Mu Likanyise Jesu—Mu Lapele Mulimu ka mwa Tokwela

Mulimu u mema batu ba “ba zwa mwa macaba kaufela, ni mwa mishobo, ni mwa masika, ni mwa lipuo kaufela.” (Sin. 7:9, 10; 15:3, 4) Ba ba amuhela memo yeo ba ‘buha bunde bwa Muñ’a Bupilo.’ (Samu 27:4; 90:17) Sina walisamu, kaufela bona ba swalisana mwa ku lumbeka Mulimu, inze ba li: “Lu kubame, lu iname; lu we ka mañwele fapil’a [Muñ’a] Bupilo, Mubupi wa luna.”—Samu 95:6.

Bulapeli Bo Ne Bu Li bwa Butokwa Hahulu ku Jehova

Ka ku ba Mwan’a Mulimu wa libanda, Jesu n’a na ni kolo ye nde ya ku ituta munahanelo wa Ndat’ahe, likuka, ni milao ya Hae. Kacwalo Jesu na kona ku luta hande ba bañwi mwa ku lapelela Jehova. Na ize: “Ki na nzila, ni niti, ni bupilo; ha ku na mutu ya ka taha ku Ndate, konji ka na.”—Joa. 1:14; 14:6.

Jesu na tomile mutala o petehile wa ku ikokobeza ku Ndat’ahe. Na ize: “Ha ni ezi se siñwi ili na, kono ni bulela z’a ni lutile Ndate.” Mi na zwezipili kuli: “Kamita ni eza ze mu tabisa.” (Joa. 8:28, 29) Jesu na tabisize Ndat’ahe mwa linzila lifi?

Jesu na ipeile ku Ndat’ahe ka ku tala, mi seo kona se ku talusa luli ku lapela Mulimu. Jesu na bonisize kuli na lata Ndat’ahe ka ku mu utwa ni ku eza tato ya Hae nihaiba mwa miinelo ye t’ata. (Mafil. 2:7, 8) Jesu na lapezi Mulimu sihulu ka ku luta batu kuli ba be balutiwa; na ezanga hahulu musebezi wo mi mane balumeli ba bañwi ni batu fela ne ba mu biza kuli Muluti. (Mat. 22:23, 24; Joa. 3:2) Ku zwa fo, Jesu na tandanga nako ye ñata ku tusa ba bañwi. Mane moya wa hae wa buitomboli ne u mu tokwisize nako ye ñata ya ku eza za hae; nihakulicwalo, na tabela ku sebeleza ba bañwi. (Mat. 14:13, 14; 20:28) Niha na patehile, Jesu na fumananga nako ya ku lapela ku Ndat’ahe wa kwa lihalimu. (Luka 6:12) Kaniti, bulapeli bwa Jesu ne li bwa butokwa hahulu ku Mulimu!

Ku Ikataza ku Tabisa Mulimu

Jehova na boni likezo ze nde za Mwan’a hae mi a bonisa kuli na mu katelwa. (Mat. 17:5) Kono Satani Diabulosi ni yena na lemuhile busepahali bwa Jesu. Kacwalo Satani a lika ka t’ata ku loba busepahali bwa Jesu. Kabakalañi? Kakuli ne ku si ka ba kale ni mutu ya na sepahalile ku Mulimu ka ku tala, ni ku mu lapela ka mwa na tokwela. Mi Diabulosi na bata ku palelwisa Jesu ku lapela Jehova, ili ku lunisa Mulimu bulapeli bo bu mu swanela.—Sin. 4:11.

Ka ku bata ku swasa Jesu, Satani a taha ku yena ni ku mu sepisa lika ze ne kona ku lika busepahali bwa hae. A isa Jesu “fa lilundu le li lumbile hahulu, a mu bonisa mibuso kamukana ya lifasi, ni kanya ya yona.” Mi a li ku yena: “Zeo kamukana ni ka ku fa zona, ha u wa ka mañwele, wa ni kubamela.” Jesu na ezize cwañi? Na ize: “Zwa Satani, kakuli ku ñozwi kuli: Kubamela Mulena Mulimu wa hao, mi u sebeleze Yena a nosi.” (Mat. 4:8-10) Kaniti, Jesu na lemuhile kuli neikaba ku lapela milimu ha na ka kubamela Satani ku si na taba ni za na ka fumana ka ku eza cwalo. Na sa lati ku eza nihaiba kezo i liñwi ya ku lapela mutu ufi kamba ufi kwand’a Jehova.

Kono luna Satani h’a na ku lu sepisa mibuso kamukana ya lifasi ni kanya ya yona kuli lu mu lapele. Nihakulicwalo, ni kacenu u sa lika ku palelwisa Bakreste ba niti ku lapela hande Mulimu. Diabulosi u bata kuli lu lapele mutu u sili kamba nto i sili.—2 Makor. 4:4.

Kreste Jesu na sepahalile mane ku isa lifu. Ka ku zwelapili ku sepahala ku Mulimu, Jesu na kanyisize Jehova ka nzila ya na si ka kanyiswa kale ka yona. Mi luna Bakreste ba niti kacenu, lu lika ka t’ata ku likanyisa busepahali bwa Jesu ka ku beya bulapeli bwa luna ku Mubupi mwa sibaka sa pili. Kaniti, bulikani bwa luna bo bunde ni Mulimu kona nto ya butokwa ka ku fitisisa ye lu na ni.

Limbuyoti Ze Fumanwa mwa ku Lapela Mulimu ka mwa Tokwela

Ku zwisezapili bulapeli “bo bu kenile, bo bu sa nyazahali” ku Mulimu ku fumanisa limbuyoti ze ñata. (Jak. 1:27) Ka mutala, lu pila ka nako yeo batu ba bañata ki “baitati, ba ba lata mali, ba ba itumbaeta” ni “ba ba toya batu ba bande.” (2 Tim. 3:1-5) Kono mwa Ndu ya Mulimu kamba puteho, lu na ni tohonolo ya ku swalisana ni batu ba bande, ba ba kenile, ili ba ba tundamena ku latelela likuka za Mulimu za mwa tokwela ku lapelelwa. Kana ha ku mi fi mwangalwa ku swalisana ni batu ba ba cwalo?

Ha lu zwelapili ku siyala lu sa nyazahali mwa lifasi le, lu ka fumana mbuyoti ye ñwi ya ku ba ni lizwalo le li kenile. Lu bata ku zwelapili ku ba ni lizwalo le li kenile ka ku mamela likuka za Mulimu ze lukile ni ku kuteka milao ya Sesare ye sa lwanisani ni milao ya Mulimu.—Mare. 12:17; Lik. 5:27-29.

Ku lapela Mulimu ka moyo kaufela ku lu tahiseza limbuyoti za mufuta o muñwi. Ha lu iyakatwa hahulu ku eza tato ya Mulimu ku fita tato ya luna, lu fita fa ku ziba libaka le lu pilela mi lu ka fumana tabo mwa bupilo. Ku fita ku ba ni mubonelo wa kuli: “A lu ceñi, a lu nweñi, kakuli kamuso lu ka shwa,” lu na ni sepo ye tiile ya bupilo bo bu sa feli mwa Paradaisi fa lifasi.—1 Makor. 15:32.

Taba ye mwa buka ya Sinulo i bulela ka za nako yeo batu ba ba zwelapili ku sepahala ku Jehova ba ka “zwa mwa ñalelwa ye tuna.” Taba yeo ili: “Ya inzi mwa Lubona u ka ba beya mwa mukunda wa hae.” (Sin. 7:13-15) Ya inzi mwa lubona yo ki Jehova Mulimu, yena ya na ni kanya ye tuna ka ku fitisisa mwa pupo kaufela. Mu hupule fela tabo ye mu ka ba ni yona nako ya ka mi amuhela mwa mukunda wa hae, ku mi sileleza kwa kozi ifi kamba ifi! Mi nihaiba ka nako ya cwale, lwa kona ku ba mwa mukunda wa hae.

Hape, batu kaufela ba ba lapela Mulimu ka mwa tokwela ba taluswa kuli ba ka iswa “kwa maweluwelu a mezi a bupilo.” Maweluwelu a wetulusa ao, a yemela litukiso kaufela za eza Jehova kuli lu fumane bupilo bo bu sa feli. Ka tiululo ya Kreste, “Mulimu u ka takula miyoko kaufela kwa meto a bona.” (Sin. 7:17) Batu ba ka fita fa ku petahala, mi seo si ka tahisa tabo ye tuna ku bao kaufela ba ba na ni sepo ya ku pila ku ya ku ile fa lifasi. Nihaiba kacenu, balapeli ba Mulimu ba sweli ku mu lumbeka ka tabo, ba bonisa Jehova buitebuho bwa bona bo bu zwelela kwa pilu, mi ba swalisana mwa ku mu lapela hamoho ni ba ba kwa lihalimu ba ba opela kuli: “Mulena Mulimu Ya-Mata-Kaufela, misebezi ya hao ki ye mituna, ya komokisa. Wena Mulimu wa macaba, linzila za hao li lukile, ki za niti; ya si na ku saba ni ku lumbeka Libizo la hao, ikaba mañi Mulena? Kakuli Ya kenile ki Wena a nosi; mi macaba kaufela a ka ta, a kubamele fapil’a hao; kakuli likatulo za hao li zibisizwe patalaza.”—Sin. 15:3, 4.

[Siswaniso se si fa likepe 27]

Ki lika mañi za lu sepisa Satani kuli lu mu lapele?