Wewe muanetu ukadi mukulakaje, udi ne mushinga mu tshisumbu

Pamuapa bukulakaja budi bukupangisha pebe bua kuenza malu auvua ukokesha bua kuenza kumpala. Nansha muudi wenzela Yehowa mudimu ne lulamatu kukadi bidimu bia bungi, udi mua kuikala ukadi udimona kutshiyi ne mushinga bua muudi kuyi ukokesha bua kuenza kabidi malu bu kumpala. Tshilejilu, udi mua kutuadija kufuanyikija biudi wenza mpindieu ne biuvua wenza kale. Biobi bikufikila nanku, ntshinyi tshiudi mua kuenza?

TSHIDI YEHOWA MUSUE BUA WENZE

Diebeja ne: ‘Ntshinyi tshidi Yehowa musue bua ngenza?’ Mêyi adi mu Dutelonome 6:5 adi mua kukukankamija. Mvese eu udi wamba: “Udi ne bua kunanga Yehowa Nzambi webe ne muoyo webe wonso ne anyima webe yonso ne bukole buebe buonso.”

Anu mudi mvese eu muleje, Yehowa mmusue bua umuenzele mudimu ne muoyo webe wonso, ne anyima webe yonso, ne bukole buebe buonso. Kuenzela Yehowa mudimu mushindu eu, kudi mua kukuambuluisha bua kuikadi udifuanyikija ne bakuabu anyi ufuanyikija biudi wenza mpindieu ne biuvua wenza kale to.

Udi wela meji kayi, mmushindu kayi uuvua wenzela Yehowa mudimu pauvua nsonga? Batendeledi ba Yehowa ba bungi batu bandamuna lukonko elu ne: bavua bamuenzela mudimu ne muoyo wabu wonso. Wewe pebe uvua mumuenzele mudimu ne muoyo webe wonso bilondeshile nsombelu uuvua nende tshikondo atshi. Pamuapa udi wenza muebe muonso bua kumuenzela mudimu bilondeshile tshiudi mpindieu. Wewe muele meji bimpe, neumone pamuapa ne: udi wenzela Yehowa mudimu ne muebe muonso anu bu muuvua wenza kumpala.

UDI MUA KUAMBULUISHA BAKUABU NE MALU AUDI MUMANYE

Pamutu pa kutuma meji anu ku malu audi kutshiyi mua kuenza, atume ku mpunga iudi nayi ya kuambuluisha bakuabu. Mpindieu uukadi mukulakaje, kudi amue malu audi mua kuenza auvua kuyi mua kuenza pauvua bansonga to. Tshilejilu, udi mua kuenza bualu ebu:

Udi mua kuambila bakuabu malu audi mulonge mu nsombelu webe. Ela meji a tshidi Bible wamba mu mvese idi ilonda eyi:

Mukalenge Davidi: “Mvua nsonga, mpindieu nkadi mukulakaje, kadi tshiena muanji kumona muntu muakane mulekelela, peshi bana bende benda bakeba tshiakudia to.”​—Mis. 37:25.

Yoshua: “Mpindieu monayi! nkadi pa kufua, ne nudi bamanye bimpe ne muoyo wenu wonso ne anyima wenu yonso ne: kakuena dîyi nansha dimue dia mu malu mimpe onso avua Yehowa Nzambi wenu munulaye didi dipange kukumbana. Onso mmalue malelela kunudi. Dîyi nansha dimue dia kudiwu ki ndipange kukumbana to.”​—Yosh. 23:14.

Pamuapa uvua mua kuikala muambe pebe mêyi a buena aa. Kadi bu muvua Davidi ne Yoshua bamone malu aa misangu ya bungi munkatshi mua bidimu bia bungi, mêyi abu adi ne mushinga wa bungi.

Biobi ne: udi wenzela Yehowa mudimu kukadi bidimu bia bungi, udi pebe mua kuakula bua malu avua Yehowa mukuenzele anyi avuaye muenzele bantu bakuabu audi bamanye. Utshidi muvuluke tshikondo tshiwakamona muvua Yehowa muambuluishe batendeledi bende mu mushindu kampanda wa pa buawu anyi? Biobi nanku, udi mua kulondela bakuabu bualu abu, bualu budi mua kubakolesha anu muvuabu bukukoleshe pebe. Wewe ulondela bena Kristo nebe malu a mu nsombelu webe, bidi mua kubakankamija bikole.​—Lomo 1:11, 12.

Mushindu mukuabu wa kukankamija bena Kristo nebe ngowu eu: ikala ne tshibidilu tshia kubuela mu bisangilu ku Nzubu wa Bukalenge. Wewe wenza nanku, neukankamije bakuabu ne nebakukankamije pebe. Connie utukadi batele udi wamba ne: “Kubuela mu bisangilu ku Nzubu wa Bukalenge nkungambuluishe bua kubenga kuteketa mu mikolo. Tshiena mua kudiumvua mubungame to, bualu bana betu batu bangenzela malu adi aleja mudibu bannange. Ntu mpesha bana betu nansha tuntu tukese bua kubaleja dianyisha. Ntu ndienzeja kabidi bua ntungunuke anu ne kuenza malu a mu nyuma pamue ne bena Kristo nanyi.”

YEHOWA UDI WANYISHA MUDIMU UUDI UMUENZELA NE LULAMATU

Mu Bible mudi bilejilu bia bungi bia bantu bavua Yehowa munange nansha muvuabu kabayi kabidi ne mushindu wa kuenza malu bu kumpala to. Tuakulayi bua Shimeona. Ukavua mukulakaje tshikondo tshivuabu balele Yezu. Pavua Shimeona uya ku ntempelo, bidi bimueneka ne: uvua umona muvua bansongalume benzaku mudimu wa mushinga. Pamuapa bua buntu, uvua mua kuikala muele meji ne: kavua kabidi ne mushinga kudi Yehowa to, bualu kavua mua kuenza kabidi mudimu bu bansongalume abu to. Kadi Yehowa yeye kavua umumona nanku to. Uvua umumona bu ‘muntu muakane, uvua mudifile,’ yeye kumupesha diakalenga dia kumona Yezu patshivuaye muana. Yehowa wakakuata kabidi nende mudimu bua kuakula dîyi dia buprofete dia ne: Yezu ke uvua ne bua kulua Masiya. (Luka 2:25-35) Bidi bimueneka patoke ne: Yehowa kavua yeye utangila mubidi wa Shimeona wa bukulakaja to, kadi uvua umumona bu muntu wa ditabuja dikole; “ne nyuma muimpe uvua pambidi pende.”

Ikala pebe mutuishibue ne: nansha wewe kuyi mua kuenza kabidi malu bu kumpala, Yehowa udi wangata mudimu wonso uudi umuenzela ne lulamatu ne mushinga wa bungi. Bua Yehowa, bintu bidi bantu bafila “mbianyishibue nangananga bilondeshile bidi muntu nabi, kadi ki mbilondeshile bidi muntu kayi nabi to.”​—2 Kol. 8:12.

Nunku, mbimpe utume meji anu ku biudi mua kuenza. Tshilejilu, ela meji a mishindu mishilashilangane iudi mua kuyisha, nansha bua mêba makese. Udi kabidi mua kukokesha bua kukankamija bena Kristo nebe, paudi ubabikila ku telefone anyi ubafundila mesaje. Tumalu nansha tukese tudibu benzela muntu bua kuleja mudibu bamunange tudi mua kumukankamija bikole, ne bitu nanku nangananga padi udi mumuenzelatu muikale muntu udi wenzela Yehowa mudimu kukadi bidimu bia bungi.

Nansha mukadi bukulakaja bukutekeshe mubidi, udi anu ne mushindu wa kuenzela Yehowa mudimu bilondeshile makanda ebe ne kupatula bipeta bimpe. Bala bualu bua muanetu wa bakaji wa mu Afrique wa ku Est mu kazubu ka “Wakamupandisha.”

Manya ne: mushindu uudi wenzela Yehowa mudimu ne lulamatu kukadi bidimu bia bungi udi mua kukankamija bakuabu bikole. Udi kabidi tshilejilu kudibu bua muudi unanukila. Nunku ikala mutuishibue ne: ‘Nzambi ki mmupange buakane bua kupuaye mudimu webe muoyo ne dinanga diuvua muleje bua dîna diende pa kukuatshila bansantu mudimu ne pa kutungunuka ne kubakuatshilawu.’​—Eb. 6:10.

DIENZEJA BUA KUAMBULUISHA BAKUABU

Makebulula adi bantu benze adi aleja ne: bakulakaje batu bambuluishangana batu ne makanda a mubidi mimpe, bela meji bimpe ne batu balala matuku a bungi.

Nansha nanku, malu mimpe adi bakulakaje benzela bakuabu kaena mua kubajikijila ntatu ya bukulakaja to. Anu Bukalenge bua Nzambi ke buayijikije, bualu nebujimije mpekatu uvua mutukebele bukulakaja ne lufu.​—Lomo 5:12.

Kadi tshiudi mua kuenza mpindieu nkutungunuka ne kuenza tshidi Yehowa ukulomba, tshia kuambuluisha bakuabu bua kumumanya. Dîba adi udi mua kuikala anu ne makanda a mubidi mimpe ne neukoleshe ditekemena diebe. Wewe muanetu ukadi mukulakaje, manya ne: Yehowa udi wanyisha biudi umuenzela, ne bena mu tshisumbu badi banyisha pabu tshilejilu tshiebe tshia ditabuja.