Danyele

4 “Ami Mulopwe Nebukaneza, kudi bantu bonso, mizo ne ndimi bekele mu ntanda yonso: Ndoe yenu ivule! 2 Naloelelwa kusapula biyukeno ne bintu bya kutendelwa byaunongela Leza Mwine wa Peulu Mwine. 3 Bine biyukeno byandi i bikatampe, bintu byandi bya kutendelwa i bya bukomo! Bulopwe bwandi i bulopwe bwa nyeke, kadi buledi bwandi i bwa ku nkongo ne nkongo.+

4 “Ami Nebukaneza, nadi talala nyā mu njibo yami kadi nadi biyampe mu njibo yami mikatakata. 5 Namwene kilotwa kyankwatyije moyo. Ponadi ndēle pa butanda bwami, byelekejo ne bimonwa bya ku kamitwe byanzakaja.+ 6 Penepo nasoñanya balete ku meso ami bantu bonso ba tunangu ba Babiloni amba banombole nshintulwilo ya kilotwa.+

7 “Mu kine kitatyi’kya, babitobo ba maleñanya, bampaki ba manga, bene Kaladea,* ne babuka na ñenyenye+ batwela. Ami pa kwibalombola byonalotele, bakomenwa kunombola nshintulwilo yabyo.+ 8 Mfulo mfulō Danyele waiya ku meso ami, wa dijina dya bu Beleteshazale+ mwendele dijina dya leza wami+ kadi wadi na mushipiditu wa baleza bajila+ munda mwandi, nami namulombola kilotwa amba:

9 “‘Abe Beleteshazale mukata wa babitobo ba maleñanya,+ ndyukile biyampe amba mushipiditu wa baleza bajila udi modi+ kadi i kutupu kifibwe nansha kimo kikukomena.+ Shi ke pano nombole bimonwa byonamonanga mu kilotwa kyami ne nshintulwilo yakyo.

10 “‘Mu bimonwa bya ku kamitwe ponadi pa butanda bwami, namwene mutyi+ pa bukata bwa ntanda, mulampe bininge.+ 11 Mutyi’wa watama, waikala mukomo, nsongo yao yafika ne mūlu, kadi wadi umweka ne ku mafulo a ntanda yonso. 12 Mani ao adi mayampe, bipa byao byadi bingi, kadi kwadi byakudya bya bonso. Banyema ba mu ntanda badi bakimba mwemba munshi mwao, kadi byoni bya mūlu byadi bikele ku misambo yao, bipangwa byonso* byadi bidya’ko.

13 “‘Ponamwene bimonwa bya ku kamitwe ponadi pa butanda bwami, namwene mulami, ujila, utūka mūlu.+ 14 Waela lubila na diwi dikatampe amba: “Tētai mutyi,+ ketai misambo yao, kūkulai mani ao, kusankanyai ne bipa byao! Banyema banyeme munshi mwao, byoni nabyo binyeme ku misambo yao. 15 Ino shiyai kitako na miji yakyo* pa nshi, na nkano ya kyuma ne ya mukuba, mu biyombo bya mu ntanda. Kibombe lumé lwa mūlu, kadi kipindi kyakyo kikale pamo na banyema mu bukata mwa munamuna ya pa ntanda.+ 16 Mutyima wakyo wa bu muntu walamunwe, kipebwe mutyima wa nyema, kadi bitatyi bisamba-bibidi+ bikipityile.+ 17 I mungya mbila ya balami,+ kadi kuno kulomba i kwa mungya kinenwa kya bajila, amba bantu bōmi bayuke amba Mwine wa Peulu Mwine i Mulopwe mu bulopwe bwa bantu+ ne amba upanga’bo yewa ense wasaka, kadi ubikikanga’po enka ne muntu mupēlulwe bininge.”

18 “‘Kino kyo kilotwa kyonamwene ami Mulopwe Nebukaneza; pano abe Beleteshazale, nombole nshintulwilo yakyo, mwanda bantu bakwabo bonso ba tunangu ba mu bulopwe bwami kebabwenyepo kunombola nshintulwilo.+ Ino abe ubwanya, mwanda mushipiditu wa baleza bajila udi modi.’

19 “Mu kine kitatyi’kya Danyele, wa dijina dya bu Beleteshazale,+ watuyuka mu kitatyi kityetye, kadi milangwe yandi yashilula kumuzakaja.

“Mulopwe wanena’mba, ‘A Beleteshazale, kilotwa ne nshintulwilo yakyo kebyakakuzakaja.’

“Beleteshazale walondolola’mba, ‘A mfumwami, kino kilotwa kifikile boba bakushikilwe, nshintulwilo yakyo nayo balwana nobe.

20 “‘Mutyi owamwene wadi ubaya ne kwikala mukomo, wafikile nsongo yao mūlu kadi wadi umweka ntanda yonso,+ 21 wadi na mani mayampe, bipa bingi, ne byakudya bya bonso, mwadi mwikele banyema ba mu ntanda munshi, wa misambo kwadi kushikete byoni bya mūlu,+ 22 i abewa, abe mulopwe, mwanda ubabaila’ko ne kwikala mukomo, kadi bukatampe bobe bubabaila’ko kadi bubafika mūlu,+ buledi bobe nabo ne ku mafulo a ntanda.+

23 “‘Kadi mulopwe wamwene mulami, ujila,+ utūka mūlu, mwine wadi unena’mba: “Tētai mutyi mwionakanye, ino shiyai kitako na miji yakyo* pa nshi, na nkano ya kyuma ne ya mukuba, mu biyombo bya mu ntanda. Kibombe na lumé lwa mūlu, kadi kipindi kyakyo kikale pamo na banyema ba mu ntanda kufika ne bikipityila bitatyi bisamba-bibidi.”+ 24 A mulopwe ino yo nshintulwilo; ayo i mbila ya Mwine wa Peulu Mwine ifwaninwe kufikila mfumwami mulopwe. 25 Abe ukapangwa mu bukata mwa bantu, kīkalo kyobe kikekala pamo na banyema ba mu ntanda, kadi ukapebwa munamuna bu byakudya pamo bwa bañombe; ukabomba lumé lwa mūlu,+ kadi bitatyi bisamba-bibidi+ bikakupityila,+ kufika ne byokayuka’mba Mwine wa Peulu Mwine i Mulopwe mu bulopwe bwa bantu ne amba upanga’bo yewa ense wasaka.+

26 “‘Ino byobanenene kushiya kitako kya mutyi na miji yakyo,*+ bulopwe bobe nabo bukekala monka bobe pokapwa kuyuka’mba madiulu abikele. 27 O mwanda abe mulopwe, itabija madingi onkudingila. Leka bubi bobe ulonge byoloke, kadi leka bukondame bobe ufwile balanda lusa. Nabya padi ukekala’ko biyampe kitatyi kilampe.’”+

28 Bino byonso byafikīle Mulopwe Nebukaneza.

29 Myeji dikumi ne ibidi pa kupita’po, wadi unanga pa musaka wa njibo mikatakata ya bulopwe ya mu Babiloni. 30 Mulopwe wadi unena’mba: “Mwene uno i Babiloni Mukatampe onaubaka ami mwine mwanda wa njibo ya bulopwe na bukomo ne buninge bwami ami mwine, ne mwanda wa ntumbo ya bukatakata bwami?”

31 Akyo kinenwa kikidi’tu mu kyakanwa kya mulopwe, diwi dyatamba mūlu amba: “A mulopwe Nebukaneza, i abe obanena’mba, ‘Bulopwe bubataluka kodi,+ 32 kadi ukapangwa mu bantu. Kīkalo kyobe kikekala pamo na banyema ba mu ntanda, ukapebwa munamuna ya kudya pamo bwa bañombe, kadi bitatyi bisamba-bibidi bikakupityila kufika ne byokayuka’mba Mwine wa Peulu Mwine i Mulopwe mu bulopwe bwa bantu ne amba upanga’bo yewa ense wasaka.’”+

33 Enka mu kitatyi’kya, kinenwa kyafikidila padi Nebukaneza. Wapangwa mu bantu, washilula kudya munamuna pamo bwa bañombe, kadi ngitu yandi yabomba lumé lwa mūlu, kufika ne byalepele nywene yandi pamo bwa masala a mikebo ne māla andi pamo bwa māla a byoni.+

34 “Ku mfulo kwa kine kitatyi’kya,+ ami Nebukaneza natala mūlu, ñeni yami yaunjoka, natendela Mwine wa Peulu Mwine, kadi natendela ne kutumbija Yewa mūmi nyeke, mwanda buledi bwandi i buledi bwa nyeke, bulopwe bwandi nabo i bwa ku nkongo ne nkongo.+ 35 Bekadi bonso ba ntanda bamonwanga bu ba bitupu, kadi aye uloñanga bintu mwendele kiswa-mutyima kyandi mu bukata mwa kibumbo kya mūlu ne bekadi ba pano pa ntanda. I kutupu muntu ubwanya kumukankaja*+ nansha kumunena’mba, ‘I bika byowalonga?’+

36 “Mu kine kitatyi’kya ñeni yaunjoka, kadi ntumbo ya bulopwe bwami, ne bukatakata bwami, ne buya bwami bwa dyangi byaunjokela.+ Bengidi bami bakatampe ba bulēme ne ba bulēme bami bankimba na kipyupyu, kadi najokejibwa mu bulopwe bwami, kadi enka ne bukatampe bwambwejibwa’ko.

37 “Pano ami Nebukaneza, ntendelanga, nzunzulanga kadi ntumbijanga Mulopwe wa mūlu,+ mwanda mingilo yandi yonso i bubine kadi mashinda andi i moloke,+ mwanda aye ubwanya kufwija bumvu boba banangila mu mitatulo.”+