Yesu Wapebwa Ntumbo Kabutwilwe

Mwikeulu Ngabudyele pa kupwa kusapwila nsongwakaji Madia amba ukemita mwana uketwa bu Yesu ne amba uno’u ukekala Mulopwe wa nyeke, Madia waipangula’mba: “Le bino bikekala namani, nami byonkyasambakene pamo na mwana-mulume?”​—Luka 1:34.

Ngabudyele walondolola’mba: “Mushipiditu ujila ukāya podi, kadi bukomo bwa Mwine wa Mūlu Mwine bukakupūta mwemba. O mwanda ne mwine ubutulwa uketwa bu ujila, Mwanā Leza.”​—Luka 1:35.

Padi, pa mwanda wa kukwasha Madia etabije uno musapu, Ngabudyele wabweja’ko amba: “Tala! Edisabeta mubutule obe nandi waimita mwana mwana-mulume, mu bununu bwandi, kadi uno ke kweji wandi wa busamba, aye obetanga bu ñumba; mwanda kudi Leza kekudipo binenwa kebibwanikangapo.”​—Luka 1:36, 37.

Kupityila ku kilondololwa kyandi, tubamone amba Madia waitabija byanena Ngabudyele. Madia wanena’mba: “Tala! ami ne umpika mwana-mukaji wa Yehova! Kinongelwe mungya binenwa byobe.”​—Luka 1:38.

Ponka’pa Ngabudyele byaenda’bi, Madia nandi kaenda kudi Edisabeta, udi na mulumyandi Zekadia kubwipi na Yelusalema, mu mitenta ya Yudea. Na ku Nazala kudi Madia, padi lwendo lwa mafuku asatu nansha aná.

Madia kafikanga, wafika kwa ba Zekadia. Pa kutwela, waimuna mubutule wandi Edisabeta. Ponka’po, Edisabeta wayulwa mushipiditu ujila, ne kusapwila Madia amba: “Wi mweselwe dyese umbukata mwa bana-bakaji, kadi i kyeselwe dyese kipa kya ndá yobe! Le naikala namani na dyese dya uno muswelo, inandya Mfumwami kwiya kondi? Mwanda tala! diwi dya lwimu lobe podyapona’tu mu matwi ami, kana kadi mu ndá yami kabatombojoka na nsangaji.”​—Luka 1:42-44.

Madia nandi ko kulondolola na mutyima wa kufwija’ko amba: “Muya wami ubatumbija Yehova, kadi mushipiditu wami keukokejapo kuleka kusangēla bininge Leza Umpandiji wami, mwanda watale kupēlulwa kwa umpika wandi mwana-mukaji. Mwanda tala! tamba pano, nkongo yonsololo ikantelanga bu wa katōkwe, mwanda Mwine wa bukomo wanongela bilongwa bikatakata.” Tubamone amba Madia nansha byaeselwa namino, watumbija’ko Leza, ne kunena’mba: “Dijina dyandi i dijila, kadi mu nkongo ne nkongo, lusa lwandi ludi pa boba bamutyina.”​—Luka 1:46-50.

Mu binenwa byandi bya bupolofeto, Madia waendelela na kutendela Leza amba: “Walonga bya bukomo na kuboko kwandi; wapalankenya kulampe boba ba kwizunzula mu milangwe ya mityima yabo. Watūkija bantu ba bukomo pa mpona ne kuzunzula boba bapēlulwe; waikutyija senene boba badi na nzala na bintu biyampe, kadi boba badi na bupeta webajokeja makasa bitupu. Waiya kukwasha Isalela mwingidi wandi ne kuvuluka lusa lwandi, monka mwaānenene kudi bakulutuba betu, kudi Abalahama ne ku lutundu lwandi, nyeke.”​—Luka 1:51-55.

Madia washikata na Edisabeta kintu kya myeji isatu, padi i ne mwanda wa kukwasha’ko Edisabeta mu mafuku andi a kubwipi na kubutula. Buya’byo’po kumona bano bana-bakaji babidi ba kikōkeji, bonso bemite na bukwashi bwa Leza, bekankamika pamo mu bino bitatyi bya būmi bwabo!

Kadi tala ntumbo yatumbikwa Yesu enka ne kumeso kwa kubutulwa’ye. Edisabeta wamwite bu “Mfumwami,” ne kana ka mu ndá yandi “kabatombojoka na nsangaji” pamweka’tu Madia. Bino i bishile kulampe na byālongele bakwabo kudi Madia ne kudi kana kadi mu ndá yandi mwenda mafuku, monka motusa kwikimwena.