50 SHAULA WA KU TÂSO
Wakashintulula nsombelu wende
SHAULA wa ku Tâso ke nsongalume uvua mumone muvua bena Yuda bashipe Stefano.a Shaula uvua mumone ne: bivua bimpe bua kushipa Stefano bualu yeye Shaula uvua witabuja ne dishindika dionso ne: anu ntendelelu wa buena Yuda ke uvua ntendelelu mulelela. Bible udi wamba bua Shaula ne: uvua “ufunyina bayidi ba Mukalenge ne ujinga kubashipa.” Ke bualu kayi wakabakengesha mu Yelushalema, kueleshishaye ba bungi ba kudibu mu buloko, kuitabaye too ne bua babashipe. Bu muvua buluishi buvule, bayidi ba Yezu ba bungi bakanyema mu Yelushalema. Shaula kakimanyina apu to. Wakaya kulomba muakuidi munene mikanda ivua imuanyishila bua kukuata bayidi ba Yezu mu tshimenga tshia Damaseke.
Pakapetaye mikanda ayi, wakaya ne bena diende bakuabu ku nord kua Damaseke. Tshikondo atshi, uvua mutuishibue ne: Yezu kavua ne muoyo to. Pabi Yezu uvua ne muoyo mu diulu muvuaye ne Tatuende. Yehowa ne Yezu bavua bamanye malu mabi a Shaula onso. Nansha nanku, bavua bamone ngikadilu yende mimpe ne bavua bamanye ne: uvua mua kushintuluka ne kubenzela mudimu bikole. Pakafika Shaula ne bena diende pabuipi ne Damaseke, bukenke bukole buvua bupite bukenke bua dîba buakabakenkesha. Shaula wakadiela panshi, katshiyi kabidi umona to.
Wakumvua dîyi dimuambila ne: “Shaula, Shaula, bua tshinyi udi unkengesha?” Dîyi adi diakamutandisha bua muvuaye bu ngombe wa tshitunu uvua udienzela bibi pavuaye uditua ku misongolo ivua mfumuende umusaka nayi. Shaula wakebeja ne: “Wewe udi nganyi, Mukalenge?” Dîyi adi diakamuandamuna ne: “Meme ndi Yezu uudi ukengesha.” Diandamuna adi divua ne bua kuikala dimulenge ku muoyo bikole. Pashishe Yezu wakamuambila bua ajuke, kumuambilaye kabidi bua mudimu uvua mumuindile kumpala. Mudimu au uvua wa kuambuluisha bantu bua bamanye bulelela budi butangila Yezu ne bumvue lumu luimpe lua Bukalenge bua Nzambi.
Muntu wa tshikisu uvua uluisha Yezu ne bayidi bende wakalua muambi wa lumu luimpe wa tshisumi. Ntshinyi tshivua tshimuambuluishe?
Shaula mumane kumvua malu onso au, wakamona ne: bivua bikengela ashintuluke. Bu muvuaye kayi muanji kupetulula lumonu, bena diende bakaya nende mu Damaseke. Wakenza matuku asatu kayi udia anyi unua tshintu to, pamuapa bua kuleja muvuaye ne kanyinganyinga kakole bua malu onso avuaye muenze. Uvua mua kuikala usambila bikole, wambila Yehowa muvuaye unyingalala bua muvuaye mukengeshe Muanende munanga. Wakashala mu Damaseke too ne pakalua muena Kristo mukuabu uvua Yezu mutume bua kumukebamu. Diende divua Anania. Anania wakanji kumvua buôwa, kadi wakaya anu kuya. Pakafikaye wakatentekela Shaula bianza ne “bintu bienze bu mabamba biakamata bipatuka mu mêsu ende,” kutuadijaye kumona kabidi. Ukavua udipuekesha bikole ne wakapeta meji a bungi kupita konso eku. Pashishe “wakajuka, kubatijibuaye.”
Bu mukavuaye mulue muena Kristo wakatuadija kuyisha. Pamutu pa kupinganaye ku Yelushalema, wakenza bualu buvua ne bua kuikala kabuyi bupepele to. Wakaya mu nsunagoga wa mu Damaseke, muvuaye mumanyike bu mukengeshi wa bayidi ba Yezu. Uvua ne bua kuikala mulombe Yehowa dikima. Difuanyikijila muvua bantu mua kuikala bakeme pakabambilaye ne: uvua muenze malu mabi matambe ne ukavua mulue mpindieu muyidi wa Yezu! Kadi kakimanyina apu to, “uvua anu wenda upeta bukole bua bungi ne utuisha bena Yuda ba mu Damaseke bapanga tshia kuamba, pavuaye ujadika malu malondangane bimpe ne: eu udi Kristo.”
Yeye mumane kupitshisha tshikondo mu Damaseke, wakaya ku Arabi, pamuapa mu tshipela tshia Sulia. Bible ki mmuleje tshivuaye muyilamu to. Kadi uvua pamuapa musue kuikala nkayende bua kusambila ne kuela meji a mudimu munene uvua mumuindile. Kakalekela kudilongela Mifundu ne kuela meji a bivuaye ulonga to. Uvua bushuwa mushintulule nsombelu wende. Pashishe wakakankamija bena Kristo nende ba ku Lomo bua benze bia muomumue.—Lomo 12:2.
Shaula uvua anu muvuluke malu mabi matambe avuaye muenze ku kale. Wakamba panyima pa bidimu ne: ‘Mvua kumpala mupendi wa Nzambi, mukengeshanganyi ne mupange bukalanga.’ (1 Tim. 1:13) Uvua kabidi munyingalale bikole bua muvuaye muanyishe lufu lua Stefano. (Bien. 22:19-21) Nansha nanku uvua mumanye ne: Yehowa ne Yezu bavua bamufuile luse, ne batungunuke ne kumubenesha.
Shaula wakasombela mu Damaseke bidimu bitue ku bisatu too ne pakaluaye kunyemamu bua mukavua bena Yuda bajinga kumushipa. Bena Kristo bakamunyemesha. Bakamuela mu tshitunga, kumupuekeshilabu lua pa disoso dia tshimanu tshia tshimenga, kuyaye mu Yelushalema. Kutshivua mudimu wa bungi uvua mumuindile.
Bala bualu ebu mu:
Lukonko lua kuelela meji:
Anu mutudi balonge mu nshapita eu, mmushindu kayi uvua Shaula wa ku Tâso muenze malu ne dikima?
Buela mu buondoke
1. Bua tshinyi Shaula wakamba ne: tshimenga tshiabu tshia Tâso tshivua “tshimenga tshidi tshimanyike bimpe”? (Bien. 21:39; w99 15/5 30 §1) A
Todd Bolen/BiblePlaces.com
Tshimfuanyi tshia A: Kutshidi bintu bia mu tshimenga tshia Tâso wa kale bidi bimueneka too ne lelu bu mudi njila udi muenza ne mabue eu
2. Bua tshinyi tudi tuamba ne: Shaula uvua mumanye bimpe bilele bia bena Yuda, bia bena Greke ne bia bena Lomo? (bt 70, kazubu §1-3)
3. Ntshinyi tshivua Shaula ujinga kuamba pakambaye ne: Yezu uvua mumumuenekele “bienze anu bu mumuenekele muana wa kabishi”? (1 Kol. 15:8; w22.09 27)
4. Ntshinyi tshidi tshijadika ne: malu avua Luka mufunde mu Bienzedi 9:11, 24, 25 mmajalame? (g03 8/2 24-26-wcgr) B
Photo by ROLOC Color Slides
Tshimfuanyi tshia B: Ku tshiibi tshia Bab-Sharqi kudi njila udibu babikila ne: Mululame ushikila
Keba malongesha
Shaula wakadipuekesha, kuitabaye bua Anania ne bena Kristo bakuabu bamuambuluishe. (Bien. 9:17, 18; Kolos. 4:10, 11) Mmu nsombelu kayi mutudi ne bua kuitaba bua bakuabu batuambuluishe?
Shaula uvua mua kuditambisha bua malu onso avuaye mukumbaje ne bua tulasa tuvuaye mulonge bua kulua Mufalese. Uvua kabidi mua kudipisha bikole menemene bua malu mabi avuaye muenze ku kale. Kadi kakalekela bionso abi bimupangisha bua kudifila ne muoyo mujima mu mudimu wa Yehowa to. (Filip. 3:4-8; 1 Tim. 1:12-16) Mmunyi mutudi mua kumuidikija? C
Tshimfuanyi tshia C
Tudi bamone mu nshapita eu muvua Shaula wa ku Tâso muenze malu ne dikima. Mmu mushindu kayi mukuabu muudi mua kumuidikija?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bilondeshile malu atudi balonge mu nshapita eu, mmunyi muudi umvua bua mudi Yehowa musungule Shaula bua kuya kukokesha ne Kristo mu diulu? Udi umvua nanku bua tshinyi?
Bia kutangila kabidi
Mu filme eu, neumone muvua muntu mukuabu uvua mukengeshe pende Bantemu anu bu Shaula mulue mutendeledi wa Yehowa wa tshisumi.
Mmunyi mudi tshilejilu tshia Shaula tshituambuluisha bua kuikala ne tshibidilu tshia kudilongela Bible, kunanga bakuabu, ne kuikala ne didipuekesha?
“Tuikalayi bena Kristo badi baya kumpala anu bu Paulo” (w08 15/5 21-25)
a Bakalua kubikila Shaula pashishe ne: Paulo. Nansha nanku, bua mu nshapita eu netumubikile anu ne: “Shaula.”