Wakenza malu ne dikima ne budimu

MUNTU wa dikima udi ne bua kuikala kabidi mudimuke. Yeye kayi mudimuke udi mua kudibueja mu njiwu ya lukutukutu. Gideona uvua ne dikima ne budimu. Mu tshikondo tshiende bena Isalele bakatuadija kutendelela nzambi ya dishima. Nunku Yehowa wakabafila mu tshianza tshia bena Midiyana, kutuadijabu kubakengesha ne kubapangisha bua kupola bia pa madimi. Kadi Gideona yeye kavua ne buôwa to. Wakatungunuka ne kuenza mudimu ne budimu bua kudiisha bavuaye nabu. Uvua uya kushipuila ntete mu tshikaminu tshia mvinyo tshivua muaba musokome, pamuapa mu nyongolo, bua bena Midiyana kabamumonyi to.

Nsombelu wakakolela bena Isalele, bobu kudidila Yehowa bua abambuluishe. Yehowa wakabatumina muprofete bua abambile bua tshinyi uvua mubalekele. Pashishe wakatuma muanjelu bua ambile Gideona ne: mmumusungule bua kusungila tshisamba tshiende. Wakalomba muanjelu au bua amuenzele bualu buvua mua kumujadikila ne: Yehowa mmumusungule. Muanjelu wakenza tshishima, kupatulayi kapia mu dibue, kuoshaku mulambu uvua Gideona mutekapu. Muanjelu wakajimina panyima pa bualu abu. Butuku abu Yehowa wakambila Gideona bua upule tshioshelu tshia Bâla ne mutshi wa tshijila uvua ku luseke kuatshi, amuashile yeye tshioshelu ne amuoshilapu milambu. Gideona wakatumikila. Kadi bu muvuaye mudimuke wakenza bionso abi butuku bua tatuende ne bena mu tshimenga kabamumonyi to.

Yeye mumane kuenza bualu abu, bena Midiyana, bena Amaleka ne bena ku Est bakasanga biluilu biabu bua kuluisha bena Isalele. Bavua bungi bu mpasu, buwule tente mu tshibandabanda tshia Yizelele. Nyuma wa Yehowa wakalombola Gideona, kutumaye bantu mu bimue bisamba bia mu Isalele bua basange balume bavua mua kulua kumuelesha diboko. Kadi wakalomba Yehowa bua amuenzele bishima bibidi bua kumujadikila ne: uvua nende. Yehowa wakamuenzela malu ne lutulu, kuitabaye dilomba diende. Butuku abu Gideona wakateka miosa ya mukoko muaba wa dishipuila, kulombaye Yehowa bua lumuma lukuate anu ku miosa kadi buloba budi kumpenga bushale bume. Biakenzeka anu nanku. Butuku buakalonda wakalomba bua miosa ishale yoyi miume, kadi buloba budi kumpenga bukuate lumuma. Biakenzeka kabidi nanku.

Bishima bibidi abi biakapetesha Gideona dikima divua dikengela, kuyaye ne bantu bende binunu 32, bua kuluangana ne bena lukuna babu bavua bobu binunu 135. Pakasabu tshitudilu ku mpokolo wa Haloda, Yehowa wakamuambila bua akepeshe bungi bua bantu ne apingaje yonso uvua ne buôwa kuende. Ba bungi bakaya, kushalabu anu binunu 10. Yehowa wakamuambila ne: batshivua anu ba bungi. Wakamuambila bua ashale mutangile bantu bende pavuabu banua mâyi. Uvua ne bua kulama bavua banua mâyi benda bakenzakana ne kumbusha bavua baanua binaminamu. Wakalama anu balume 300 bavua badimuke bua kuya nabu ku mvita.

Gideona wakaya kudilongolola bua mvita, nansha muvuaye ne tshiluilu tshikese. Yehowa wakamupesha bijadiki bikuabu bua kumujadikila ne: uvua nende. Wakamuambila bua aye bitekete bitekete mu tshitudilu tshia baluishi babu butuku. Yeye kuya. Pakafikayemu, wakumvua musalayi umue ulondela mukuende tshilota tshivua tshileja ne: Isalele uvua ne bua kutshimuna mvita. Bu mukavuaye mutuishibue ne: Yehowa uvua nende, wakaya kuambila bantu bende malu avuabu ne bua kuenza bua kutshimuna. Wakabambila bua bamutangile ne bamuidikije. Bakajuka butuku kuyabu mu tshitudilu tshia baluishi babu. Bavua bambule milondo minene, bimunyi ne nsengu. Bakenza anu muvua Gideona muenza, kuelabu mpungi ne kutayishabu milondo. Pashishe bakela lubila ne: “Muele wa mvita wa Yehowa ne wa Gideona!” Bimunyi ne mbila ivuabu bele biakenza bua baluishi abu bele meji ne: bavua babanyunguluke kudi tshiluillu tshinene tshidi tshilue kubela mvita. Buôwa buakabakuata, kutuadijabu kunyemakana nseke yonso mbilu ya dikema! Yehowa wakababueja mu kayumbayumba, kutuadijabu kushipangana. Anu bantu batue ku binunu 15 ke bakanyema.

Gideona wakaya mubalondakaje. Wakabatshimuna, kushipaye bamfumu babu. Kupinganyinaye bavua kabayi babambuluishe abu bua kubanyoka. Pashishe bantu bakajinga kuteka Gideona bu mukalenge wabu. Wakadipuekesha kuambaye ne: “Yehowa ke wanukokesha.” Yehowa wakafuta Gideona bua muvuaye muenze malu ne dikima ne budimu. Gideona wakashala ne muoyo bidimu bia bungi, ne Isalele wakashala mu ditalala tshikondo tshionso tshivuaye mulumbuluishi. Mupostolo Paulo wakamutela mu balume ne bakaji bavua ne ditabuja dikole.​—Eb. 11:32.

Bala bualu ebu mu:

• Balumbuluishi 6:1–7:22; 8:4-23, 28

Lukonko lua kuelela meji:

Mmushindu kayi uvua Gideona muenze malu ne dikima?

Buela mu buondoke

1. 1. Bua tshinyi “diampa dia orje dia tshijengu” divua musalayi mumone mu tshilota divua tshimfuanyi menemene tshia tshiluilu tshia Gideona? (Bal. 7:13; it “Orje” §7-wcgr)

   Andamuna

2. 2. Bua tshinyi mpungi miela kudi bantu 300 yakakuatshisha bena Midiyana buôwa ne yakababueja mu kayumbayumba? (it “Mpungi” §3-wcgr) A

   Andamuna

   

3. 3. Ntshinyi tshivua Gideona ne tshiluilu tshiende ne bua kuenza bua kutshimuna bena Midiyana? (w04 15/10 16 §9-10) B

   Andamuna

   

4. 4. Mmalu kayi makuabu a mu Bible adi aleja ne: muyuki eu mmulelela? (w05 15/4 32)

   Andamuna

Keba malongesha

• Gideona wakafikisha bantu ba Nzambi ku ditshimuna. Kadi uvua anu ne budipuekeshi ne wakula bimpe ne bakuabu. (Bal. 8:1-3) Mmunyi mudi bamfumu ba mêku ne bakulu mua kuidikija tshilejilu tshia Gideona padi muntu ubafiikila munda bua mapangadika adibu bangate?

  Andamuna

• Mmu nsombelu kayi mudibi mua kutulomba bua kuikala badimuke ne kuenza malu ne dikima? C

  Andamuna

  

• Mmunyi muudi mua kuenza malu ne dikima anu bu Gideona?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Gideona pabishibuaye ku lufu?

  Andamuna

Bia kutangila kabidi

Mmunyi muudi mua kuidikija Gideona bobu bakupeshe mudimu mu bulongolodi?

‘Meji adi kudi bantu bapuekele’ (w00 1/8 16-18 §11-15)

Ambuluisha bana bebe ne muyuki wa mu Bible wa mu bimfuanyi eu bua beyemene Nzambi.

“Yehowa udi ukolesha Gideona” (ijwis tshiena-bualu tshia 13-wcgr)