49 PETELO
Wakalua muntu wa dikima
PAKATUILANGANA Yezu ne Simona, wakamuambila ne: “Wewe udi Simona, muana wa Yone; nebakubikile ne: Kefa.” Bidi bimueneka ne: dîna “Kefa” anyi “Petelo” mu tshiena Greke didi diumvuija “dibue.” Bua tshinyi Yezu uvua mumupeshe dîna adi? Dibue ditu dikole ne kaditu dinyanguka lukasa to, ne batu mene bibaka nadi. Yezu uvua bu uvua wamba ne: Petelo uvua ne bua kulua bu dibue.
Petelo wakalua bu dibue anyi? Mu nshapita wa 45 tuvua bamone muvuaye mupangile ditabuja imue misangu ne muangate mapangadika mabi bua muvuaye ne buôwa. Nansha nanku, Yezu uvua anu umueyemena, mutuishibue ne: uvua ne bua kulua muntu wa dikima. Ke tshiakenzeka anyi?
Panyima pa lufu lua Yezu ne dibishibua diende ku lufu, wakapesha bapostolo bende mudimu munene wa kuamba lumu luimpe. Petelo uvua uzuka bua kuwenza. Wakenza malu ne dikima misangu ne misangu. Tshilejilu, pavua bena Yuda badisangishe binunu ne binunu bua tshibilu ku Yelushalema, Petelo wakakula kumpala kua tshisumbu tshia bantu, kubambilaye kayi utshina ne: bavua bashipe Masiya. Bantu ba bungi bavua bumvue malu au bakanyingalala bualu “akabalenga ku muoyo.” Nunku bantu batue ku 3 000 bakabatijibua, kuluabu bayidi ba Yezu.
Ntshinyi tshivua tshiambuluishe Petelo bua kulua muntu wa ditabuja dikole ne dikima dia bungi?
Mudimu wa diyisha au wakalua mudimu munene uvua Petelo wenza. Yezu wakamupesha “nsapi ya Bukalenge,” mmumue ne: Petelo uvua ne bua kupesha bisumbu bia bantu bisatu mpunga wa kubuela mu Bukalenge bua mu diulu. Nunku Petelo wakayisha bena Yuda, bena Samalea, ne bantu ba bisamba bikuabu, ubayisha ne dikima kayi ubasunguluja to. Uvua uya miaba ya bungi wenda uyisha ne ukankamija bena Kristo nende; kuvua misangu ivuabu bamufila kudi mukajende. Petelo wakaya too ne mu Babilona, yeye kusombelamu bua kuyisha.
Petelo wakapeta buluishi bua bungi mu mudimu au. Tshilejilu, bakabela mu buloko misangu ya bungi yeye ne bapostolo bakuabu. Bamfumu ba ntendelelu wa buena Yuda bakabakandika bua kuyisha. Kadi bakabambila ne: “Tudi ne bua kutumikila Nzambi bu mfumu pamutu pa kutumikila bantu.” Pakumvua bena Yuda bualu abu, bakafiika munda, kubakumabu bikole. Nansha nanku, bakatungunuka anu ne kuambila bantu malu a Bukalenge bua Nzambi ne a Yezu Mukalenge wa Bukalenge abu.
Baluishi ba bena Kristo bakadisuika anu bikole bua kuimanyika mudimu wa diyisha. Anu mutuvua bamone mu nshapita mushale, bamfumu ba ntendelelu wa buena Yuda bavua bashipe Stefano. Panyima pa bidimu bu dikumi, mukalenge Helode wakashipesha Yakobo mulunda wa Petelo uvua biende mupostolo. Helode wakamona ne: lufu lua Yakobo luvua lusankishe bena Yuda. Nanku wakatuma dîyi bua bakuate Petelo. Basalayi bakamusuika ne shene, kumuelabu mu buloko, kushalabu bamulame bua kanyemi to. Petelo uvua udiebeja bikala bualu buvua Yezu mumuambile kumpala kua kubandaye mu diulu buvua bukumbane. Yezu uvua mumuambile ne: bavua ne bua kumusuika, kumuela mu buloko ne kumushipa.
Butuku muanjelu wakamumuenekela, yeye kumujula. Wakamumbusha shene ivuabu bamusuike ayi, kumupatulaye mu kazubu ka buloko kavuaye, kupitabu basalayi bavua bamulame, kufikabu ku tshiibi tshia tshiamu, kupatukabu too ne mu njila. Petelo wakenza tshinyi pashishe? Kakela meji a kunyema mu Yelushalema bua kusungila muoyo wende to. Kadi wakaya muaba uvua bena Kristo nende badisangishila bua kutendelela Yehowa. Difuanyikijila muvuabu bumvue disanka ne bakoleshibue pakamumonabu!
Petelo uvua anu muvuluke tshivua Yezu mumuambile tshia ne: “Kolesha bana benu”; “udiishe mikoko yanyi mikese.” (Luka 22:32; Yone 21:17) Petelo wakayisha ne dikima, kukoleshaye bena Kristo nende konso kuvuaye uya. Nansha nanku, uvua wenza bilema. Tshilejilu, wakabenga bua kudia ne bamue bena Kristo nende bualu uvua ne buôwa bua tshivua bantu bakuabu mua kuamba. Bua bualu abu mupostolo mukuabu wakamubela. Wakadipuekesha, kuitabaye mubelu au ne kakenzulula tshilema atshi to. Wakatungunuka ne kukankamija bena Kristo nende. Kufundaye mikanda ibidi ya mu Bible ku bukole bua nyuma. Wakashala ne lulamatu kudi Yehowa too ne ku ndekelu, tuambe ne: pavuabu bamuele mu buloko ne bamushipe. Bushuwa Petelo wakalua dibue anu muvua Yezu muambe. Wakenza malu ne dikima ne ditabuja dikole ne wakakolesha bena Kristo nende.
Bala bualu ebu mu:
Lukonko lua kuelela meji:
Mmushindu kayi uvua Petelo muenze malu ne dikima?
Buela mu buondoke
1. Yezu wakapesha Petelo “nsapi ya Bukalenge.” Ntshinyi tshiakenzaye nayi? (Mat. 16:18, 19; bt 64, kazubu) A
Tshimfuanyi tshia A: Petelo wakayisha mukenji wa Bukalenge kudi bena Yuda mu Yelushalema, kudi bena Samalea mu Samalea ne kudi bantu ba bisamba bikuabu ku Kaisalia
2. Bua tshinyi tudi tuamba ne: Petelo uvua munange bantu bavua kabayi bena Yuda kumpala kua kuyaye kumonangana ne Konelio uvua muntu wa bisamba bikuabu? (Bien. 10:5-7, 23; bt 77 §1, dim.) B
Tshimfuanyi tshia B: Muaba uvua tshimenga tshia Yopa ku kale
3. Ntshinyi tshidi tshileja ne: Petelo wakitaba mubelu uvua Paulo mumupeshe? (w17.04 26-27 §15-17)
4. Bua tshinyi Petelo wakaya kusombela mu Babilona? (w14 15/1 24 §9)
Keba malongesha
Petelo wakakula ne dikima ne kanemu kumpala kua musumba wa bantu mu Yelushalema. Ndîba kayi didibi mua kutulomba bua kuakula ne kanemu ne dikima?
Nansha muvua Petelo mupostolo, wakitaba mubelu uvua Paulo mumupeshe. Mmunyi mutudi mua kumuidikija? C
Tshimfuanyi tshia C
Anu bu mutudi bamone mu nshapita eu, mmunyi muudi mua kuenza malu ne dikima bu Petelo?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bilondeshile malu atudi balonge mu nshapita eu, mmunyi muudi umvua bua mudi Yehowa musungule Petelo bua kuya kukokesha ne Kristo mu diulu? Udi umvua nanku bua tshinyi?
Bia kutangila kabidi
Mmunyi mutudi mua kuidikija Petelo ne kueyemena Yehowa patudi ne buôwa?
Angata mudimu eu bua kulonga malu makuabu a mu muyuki udi mu Bienzedi nshapita wa 10.
“Nzambi kena ne kansungansunga to” (“Biena-bualu bia mu jw.org “Midimu ya mu dilonga dia Bible”-wcgr)