Isaya

35 Mu ntanda mutuputupu ne ntanda myūmu tē bikasepelela,+

Kadi dilungu mudi zolē dikasangala ne kutōya maluba pamo bwa safelona.+

 2 Ikatōya maluba bya binebine;+

Ikasangala ne kwela nsadi ya tusepo.

Ikapebwa ntumbo ya Lebanona,+

Buya bwa dyangi bwa Kalamela+ ne bwa Shalone.+

 3 Komejai maboko mazoze,

Kadi ningijai manwi atelententa.+

Talai! Leza wenu ukāya na kinongo,

Leza ukāya na mfuto.+

 5 Mu kine kitatyi’kya meso a bampofu akapūtulwa,+

Matwi a ba bitwi nao akajikulwa.+

 6 Mu kine kitatyi’kya usunkuta ukatumbuka’nka bwa kasha kalume,+

Kadi ludimi lwa kamāma lukela nsadi ya tusepo.+

Mwanda mema akalondomoka mu ntanda mutuputupu,

Ne tuminonga nato mu dilungu mudi zolē.

 7 Nshi myūmu tē ikekala ke kijiba kya mabungu,

Nshi myūmu nayo ke masulo a mema.+

Mu mitá mwadi mwikalanga mizeu,+

Mukekala biyombo bibishi ne mabungu ne mbuba.

 8 Kadi kukekala dishinda dikatampe,+

Bine, dishinda ditwa bu Dishinda dya Buujila.

I dya muntu wenda mu dishinda;

I kutupu mulembakane ukasabila’mo.

 9 I kutupu ntambo nansha umo ukekala’mo,

Kadi banyema ba ntanda ba budyani kebakāya’mopo.

Kebakatanwa’mopo;+

Enka boba bakūdilwe bo bakenda’mo.+

Bakekala na nsangaji ne kusepelela,

Kadi njia ne kubinza bikanyema.+