Kalulo Ya Puzo

◼ Lu swanela ku ituta ka nako ye kuma kai ni muituti wa Bibele ya eza zwelopili?

Ki hande ku zwelapili ku ituta ni muituti wa Bibele ya eza zwelopili ku fitela a feza ku ituta libuka ze peli—ili buka ya Bibele I Lutañi Luli? ni ya “Mu Tiiseze Mwa Lilato la Mulimu.” Mu tokwa ku eza cwalo muituti niha ka kolobezwa inze a si ka feza kale ku ituta libuka ze peli zeo. Muituti ha sa kolobelizwe, lwa kona ku zwelapili ku bihanga nako, misipili ya makutisezo, ni tuto yeo. Haiba muhasanyi yo muñwi a lu sindeketa kwa tuto yeo, mi haiba muhasanyi yo a abana mwa tuto, ni yena wa kona ku biha nako.—Mu bone Bukombwa Bwa Luna Bwa Mubuso bwa March 2009, likepe 2.

Ki kwa butokwa kuli ba banca mwa kopano ba tome hande mwa niti pili mu si ka tuhela kale ku ituta ni bona. Ba tokwa ku “tibisa mibisi” ya bona ku Kreste ni ku “tiya mwa tumelo” ilikuli ba kone ku tiyela miliko ye ba tamehile ku kopana ni yona. (Makolo. 2:6, 7; 2 Tim. 3:12; 1 Pit. 5:8, 9) Ku tuha fo, kuli ba kone ku luta hande ba bañwi, ba swanela ku ba ni “zibo ya ku ziba niti.” (1 Tim. 2:4) Ka ku ituta libuka ze peli ni baituti ba luna, lu ba tusa ku fumana maata a ka ba konisa ku kena mwa “munyako wa bupilo.”—Mat. 7:14.

Pili maeluda ba si ka fa kale tumelezo ya kuli mutu yo muñwi a kolobezwe, ba swanela ku bona teñi kuli mutu yo wa utwisisa hande lituto za Bibele ze mutomo ni kuli u pila ka ku lumelelana ni lituto zeo. Sihulu maeluda ba swanela ku ba ni tokomelo ha ba nyakisisa muituti ya si ka feza kale ku ituta buka ya pili. Haiba mutu yo muñwi ha si ka kwanisa ze tokwahala ili ze mu konisa ku kolobezwa, maeluda ba ka bona teñi kuli mutu yo wa fiwa tuso ye tokwahala ilikuli kwapili a kwanise ze tokwahala ilikuli a kolobezwe.—Mu bone buka ya Mo Lu Swalisanezi ku Eza Tato ya Jehova, makepe 216-218.

[Manzwi a fa likepe 2]

Ki kwa butokwa kuli ba banca mwa kopano ba tome hande mwa niti