifi ze lu ikola cwale ka ku ama kwa tukuluho? (b) Ki limbuyoti lifi ze lu libelela ka cisehelo?

²³ Ka mo ku inezi fela lu batu ba ba fuy’ozwi. Lu ba ba lukuluhile kwa bulapeli bwa buhata ni kwa tumelo ya za mioya. Ki buitumelo kwa sitabelo sa tiululo, lwa kona ku atumela Jehova ka lizwalo le li kenisizwe, lu ba ba lukuluhile ka nzila ya kwa moya kwa butanga bwa sibi ni lifu. Mi ona cwale-cwale fa ku ka taha ku “patululwa kwa bana ba Mulimu.” Fa Armagedoni, banyani ba Jesu ba li mwa kanya ya bona ya lihalimu ba ka patululwa kwa mufuta wa mutu sina bayundisi ba lila za Jehova. (Maroma 8:19; 2 Matesalonika 1:6-8; Sinulo 2:26, 27) Hamulaho wa fo, bona bana ba Mulimu bao ba ka patululwa sina linzila mo ku suluhela limbuyoti ze zwelela kwa lubona lwa Mulimu ku taha kwa mufuta wa mutu. (Sinulo 22:1-5) Kwa nalule-lule, ona ku patululwa k’o kwa bana ba Mulimu ku ka tahisa mbuyoti kwa mufuta wa mutu o sepahala ka kanya ya tukuluho ya bana ba Mulimu. Kana mu ba ba nyolezwi yona nako yeo? Kacwalo he mu itusise tukuluho ya mina ya Sikreste ka butali. Mu sebeleze Mulimu cwale, mi mu ka ikola yona tukuluho yeo ye makalisa mwa linako za kamita!

[Litaluso za kwatasi]

Sikwenda sa Lundululo

◻ Ba ba tozizwe ni lingu ze ñwi se ba lumbile cwañi Jehova?

◻ Ki kabakalañi Bakreste ha ba swanela ku fa likute kwa m’ata a tamaiso a silifasi?

◻ Ki mwa linzila lifi Mukreste a kona ku swalisana ni maeluda?

◻ Ka ku ama kwa mutinelo, ki kabakalañi Lipaki za Jehova ha ba zwile mubano ka ku fapahana kwa batu ba bañata mwa lifasi?

◻ Ki sikamañi se lu swanela ku pima ha ku amiwa kwa ku ishumusa?