45 PETELO
“Ndi muena mpekatu”
PETELO uvua wenza mudimu mukole wa kuloba ne bena mu dîku diabu. Uvua muntu wa dikima. Uvua wamba tshionso tshivua tshimuluila mu mutu ne wenza tshivua tshikengela. Dituku dikuabu, muanabu Andele wakalua kumuambila ne disanka ne: “Tudi bapete Masiya.” Petelo kakaladikija malu to, wakalua muyidi wa Yezu.
Panyima pa ngondo, Yezu wakaya mu musoko wa Kapênuma muvua Petelo musombele ne wenzela mudimu wa diloba. Dimue dituku Yezu wakamona Petelo mutshioke yonso pabuipi ne musulu. Uvua mutshioke bualu uvua mulobe butuku bujima kayi mukuate mishipa to. Yezu wakabuela mu buatu buende, kumuambilaye bua baye muaba uvua mâyi male bua ele kapamba ne akuate mishipa. Kadi Petelo wakelakana bualu bivua bikole bua kukuata mishipa mu munya. Nanku wakambila Yezu ne: “Tuvua batate butuku bujima ne katuvua bakuate kantu.” Nansha nanku wakenza tshiakamuambila Yezu atshi. Katantshi aka, matu abu onso abidi akuwula tente ne mishipa, kutuadijawu ne kudiina! Petelo wakakema bikole bua tshishima tshivua Yezu mubenzele atshi, kumvuaye buôwa bua bungi. Bua bualu abu, wakatua binu kumpala kua Yezu, kumulombaye ne: “Mukalenge, umbuka kundi, bualu ndi muena mpekatu.” Petelo wakadimona kayi mukumbane bua kuikala ne Yezu muana wa Nzambi uvua ne bukole bua kuenza bishima. Kadi Yezu wakamukolesha ku muoyo, kumuambilaye ne: “Lekela kutshina. Kutuadijila ku mpindieu newikale ukuata bantu ne muoyo.” Yezu uvua mumone ngikadilu mimpe ivua nayi Petelo ne wakalua kumuteka umue wa ku bapostolo bende 12.
Petelo wakenza malu ne dikima mu mishindu mikuabu ya bungi. Tshilejilu, pavua Yezu wambila bayidi bende malu avuabu kabayi bumvua bimpe, Petelo ke uvua anu umulomba bua abumvuije tshivuaye ujinga kuamba. Musangu uvua Yezu muendele pa mâyi, anu Petelo ke wakendelapu pende mutangile kuvua Yezu.
Petelo uvua utamba kuamba malu avua amuluila mu mutu, kadi uvua witaba mibelu ne dikima ne ushintuluka
Petelo uvua wenza kabidi malu ne dikima pavua Yezu umupingaja mu njila. Uvua mushilangane ne bantu ba bungi bualu uvua witaba bilema biende ne ulekela kubienza. Tshilejilu, pavua Yezu mubamanyishe ne: bavua ne bua kumushipa, Petelo wakamuambila ne: “Mukalenge, diumvuilaku luse.” Petelo uvua mu bulelela wambila Yezu bua enza bualu buvua Yehowa kayi musue to. Ke Yezu kumuambila ne: uvua wakula anu bu Diabolo.
Yezu wakapingaja Petelo mu njila misangu mikuabu ya bungi. Bu muvuaye ne budipuekeshi, wakitaba mibelu misangu yonso ayi. Tshilejilu, butuku bua muladilu wa lufu lua Yezu, Yezu uvua wenda ulongesha bapostolo bende bua bikale ne budipuekeshi. Wakatuadija kubuowesha mâyi ku makasa bienze anu bu muena mudimu wabu. Kadi Petelo uvua ukeba kumupangisha bua kamuoweshi mâyi to, kumuambilaye ne: “Bushuwa wewe kuakungowesha mâyi ku makasa nansha kakese.” Yezu wakamubela kayi udia tshibanga, kumuambilaye ne: “Meme tshiyi mukuoweshe mâyi, kuena ku luseke luanyi to.” Petelo kumulombaye bua amuenzele tshintu tshivua tshibengangana ne tshivuaye ufuma ku dimuambila atshi, wakamulomba bua kamuoweshi anu ku makasa nkayaku to, kadi amuoweshe kabidi ku bianza ne mu mutu. Yezu wakamubela kabidi. Anu butuku abu, wakabambila ne: bonso buabu bavua ne bua kunyema kumushiya. Kadi Petelo wakamuambila ne: “Nansha bakuabu bonsu bakushiye, meme tshiena mua kukushiya nansha.” (Mâko 14:29, MMV) Yezu kumuambilaye ne: uvua ne bua kumuvila misangu isatu butuku abu.
Katantshi kakese pashishe, basalayi bakalua kukuata Yezu, kumusuikabu ne kuyabu nende. Bu muvua Petelo ne dikima, uvua wenda ubalonda pa bule. Bakaya ne Yezu mu nzubu mua muakuidi munene muvuabu bamukume ne bamukosele tshibawu tshia lufu nansha muvuaye kayi muenze bualu. Petelo yeye uvua mushadile pambelu. Bamue bantu bavuaye nabu pambelu apu bakamuamba muvuaye muyidi wa Yezu. Kadi wakavila Yezu misangu isatu anu mukavua Yezu mumuambile.
Pamuapa Yezu ukavua mu lutanda lua kuulu, mêsu ende ne a Petelo kutuanganawu. Kanyinganyinga kakole kakakuata Petelo, ‘kupatukaye pambelu pa lubanza luvuaye, kudilaye bikole.’ Pakaluabu kushipa mukalenge wende uvuaye munange, kumushipabu ne tshikisu, wakumvua kanyinganyinga kavuaye kayi muanji kumvua to. Kadi nansha muvua Petelo muenze tshilema tshinene atshi, kakalekela kanyinganyinga aku kamutshibuila panshi to. Wakatungunuka ne kuenzela Yehowa mudimu ne kudisangisha ne bapostolo nende bakuabu. Pakavua Yezu mubishibue ku lufu, wakamuenekela Petelo pa nkayende. Bible kena uleja tshivuabu bayukile to. Kadi tudi bamanye ne: Petelo wakakola mu mikolo pakamanyaye ne: Yezu uvua mumufuile luse.
Yezu wakalua kumuenekela bapostolo bende ku mbuu wa Galela panyima pa mbingu ndambu. Wakenzela Petelo bualu bulenga. Anu bu muvua Petelo muvile Yezu misangu isatu, Yezu wakamupesha mpunga bua ajadike misangu isatu muvuaye mumunange. Bu muvua Yezu umueyemena, wakamupesha mudimu wa mushinga mukole. Kumuambilaye ne: “Udiishe mikoko yanyi mikese.” Anu mutuamona mu nshapita wa 49, Petelo wakatungunuka ne kudiisha mikoko ya Yezu, ne wakatungunuka ne kuenza malu ne dikima too ne pakafuaye.
Bala bualu ebu mu:
Lukonko lua kuelela meji:
Anu mutudi balonge mu nshapita eu, mmushindu kayi uvua Petelo muenze malu ne dikima?
Buela mu buondoke
1. Mudimu wa kuloba uvua nawu Petelo uvua ulomba tshinyi? (it “Dilemba ne diloba” §6-7-wcgr) A
Tshimfuanyi tshia A
2. Bua tshinyi Yezu wakinyika Simona dîna dia Kefa (Petelo)? (ia nshap 21, §8)
3. Ntshinyi tshivua Yezu musue kuamba pavuaye mulombe Petelo ne Andele bua balue “balobi ba bantu”? (Mat. 4:18-20; w16.05 10 §3-4) B
Tshimfuanyi tshia B
4. Katupa kakese kumpala kua Yezu kubanda mu diulu, wakebeja Petelo ne: “Udi munnange kupita ebi anyi?” Uvua mua kuikala wakula bua tshinyi? (ia nshap. 23, §26)
Keba malongesha
Biwikala uluangana ne butekete kampanda, mmunyi mudi tshilejilu tshia Petelo mua kukuambuluisha bua kutungunuka ne kuenzela Yehowa mudimu? C
Tshimfuanyi tshia C
Mmunyi mudi kuelangana meji a muvua Yehowa ne Yezu bafuile Petelo luse mua kukuambuluisha?
Anu bu mutudi bamone mu nshapita eu, mmunyi muudi mua kuenza malu ne dikima bu Petelo?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bilondeshile malu atudi balonge mu nshapita eu, mmunyi muudi umvua bua mudi Yehowa musungule Petelo bua kuya kukokesha ne Kristo mu diulu? Udi umvua nanku bua tshinyi?
Bia kutangila kabidi
Mmunyi mudi baledi mua kulongesha bana babu ne tshilejilu tshia Petelo bua kubaleja mutu Yehowa ufuilangana luse?
Mona muvua Petelo mushale mulamate Yezu pavua bantu bakuabu bamushiye.