54 MUPOSTOLO YONE
Wakenza malu ne dikima mu nsombelu mukole
PAKAVUA mupostolo Yone mukulakaje bikole, wakafunda ne: “Edi ndîba dia ndekelu.” Uvua mumanye ne: Yezu ne Paulo bakavua bakule bua tshikondo tshivua batontolodi ne bua kubuela mu tshisumbu ne kusaka bantu bua balekele kutendelela Yehowa mudiye wanyisha. Pakatuadija butontolodi, Yone ne bapostolo bakuabu bakakuba tshisumbu bua katshinyanguki to. (Mat. 7:15; Bien. 20:29, 30; 2 Tes. 2:6, 7) Kadi bapostolo bakuabu bakalua kufua, Yone kushalaye nkayende. Ke bualu kayi wakafunda ne: “Edi ndîba dia ndekelu.” Uvua mumone muvua butontolodi buenda bumuangalaka mu bisumbu. Wakela pamuapa meji ne: buena Kristo buvua mua kujimina. Nansha nanku, kakateketa mu mikolo to.
Pakavua Yone mukulakaje, bakamukengesha, kumutumabu mu buloko ku Patemo, ne kumonaye muvua batontolodi banyange tshisumbu. Ntshinyi tshivua tshimuambuluishe bua kunanukila?
Pakavuaye ne bidimu bipite pa makumi tshitema, utshivua anu ‘wakula bua bualu bua Nzambi ne ufila bumanyishi bua bualu bua Yezu.’ Bakamukuata bua bualu abu, kumutumabu mu buloko ku Patemo, tshidiila tshivua bu tshipela. Ntshinyi tshivua tshimuambuluishe bua kushala anu ne dikima? Uvua ne bua kuikala muvuluke mulayi wa Yezu eu: “Ndi nenu matuku onso too ne ku nshikidilu kua ndongoluelu wa malu eu.”—Mat. 28:20.
Panyima pa bidimu bipite pa makumi asambombo Yezu mumane kufila mulayi au, Yone uvua musanke bikole bua kumona kabidi Yezu ne kumuteleja mu tshikena kumona tshia dikema, muvuaye mumone malu avua ne bua kulua kuenzeka. Tshivua tshiakula bua “dituku dia Mukalenge” dikala batendeledi ba Yehowa ne bua kumutendelela kabidi mu mushindu udiye wanyisha. Yezu wakamuleja kabidi ne: uvua mua kubambuluisha bua kukandamena Satana ne kushala ne lulamatu kudi Yehowa.
Bakaleja Yone malu au mu bimanyinu. Bidi bimueneka ne: kavua muumvue onso bimpe to. Kadi kuvua bualu buvuaye mumvue bimpe bua ne: Yehowa ne Yezu kabavua mua kulekela butontolodi bunyanga tshisumbu kashidi to. Mu dituku dia Mukalenge, bantu ba Yehowa bavua ne bua kuvula ne kupeta mabenesha a bungi. Mvita ivua ne bua kuenzeka mu diulu, bavua ne bua kutshimuna Satana ne kumuimansha pa buloba, pashishe balua kumubutula bua kashidi. Tshikena kumona atshi tshivua ne bua kuikala tshipeteshe Yone dikima dia bungi ne wakafunda “malu onso avuaye mumone” au ne bujalame.
Dikala muena buloko ku Patemo kadivua ditekeshe Yone to. Bakamuitabila bua kumbuka ku Patemo pamuapa panyima pa lufu lua Domitien, amperere wa Lomo uvua mukengeshe bena Kristo bikole. Bidi bimueneka ne: wakapingana ku Efeso. Pakavuaye ne bidimu bitue ku 100, Yehowa wakamupesha mudimu mukuabu munene.
Mudimu au uvua wa kufunda Evanjeliyo muinayi, mmumue ne: Evanjeliyo wa ndekelu. Bidi bimueneka ne: uvua mumanye ne: malu avuaye ufundamu au avua ne bua kufika mu bisumbu bionso ne kupetesha bantu bungi kabuyi kubala dikima ne ditabuja. Uvua kabidi mumanye ne: baluishi ba bena Kristo bavua ne bua kumukina bua bualu abu. Nansha nanku, kakatshina to.
Nansha mukavua bidimu bu 70 bipite panyima pa lufu lua Yezu, nyuma muimpe wakambuluisha Yone bua kuvuluka malu avua Yezu muambe ne muenze. Wakafunda malu a dikema a nsombelu wa Yezu, ne a bungi a kudiwu kaena mu Evanjeliyo mikuabu to. Tshilejilu, wakafunda bua dibishibua dia Lazalo ku lufu ne bua muvua bamfumu ba ntendelelu wa buena Yuda bajinge kushipa Lazalo. (Yone 11:1-46; 12:10) Wakafunda malu makuabu mimpe a bungi avua Yezu muambile bayidi bende butuku bua muladilu wa lufu luende ne bua muvuaye musambile bua bualu buabu butuku abu. Tudi ne dianyisha dia bungi bua malu adi Yone mufunde aa, ikala ne bua kupetesha bena Kristo bonso dikima!
Anu pabuipi ne tshikondo atshi, Yone wakafundila kabidi bena Kristo nende mikanda isatu ku bukole bua nyuma. Uvua mubambile ne dikima dionso bua butontolodi bukavua bumuangalake mu matuku au, ubadimuija bua kubenga kusomba ne batontolodi, kubenga kubela too ne muoyo. Wakakula kabidi bikole bua dinanga ne bua ditekemena. Kulongeshaye ne: “Nzambi udi dinanga,” yeye kuleja dinanga adi pavuaye ukankamija bena Kristo nende ne ubabela. Uvua kabidi mufunde bua disanka dinene divuaye nadi bua muvua bana bende ba mu nyuma batungunuka ne “kuenda mu bulelela.” Mêyi ende aa avua ne bua kuikala masake ba bungi ba kudibu bua kuendela anu mu bulelela.
Lelu, butontolodi butshidi anu ne njiwu. Yehowa kakuitaba bua bunyange kabidi tshisumbu bu muvuabi bienzeke bidimu bia bungi panyima pa lufu lua Yone to. (Yesh. 54:17; Bien. 3:21) Kadi badi mua kutuluisha, kutukengesha, kutuela too ne mu buloko anu bu Yone. Tulondayi tshilejilu tshiende. Nansha bia kumona lufu, tuikalayi badisuike bua kutungunuka ne kuenda ne Nzambi bikale anu ne dikima!
Bala bualu ebu mu:
Lukonko lua kuelela meji:
Mmushindu kayi uvua Yone muenze malu ne dikima?
Buela mu buondoke
1. Ntshinyi tshidi tshileja ne: Yone uvua muntu wa mashi luya? (bt 37, kazubu §3-4)
2. Bua tshinyi bavua bamba ne: Yone ‘kavua mulonge ne uvua muntu tshianana’? (Bien. 4:13; w08 15/5 30 §6)
3. Mmu ngumvuilu kayi muvua Yone mushale too ne pavua Yezu mulue? (w05 15/1 13 §14-15)
4. Bua tshinyi tudi tuamba ne: Yone ke uvua mufunde Evanjeliyo udi ne dîna diende? (it “Lumu luimpe luamba kudi Yone” §2-8-wcgr) A
Fondation Martin Bodmer, Cologny (Genève)
Tshimfuanyi tshia A: Maniskri a mu tshidimu bu tshia 200 P.Y. mikale ne tshiena-bualu (tshidi mu kazubu) “Lumu luimpe lufunda kudi Yone”
Keba malongesha
Mu mikanda ivua Yone mufunde ku bukole bua nyuma, mmuakulamu misangu mipite pa lukama bua mulambu wa Yezu ne bua malu mimpe adiwu utupetesha. Mmunyi mutudi mua kuleja dianyisha dia muomumue bua mulambu wa Yezu?
Bidi bimueneka ne: Yone ukavua ne bidimu bitue ku 100 pakafundaye mikanda itanu ya mu Bible. Ntshinyi tshidi bualu ebu butulongesha bua mushindu udi Yehowa umona bakulakaje? B
Tshimfuanyi tshia B
Mmu mushindu kayi mukuabu muudi pebe mua kuenza malu ne dikima bu Yone?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mmunyi muudi umvua bua mudi Yehowa musungule Yone bua kuya kukokesha ne Kristo mu diulu? Udi umvua nanku bua tshinyi?
Bia kutangila kabidi
Bena Kristo ba lelu bakadi bakulakaje badi mua kuenza malu ne dikima bu Yone anyi?
Yone mmuakule bikole bua dinanga. Mona tshidi tshilejilu tshiende ne malu avuaye mufunde ku bukole bua nyuma mua kutulongesha.
“Malu adi tshilejilu tshia ‘muyidi uvua Yezu munange’ tshitulongesha” (w21.01 8-13)