Wakasungula luseke lua Yehowa

TSHIMENGA tshia Yeliko tshivua muaba mulenga, luseke luvua dîba dipatukila. Badi batshibikila mu Bible ne: “Tshimenga tshia mabue a ngaji.” (Dut. 34:3) Muvua ndumba mukuabu diende Lahaba. Uvua umuenena bulenga bua tshimenga pa dididishi dia nzubu wende uvua lua ku tshimanu tshia tshimenga. Pavuaye wenda unyunguluka mu tshimenga, uvua umona bantu bonso bamueneka bikale ne buôwa, bualu bavua bamanye ne: Yehowa neasungile bena Isalele kadi neababutule bobu. Bavua bakumbanyine kabutu aku.

Bena Isalele bavua base tshitudilu pabuipi ne tshimenga atshi. Bidimu 40 kumpala, Yehowa ukavua musungile bantu bende pavuaye mubutuile Palô ne tshiluilu tshiende mu Mbuu Mukunze. Matuku makese kumpala kua bena Isalele kufikabu pabuipi ne Yeliko, Yehowa uvua mubambuluishe bua kutshimuna bakalenge ba bena Amole, Sihona ne Oga. Abu buvua bualu bua dikema bualu bena Isalele kabavua bamanye mvita to. Mpindieu bakavua baya batangile ku Yeliko, bualu Yehowa uvua musue kunyoka benamu bua malu abu mabi.

Lahaba uvua mumanye ne: bena mu tshimenga tshiabu bavua benza malu mabi. Uvua pamuapa musue kuikala ne nsombelu muimpe kupita uvuaye nende wa dienda bundumba. Malu a Yehowa akumvuaye avua mamusemeje pabuipi nende ne mamupeteshe ditabuja. Wakajingulula ne: Yehowa uvua ukuba bena Isalele ne ubenzela malu ne kanemu, nNzambi wa buakane, uvua ubatabalela ne munange bukezuke. Uvua mushilangane ne nzambi ya bampangano ya mu Kanâna ivua yenza bantu buôwa.

Dituku dikuabu butuku, bantu babidi bakalua kuende bakeba pa kulala. Wakamanya diakamue ne: bavua batentekedi bena Isalele. Mukalenge wa Yeliko wakamanya pende ne: batentekedi babidi abu bavua mu tshimenga. Wakatuma bantu bende kua Lahaba, kumutuminabu dîyi bua apatule bantu babidi abu mu nzubu. Lahaba uvua kumpala kua bualu bukole! Nealamate ku dia bantu babi ba mu tshimenga tshiabu anyi? Peshi neasungule luseke lua Yehowa?

Lahaba wakenza malu ne dikima, kusungulaye luseke lua Yehowa. Wakasokoka batentekedi abu pa mutu pa nzubu wende, kuambilaye bantu ba mukalenge abu ne: bakadi baye. Pakayabu, Lahaba wakabanda pa mutu pa nzubu, kuambilaye batentekedi abu bua tshinyi uvua mubasungile. Wakitabuja Nzambi wabu, kubambilaye ne: “Ndi mumanye bimpe ne: Yehowa neanupeshe buloba ebu.” Pashishe wakabambila bualu buvua bubakoleshe bikole bua ne: bena mu tshimenga tshia Yeliko bavua batshina bena Isalele bikole. Nanku wakabasengelela bua bamukube paluabu kubutula tshimenga.

Lahaba wakasungila batentekedi babidi abu, kumonabu ne: uvua mulamate ku luseke lua Yehowa. Bakitaba dilomba diende, kabakumushipa yeye ne bena mu dîku diabu to. Bakamuambila bua kambidi muntu nansha umue muaba uvuabu to. Pashishe bakamuambila bua kulembeleja muonji mukunze ku dididishi dia nzubu wende divua luseke lua tshimanu tshia tshimenga, ne ashale musombe mu nzubu paluabu kubutula tshimenga. Yeye mutumikile bionso bidibu bamuambile abi, neasungidibue ne bena mu dîku diabu.

Lahaba wakambuluisha batentekedi abu bua kupatuka tshimenga ne muonji uvuaye musuike ku dididishi au. Pashishe wakashala kuenza malu anu muvuabu bamuambile bua kuenza. Wakasuika muonji mukunze ku dididishi, kakambila muntu nansha umue bualu bua batentekedi babidi abu, ne bakashala basombe anu mu nzubu, yeye ne bena mu dîku diabu. Kusokoka batentekedi abu kuvua kumulomba dikima dia bungi, bualu bu bena mu tshimenga tshiabu bobu bamanye bualu abu bavua mua kumushipa. Pakumvua Lahaba ne: Yehowa uvua muimanyike musulu wa Yadene bua bena Isalele kusabuka, kakuyi mpata wakatuishibua kabidi bikole ne: uvua musungule luseke luimpe. Bena mu Yeliko bavua ne bua kuikala bumvue buôwa bukole bua muvua bena Isalele benda banyunguluka tshimenga tshiabu munda mua matuku 7. Mu dituku dia 7 bakuidi bakela mpungi, bena Isalele kuelabu mbila, bimanu kutuadijabi kupuka. Lahaba ne bena mu dîku diabu bakashala mu bukubi mu nzubu.

Pakajika mvita, Yoshua wakatuma batentekedi bua bapatule Lahaba. Nzubu wa Lahaba uvua ku luseke lua tshimanu tshia tshimenga au kavua mupuke to. Bakapatula Lahaba ne bena mu dîku diabu pambelu pa tshimenga. Panyima pa matuku, Lahaba wakalua pende wa mu tshisamba tshia Isalele. Bakamusela kudi muena Isalele, kulelabu nende bana. Mu ndelanganyi yende ke muakapatukila Yezu Kristo udi muntu wa dikima didi kadiyi kuamba. (Mat. 1:5, 16) Yehowa wakamubenesha bikole bua ditabuja diende ne bua muvuaye muenze malu ne dikima.

Bala bualu ebu mu:

• Yoshua 2:1-24; 5:1; 6:14-25

• Ebelu 11:30, 31

• Yakobo 2:24, 25

Lukonko lua kuelela meji:

Mmushindu kayi uvua Lahaba muenze malu ne dikima?

Buela mu buondoke

1. 1. Umvuija muvua nsombelu wa Lahaba mu Yeliko. (w13 1/11 12 §4–13 §1)

   Andamuna

2. 2. Bua tshinyi tudi tuamba ne: pavua batentekedi baye kua Lahaba, kabavua bayaku bua kuenda nende masandi? (it “Mukaji wa ndumba” §18-wcgr)

   Andamuna

3. 3. Bua tshinyi pa mutu pa nzubu wa Lahaba pavua line wa bungi? Ntshinyi tshivuabu benza ne line? (it “Line” No. 1 §2-4-wcgr) A

   Andamuna

   

   Thanks for your interest in my photos/Moment Open via Getty Images

4. 4. Bua tshinyi Lahaba kavua muenze bibi bua muvuaye kayi muambile bantu bavua mukalenge mutume bulelela? (w04 1/12 9 §1) B

   Andamuna

   

Keba malongesha

• Bua tshinyi bivua bilombe Lahaba dikima bua kulekela nsombelu wa tshiendenda uvuaye nende ne kutendelela Yehowa pamue ne bena Isalele? Tshilejilu tshiende tshidi mua kulongesha balongi ba Bible tshinyi?

  Andamuna

• Mmushindu kayi mukuabu uudi mua kuenza malu ne dikima anu bu Lahaba?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Lahaba pabishibuaye ku lufu?

  Andamuna

Bia kutangila kabidi

Ntshinyi tshidi tshilejilu tshia Lahaba tshitulongesha bua tshitudi ne bua kuenza bua kupanduka ku dituku dia Yehowa?

“Mmuaba kayi uudi ne bua kuikala palua nshikidilu?” (w09 15/5 6-8)

Ambuluisha bana bebe ne muyuki wa mu Bible wa mu bimfuanyi eu bua badifuanyikijile malu adimu.

“Lahaba udi utumikila bidibu bamuambile” (ijwis tshiena-bualu tshia 11-wcgr)