Kupwila Kukankamikila “ku Buswe ne ku Mingilo Milumbuluke”

MU BULA bwa tutwa twa myaka, bantu ba Yehova bebungilanga pamo mu muswelo mulongololwe. Mu Isalela wa kala, bana-balume bonso bādi benda ku Yelusalema ku masobo makatampe asatu. (Kup. 16:16) Mu myaka katwa kabajinji, bene Kidishitu bādi bapwila kyaba kyonso, divule mu mobo a bantu. (Fil. 1, 2) Dyalelo, netu twendanga ku kupwila ne ku bitango. Mwanda waka bengidi ba Leza bapwidilanga pamo? Dibajinji bidi, mwanda kupwila i kipindi kikatampe mu butōtyi bwetu.​—Ñim. 95:6; Kol. 3:16.

² Kadi kupwila kudi na kamweno ku boba batanwa’ko. Bene Isalela bēbanenene pa mwanda wa Masobo onso a Bitanda a busamba-bubidi amba: “Kongakanya bantu pamo, bana-balume, bana-bakaji, bana, ne mweni obe wa kibundi udi mu bibundi byobe, amba bevwane ne kwifunda ne kutyina Yehova Leza wenu kadi bate mutyima, balonde binenwa bya bino Bijila.” (Kup. 31:12) Nanshi kitungo kine kipwidilwa pamo i ‘kufundijibwa na Yehova.’ (Isa. 54:13) Kupwila kwitupanga mukenga wa kwiyuka na bakwetu, kwikankamika, ne kukomejibwa na bu bana na bana bwetu.

³ Bana ba bwanga bēbungīle pamo kupwa kwa Pentekosa 33 Yesu ke mwiye bēpēne nyeke mu lufundijo lwa batumibwa, kadi “difuku ne difuku badi benda kitatyi kyonso ku tempelo na kitungo kimo.” (Bil. 2:42, 46) Mwenda mafuku, pādi pebungila bene Kidishitu pamo kutōta, bādi batanga bilembwa bya ku bukomo bwa mushipiditu, kubadila’mo ne mikanda ilembelwe na batumibwa ne na bana ba bwanga bakwabo ba Kidishitu. (1 Ko. 1:1, 2; Kol. 4:16; 1 Ts. 1:1; Yak. 1:1) Kadi kwādi ne milombelo ya kipwilo. (Bil. 4:24-29; 20:36) Dimodimo bādi basekununa ne myanda imwenwe na bamishonele mu mwingilo. (Bil. 11:5-18; 14:27, 28) Bādi babandaula mfundijo ya mu Bible ne kufikidila kwa bupolofeto bulembelwe na mushipiditu. Kwādi kuletwa misoñanya mu myanda itala mwiendelejo mwitabijibwe wa bwine Kidishitu ne itala kwipāna kwa bwine Leza. Bonso bādi bakankamikwa bekale basapudi ba myanda miyampe bapyasakane.​—Loma 10:9, 10; 1 Ko. 11:23-26; 15:58; Ef. 5:1-33.

⁴ Mu ano etu mafuku, kupwila kwa bwine Kidishitu kulondanga kimfwa kya mu mafuku a batumibwa. Twivwananga kuzenza kobetuzenza mu Bahebelu 10:24, 25 amba: “Twitei mityima batwe bene na bene . . . , ne kuleka’byo kwibungila pamo kwetu mpika, na mwaibidila bamobamo, ino twikankamikei batwe bene na bene, nakampata pano pomwamona difuku dibafwena po pene.” Byotudi mu ano mafuku makomo a mfulo, tusakilwa bukankamane buvule botumwena mu kwitana kotwitana pamo kitatyi ne kitatyi mwa kulamina bukomo ku mushipiditu ne bululame bwa bwine Kidishitu. (Loma 1:11, 12) Batwe bene Kidishitu, tudi mu bukata mwa lukongo lukondame ne lunyengakane. Twi bafundule bumpikwa bwine Leza ne bya kusakasaka bya ino ntanda. (Fid. 2:15, 16; Tet. 2:12-14) Bine, le kudi kukwabo kuyampe kwa kwikala kupityile kwikala mu bu bana na bana bwa bantu ba Yehova? (Ñim. 84:10) Ne kadi, i bika bikwabo bidi na kamweno kupita kwifunda ne kwisambila pa Kinenwa kya Leza? Tala kupwila palapala kuteakanibwe mwanda wa kamweno ketu.

⁵ Kipindi kibajinji kya ku kupwila kwa ku mfulo kwa yenga i mwisambo wimanine pa Bible utala nakampata bantu bonso, kadi ku bamo ubwanya kwikala musunsa mubajinji kutanwa ku kupwila. Mwisambo wa bantu bonso udi na mvubu mikatampe pa kuvuija bisakibwa bya ku mushipiditu bya bapya bātanwa’ko ne bya basapudi ba pa kipwilo.​—Bil. 18:4; 19:9, 10.

⁶ Kidishitu Yesu, batumibwa bandi, ne bapwani nabo bāendeje kupwila kwa bantu bonso kwiifwene na kupwila kwendejibwanga dyalelo mu bipwilo bya bantu ba Yehova. Na bubine, Yesu wādi muneni mukatakata kupita bonso pano pa ntanda. O mwanda bāmwaninye amba: “Kashā kekwaikele muntu unena nabya.” (Yoa. 7:46) Yesu wādi unena na lupusa, bevwaniki bandi bashala batendela. (Mat. 7:28, 29) Boba bādi balama musapu wandi bādi bamwena’mo byabuyabuya bivule. (Mat. 13:16, 17) Batumibwa nabo bālondele kimfwa kyandi. Mu Bilongwa 2:14-36 tutanga’mo mwisambo munane wānenene Petelo mu difuku dya Pentekosa 33 Yesu ke mwiye. Bavule bālongēle mungya byobya byobāivwene. Mwenda mafuku, bantu bamo baitabija pa kupwa kwivwana mwisambo wānenene Polo mu Atene.​—Bil. 17:22-34.

⁷ Ne mu ano mafuku namo mo monka, bantu midiyo ne midiyo bamwenanga byabuyabuya mu mīsambo ya bantu bonso inenwanga yenga ne yenga mu bipwilo, ne mu mīsambo ya bantu bonso inenwanga ku bitango. Ino mīsambo itukwashanga tute nyeke mutyima ku bufundiji bwa bwine Kidishitu ne kwimanija pototo mu mwingilo wa Bulopwe. Shi twita bantu bansangela musapu ku kuno kupwila ne bantu bakwabo, nabya tukakwasha bantu bayuke bufundiji bwa Bible bwa kyalwilo.

⁸ Mitwe ya myanda ya mīsambo ya bantu bonso i mishileshile. Kudi mīsambo īsambila pa mfundijo ne pa bupolofeto bwa mu Bible, pa misoñanya ne pa madingi a mu Bisonekwa atala pa būmi bwa kisaka, pa myanda ya busongi, pa ngikadilo ipita’mo bankasampe, ne pa mikadilo ya bwine Kidishitu. Mīsambo mikwabo īsambilanga pa mingilo ya kutendelwa ya bupangi bwa Yehova. Mikwabo nayo ilombolanga patōka bimfwa bilumbuluke bya lwitabijo, bukankamane, ne bululame bwa bantu ba mu Bible, ne kwimanina pa ñeni yotuboila’ko dyalelo.

⁹ Shi tusaka kumwena bya binebine mu mīsambo ya bantu bonso, tufwaninwe kuta’ko mutyima mpata, kutanga bisonekwa bitela muneni, ne kumulonda patanga ne pashintulula’byo. (Luka 8:18) Shi tubandaule biyampe bintu bīsambwa’ko, tukasumininwa kulamata ku byotwifunda ne kwingidija’byo mu būmi bwetu.​—1 Ts. 5:21.

¹⁰ Shi baneni badi’ko, kipwilo kekikabulwepo nansha dimo mwisambo wa bantu bonso yenga ne yenga. Divule, bikabwanika shi mwita baneni bapempudi ba mu bipwilo bya kubwipi. Shi baneni i batyetye, mīsambo ikapityijibwa ponso pobibwanika.

¹¹ Kipindi kya bubidi kya ku kupwila kwa ku mfulo kwa yenga i Kifundwa kya Kiteba kya Mulami, mīsambo ya bipangujo ne malondololo imanine pa bishinte bidi mu Kiteba kya Mulami kya kwifuna. Yehova witupanga byakudya bya ku mushipiditu pa kitatyi kitungwe kupityila ku Kiteba kya Mulami.

¹² Bishinte bya kwifunda bīsambilanga divule pa mwa kwingidijija misoñanya ya mu Bible mu būmi bwa difuku ne difuku. Bikomejanga bene Kidishitu baleke kulonda ‘mushipiditu wa ino ntanda’ ne mwiendelejo wa disubi. (1 Ko. 2:12) Mu Kiteba kya Mulami mwiyanga bitōkeji bivule bīsambila pa mfundijo ya mu Bible ne bupolofeto, bino bikwashanga bonso bendele pamo na bubine ne kulonda nyeke kashinda ka boloke. (Ñim. 97:11; Nki. 4:18) Kutanwa ku Kifundwa kya Kiteba kya Mulami ne kulondolola’ko kubwanya kwitukwasha tusangēle lukulupilo lwa ntanda mipya myoloke ya Yehova. (Loma 12:12; 2 Pe. 3:13) Bu bana na bana bwetu bwa bwine Kidishitu bwitukwashanga tutamije kipa kya mushipiditu ne kukomeja mutyima wetu wa kwingidila Yehova na bupyasakane. (Ngt. 5:22, 23) Bwitukomejanga tūminine matompo ne kuningisha “kyalwilo kilumbuluke kya mafuku a kumeso” pa kusaka’mba ‘tukwatyije pototo būmi bwinebwine.’​—1 Tm. 6:19; 1 Pe. 1:6, 7.

¹³ I muswelo’ka otubwanya kumwena ne pa mfulo mu ino mpangiko ya byakudya bya ku mushipiditu? Tufwaninwe kuteakanya kifundwa kumeso kwa kitatyi, ekale bunka nansha mu kisaka, kutanga bisonekwa bitelelwe, kadi mu kitatyi kya kupwila kuleta malondololo mu bishima byetu. Kulonga namino kukatweja bininge bubine mu mutyima wetu, kadi bantu bakwabo bakamwena’mo pobevwana binenwa byetu bya lwitabijo. Shi tuteja na katentekeji malondololo a bakwetu, nabya tukamwena mu kifundwa kya yenga ne yenga.

¹⁴ Kipwilo kipwilanga yenga ne yenga ku Njibo ya Bulopwe mwanda wa mpangiko itwa bu Būmi ne Mwingilo Wetu wa Bwine Kidishitu. Kuno kupwila kudi na bipindi bisatu biteakanibwe mwanda wa kwitukwasha ‘tubwanye senene’ mwa kwikadila bengidi ba Leza. (2 Ko. 3:5, 6) Mpangiko ne myanda ikalupulwa kweji ne kweji mu Kabuku ka ku Kupwila​—Būmi ne Mwingilo Wetu wa Bwine Kidishitu. Mu Kabuku ka ku Kupwila Būmi ne Mwingilo mudi musapwilo wa kulondela’po wa kwingidija mu busapudi.

¹⁵ Kipindi kibajinji kya ku kuno kupwila, kitwa bu Byabulēme bya mu Kinenwa kya Leza, kitukwashanga tuyuke ngikadilo ne myanda ikwatañene pamo na nsekununi idi mu Bible ne kuyuka muswelo otubwanya kwiingidija. Mu kuno kupwila mudi ne mwisambo, butangi, ne kwisamba na bevwaniki kwimanine pa butangi bwa Bible bwa yenga ne yenga. Bifwatulo ne byaba bidi pululu bidi mu Kabuku ka ku Kupwila Būmi ne Mwingilo bikwashanga pa kufundija ino nsekununi. Buno bubandaudi bwa mushike bwa mu Bible buketukwasha mu būmi bwetu bwa difuku ne difuku ne mu bufundiji bwetu, amba twikale ‘babwanye byonsololo, bateakanibwe senene mwa kwingidila mwingilo onso muyampe.’​—2 Tm. 3:16, 17.

¹⁶ Kipindi kya bubidi kya ku kupwila, kitwa bu Wiibidije Mwa Kusapwila, i kiteakanibwe mwanda wa kupa bonso mukenga wa kwiibidija mu busapudi ne kulumbulula bwino bwabo bwa kusapula ne kufundija. Kutentekela pa bipindi bya bana ba masomo, kutalwanga ne video a musapwilo wa kulondela’po. Kino kipindi kya ku kupwila kitukwashanga twikale na “ludimi lwa boba bafundijibwe” amba tubwanye “mwa kulondolwela yewa mukōke na kinenwa kyoloke.”—Isa. 50:4.

¹⁷ Kipindi kya busatu nakyo kitwa bu Būmi bwa Bene Kidishitu, kilombola mwa kwingidijija misoñanya ya mu Bible mu būmi bwa difuku ne difuku. (Ñim. 119:105) Kintu kikatampe mu kipindi kya kuno kupwila i Kifundwa kya Bible kya Kipwilo. Kifundwa kya Bible kya Kipwilo i kipindi kya bipangujo ne malondololo pamo bwa Kifundwa kya Kiteba kya Mulami.

¹⁸ Patambulwa kweji ne kweji Kabuku ka ku Kupwila Būmi ne Mwingilo kapya, mukwatakani wa kitango kya bakulumpe, nansha mukulumpe umukwasha, ukekabandaula senene ne kutandika mpangiko. Yenga ne yenga, mukulumpe umo uyukile kufundija biyampe ne mwitabijibwe na kitango kya bakulumpe ukengila bu mwimaniji wa kupwila. Biselwa byandi i bya kuyuka’mba kupwila kufwaninwe kushilula pa kitatyi kitungwe ne kufula pa kitatyi, kufwija ne kudingila bonso badi na bipindi bya bana ba masomo.

¹⁹ Shi twiteakanya kitatyi ne kitatyi, ne kutanwa’ko, ne kulondolola nansha kupityija bipindi ku Kupwila kwa Būmi ne Mwingilo, tukatambula buyuki bwa mu Bisonekwa, kwivwanija misoñanya ya mu Bible, kusapula myanda miyampe pampikwa moyo, ne kwikala na bwino mu kulonga bana ba bwanga. Boba batanwa’ko ino kebaikele Batumoni babatyijibwe, nabo bamwenanga mu bu bana na bana buyampe ne mu mīsambo yūbaka ku mushipiditu. Pa kwiteakanya senene ku kuno kupwila ne kukwabo, tubwanya kwingidija Watchtower Library, JW Library^®, Watchtower KIBĪKO PA ENTELENETE (shi bidi mu lwenu ludimi), ne kibīko kya mabuku kya ku Njibo ya Bulopwe. Mu kibīko kya mabuku kya ku Njibo ya Bulopwe mudi mabuku a Batumoni ba Yehova alupwilwe, Index des publications des Témoins de Jéhovah nansha Dibuku dya Bukimbi dya Batumoni ba Yehova, pamo ne malamuni palapala a Bible, concordance, dibuku dishintulula bishima, ne mabuku makwabo akwasha a kunyemena’ko. Kino kibīko kibwanya kwingidijibwa na muntu ense kumeso nansha kupwa kwa kupwila.

²⁰ Mu bula bwa yenga ne ku mfulo kwa yenga, bisumpi bya basapudi bītananga pamo mu kitatyi kityetye ku kupwila kwa kwenda mu busapudi mu bitatyi bishileshile. Divule dine kuno kupwila kulongelwanga ku mobo nansha ku bifuko bikwabo byendele’mo. Kubwanya ne kulongelwa ku Njibo ya Bulopwe. Kwikala na bisumpi bityebitye mu bifuko bivule mu mwaba kubwanya kupēlejeja basapudi mwa kwendela ku kupwila kwa kwenda mu busapudi ne mu mwaba. Basapudi babwanya kwabanibwa bukidibukidi ne kwenda mu mwaba pampikwa kwija. Kadi mutadi wa kisumpi ubwanya ne kuta mutyima bininge bantu badi mu kisumpi kyandi. Nansha kwikala na bisumpi bivule bipwidila palapala byokudi na kamweno, ngikadilo imo ibwanya kulengeja bisumpi bivule bītanine pamo. Kimfwa, shi basapudi benda mu busapudi mu bukata bwa yenga i batyetye, bikokeja kwikala biyampe kutyanga bisumpi bimo pamo nansha bisumpi byonso bibwanya kwitanina pamo ku Njibo ya Bulopwe nansha ku kifuko kikwabo kifwaninwe. Mu uno muswelo, musapudi ne musapudi ukekala na muntu wa kusapula nandi. Kipwilo kibwanya kumona’mba i biyampe kwitanina ku Njibo ya Bulopwe mu kitatyi kya mafetyi. Nansha padi kipwilo kibwanya kutonga kwitanina pamo mwanda wa kwenda mu busapudi kupwa kwa Kifundwa kya Kiteba kya Mulami.

²¹ Shi bisumpi bītanina palapala, mutadi wa kisumpi ye wa kwendeja kupwila kwa kwenda mu busapudi. Kyaba kimo, mutadi wa kisumpi ukanena mukwashi wandi nansha tutu mubwanye bisakibwa endeje kuno kupwila. Mwendeji ufwaninwe kwiteakanya kwisambila pa bintu bimobimo bifike’po kadi bikwasha mu mwingilo wa busapudi. Shi mpangiko ya mwingilo wa busapudi ibapu, tutu umo wa mu kisumpi ukalombela. Kupwa kisumpi kikenda bukidibukidi mu mwaba. Kuno kupwila kukapityijibwa mu minite itano nansha isamba-ibidi, ino kufwaninwe kwipipijibwa shi kulongwa kupwa kwa kupwila kwa pa kipwilo. Kufwaninwe kwikala kukankamika, kuleta madingi akwasha, ne bulombodi ku bantu bonso batambila mu mwingilo wa busapudi. Bapya nansha bantu bakwabo basakilwa bukwashi babwanya kusapula pamo na basapudi ba bwino mwanda wa kwibebidija.

²² Bana ba bwanga byobenda bavudila’ko, bipwilo nabyo byendanga bivudila’ko. Divule mutadi wa kipindi ye ulombanga kushimikwa kwa kipwilo kipya. Dimodimo, bisumpi bityebitye bibwanya kumona’mba i biyampe kwilunga na kipwilo kidi pabwipi bininge.

²³ Kyaba kimo, bipwilo bityebitye bikokeja kwikala na bakaka bonka. Shi kidi uno muswelo, nabya kaka ukalombela mu kipwilo nansha ukendeja kupwila ufwaninwe kwipūta ku mutwe, kukwatañana na mpangiko ya mu Bisonekwa. (1 Ko. 11:3-16) Divule dine, ukekala ushikete, witadidile na kisumpi mpala na mpala. Bakaka kebanenangapo mīsambo ku kupwila. Ino batañanga myanda ilupwilwe na bulongolodi ne kwisambila’po, nansha kupityija’yo bu bipindi bya kwisamba na bevwaniki nansha bu kya kumwena’ko. Bilo ya musambo ikanena kaka umo anze kwisamba na bilo kupityila ku mikanda ne kukwatakanya kupwila. Mwenda mafuku, shi kubaikala batutu babwenye bisakibwa, bakasela bino biselwa.

²⁴ Mwaka ne mwaka kukwatwanga mpangiko mwanda wa bipwilo bidi mu kipindi kimo bītanine pamo ku bitango bibidi bya kipindi bya difuku dimo dimo. Bino bitatyi bya nsangaji bipanga bantu bonso batanwa’ko mukenga wa ‘kushitula mityima yabo’ mu kisense kya bwine Kidishitu. (2 Ko. 6:11-13) Pa mwanda wa bino bisakibwa bya pa bula, bulongolodi bwa Yehova buteakanyanga mitwe ya myanda ya mu Bisonekwa ne bipindi palapala bya ino mpangiko. Myanda ipityijibwanga mu miswelo palapala, kimfwa mu mīsambo, mu bya kumwena’ko, mu kwengelekeja, mu kwineneja, ne mu bwipangudi. Buno bufundiji bwa pa kitatyi kifwaninwe būbakanga bonso batanwa’ko. Bino bitango bipanga bana ba bwanga bapya mukenga wa kubatyijibwa bu kilomboji kya kwipāna kwabo kudi Yehova.

²⁵ Kwikalanga kwibunga kukatampe musunsa umo ku mwaka ne mwaka. Kino kitango kya ntanda kiloñwanga divule mafuku asatu, kadi kibungakanyanga pamo bipwilo bya mu bipindi bivule. Inoko, misambo mityemitye ibwanya kumona’mba i biyampe bipwilo byonso bya mu mwaba wa musambo bilongele kitango pa kifuko kimo. Mpangiko ya bino bitango ikokeja kwishila mu matanda amoamo kukwatañana na ngikadilo nansha na kulonda bwendeji butamba ku bulongolodi. Kyaba kimokimo, kuloñwanga bitango bya matanda nansha bitango bya pa bula mu matanda amoamo, kadi kubwanya kutanwa Batumoni tununu makumi na makumi batamba mu matanda meshileshile. Mu bula bwa myaka, bantu bavule i befunde myanda miyampe ya Bulopwe pa mwanda wa mabila elelwanga kuno kwibunga kukatampe kwa Batumoni ba Yehova.

²⁶ Ku bantu ba Yehova bepāne, bitango i bitatyi bya nsangaji bya kutōta mu bumo. Bino bitango i byaba biyampe kobetusokwelanga bitōkeji bivule bya bubine. Ku bitango bimobimo, kulupulwanga mabuku mapya a kwingidija mu kifundwa kya pa kasuku nansha kya kipwilo nansha a kwingidija mu mwingilo wa busapudi. Ku bitango kubatyijibwanga ne bantu. Bitango bidi na mvubu ya pa bula ya kutamija bantu ku mushipiditu. Bilombolanga’mba bine bantu ba Yehova badi bine mu bu bana na bana bwa ntanda yonso bwa bene Kidishitu bepāne badi na kiyukeno kibayukanya’mba i bana ba bwanga ba Yesu Kidishitu.​—Yoa. 13:35.

²⁷ Shi tutanwa ku kupwila kwa pa kipwilo, ne ku bitango bya bantu ba Yehova, nabya tukakomejibwa mwa kulongela kiswa-mutyima kya Yehova. Kadi tukiñwanga ku lupusa lubi lwa ntanda lukokeja kōna lwitabijo lwetu lwa bwine Kidishitu. Kuno kupwila konso kutumbijanga Yehova ne kumutendela. (Ñim. 35:18; Nki. 14:28) Bine tufwijanga’ko Yehova pa kutūla’ko bino bitatyi bya kutūkija ku mushipiditu mityima ya bantu bandi bepāne mu kino kitatyi kya mfulo.

²⁸ Bipwilo bya Batumoni ba Yehova ntanda yonso bivulukanga lufu lwa Yesu Kidishitu musunsa umo ku mwaka, na kulonga Kivulukilo kya lufu lwa Kidishitu, nansha Bidibwa bya Kyolwa bya Mfumwetu. (1 Ko. 11:20, 23, 24) Kuno ko kupwila kwa bantu ba Yehova kwa mvubu mpata kupita konso mu mwaka. Tunenwe batwe bonso kuvuluka kino Kivulukilo.​—Luka 22:19.

²⁹ Mafuku a kweji a Kivulukilo etananga na mafuku a kweji a Pashika wa mu Bible, alombwelwe mu Bisonekwa. (Div. 12:2, 6; Mat. 26:17, 20, 26) Pashika ādi masobo a mwaka ne mwaka a kuvuluka Divilu dyāvilukile bene Isalela mu Edipito mu mwaka wa 1513 Yesu kaile. Mu kine kitatyi’kyo, Yehova wātūdile difuku dya 14 dya kweji wabo wa kwanza ushilula na kutentama kwa kweji bu difuku dyabo dya kudya kana ka mukōko ka Pashika ne kutamba mu bupika bwa Edipito. (Div. 12:1-51) Pa kuyuka difuku dine, bilomba kubala mafuku 13 tamba pa kutentama kwa kweji wifwenene bininge na mafuku a ku muketeko ekalanga mwinya ne bufuku na bula bumo mungya mobimwekela mu Yelusalema. Divule, kuvuluka kwa Kivulukilo kuponenanga mu difuku dibajinji dimonwa kweji lubenji kinondanonda na mafuku a ku muketeko adi mwinya ne bufuku na bula bumo.

³⁰ Mateo 26:26-28 utela binenwa bya Yesu bilombola mwa kupityijija Kivulukilo. Ke kiselapo kya majende, ino i bidibwa bya kyelekejo bya kudya boba betyilwe kwikala bampyana pamo na Yesu Kidishitu mu Bulopwe bwandi bwa mūlu. (Luka 22:28-30) Bene Kidishitu bonso bepāne ne bantu basangela musapu i bakankamikwe kutanwa ku Bidibwa bya Kyolwa bya Mfumwetu bu bantu batala bitupu. Kutanwa kobatanwa’ko kulombola’mba batendelanga ne kufwija’ko pangala pa mpangiko yākwete Yehova Leza mwanda wa kamweno ka bantu bonso kupityila kudi wandi Mwana, Yesu Kidishitu. Kumeso kwa Kivulukilo, kuloñwanga mwisambo wa pa bula wa bantu bonso wa kukwasha bantu basangele kino kinkumenkume ne kwibakankamika basangele bininge kwifunda Bible.

³¹ Batumoni ba Yehova belaijanga na nsangaji bitatyi bya kwitana pamo ku kupwila kwine ‘kotwikankamikila ku buswe ne ku mingilo milumbuluke.’ (Bah. 10:24) Umpika mukōkele ne mudyumuke uteakanyanga nyeke kuno kupwila kukwatañana na bisakibwa byetu bya ku mushipiditu. Bengidi bonso ba Yehova ne boba basangela musapu i bakankamikwe kumwena ne pa mfulo mu ino mpangiko ya kwibungila pamo kitatyi ne kitatyi. Bengidi ba Leza i bekutyile mu bumo nkē mwanda bafwijanga’ko Yehova bya binebine pa mwanda wa mpangiko yakwete kupityila ku bulongolodi bwandi. Kya mvubu kutabuka, tutendelanga Yehova ne kumutumbija.​—Ñim. 111:1.