17 YAELE
“Muntu mukaji udi mutambe kubeneshibua”
SISELA wakanyema mu tshibandabanda tshia Yizelele muvuaye mushiye balume bende ba mvita benda bafua. Bivua bimupitshila bikole bua muvua tshiluilu tshiende tshivua ne matempu a mvita avua enza buôwa tshitue binu panshi kumpala kua tshiluilu tshikese tshia bena Isalele tshivua katshiyi ne bia mvita bikumbane. Sisela ukavua wenda ukeba kua kusokoma. Nunku wakanyemena ku ntenta wa Hebê muena Kene.
Bena Kene bavua bapetangana bimpe ne bena Isalele. Bavua badie malanda au katshia ku tshikondo tshia Mose. Bivua nanku bualu mukaji wa Mose uvua muena Kene. Bena Kene abu bavua basombele mu buloba bua bena Isalele. Hebê yeye uvua mushilangane ne bena Kene bakuabu bualu uvua muena dia Yabina mukalenge wa Kanâna. Sisela wakela meji ne: bu muvuaye mfumu wa tshiluilu tshia Yabina, uvua mua kuya kusokomena mu ntenta wa Hebê kakuyi bualu. Bidi bimueneka ne: Sisela kavua pamuapa muele meji ne: Yaele mukaji wa Hebê uvua mua kuikala yeye ne meji mashilangane ne a bayende to.
Yaele uvua mu ntenta pavua bayende mupatuke. Pakamonaye Sisela wenda usemena pabuipi ne ntenta, uvua ne bua kukeba tshia kuenza ne lukasa. Uvua mumanye bimpe muvua Sisela muntu wa tshikisu. Yaele kavua pamuapa mumanye tshivua muprofete mukaji Debola muambe bua Sisela ne: ki mmuntu mulume wamushipa to, kadi mmuntu mukaji. Nansha nanku bidi bisua kumvuika ne: Yaele uvua mumanye tshivua Yehowa musue bua enze. Bua tshinyi tudi tuamba nanku?
Yehowa wakasaka Debola bua kuimba musambu uvua wakula bua muvua Balaka mutshimune Sisela. Wakamba mu musambu amu ne: “Muntu mukaji udi mutambe kubeneshibua udi Yaele mukaji wa Hebê muena Kene; yeye udi mutambe kubeneshibua munkatshi mua bantu bakaji badi basombela mu ntenta.” Kudi bantu badi bamba bobu ne: Yaele uvua mukaji mubi muena dishima. Kadi kabiena nanku to. Uvua muluanganyi wa mvita wa dikima. Yaele wakabenga kutua bena lukuna mpanda, kusungulaye luseke lua Yehowa anu bu Lahaba. Yaele uvua mumanye ne: Sisela uvua muluishi wa Yehowa, ne wakajingulula tshivua Yehowa musue bua enze, tuambe ne: kushipa Sisela. Mmunyi muvuaye mua kuenza nanku?
Yaele kavua ne makanda a kuluangana ne Sisela ku bianza to, bualu Sisela uvua tshilobo tshia mvita tshia bukole. Nunku wakamubikila bua alue kuikishila mu ntenta wende. Wakamubuikila mbulankete. Sisela wakamulomba mâyi a kunua, kadi yeye wakamupesha mabele. Wakambila Yaele bua imane ku tshibueledi tshia ntenta, ne bobu balue kumuebeja ni uvua muaba au kambi bualu to. Pashishe wakaditua mu tulu.
Nzambi wakasungula muntu mukaji bua kushipa tshilobo tshia mvita tshivua ne tshikisu
Yaele wakamona ne: au ke mpunga uvuaye mua kushipa Sisela. Wakambula nyindu wa bujitu ne mpopo bivua pamuapa bienza ne mabaya. Wakaya bitekete bitekete too ne muaba uvua Sisela mulale, kuzonzomaye ku mutu kuende. Yeye muenze anu katshilema kakese muaba au, Sisela uvua mua kutabuluka kumushipa bibi menemene. Kadi wakenza malu onso bimpe. Wakamupopela mpopo mu luseke lua mutu, kufuilaye anu muaba au.
Pashishe Balaka wakafika wenda ukeba Sisela. Yaele wakapatuka bua kutuilangana nende. Wakamuambila ne: “Luaku nkuleje muntu uudi ukeba.” Balaka wakabuela mu ntenta, kumonaye ne: dîyi dia buprofete divua Debola muambe divua dikumbane. Dîyi adi divua dia ne: “Yehowa neafile Sisela mu tshianza tshia muntu mukaji.”
Balaka ne Debola bakimba musambu bua muvua Isalele mutshimune, kutumbishabu Yaele mu musambu au. Panyima pa bualu abu, ki mbakule kabidi bua Yaele mu Bible to. Malu au mmenzeke kukadi bidimu bipite pa 3200, kadi tshilejilu tshiende tshitambe buimpe tshidi tshitulongesha malu a mushinga. Lelu eu bantu ba Nzambi kabena baluangana ne bia mvita ku bianza to, kadi badi baluangana ne Satana ne bademon bende ne ndongoluelu mubi wa malu eu. Lelu ke utudi ne bua kuikala ne dikima dia bungi anu bu dia Yaele.
Bala bualu ebu mu:
Lukonko lua kuelela meji:
Mmushindu kayi uvua Yaele muenze malu ne dikima?
Buela mu buondoke
1. Nku tshinyi kudi mvita ivua Sisela muluangane ne bantu ba Nzambi mifuanangane ne mvita ya Armagedone? (w19.09 8-9 §3-6)
2. Hebê bayende wa Yaele nkayende ke uvua mulamatangane ne bena Kanâna bavua baluishi ba bena Isalele. Kadi mmalanda kayi avua pankatshi pa Hebê ne bena Isalele? (it “Hebê” No. 2-wcgr)
3. Mbualu kayi buvua bena Isalele batuilangane nabu bidimu bia bungi pashishe? Mmunyi muvua kuvuluka mushindu uvuabu batshimune Sisela ne Yabina kukoleshe ditabuja diabu? (w08 15/10 14-15 §12-15)
4. Ntshinyi tshidi tshitamba kukoka ntema bua mushindu uvua Debola mutumbishe Yaele? (w15 1/8 15 §3) A
Tshimfuanyi tshia A
Tshimfuanyi tshia A
Keba malongesha
Ndîba kayi didibi mua kulomba muanetu wa bakaji udi ne mulume udi kayi Ntemu bua kuikala ne dikima anu bu Yaele?
Yaele kavua muprofete bu Debola anyi musalayi bu Balaka to. Kadi wakenza tshionso tshivuaye mua kuenza. Mmunyi mutudi mua kumuidikija tuetu mu nsombelu utudi katuyi mua kuenza malu onso mudibi bikengela? B
Tshimfuanyi tshia B
Mmushindu kayi mukuabu uudi mua kuenza malu ne dikima anu bu Yaele?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Yaele pabishibuaye ku lufu?
Bia kutangila kabidi
Mu filme udi ulonda eu, mona mudi tshilejilu tshia Yaele tshipeshe nsongakaji muena Kristo dikima dia kuyisha.
Yaele ngumue wa mu bantu bakaji ba bungi badi nsombelu wabu mua kutulongesha malu a mushinga. Bala malu a bamue ba kudibu.
“Bakaji badi Bible utela badi batulongesha tshinyi?” (ijwbq tshiena-bualu tshia 161-wcgr)