Fwena ku Kisaka Kyobe kya ku Mushipiditu

 1. Le bantu ba kikōkeji babwanya kwita Yehova bu ani?

MU KISAKA kya batōtyi ba Yehova mudi Yesu, mwine “umbedi wa bipangwa byonso,” ne bamwikeulu bavule. (Kol. 1:15; Ñim. 103:20) Pādi Yesu pano pa ntanda, wālombwele amba bantu ba kikōkeji bakokeja kumona Yehova bu Shabo. Paādi wisamba na bandi bana ba bwanga, wānenene amba Yehova i “Tata kadi ye Shenu.” (Yoa. 20:17) Kadi kitatyi kyotwipānanga kudi Yehova ne kubatyijibwa, twikalanga mu kisaka kya buswe kya batutu ne bakaka.​—Mako 10:29, 30.

 2. Le i bika byotusa kwisambila’po mu kino kishinte?

² Bantu bamo bakomenwanga kumona Yehova bu Shabo wa buswe. Bakwabo nabo kebayukilepo padi ne mwa kulombwela buswe ku batutu ne bakaka. Mu kino kishinte, tusa kwisambila pa muswelo witukwasha Yesu tumone Yehova bu Tata wa buswe, mwine otubwanya kufwena. Kadi tusa kuyuka mwa kwiwila Yehova mu muswelo otwikele na batutu ne bakaka.

 3. Le lulombelo lwa kulondela’po lwitufwenya namani kudi Yehova?

³ Yehova i Tata wa buswe. Yesu usakanga tumone Yehova mwamumwena aye mwine, bu mbutwile wa kanye ne buswe ufwenwa, ke bu muntupo wampikwa kanye witulombola’nka bya kulonga. Kino i kimwekele mu byāfundije Yesu bandi bana ba bwanga kulombela. Wāshilwile lulombelo lwa kulondela’po na binenwa bya amba: “Tata wetu.” (Mat. 6:9) Yesu wādi ukokeja kwitunena twite Yehova bu “Mwinē Bukomo Bonso,” “Umpangi,” nansha bu “Mulopwe wa nyeka”—bitenta byendele’mo kadi bya mu Bisonekwa. (Ngo. 49:25; Isa. 40:28; 1 Tm. 1:17) Ino Yesu wētunenene twite Yehova bu “Tata.”

 4. Le tubayuka namani amba Yehova usakanga tufwene kwadi?

⁴ Lelo ukomenwanga kumona Yehova bu Shobe wa buswe? Bamo mu bukata mwetu bakomenwanga. Shi Tata wetu kadipo na kanye, twadi ba kukomenwa kwitabija’mba i mbutwile wa buswe. Bine, bisangaja’po kashā pa kuyuka’mba Yehova wivwanije biyampe mwine motwiivwanina! Usakanga kwitufwena. O mwanda Kinenwa kyandi kitusoñanya’mba: “Fwenai kudi Leza, nandi ukemufwena.” (Yak. 4:8) Yehova witusenswe kadi unena’mba ukekala Tata mulumbuluke kutabuka.

 5. Mungya Luka 10:22, Le Yesu ubwanya kwitukwasha namani tufwene kudi Yehova?

⁵ Yesu ubwanya kwitukwasha tufwene kudi Yehova. Yesu uyukile Yehova senene kadi umwekejanga ngikadila yandi mu muswelo mubwaninine, o mwanda wānenene amba: “Yewa ense umona ami wamone ne Tata mwine.” (Yoa. 14:9) Pamo bwa tutu wetu, Yesu witufundijanga mwa kulēmekela Tata wetu ne kumukōkela, mwa kulekela kumufītyija mutyima ne muswelo wa kwitabijibwa nandi. Inoko kupityila ku būmi bwandi bwa pano panshi, Yesu wētukweshe twivwanije amba Yehova i wa kanye ne buswe. (Tanga Luka 10:22.) Twisambilei’ko bidi pa bimfwa bimobimo.

 6. Le Yehova wāivwene Yesu kitatyi’ka?

⁶ Yehova wivwananga bandi bana. Langulukila pa muswelo wāivwene Yehova wandi Mwana umbedi. Na bubine Yehova wāivwene milombelo mivule yālombele wandi Mwana paādi pano pa ntanda. (Luka 5:16) Wāivwene Yesu ulombela pa butyibi bukatampe bwa kukwata, kimfwa pa kutonga batumibwa 12. (Luka 6:12, 13) Kadi Yehova wāivwene Yesu ulombela paādi uzumbija mutyima. Kumeso kwa kumwaba, Yesu wālombele Shandi na kininga pa makambakano makoma adi a kumutana. Yehova kāivwenepo’nka milombelo ya Yesu, ino wātumine ne mwikeulu wa kukomeja wandi Mwana wansenswe.​—Luka 22:41-44.

 7. Le i bika bitulengeja tumone amba Yehova wivwananga milombelo yetu?

⁷ Dyalelo nadyo, Yehova wendelelanga kwivwana milombelo ya bengidi bandi ne kwiilondolola pa kitatyi kifwaninwe kadi mu muswelo muyampe. (Ñim. 116:1, 2) Tulangulukilei bidi pa muswelo wemwenine Kaka umo wa mu India, mwalondolwedile Yehova milombelo yandi. Wadi ukambakanibwa mu ñeni bininge, ebiya walomba Yehova bininge pa uno mwanda. Walembele amba: “Mpangiko ya Televijo ya JW ya Kweji 5, 2019 yadi īsambila pa bya kulonga kitatyi kyotuzumbija mutyima, ye kintu kyonadi nsakilwa. Adi malondololo ku milombelo yami.”

 8. Le Yehova wālombwele amba usenswe Yesu muswelo’ka?

⁸ Yehova witusenswe kadi witutele mutyima, monka mwaādi usanshilwe Yesu ne kumuta mutyima mu mwingilo wandi mukomo wa pano panshi. (Yoa. 5:20) Wādi uvuija bisakibwa bya Yesu bya ku mushipiditu, mu ñeni ne ku ngitu. Kadi Yehova wālombwele wandi Mwana amba umusenswe ne amba umwitabije. (Mat. 3:16, 17) Yesu byaādi ukulupile nyeke Shandi wa mūlu wa buswe, kādipo wiivwana bu udi bunka.​—Yoa. 8:16.

 9. Le i bintu’ka bilombola’mba Yehova witusenswe?

⁹ Pamo bwa Yesu, batwe bonso twimwenanga buswe bwa Yehova mu miswelo mivule. Languluka’po bidi: Yehova wētukokēle kwadi ne kwitupa batutu ne bakaka ba buswe betukwasha twikale na nsangaji ne kwitukankamika kitatyi kyotuvutakanibwe ñeni. (Yoa. 6:44) Kadi Yehova witupanga byakudya bya ku mushipiditu bya kukomeja lwitabijo lwetu. Witukwashanga ne kwitukwasha tusokole bisakibwa byetu bya difuku ne difuku. (Mat. 6:31, 32) Shi tulangulukile pa buswe bwitusenswe Yehova, tukamusanswa bininge.

10. Le i ñeni’ka yotubwanya kuboila ku muswelo wikele Yehova na batutu ne bakaka?

¹⁰ Yehova usenswe batutu ne bakaka. Inoko kebitupēlelangapo nyeke kwibasanswa nansha kumwekeja buswe botwibasenswe. Kyaba kimo bikomanga mwanda tudi na bibidiji bishile kadi twi batamine mu ngikadilo mishileshile. Kadi batwe bonso tuloñanga bilubo bibwanya kusanshija bakwetu ne kwibatyumuna mutyima. Inoko tubwanya kulonga bukomo bwa kukankamika buswe mu kisaka kyetu kya ku mushipiditu. Namani? I na kwiula Tata wetu ne kulombola batutu ne bakaka buswe. (Ef. 5:1, 2; 1 Yo. 4:19) Pano tutalei ñeni yotubwanya kuboila ku kimfwa kya Yehova.

11. Le Yesu wāmwekeje namani “mutyima wa lusalusa” wa Yehova?

¹¹ Yehova udi na “mutyima wa lusalusa.” (Luka 1:78) Muntu wa lusa bimusansanga shi wamone bantu basusuka; ukimbanga muswelo wa kwibakwasha ne kwibasenga. Yesu wāmwekeje lusa lwa Yehova pa bantu mu muswelo waādi wikele nabo. (Yoa. 5:19) Difuku dimo paāmwene kibumbo kya bantu, Yesu “webakwatyilwa lusa mwanda badi basusulwa kadi basūlwe pamo bwa mikōko yampikwa mukumbi.” (Mat. 9:36) Yesu wālongele bivule kupita’ko’tu kwibevwanina lusa bitupu. Wābelwile babela ne kukwasha boba bādi “baputuma na mingilo ne balēmenenwe.”​—Mat. 11:28-30; 14:14.

12. Leta kimfwa kya muswelo otubwanya kulombola lusa.

¹² Kumeso kwa kukwatyilwa batutu ne bakaka lusa, tufwaninwe bidi kuyuka makambakano obekonda nao. Kimfwa, kaka udi padi na misongo mikatampe. Kesambilangapo pa misongo yandi, ino padi ukasangala shi muntu wamukwasha. Le ubwanya namani kuvuija bisakibwa bya kisaka kyandi? Le uketabija kumukwasha na kumutēkela byakudya nansha kumukundwila mu njibo? Nansha padi tutu wajimija kaji. Le kumupa ka kyabuntu ka lupeto, padi na kuleka kumulombola’mba i batwe bamupa’ko, kukamukwasha kufika ne byasokola kaji kakwabo?

13-14. Le i muswelo’ka otubwanya kwikala na buntu pamo bwa Yehova?

¹³ Yehova udi na buntu. (Mat. 5:45) Ketufwaninwepo kwilaija kufika ne bitulomba tutu nansha kaka bukwashi, ebiya ketumukwasha. Pamo bwa Yehova, tubwanya kwibakwasha kumeso kwa abo kwibulomba. Yehova witutambidijanga dyuba difuku ne difuku batwe papo kumulomba’dyo mpika! Kadi bantu bonso bamwenanga mu kyanga kya dyuba, ke enkapo boba badi na mutyima wa kufwija’ko. Lelo kwitabijepo amba Yehova pavuija bisakibwa byetu, ulombolanga buswe bwaetuswele? Bine, tusenswe Yehova bininge mwanda udi na kanye ne buntu!

¹⁴ Pa kwiula Shabo wa mūlu, batutu ne bakaka bavule balombolanga bakwabo buntu. Kimfwa mu 2013, kintenshi kikatampe kya Typhon Haiyan kyaonakenye bintu bivule mu Filipine. Batutu ne bakaka bavule bajimije mobo ne bintu byabo. Ino kisaka kyabo kya ku mushipiditu kya ntanda yonso kyebakweshe bukidibukidi. Bavule baletele lupeto nansha kukwasha ku mwingilo mukatampe wa kūbaka, kintu kyalengeje kubwipi kwa mobo 750 alongololwe nansha kūbakululwa mu kintu kya mwaka umo! Mu kitatyi kya kipupo kya COVID-19, Batumoni baingile bininge mwanda wa kukwasha batutu ne bakaka. Shi tupelakana kukwasha batutu ne bakaka, tulombolanga’mba twi basenswe.

15-16. Mungya Luka 6:36, le i muswelo’ka muyampe otubwanya kwiula Tata wetu wa mūlu?

¹⁵ Yehova udi na lusa ne buntu. (Tanga Luka 6:36.) Twimwenanga lusa lwa Tata wetu wa mūlu difuku ne difuku. (Ñim. 103:10-14) Balondi ba Yesu bādi bampikwa kubwaninina; inoko wēbafwidile lusa ne kwibalekela. Wāitabije’nka ne kupāna būmi bwandi mwanda wa betulekele bubi bwetu. (1 Yo. 2:1, 2) Lelo lusa ne lulekelo lwa Yehova ne Yesu kebikulengejepo ufwene kobadi?

¹⁶ Tuningijanga buswe botwisenswe mu kisaka kyetu kya ku mushipiditu, shi ‘twilekela na mutyima umo.’ (Ef. 4:32) Shako, kyaba kimo tubwanya kukomenwa kulekela bakwetu, o mwanda tufwaninwe kulonga bukomo. Kaka umo wamwene amba kishinte kidi mu Kiteba kya Mulami kinena’mba “Twilekelei Bitupu Batwe Bene,” kyamukweshe asanswe bakwabo.b Walembele amba: “Kwifunda kino kishinte, kwankweshe ngikale na mumweno ungi kadi muyampe mu uno mwanda. Kyashintulwile amba kwitabija kulekela bakwetu kekushintululapo amba witabije mwiendelejo wabo mubi nansha kutyepeka bibi byobalongele. Ino kulekela i kuleka’tu kulama kīji pa bibi bilongelwe ne kulama nyeke ndoe yobe.” Shi tulekela batutu ne bakaka na mutyima umo, tulombolanga’mba twibasenswe ne amba twiulanga Tata wetu, Yehova.

17. Mungya Mateo 5:16, le i muswelo’ka otubwanya kutumbija Tata wetu wa mūlu?

¹⁷ Kwikala mu kisaka kya buswe kya ntanda yonso i dyese dikatampe. Tusakanga bantu bavule bāye tutōte Leza pamo nabo. O mwanda ketufwaninwepo kulonga kintu kibwanya kulengeja bantu bekale na milangwe mibi pa bantu ba Yehova ne padi Tata wetu wa mūlu. Tuloñanga bukomo bwa kwiendeja mu muswelo ukokela bantu ku myanda miyampe.​—Tanga Mateo 5:16.

18. Le i bika bibwanya kwitukwasha tusapule pampikwa moyo?

¹⁸ Kyaba kimo, bantu bamo babwanya kwitufutulula nansha kwitupangapanga mwanda’tu tukōkele Tata wa mūlu. Le tukalonga namani shi tubaivwana moyo kitatyi kyotusapwila bakwetu nkulupilo yetu? Tubwanya kukulupila’mba Yehova ne wandi Mwana baketukwasha. Yesu wākulupije bandi bana ba bwanga amba kebafwaninwepo kuzumbija mutyima pa bya kwisamba nansha bya kunena. Mwanda waka? Yesu wāshintulwile amba, “bya kunena bikemupebwa’nka mu mine nsá’ya; mwanda bakanena ke banwepo bonka kete, mhm, ino i mushipiditu wa Shenu unenena momudi.”​—Mat. 10:19, 20.

19. Leta kimfwa kya muntu wasapwile na bukankamane.

¹⁹ Tulangulukilei pa kimfwa kya Robert. Kitatyi kyaadi ukifunda Bible kadi na buyuki’tu butyetye bwa mu Bible, wakasambila ku kidye kya basola mu Afrika wa Kunshi. Washintulwila kidye na bukankamane amba kasakilepo kutwela busola pa mwanda wa buswe bwasenswe banababo bene Kidishitu. Wadi usenswe kifuko kyandi mu kisaka kyetu kya ku mushipiditu! Mutyibi wamwipangula mu kitulumukila’mba, le “banabenu i bāni?” Robert kadipo ulanga’mba basa kumwipangula kino kipangujo, ino enka pene’pa wavuluka kisonekwa kya difuku. Kyadi kisonekwa kya Mateo 12:50 kinena’mba: “Yewa ense ulonga kiswa-mutyima kya Tata udi mūlu, ye mwanetu mwana-mulume, ye mwanetu mwana-mukaji, kadi ye mama.” Nansha Robert byaadi kaijije mu kwifunda Bible, mushipiditu wa Yehova wamukweshe alondolole kino kipangujo ne bipangujo bikwabo bya mu kitulumukila. Bine, Yehova kabudilwepo kwitemba Robert! Yehova witwitembanga ne batwe shi tumukulupila kitatyi kyotusapula na bukankamane mu ngikadilo mikomo.

20. Le tufwaninwe kusumininwa kulonga bika? (Yoano 17:11, 15)

²⁰ Twendelelei kusangela dyese dyotudi nadyo dya kwikala mu kisaka kya buswe kya ku mushipiditu. Tudi na Tata muyampe bininge ne batutu ne bakaka bavule betusenswe. Tufwaninwe kufwija’ko nyeke pa bino bintu. Satana ne balondi bandi babi baloñanga bukomo bwa kwitulengeja tutatane buswe bwitusenswe Tata wetu wa mūlu ne kona bumo bwetu. Inoko Yesu wālombele pa mwanda wetu, wālomba Tata wetu etulame mwanda wa kisaka kyetu kikale nyeke mu bumo. (Tanga Yoano 17:11, 15.) Yehova ulondololanga ino milombelo. Nanshi pamo bwa Yesu, ketwakatatanai buswe bwitusenswe Tata wa mūlu ne kwitukwasha kwaetukwasha. Tusumininwei kufwene nyeke ku kisaka kyetu kya ku mushipiditu.