Bubinebine bwa Binenwa

I BIKA bifikijanga mwine Kidishitu ku kunena bya bubela? Padi upitulukanga’tu mu myanda yaaivwene, pampikwa kubandaula’yo shi i ya bine. Pakwabo utyityija kintu kyaetupile, aye kuyuka mpika, pa kutanga’kyo mu kitabo. Shi tuta mutyima mpata ku bubinebine nansha ke mu tubintu tutyetutye, bemvwaniki betu bakakulupila ne bintu bikatampe bya mu musapu wetu amba i bya bine.

Mu Mwingilo wa Budimi. Bavule baselanga mutyima kūlu pa kushilula mwingilo wa budimi mwanda bemonanga amba bakidi na bivule bya kwifunda. Ino kebejangapo bemona kala amba nabo babwanya kusapula bukamoni senene, nansha byobadi na buyuki bwa kyalwilo bwa bubinebine. Namani? Kintu kikwasha pano i kwiteakanya.

Kumeso kwa kwenda mu mwingilo wa budimi, jingulula biyampe mwanda osaka kukesambila’po. Tompa kala kufwatakanya bipangujo bikokeja kukwipangula bemvwaniki. Kimba malondololo a mu Bible obatondwa. Namino ukekala mwiteakanye kuleta malondololo a binebine koku utūkije ne mutyima. Lelo usa kukendeja kifundwa kya Bible? Bandaula bya binebine myanda ya kukefunda. Jingulula shi wivwanije buluji bwa mu Bible bwimanine’po malondololo a bipangujo bitampilwe.

Ino ukalonga namani shi mwinē njibo waipangula kipangujo kyokwiteakenyepo kulondolola? Shi kuyukilepo biyampe myanda ya bine, komena mutyima wa kusaka kufwatakanya malondololo. “Mutyima wa moloke ulanga pa kulondolola.” (Nk. 15:28) Ukokeja kutana bukwashi bosaka mu dibuku Comment raisonner à partir des Écritures nansha mu kabuku Mitwe ya Myanda ya mu Bible ya Kwisambila’po shi bidi mu ludimi loivwana. Shi kudipo nansha na kimo pa bino, munene ukakimbe bidi, penepo kojoka dikwabo. Shi mwine wipangwile kipangujo wipangwile’kyo na mutyima umo, kakakolelwapo kwilaija malondololo moloke. Ino na bubine, ukatengwa mpata pa kumona kwityepeja kobe.

Kwingila na basapudi bendelele mu mwingilo wa budimi kukakukwasha utamije bwino bobe bwa kwingidija Kinenwa kya Leza monka mokyolokele. Tadija bisonekwa byobengidija ne muswelo obalanguluka’po. Itabija na kwityepeja byonso byobakudingila ne byobakulemununa. Apolosa mwanā bwanga mupyasakane wāmwenine byabuyabuya ku bukwashi bwāmukweshe bakwabo. Luka wāsaswile Apolosa amba i “wa ñeni byamalwa,” “mukatampe mwine mu bisonekwa,” kadi wa “mutyima wandi wadi umutēma,” “wisamba ne kufundija biyampe byonka umbintu bya Yesu.” Inoko kādipo wivwanije byonso ne pa mfulo. Ba Pishila ne Akwila bājingulwile kino, “bamukokela ko badi, ke bamushintulwila bilumbuluke byonka mwendele dishinda dya Leza.”​—Bil. 18:24-28.

“Kūminina Monka mu Mwanda wa Binebine.” Bipindi byotupityija ku kupwila bifwaninwe kulombola bulēme botukwete nabo mwingilo wa kipwilo mwanda akyo kyo “kipanda, ne kyalwilo kya binebine.” (1 Tem. 3:15) Pa kulamata ku bubinebine, i kyendele’mo kuyuka buluji bwa bisonekwa byotusaka kukengidija mu mwisambo. Ta mutyima ku mwanda obesambila’po ne kine kyobesambila’o.

Byobya byonena ku kipwilo bikokeja kupitulukwa’mo na bakwabo. Eyo, “bātwe bonso tukukalanga mu bintu bivule.” (Yak. 3:2) Inoko ukamwena’mo shi utamija kibidiji kya kunena bintu bya bine. Batutu bavule beandikije ku Masomo a Mwingilo wa Kiteokratike bakekala bakulumpe mwenda mafuku. Kudi “bingi bīne bikwabo” bisakibwa kudi boba bapelwe kino kiselwa. (Luka 12:48) Shi mukulumpe upāna bupānepāne madingi a bubela alenga myanda mikatampe mu banabetu ba mu kipwilo, Leza ukamufityilwa mutyima. (Mat. 12:36, 37) Nanshi, tutu ubwanya bisakibwa bya bu mukulumpe ufwaninwe kuyukana bu muntu ‘ūminine monka mu mwanda wa binebine mu busendwe bwandi bwa kufundija.’​—Tet. 1:9.

Tadija biyampe amba milangwe yobe ikwatañene na ‘kyelekejo kya myanda ya bukomo’ kilombwelwe mu bubinebine bonso butuntulu budi mu Bisonekwa. (2 Tem. 1:13) Kino kekifwaninwepo kukuzakaja. Padi ukisakilwa kupwa kutanga Bible yense mutuntulu. Wielele’ko nyeke upwe. Pano’ko bidi, tala ano madingi alonda’ko moakokeja kukukwashisha uyuke mwa kubandawila myanda yolanga kukanena mu bufundiji bobe.

Dibajinji, wiipangule amba: ‘Lelo ino myanda ikwatañene na byokendi kala mufunde mu Bible? Lelo ifwenyanga bemvwaniki bami kudi Yehova’ni nansha itumbijanga tunangu twa ino ntanda, ne kukankamika bantu baludikwe nato?’ Yesu wānene amba: “Kinenwa kyobe bo bubinebine.” (Yoa. 17:17, NW; Kup. 13:1-5; 1 Kod. 1:19-21) Kupwa, ingidija biyampe bingidilwa bya kwifunda bilupulwa na kabumbo ka umpika wa binebine ne wa manwa. Kulonga namino kukakwivwanija bisonekwa biyampe, kadi kukakuyukija mwa kwibingidijija na bujalale, pampikwa kupityija’byo kipimo. Shi ulondeje mīsambo yobe pa ‘kyelekejo kya myanda ya bukomo’ ne kukulupila kingidilwa kya Yehova poshintulula ne kulombola mvubu ya bisonekwa, binenwa byobe bikekala bya binebine.

Kubandaula Bubinebine bwa Myanda. Misapu ya panopano, binenwa bya bantu, ne myanda mimweke bikwashanga pa kuleta kimfwa ne kulombola mvubu ya myanda kampanda. Ino ukayuka namani amba i bya binebine? Dishinda dimo i kwibisela kuntu kukulupilwe. Vuluka kubandaula myanda’ya shi i ya panopano. Bibalwa bya malapolo kebyo kupwa mvubu; myanda isokola bafundi ba sianse nayo keyo kushinta bukidibukidi; kadi ponso penda pevwanija bantu mānga ne ndimi ya kala, milangwe imanine pa buyuki bubajinji nayo ishintwanga. Dyumuka mpata shi ulanga kunena myanda ya mu majulunale, ku televijo, ku ladiyo, mu mikanda ya mu kompyuta, nansha ya ku Entelenete. Nkindi 14:15 udingila’mba: “Mwendalale witabija binenwa byonso: Ino muntu mukosoke aye utadija biyampe matabula andi.” Wiipangule amba: ‘Lelo kuno konsela myanda i kukulupilwe na bantu bavule? Le ino myanda ibingijibwa na nsulo mikwabo?’ Shi utatana bubinebine bwa mwanda kampanda, leka’o.

Ne kadi, shi ubapu kubandaula amba nsulo yosela’ko myanda i mikulupilwe, tadija biyampe shē muswelo osaka kwingidija myanda’ya. Tala shi binenwa bya bantu ne bibalwa byosaka kwingidija bikwatañene na mwanda obadi banenena’po kwine koselele’byo. Ponso posaka kukoma myanda, tadija kutyina amba wakashinta “bantu bamo” ke “bantu kapwila,” “bantu bavule” ke “bantu bonsololo,” ne “dimodimo” ke “nyeke.” Kwela mwepo mu myanda nansha kuvudija bibalwa, ludingo, nansha kutyityija kusumininwa kwa myanda keko kupa bantu kwalakana.

Shi unena nyeke myanda ya bine, ukayukana bu muntu ulēmekele bubinebine. Kino kikamwekeja biyampe Batumoni ba Yehova bonso kikonge. Ne kupityidila, kipejanga bulēme ‘Yehova Leza wa bubinebine.’​—Mit. 31:5.