Bengidi ba Mingilo Bengilanga Mwingilo wa Mvubu

MUTUMIBWA POLO wātumīne kipwilo kya mu Fidipai mukanda’mba: “Ami Polo ne Temote, bapika ba Kidishitu Yesu, kudi bajila bonso badi mu bumo na Kidishitu Yesu ba mu Fidipai, pamo ne batadi ne bengidi ba mingilo.” (Fid. 1:1) Ubamone, Polo wāimwine ne bengidi ba mingilo mu lwimu lwandi. Na bubine bano bana-balume bādi bengila mwingilo wa mvubu wa kukwasha bakulumpe ba mu kipwilo mu mine myaka’ya. Ne mu ano etu mafuku namo mo monka. Bengidi ba mingilo bengilanga mingilo palapala ikwasha batadi ne ituntwila’ko ndudi miyampe mu kipwilo.

² Lelo uyukile bengidi ba mingilo badi mu kyenu kipwilo? Le uyukile mingilo yobengila pa mwanda wa kamweno kobe ne ka kipwilo kyonso kituntulu? Bine Yehova usangelanga mingilo ingila bano bana-balume. Polo wālembele amba: “Bantu bengila senene banenenwanga biyampe kadi besambanga pampikwa kafinda nansha kamo mu lwitabijo lwa mudi Kidishitu Yesu.”​—1 Tm. 3:13.

³ Bengidi ba mingilo bafwaninwe kwikala na būmi butōka bwa bwine Kidishitu, bekale bana-balume bakulupilwa, kadi babwanya kwingila senene mingilo yabo. Bino i bimweke patōka potubandaula byānenene Polo mu mukanda waātumīne Temote bitala pa bisakibwa byabo, amba: “Bengidi ba mingilo nabo bafwaninwe kwikala belēmeke, ke ba ndimi ibidipo, ke ba kwipānapo mu kutoma vinyu mingi, ke ba makomwa-mesopo a kumwena mu bya budimbidimbi, ino bekale balamine kifibwe kikola kya lwitabijo na mutyima wa mundamunda utōka. Kadi, bano’ba batompibwe bidi shi i bafwaninwe; ebiya kebengila bu bengidi, byobadi bampikwa mambo. Bengidi ba mingilo bekale balume ba mukaji umo umo, bendeja babo bana ne ba mu abo mobo senene.” (1 Tm. 3:8-10, 12) Kulama misoñanya ya peulu itūdīlwe bengidi ba mingilo kukiñanga kipwilo ku matope atala bana-balume bapelwe mingilo ya pa bula.

⁴ Bengidi ba mingilo, bekale banuke nansha bakulu, bekalanga bapyasakane mu busapudi kweji ne kweji. Beulanga Yesu na kupyasakena busapudi. Pobapyasakana namino, bamwekejanga mutyima wa Yehova wa kusakila bantu kupanda.​—Isa. 9:7.

⁵ Bana-balume bengila bu bengidi ba mingilo baletanga kimfwa kiyampe mu muvwadilo, mwidyangwilo, mu muneneno, mu mulangilo, ne mu mwiendelejo. Badi na ñeni mibwane, ne kino kibapejanga bulēme na bakwabo. Kadi, bakwete na kusumininwa kipwano kyobapwene na Yehova ne madyese a mingilo obapelwe mu kipwilo.​—Tet. 2:2, 6-8.

⁶ Bano i bana-balume “batompibwe bidi.” Kumeso kwa abo kutongwa, belombwele kala amba bine i bana-balume bepāne. I balombole amba batangidije tumweno twa Bulopwe kumeso mu būmi bwabo, ne amba i bafikile pa madyese o-onso a mwingilo obakokeja kwibapa. Bine, i bimfwa biyampe bya kwiulwa na bakwabo mu kipwilo.​—1 Tm. 3:10.

⁷ Bengidi ba mingilo bengidilanga banababo mingilo mishileshile, ne kino kikwashanga batadi bapityije kitatyi kivule na kuta mutyima ku biselwa bya bufundiji ne bya bukumbi. Shi kitango kya bakulumpe kekipe bengidi ba mingilo bya kulonga, kitalanga bwino bwa umo ne umo ne bisakibwa bya kipwilo.

⁸ Tala bidi mingilo imoimo: Mwingidi wa mingilo umo ukokeja kupebwa mwingilo wa kwimanina mabuku amba tutambule’o, mwanda wa twiengidije batwe bene ne mu mwingilo wa busapudi. Bakwabo bakokeja kupebwa mwingilo wa kulama mafomu a lubalo lwa kipwilo nansha a mwaba. Bakwabo nabo batambika ba mamikolo, bengila ku binanda, batundaila bāya, nansha kukwasha bakulumpe mu miswelo mikwabo. Kudi mingilo mivule ya kwingila pa kulama Njibo ya Bulopwe biyampe ne dyangi shē, o mwanda bengidi ba mingilo balombwanga kukwasha ku kuvuija bino biselwa.

⁹ Mu bipwilo bimo, bakokeja kupa mwingidi ne mwingidi wa mingilo mwingilo umo pa ino. Ino kukwabo, mwingidi wa mingilo umo ukokeja kupebwa mingilo mivule. Dimodimo, bengidi ba mingilo bavule babwanya kwingila mwingilo kampanda. Shi kekudipo bengidi ba mingilo babwane ba kusela biselwa bimobimo, nankyo kitango kya bakulumpe kikakwata’ko mulangwe wa kutonga batutu babatyijibwe baleta kimfwa kiyampe ba kwingila ino mingilo ya mvubu. Namino, nabo bakekala na bwino mu mingilo, bwine bukebakwasha pobakabwanya bisakibwa bya kutongwa bu bengidi ba mingilo. Ino shi kekudipo batutu, kaka uleta kimfwa kiyampe ukanenwa kukwasha ku bintu bimobimo nansha byakakokejapo kutongwa bu mwingidi wa mingilo. Muntu uleta kimfwa i yewa ubwanya kwiulwa biyampe mu mwikadilo ne mu butōtyi bwandi. I tutu nansha kaka uleta kimfwa kiyampe ku bakwabo mu kupwila, mu busapudi, mu būmi bwandi mu kisaka, mu mutongelo wa kwipwija mukose, mu muvwadilo, mu mwidyangwilo, ne mu bikwabokwabo.

¹⁰ Mu bipwilo mudi bakulumpe batyetye, bengidi ba mingilo ba bwino babwanya kunenwa kubandaula na muntu wa kubatyijibwa bipangujo bya myanda ya bufundiji. Bino bipangujo bitanwa ku Mbwejo mu “Kipindi 1: Nkulupilo ya Bwine Kidishitu.” Inoko “Kipindi 2: Būmi bwa Bwine Kidishitu” byokitala myanda ikoleja itenga būmi bwa muntu, kifwaninwe kubandaulwa na mukulumpe.

¹¹ Shi kudi buluji kampanda bwendele’mo, kitango kya bakulumpe kikokeja kumona’mba i biyampe kushinta mingilo imoimo yadi na mwingidi wa mingilo kampanda bape’yo kankenge. Inoko, i kipite buya shi batutu bendelela na kwingila mingilo imo yonka kitatyi kampanda mwanda wa bekale na bwino ne kupotolola’yo senene.

¹² Kukwatañana na ngikadilo ya penu, kudi mingilo mikwabo ikokeja kupebwa bengidi ba mingilo ‘bamwekeja patōkelela ku bantu bonso’ kwendelela kwabo. (1 Tm. 4:15) Shi kekudipo bakulumpe babwane ba kutala kisumpi kya busapudi, bengidi ba mingilo bamobamo bakokeja kwingidijibwa bu bakwashi ba mutadi wa kisumpi, nansha bu bengidi ba kisumpi bengila na kulonda bwendeji bwa bakulumpe. Bengidi ba mingilo bakokeja kupebwa bipindi bimobimo ku Kupwila kwa Būmi ne Mwingilo, ne shi bibwanika babwanya kwendeja Kifundwa kya Bible kya Kipwilo, ne kunena mīsambo ya bantu bonso. Bengidi ba mingilo bakokeja kupebwa madyese makwabo mungya bisakibwa ne shi i babwanye bisakibwa bya kuvuija mwingilo’wa. (1 Pe. 4:10) Bengidi ba mingilo pobakwasha bakulumpe, bafwaninwe kwipāna na mutyima tō.

¹³ Eyo, mwingilo wabo i mwishile na wa bakulumpe, inoko nao i kipindi kya mwingilo ukola otwingidila Leza ne kadi udi na mvubu pa kusaka kipwilo kyendelele biyampe. Mwenda mafuku, shi bengidi ba mingilo bavuija biyampe biselwa byabo ne shi ababwanya bisakibwa bya kwingila bu bakumbi ne bafundiji, nabya bakokeja kuyukanibwa mwa kwingidila’bo bu bakulumpe.

¹⁴ Shi wi tutu nkasampe nansha mubatyijibwe panopano, le ukimbanga kubwanya bisakibwa bya kwikala mwingidi wa mingilo? (1 Tm. 3:1) Bantu bāya mu bubine byobenda bavula mwaka ne mwaka, o mwanda ke kusakibwa bana-balume ba kusela biselwa mu kipwilo. Ukokeja kukimba mingilo na kutamija mutyima wa kusaka kukwasha bantu. Muswelo muyampe wa kulonga kino i kulangulukila pa kimfwa kilumbuluke kya Yesu. (Mat. 20:28; Yoa. 4:6, 7; 13:4, 5) Kusaka kobe kukaningila’ko ponso poenda wimwena nsangaji idi mu kupāna. (Bil. 20:35) Nanshi ingila mingilo ya kwilanga ya kukwasha bantu, kulama bukundwe bwa Njibo ya Bulopwe, nansha kupingakena pa kipindi kya mwanā masomo ku Kupwila kwa Būmi ne Mwingilo. Mu kukimba mingilo mubadilwa kadi ne kutamija ngikadila ya ku mushipiditu na kwikala na kibidiji kiyampe kya kwifunda pa kasuku. (Ñim. 1:1, 2; Ngt. 5:22, 23) Kadi, tutu ukimba mingilo ulombolanga’mba i ukulupilwa ne wa kikōkeji papebwa mingilo ya kipwilo.​—1 Ko. 4:2.

¹⁵ Bengidi ba mingilo batoñwanga na mushipiditu ujila pa mwanda wa kamweno ka kipwilo. Bantu bonso mu kipwilo babwanya kufwija’ko bengidi ba mingilo pa mingilo mikomo yobengila na kwingidila nabo pamo kitatyi kyobavuija mingilo ibapelwe. Mu uno muswelo, kipwilo kikalombola’mba kifwijanga’ko Yehova pangala pa mpangiko yakwete ya kulama ndudi mu ba mu njibo.​—Ngt. 6:10.