Mua kupesha Yehowa bunême dituku dia dibaka dienu

1-2. Yehowa udi unujingila tshinyi dituku dia dibaka dienu?

NUKADI nukeba kuselangana anyi? Biobi nanku, nudi ne disanka dia bungi be! Pamuapa nudi nuenda nulongolola malu enzeka dituku dia dibaka dienu. Yehowa mmusue bua nuikale ne disanka dituku adia ne nutungunuke ne kuikala nadi mu dibaka dienu.​—Nsu. 5:18; Msol. 3:11.

² Yehowa mmukumbane bua nuenu kumupesha bunême dituku dia dibaka dienu. Bua tshinyi tudi tuamba nanku? Mmunyi munudi mua kumupeshabu? Nansha mudi malu adi mu tshiena-bualu etshi atangila nangananga bantu badi bakeba kuselangana, mibelu idimu idi mua kutuambuluisha tuetu bonso badi babuela mu tshibilu tshia dibaka diabu anyi badibu balomba mibelu ya mudibu mua kutshilongolola.

BUA TSHINYI MBIMPE NUPESHE YEHOWA BUNÊME?

3. Ntshinyi tshidi bantu badi bakeba kuselangana ne bua kuenza padibu balongolola malu enzeka dituku dia dibaka diabu? Bua tshinyi?

³ Bana betu badi bakeba kuselangana badi ne bua kulongolola dibaka diabu bilondeshile mêyi manene a Yehowa adi mu Bible. Bua tshinyi? Bualu yeye ke udi muenze dibaka. Yeye ke uvua muenze dibaka dia kumpala, dia Adama ne Eva. (Gen. 1:28; 2:24) Nunku bana betu badi bakeba kuselangana badi ne bua kuela meji bikole bua malu enzeka dituku dia dibaka diabu apeshe Yehowa bunême.

4. Mbualu kayi bukuabu budi mua kusaka bantu badi bakeba kuselangana bua kupesha Yehowa bunême dituku dia dibaka diabu?

⁴ Bualu bukuabu bua mushinga budi mua kusaka bantu badi bakeba kuselangana bua kulongolola malu adi apesha Yehowa bunême dituku dia dibaka diabu budi ne: Yehowa nTatu wabu wa mu diulu ne mmulunda wabu munene. (Eb. 12:9) Kakuyi mpata, nudi basue kuikala anu nende mu malanda mimpe. Nunku kanuakujinga bua bualu nansha bumue budi mua kunyingalaja mulunda wenu munene eu buenzeke dituku dia dibaka dienu to. (Mis. 25:14) Nuenu bele meji a malu onso akadi Yehowa munuenzele ne anuenzelaye, nenumone ne: mmukumbane bua nuenu kumupesha bunême dituku dia dibaka dienu.​—Mis. 116:12.

MMUSHINDU KAYI UNUDI MUA KUPESHA YEHOWA BUNÊME?

5. Mmunyi mudi Bible mua kuambuluisha bana betu badi bakeba kuselangana bua kulongololabu dibaka diabu?

⁵ Mu Bible kamuena mikenji idi ileja tshidi bena Kristo ne bua kuenza dituku dia dibaka diabu to. Ke bualu kayi badi mua kudilongolola bilondeshile mushindu utubu badienza muaba udibu basombele anyi bilondeshile mudibu basue. Bena Kristo badi kabidi batumikila mikenji ya mbulamatadi idi itangila dibaka. (Mat. 22:21) Kadi bobu balongolole dibaka diabu adi bilondeshile mêyi manene a mu Bible, nebapeshe Yehowa bunême ne nebamusankishe. Mmêyi manene kayi anudi ne bua kuvuluka?

6. Bua tshinyi mbimpe bua bantu badi bakeba kuselangana batumikile mikenji ya mbulamatadi idi itangila dibaka?

⁶ Tumikilayi mikenji ya mbulamatadi. (Lomo 13:1, 2) Mbulamatadi ya matunga a bungi mmiele mikenji idi bantu badi bakeba kuselangana ne bua kutumikila. Nunku bidi bikengela bantu badi bakeba kuselangana bamanye mikenji ya mu ditunga diabu. Bobu basue kuyimanya, badi mua kuebeja bakulu.b

7. Mmalu kayi adi makumbane bua kuenza dituku dia dibaka?

⁷ Enzayi bua malu enzeka dituku dia dibaka dienu ikale mimpe. (1 Kol. 10:31, 32) Dienzejayi bua malu enzeka dituku dia dibaka dienu aleje munudi ne ngikadilu ya nyuma wa Nzambi pamutu pa kuleja malu a mubidi a nyuma wa bena panu. (Gal. 5:19-26) Bu mudibi ne: mulume ke wikala mfumu wa dîku, yeye ke udi ne mudimu wa kuenza bua malu enzeka dituku dia dibaka diabu asankishe bantu ne avuije dibaka diabu dia kunemekibua. Mmunyi mudibu mua kufika ku dienza dibaka dia mushindu eu? Bobu babenzele muyuki wa dibaka muangatshila mu Bible ne dinanga ne musangelu ne kanemu, nebibambuluishe bobu ne bantu bonso badi bawuteleja bua kumvua ne: dibaka ndipa dia kudi Yehowa. Newubambuluishe kabidi bua kumona ne: tshikondo atshi ki ntshikondo tshia bilele to. Ke bualu kayi bana betu badi baselangana batu basue bua babenzele muyuki au ku Nzubu wa Bukalenge, kuoku mushindu. Nuenu basue bua banuenzele muyuki ku Nzubu wa Bukalenge, fundilayi bakulu kumpala kua dîba bua kubalomba dianyisha.

8. Ntshinyi tshinudi mua kuenza bua difesto dia dibaka dienu dipeshe Yehowa bunême? (Lomo 13:13)

⁸ Bala Lomo 13:13. Nuenu balongolole bua kuenza difesto dia dibaka, ntshinyi tshinudi mua kuenza bua malu enzekamu aleje ne: kanuena nulonda nyuma wa bena panu to? Muaku wa mu tshiena Greke udibu bakudimune ne: “bibilu bia bisankasanka” udi wakula bua bibilu bidi bantu benza, banuamu maluvu bakuatshika, belamu mijiki, yimba too ne mu mêba makole a butuku. Nuenu basue kuelela bantu maluvu makole mu difesto dienu adi, dianjilayi kulongolola malu bua muntu kanu kapitshishi to.c Nuenu basue bua kuela mijiki, nudienzeje bua mêyi a bisanji kaapangishi bantu bua kuyukila to. Mbimpe nudianjile kuteleja mijiki inuelamu ne malu adibu bambamu bua kayilu kulenduisha bakuabu to.

9. Ntshinyi tshidi badi baselangana ne bua kuvuluka padi bantu bakuabu babalomba bua kuamba mêyi kampanda anyi kuenza malu kansanga mu difesto diabu?

⁹ Imue miaba, patu bantu benza difesto dia dibaka, balunda babu ne bena mu mêku abu batu bimana kuulu bua kuamba malu kampanda adi abatangila. Mu mafesto makuabu a mabaka, batu belamu filme anyi baleja bantu foto ya badi baselangana peshi benzamu malu makuabu. Malu au atu pawu enza bua dituku dia difesto dikale dia pa buadi. Nansha nanku, nutabalele bua kaatekeshi bantu to. (Filip. 4:8) Diebejayi ne: ‘Malu aa nealeje ne: tudi tunemeka bakuabu ne tuangata dibaka ne mushinga anyi?’ Kadi lukonko lua mushinga mukole lunudi mua kudiela ndua ne: ‘Malu aa neapeshe Yehowa bunême anyi?’ Nansha mudibi kabiyi bibi bua kuamba tumalu tudi tusekesha bantu, kadi mbimpe kuepuka malu adi atuma meji a bantu ku malu a disangila. (Ef. 5:3) Balela benu anyi balunda benu bobu ne bia kuamba mu difesto dia dibaka dienu, bambilayi malu adibu ne bua kuepuka.

10. Bua tshinyi mbimpe bantu badi baselangana bikale ne bupuekele padibu balongolola difesto dia dibaka diabu? (1 Yone 2:15-17)

¹⁰ Ikalayi ne bupuekele. (Bala 1 Yone 2:15-17.) Patu batendeledi ba Yehowa badienzeja bua kumupesha bunême, kabayi bakoka ntema ya bantu kudibu, Yehowa utu usanka. Nunku, bena Kristo badi ne bupuekele kabakukeba bua kutula makuta mapite bungi ne kukeba bua ‘kudileja’ to. Nuenu benze nanku, nebinuambuluishe anu muvuabi biambuluishe muanetu Mike wa mu Norvège. Udi wamba ne: “Bu mutuvua katuyi bakebe bua difesto dia dibaka dietu dikale dia tuyayi tukamona, katuakabuela mabanza to. Biakatuambuluisha bua kutungunuka ne bumpanda-njila. Dituku dia dibaka dietu divua dimpe ne katuakudipua muoyo to.” Muanetu wa bakaji wa mu Inde, diende Tabitha, udi wamba ne: “Bu mutuvua katuyi bakebe bua kuenza difesto dia batumone batuambe, katuvua ne malu a bungi a kulongolola to. Biakatuambuluisha bua kubenga kusamisha mutu bikole ne katuvua ne mapangadika a bungi avua mua kutufikisha, meme ne mubangila wanyi ne balela betu ku dipanga kupetangana to.”

11. Mmunyi mudi mvuadilu wa bana betu badi baselangana ne didilengeja diabu mua kuleja ne: badi ne bupuekele? (Tangila kabidi bimfuanyi.)

¹¹ Nukadi basungule bia kuvuala dituku dia dibaka dienu anyi? Kakuyi mpata, nudi basue bua nuikale ne tshimuenekelu tshimpe menemene dituku adi. Nansha tshikondo tshia kale, pavua bantu bakeba kuselangana, bavua benza muabu muonso bua bikale ne tshimuenekelu tshimpe. (Yesh. 61:10) Bushuwa, binudi mua kuvuala dituku dia dibaka dienu bidi mua kushilangana ne binudi mua kuvuala bikondo bikuabu. Kadi nutabalele bua binudi nuvuala dituku dia dibaka dienu abi kabilenduishi bantu to. (1 Tim. 2:9) Kanuenji bua bilamba ne didilengeja dienu bikale biobi ne mushinga wa bungi menemene dituku dia dibaka dienu to.​—1 Pet. 3:3, 4.

12. Bua tshinyi mbimpe bana betu badi baselangana batabalele bua bilele bia muaba udibu basombele bidi bibengangana ne Bible kabienzeki mu difesto dia dibaka diabu?

¹² Epukayi bilele bidi bibengangana ne Bible. (Buak. 18:4) Patu bena panu baselangana, misangu ya bungi batu benza bilele bidi mu diumvuangana ne ntendelelu wa dishima, bia malu a mîdima, ne bia malu a bitabataba. Yehowa mmutukandike malu onso a bukoya au. (2 Kol. 6:14-17) Bantu ba muaba unudi basombele bobu benza bilele kampanda binudi numona bu ne: kabiena bisankisha Yehowa, enzayi makebulula bua kumanya kudibi bifumina ne bua kupeta mêyi manene a mu Bible adi mua kunuambuluisha bua kusungula binudi mua kuenza mu difesto dia dibaka dienu.

13. Mmunyi mudi bana betu badi baselangana mua kuikala ne mmuenenu wa Yehowa bua kado?

¹³ Bantu ba muaba unudi basombele batu belangana kado mu mafesto a mabaka anyi? Muntu udibu babikila mu difesto dia dibaka udi mua kufila kado bilondeshile bungi bua makuta adiye nawu. Bushuwa, bena Kristo mbakankamijibue bua kupeshangana bintu; ne batu bumvua disanka patubu babifila. (Nsu. 11:25; Bien. 20:35) Kadi kanuenzeji bantu bua kufila kado anyi kubafikisha ku dimona ne: bobu bafile kantu kakese, kanuakukanyisha to. Bua kuidikija Yehowa, mbimpe kuikala ne dianyisha bua tshintu tshionso tshidibu mua kunupesha kudi bantu; nulekele banupeshatshi bu mudibu bapangadije mu muoyo wabu.​—2 Kol. 9:7.

TANTAMENAYI NTATU

14. Nntatu kayi itu bamue bana betu badi baselangana bapeta?

¹⁴ Nudi mua kutuilangana ne ntatu tshikondo tshinudi nulongolola difesto dia dibaka dienu didi dipesha Yehowa bunême. Tshilejilu, bidi mua kunukolela bua kulongolola difesto dikese. Charlie wa mu bidiila bia Salomon, udi wamba ne: “Bu mutuvua ne balunda ba bungi, biakatukolela bua kumanya ba kubikila mu difesto dietu dia dibaka. Bualu bukuabu, bilondeshile tshilele tshia kuetu, muntu yonso utu musue bua bamubikile mu difesto dia dibaka!” Tabitha, utukadi batele udi wamba ne: “Bantu ba muaba undi musombele batu batamba kuenza mafesto manene. Ke bualu kayi kabivua bualu bupelele bua baledi betu kuitaba dipangadika dietu dia kubikila bantu batue nansha ku 100 to.” Sarah, wa mu Inde udi wamba ne: “Bamue bantu batu batamba kuimanyina pa makuta a bungi adibu nawu ne pa tshidi bakuabu babamanyine. Bu muvua bana ba bana babu ne tatu benze mafesto manene a mabaka, ngakadimona muenzejibue bua ngenze meme difesto dia kuulu.” Ntshinyi tshidi mua kunuambuluisha bua kutantamena ntatu eyi ne mikuabu idi mua kumueneka?

15. Bua tshinyi disambila didi ne mushinga panudi nulongolola difesto dia dibaka dienu?

¹⁵ Ikalayi nusambila. Nudi mua kuambila Yehowa lutatu luonso lunudi nutuilangana nalu tshikondo tshinudi nulongolola difesto dia dibaka dienu. (Filip. 4:6, 7) Nudi mua kumulomba bua anuambuluishe bua kuangata mapangadika mimpe, bua kanulubakanyi panudi ne malu adi anusamisha mutu, ne bua nuikale anu ne dikima dia kuenza bualu bunudi bapangadije bua kuenza nansha bakuabu bobu babubenga. (1 Pet. 5:7) Nuenu numona mudi Yehowa wandamuna masambila enu, nenumueyemene bikole. Tabitha, utukadi batele udi wamba ne: “Meme ne mubangila wanyi tuvua tusamisha mutu bua mutuvua katuyi tupetangana tuetu babidi, nansha ne bena mu mêku etu mu amue malu. Ke bualu kayi dîba dionso dituvua tukeba kuyukila bua mushindu wenzeka difesto dia dibaka dietu, tuvua tusambila. Bushuwa, Yehowa uvua mutuambuluishe bua kuikale ditalala munkatshi muetu.”

16-17. Mmunyi mudi kuyukidilangana bimpe mua kuambuluisha bantu badi baselangana bua kulongolola difesto dia dibaka diabu?

¹⁶ Yukidilanganayi bimpe ne bukalanga. (Nsu. 15:22) Kudi malu a bungi anudi mua kuyukidilangana, bu mudi disungula dituku dia kuenza difesto dienu, bungi bua makuta a kutula, bungi bua bantu ba kubikila, ne bua malu makuabu. Kumpala kua kuangata dipangadika kampanda, yukidilanganayi bua yonso wa kunudi aleje tshidiye wela meji, ne pashishe nuyukile bua mêyi manene a mu Bible adi mua kunuambuluisha ne bua mibelu idibu banupeshe kudi bena Kristo bashindame mu nyuma. Padi yonso wa kunudi ufila luende lungenyi, mbimpe akule ne dîyi dimpe, ne ikale pabuipi bua kuteleja tshidi bakuabu bamba ne kutshitaba. Tshilejilu, baledi benu bobu basue bua nuenze bualu kampanda budi kabuyi anu bubi mu difesto dienu, kanubengi to. Tshikondo atshi ntshia pa buatshi buabu bobu pabu. Nuenu kanuyi ne mushindu wa kuenza tshidibu banulomba, mbimpe nubumvuije ne kanemu konso malu adi anupangisha bua kutshienza. (Kolos. 4:6) Lejayi bena mu mêku enu patoke ne: tshipatshila tshienu ntshia kuenza difesto dimpe didi dipesha Yehowa bunême.

¹⁷ Bidi mua kunukolela bua kumvuija baledi benu tshinudi kanuyi nuenzela amue malu, nangananga bobu kabayi Bantemu. Kadi nudi anu mua kubafikisha ku diumvua tshinudi kanuyi nuenzela. Muanetu mukuabu wa mu Inde, diende Santhosh, udi wamba ne: “Bena mu mêku etu bavua basue bua tuenze bilele bishilashilangane bia bena Hindu mu difesto dia dibaka dietu. Biakatuangata matuku, meme ne mubangila wanyi bua kubumvuija mapangadika atukavua bangate. Tuakitaba amue malu avuabu batulomba bua kuenza avua kaayi mua kunyingalaja Yehowa to. Tshilejilu, tuakabenga bua kulamba biakudia bitukavua bapangadije bua kulamba, tuetu kulamba bivuabu batuambile. Katuakitaba bua bantu bimbe misambu anyi baje maja to, bualu bena mu meku etu abu kabavua bibidilangane ne malu a mushindu au to.”

18. Ntshinyi tshinudi mua kuenza bua malu enzeke bimpe dituku dia dibaka dienu? (1 Kolinto 14:40) (Tangila kabidi tshimfuanyi.)

¹⁸ Longololayi malu bimpe bimpe. Nuenu badilongolole bimpe, kanuakutamba kusamisha mutu dituku dia dibaka dienu to. (Bala 1 Kolinto 14:40.) Wayne wa mu Taïwan udi wamba ne: “Pakavua dituku dia difesto dia dibaka dietu dilembelele, tuakenza tshisangilu ne bana betu bavua mua kutuambuluisha mu difesto adi. Tuakayukidilangana bua malu atuvua balongolole bua kuenzamu ne kuambulula avua akengela bua malu onso apitakane bimpe dituku adi.” Nudienzeje bua malu onso enzeke pa dîba dituku adi. Dîba adi nebileje ne: nudi nunemeka bantu banudi babikile.

19. Ntshinyi tshinudi mua kuenza bua nuikale batuishibue ne: malu onso enzeka mu difesto dia dibaka dienu neapeshe Yehowa bunême?

¹⁹ Nuenu badianjile kuela meji bua ntatu idi mua kumueneka, nebinuambuluishe bua kuyepuka. (Nsu. 22:3) Tshilejilu, nuenu basombele muaba utu bantu ne tshibidilu tshia kudienzela malu kampanda mu difesto kabayi babanyishile, longololayi malu bua kabienzeki nanku mu difesto dienu to. Enzayi bua balela benu badi kabayi Bantemu bamanye muenzeka malu, ne bumvuijayi munutu numona bilele kampanda bitu bienzeka mu mafesto a mabaka. Mbimpe nubambile bua babale tshiena-bualu tshia “Bantemu ba Yehowa batu benza tshibilu tshia dibaka mushindu kayi?” mu jw.org. Mbimpe nuteke muanetu wa balume mushindame mu nyuma bua ikale “mulombodi wa tshibilu.” (Yone 2:8) Nuenu bamumvuije malu onso anudi balongolole bua difesto dia dibaka dienu bimpe, neenze bua dienzeke mu mushindu udi upesha Yehowa bunême ne nedienzeke anu bilondeshile munuvua badilongolole.

20. Ntshinyi tshidi bana betu badi baselangana ne bua kuvuluka bua dituku dia dibaka diabu?

²⁰ Panudi nuela meji bua malu onso anudi ne bua kulongolola bua tshibilu tshia dibaka dienu, bidi mua kunusamisha mutu bikole. Kadi manyayi ne: tshibilu atshi netshienzeke anu dituku dimue. Dituku adi ke dinuatuadija kuenzela Yehowa mudimu pamue. Dienzejayi bua tshibilu tshia dibaka dienu tshipeshe Yehowa bunême ne katshikadi tshia tuyayi tukamona to. Eyemenayi Yehowa. Yeye munulombole, nenufike ku dilongolola tshibilu tshia dibaka dienu bimpe. Pashishe, nenushale anu nuvuluka malu mimpe avua menzekamu, kanuyi mua kudiela meji to.​—Mis. 37:3, 4.