Wakatekesha tshiji tshia balume babidi

ABIGAYILA wakatekesha tshiji tshia balume babidi. Umue wa kudibu uvua bayende Nabala. Uvua muntu mubi menemene. Mukuabu uvua Davidi. Uvua muntu muimpe, mutendeledi wa Yehowa wa lulamatu uvua ne bua kulua mukalenge wa Isalele. Davidi uvua ne tshiji bualu Nabala uvua mumufiikishe munda. Muena mudimu wa Nabala wakalua kumanyisha Abigayila bua njiwu ya lufu ikavua pa kukuata dîku diende dijima. Abigayila uvua mukaji wa meji ne muimpe kumona. Kadi biakamulomba kabidi dikima dia bungi bua enze tshionso tshivua tshikengela bua kukuba yonso wa mu dîku diende.

Davidi uvua wenda ulua ne basalayi 400 bikale ne bia mvita bua kuenzela Nabala “ne nzubu wende mujima bibi.” Ntshinyi tshivua tshienzeke? Pavua Davidi wenda usokoma mukalenge Shaula uvua mumukine kakuyi bualu, yeye ne bantu bende bavua bakuba bena Isalele bua bantu babi kababenzedi bibi to. Bakakuba kabidi Nabala, balami bende ba mikoko, ne mikoko yende ya bungi. Panyima pa matuku, Davidi wakatuma bantu bende bua balombe Nabala biakudia. Kadi Nabala wakabandamuna bibi. Kuambaye kabidi muvua Davidi umue wa ku bapika bavua banyema bamfumu babu!

Muena mudimu wa Nabala au uvua mumone ne: kabivua ne mushinga bua kuambila Nabala bualu abu to. Wakambila Abigayila bua Nabala ne: “Yeye udi muntu tshianana udibu kabayi mua kuambila bualu kudi muntu nansha umue” to. Kadi uvua mumanye ne: Abigayila uvua ne bua kumuteleja ne kuenza malu ne meji. Wakenza tshinyi?

Kakapampakana to. Kadi uvua mumanye ne: bivua bikengela enze malu ne lukasa. Wakalambishila Davidi ne bantu bende biakudia, kubiambuishaye pa nyama ya mpunda, ne kutumaye bena mudimu bende bua babituadile Davidi bu dipa. Yeye uvua wenda ubalonda pa wende mpunda. Kakambila Nabala bualu to. Pamuapa uvua mumone ne: uvua mua kumupangisha bua kuenza tshivua tshimpe.

Bu muvua Abigayila pa mpunda mukuna mumujike, Davidi ne bantu bende bavua balua bua kusambakena nabu kabavua bamumone to. Diakamue pakatuilanganabu, wakatuluka pa mpunda, kuyaye kudi Davidi uvua wamba kutayika ne tshiji. Wakadiela ku makasa a Davidi, kumusengelelayi bua amuteleje. Budipuekeshi buende buakatekesha tshiji tshia Davidi.

Abigayila wakitaba tshilema tshivuaye kayi muenze, kuambaye muvua Davidi ne bua kufiikila bayende tshiji bualu uvua mumuenzele bibi. Wakavuluija Davidi muvuaye ne ditabuja dikole ne muvua Yehowa kayi musue bua ambule dibanza dia mashi a bantu bavua kabayi ne bualu ne adiele meji bua bualu abu. Wakamba kabidi ne: Yehowa uvua ne bua kushala kusungula muntu wa mu dîku dia Davidi bua kumuteka mukalenge wa Isalele ne uvua ne bua kusungila Davidi kudi bena lukuna bende. Bileja patoke muvua Abigayila mumanye ne: Yehowa ukavua muele Davidi manyi bua kulua mukalenge wa Isalele.

Mêyi ende mimpe a meji akatekesha tshiji tshia Davidi. Davidi kuambaye ne: “Yehowa Nzambi wa Isalele, yeye udi mukutume lelu bua kusambakena nanyi, atumbishibue!” Wakela Abigayila kalumbandi bua muvuaye mukaji wa meji ne wakadipuekesha, kutumikilaye mubelu wende. Davidi wakamuambila ne: “Tangila, ndi mukuteleje.”

Nabala kavua mumanye bualu nansha bumue to. Pakila butuku, wakenza difesto dinene ne uvua munue “mukuatshike kakuyi mushindu to.” Abigayila wakindila too ne pakatshiabu pakavua maluvu matenduke Nabala, kadi tshimuenekelu tshiende tshivua anu tshibi bu konso eku. Nansha nanku, wakamuambila tshionso tshivuaye muenze. Uvuaku muele meji ne: pavuaye umuambila bualu abu uvua mua kumutandisha anyi mene kumukuma anyi? Kadi bualu kabuakenzeka to. Bible udi wamba ne: “Muoyo wende wakalua bu wa muntu mufue, ne wakalala mutekete kayi unyunga anu bu dibue.” Panyima pa matuku matue ku dikumi, “Yehowa wakakuma Nabala, yeye kufua.” Wakamunyoka bua muvuaye mubenge kuambuluisha Davidi, muela manyi wende. Bualu abu buakasulula kabidi Abigayila ku dibaka diende dibi adi.

Yehowa wakenzela Abigayila malu makuabu a bungi mimpe. Pakumvua Davidi ne: Nabala uvua mufue, wakalomba Abigayila bua ashale mukajende. Yeye kuitaba. Umue musangu, bena Amaleka bakalua kukuata Abigayila kuyabu nende. Kadi bayende wakaya ne dikima, kumunyengaye mu bianza biabu. Mpindieu Abigayila ukavua ne mulume uvua umunemeka ne umutabalela. Ndekelu wa bionso Davidi wakalua mukalenge, ne Abigayila wakamulelela muana wa balume.

Bala bualu ebu mu:

• 1 Samuele 25:1-43; 30:1-6, 16-20

Lukonko lua kuelela meji:

Mmushindu kayi uvua Abigayila muenze malu ne dikima?

1. 3. Bua tshinyi Nabala uvua ne bua kuleja basalayi ba Davidi dianyisha bua diambuluisha diabu? (ia 77-78 §9-10) B

   Andamuna

   

   Hanan Isachar/Alamy Stock Photo

2. 4. Pavua Abigayila muambe ne: muoyo wa Davidi uvua ne bua kuikala “mujingila bimpe menemene mu tshibuta tshia muoyo tshidi kudi Yehowa,” uvua usua kuamba tshinyi? (1 Sam. 25:29; it “Muoyo” §45-wcgr)

   Andamuna

Keba malongesha

• Tshilejilu tshia Davidi uvua muteleje Abigayila tshidi tshilongesha balume tshinyi? C

  Andamuna

  

• Ntshinyi tshidi tshilejilu tshia Abigayila mua kulongesha bana betu ba bakaji badi ne babayabu kabayi Bantemu ba Yehowa?

  Andamuna

• Mmunyi muudi pebe mua kuenza malu ne dikima bu Abigayila?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Abigayila pabishibuaye ku lufu?

  Andamuna

Bia kutangila kabidi

Ntshinyi tshidi muena Kristo mua kuenza bua kusomba bimpe ne muena dibaka nende udi kayi Ntemu wa Yehowa?

Dibaka ndienza bua kusombamu kashidi (4:30)

Abigayila wakatekesha tshiji tshia Davidi. Mona tshia kuenza bua kutekesha tshiji tshiebe nansha padibu bakuenzele bibi anyi bakukebe bilumbu.

“Bushuwa, bujinguludi bua muntu budi butuyisha tshiji tshiende” (w14 1/12 12-13)