KIFUNDWA 57
Bya Kulonga shi Ubalonga Bubi Bukatampe
Nansha byosenswe Yehova bininge ne ulonga bukomo bwa kwepuka kumusanshija, kyaba kimo ukalonga ne bilubo. Inoko kudi bubi bumo bukatampe kupita bukwabo. (1 Bene Kodinda 6:9, 10) Shi ubalonga bubi bukatampe, vuluka’mba Yehova aye kalekele’byopo kukusanswa; ukakimba kukufwila lusa ne kukukwasha.
1. I bika byotufwaninwe kulonga pa kulekelwa na Yehova?
Boba bonso basenswe Yehova bealakanyanga shi abamone amba abalonga bubi bukatampe. Inoko babwanya kusengwa na byobya byālaile Yehova ku bantu bandi amba: “Nansha shi bubi bwenu budi pamo bwa bityila pyā, bukatōkejibwa pamo bwa mashika mekwate.” (Isaya 1:18) Shi tubesāsa bya binebine, Yehova nandi uketufwila lusa bya binebine. Le tukesāsa namani? I na kwialakanya, na kuleka kulonga bibi’bya, ne na kulomba Yehova etufwile lusa. Kupwa, ketwingila bininge mwanda wa kushinta milangwe mibi ne bibidiji bibi byetufikije ku bubi’bwa, ne kushilula kwiendeja mungya misoñanya ya Yehova itala butōki.—Tangai Isaya 55:6, 7.
2. Lelo Yehova wingidijanga namani bakulumpe betukwashe shi tubalonga bubi?
Shi tubalonga bubi bukatampe, Yehova witusapwila kwita “bakulumpe ba kipwilo.” (Tangai Yakoba 5:14, 15.) Bano bakulumpe basenswe Yehova ne mikōko yandi. I babwanye bisakibwa bya kwitukwasha tulongolole kipwano kyetu na Yehova.—Bene Ngalatea 6:1.
Le bakulumpe betukwashanga namani shi tubalonga bubi bukatampe? Bakulumpe babidi nansha basatu babwanya kwitulemununa na kwitupa madingi a mu Bisonekwa. Baketupa manwa mapotoloke ne kwitukankamika twepuke kulonga monka bubi. Bakokeja ne kwitupeleja kwingila mingilo imoimo ya ku mushipiditu kufika ne byotwikala bakomo monka. Pa kukinga kipwilo ku lupusa lubi, bakulumpe bapañanga mu kipwilo yewa ense walonga bubi ino kasakilepo kwisāsa.
LANGULUKA BININGE
Fwija’ko Yehova bininge pa muswelo waetukwashanga shi tubalonga bubi bukatampe.
3. Kusaba bubi kukwashanga twikale bakomo
Bubi bonso botulonga butalanga ne Yehova, o mwanda mwine tusabanga’bo kwadi. Tangai Ñimbo ya Mitōto 32:1-5, ne kwisambila pa kino kipangujo:
Mwanda waka i biyampe kusaba bubi bwetu kudi Yehova pa kyaba kya kukimba kufya’bo?
Kutentekela pa kusaba bubi kudi Yehova, tuseñwanga ne potukimba bukwashi kudi bakulumpe. Talai VIDEO, ne kwisambila pa kipangujo kilonda’kya.
Lelo bakulumpe bakweshe namani Canon mu ino video ajokele kudi Yehova?
Potwisamba na bakulumpe, tufwaninwe kunena patōkelela ne kwampikwa buzazangi; badi’ko mwanda wa kwitukwasha. Tangai Yakoba 5:16, ne kwisambila pa kino kipangujo:
Kwisamba na bakulumpe pampikwa buzazangi kukalengeja namani bapēlelwe kwitukwasha?
Saba bubi bobe, wisambe na bakulumpe kwampikwa buzazangi, kadi itabija Yehova akukwashe na buswe
4. Kupanga muntu mu kipwilo kukwashanga
Shi muntu walonga bubi bukatampe ne kupela kulonda misoñanya ya Yehova, kakabadilwapo monka mu kipwilo. Ukapangwa, kadi netu tukapela kupwana nandi enka ne kwisamba nandi. Tangai 1 Bene Kodinda 5:6, 11 ne 2 Yoano 9-11, ne kwisambila pa kino kipangujo:
Monka mwikadilanga kiyujo kitatula mukama wa mukate, kupwana na muntu upelele kwisāsa konanga namani kipwilo?
Bantu bavule bapangilwe bajokēle monka mu kipwilo, mwanda bulemununi bwebapelwe, nansha byobwadi busansa, bwebalengeje baluje ñeni yabo. (Ñimbo ya Mitōto 141:5) Talai VIDEO, ne kwisambila pa kipangujo kilonda’kya.
Mu ino drame, le kupangwa kwakweshe namani Sonja?
Le mpangiko ya kupanga muntu mu kipwilo . . .
itumbijanga namani dijina dya Yehova?
ilombolanga namani amba Yehova udi na bujalale kadi na buswe?
5. Yehova witulekelanga shi tubesāsa
Yesu wāingidije kyelekejo kitukwasha twivwanije muswelo wiivwananga Yehova shi muntu wesāsa. Tangai Luka 15:1-7, ne kwisambila pa kino kipangujo:
Le bino bibakufundija bika padi Yehova?
Tangai Ezekyele 33:11, ne kwisambila pa kino kipangujo:
I matabula’ka a mvubu afwaninwe kutabula muntu pa kulombola’mba wesāsa binebine?
Pamo bwa mukumbi, Yehova utele bininge mikōko yandi mutyima
BANTU BAMO BANENANGA’MBA: “Ngidi na moyo, shi nsapwile’mo bakulumpe bubi bwami, nabya nsa kupangwa.”
Le i bika byokanena ku muntu wiivwana uno muswelo?
MU KĪPI
Shi tubalonga bubi bukatampe, ino tubealakanya bya binebine ne twi basumininwe kuleka kulonga monka bubi’bwa, Yehova uketufwila lusa.
Pitulukai’mo
Mwanda waka i biyampe tusabe bubi bwetu kudi Yehova?
I bika byotufwaninwe kulonga pa kusaka’mba tulekelwe bubi bwetu?
Shi tubalonga bubi bukatampe, mwanda waka i biyampe kukimba bukwashi ku bakulumpe?
KIMBA
Tala muntu umo mwawemwenine lusa lwa Yehova lulombwelwe mu Isaya 1:18.
Le bantu bonso batengelwe na bubi bulongelwe bamwenanga namani mu mpangiko ya kupangwa?
“Mwanda Waka Kupangwa I Mpangiko ya Buswe” (Kiteba kya Mulami, 1 Kweji 5, 2015)
Wifunde mwa kushintulwila boba ke Batumonipo mwine mwikadile mpangiko ya kupangwa mu kipwilo.
“Lelo Musūlanga Boba Batamba mu Kyenu Kipwilo?” (Kishinte kya pa Entelenete)
Mu nsekununi “Nadi Mfwaninwe Kujokela Kudi Yehova,” wifunde’mo, umone muntu umo watambile mu bubine mwaweivwanine amba Yehova wamujokejeja’mo.
“Bible Ushintanga Būmi” (Kiteba kya Mulami, 1 Kweji 4, 2012)