Shala ne lulamatu kudi Yehowa paudi ulonga tulasa tukuabu

1-2. a) Nansha wewe mupangadije bua kulonga tulasa tukuabu, ntshinyi tshiudi ne bua kutungunuka ne kuenza? b) ‘Kutungunuka ne kuenda mu bulongame mu njila wa muomumue eu’ kudi kumvuija tshinyi? (Filipoyi 3:16)

BAMUE Bantemu ba Yehowa mbapangadije bua kulonga tulasa tukuabu pa kumbusha tua bikadilu tukadibu balonge. Pamuapa mbamone ne: kulonga tulasa atu nekubapeteshe mudimu wambambuluisha bua kuenzela Yehowa mudimu. Wewe mupangadije bua kulonga tulasa tukuabu, ntshinyi tshiwenza bua kushala ne lulamatu kudi Yehowa? (Yak. 4:8a) Kakuyi mpata, uvua mutuilangane ne ntatu pauvua mu tulasa tua bikadilu ivua pamuapa mifuane kukupangisha bua kushala ne lulamatu kudi Yehowa, kadi wakayitantamena. Mpindieu nebikulombe bua ‘utungunuke ne kuenda mu bulongame mu njila wa muomumue eu,’ mmumue ne: utungunuke ne kuenzela Yehowa mudimu ne lulamatu anu bu muudi umuenzelawu.​—Bala Filipoyi 3:16.

² Muaku wa pa muanda wa mu tshiena Greke udibu bakudimune mu mvese eu ne: “kuenda mu bulongame mu njila wa muomumue eu” bavua benza nawu mudimu bua basalayi bavua batungunuka ne kuya kumpala pamue kabayi bimana anyi bapingana tshianyima to. Wewe mupangadije bua kulonga tulasa tukuabu, mbimpe wenze malu bu basalayi abu, ‘utungunuke ne kuya kumpala’ mu mudimu wa Yehowa, kuyi wimana anyi upingana tshianyima to. Mu tshiena-bualu etshi, netumone mêyi manene a mu Bible anayi ikala mua kukuambuluisha. Ukadi muamanye bimpe ne pamuapa muatumikile pauvua mu tulasa tua bikadilu. Nunku mbimpe utungunuke ne kuatumikila paudi wenda ulonga tulasa tukuabu ne pawatujikija.

IKALA WENZA MALU ADI AKOLESHA BULUNDA BUEBE NE YEHOWA

3. Paudi ubuela mu tulasa tukuabu, ntatu kayi iudi mua kutuilangana nayi mu malu ebe a ku dituku?

³ Ntatu idi mua kumueneka. Paudi ulonga tulasa tukuabu, newikale ne bia bungi bia kuenza dituku dionso kupita kumpala. Bu muwajinga bua kukuata mu kalasa, udi mufuane kubanga kumona bu ne: malu a Yehowa kaena ne mushinga menemene to. Udi mene mua kutuadija kulengulula bua kuya mu bisangilu, kuyisha, kudibadila Bible ne kusambila.​—Buak. 2:4.

4. Ntshinyi tshidi mua kukuambuluisha bua ‘wikale amu ne bia bungi bia kuenza mu mudimu wa Mukalenge’? (1 Kolinto 15:58)

⁴ Bala 1 Kolinto 15:58. Bua dikalu kuyadi kumpala, anu muntu mudiendeshe. Ke mudibi kabidi bua wewe kukolesha bulunda buebe ne Yehowa, ‘ikale amu ne bia bungi bia kuenza mu mudimu wa Mukalenge.’ mmumue ne: mu mudimu wa Yehowa. Bualu ebu kabuena bumvuija anu kupitshisha mêba a bungi mu malu a Nzambi to. Kadi udi uenza bualu owu ke adi ne mushinga wa bungi kuudi. Manya ne: kuenzela Yehowa mudimu ke kuudi ne bua kuteka pa muaba wa kumpala mu nsombelu webe, ki ndilonga tulasa tukuabu to. (Mat. 22:37) Muanetu wa bakaji mukuabu, diende Samantha, udi wamba ne: “Kumpala kua meme kulonga tulasa tukuabu, ngakadiambila ne: meme mubuelamu, pashishe mmona ne: mbituadije kunkolela bua kuenzela Yehowa mudimu mudibi bikengela, ndi ngimanyika kulonga.”

5. Ntshinyi tshiudi mua kuenza bua kuikala anu ne bia bungi bia kuenza mu mudimu wa Yehowa?

⁵ Tshia kuenza kumpala kua kutuadija kulonga tulasa tukuabu. Dienzeja bua malu a Yehowa ikale anu pa muaba wa kumpala. Diebeja ne: ‘Ntshinyi tshingenza bua kuikala anu kulongolola bisangilu ne kubuelamu, kuyisha, ne kuikala kudilongela pa tshibidilu?’ (Yosh. 1:8; Mat. 28:19, 20; Eb. 10:25) Diebeja kabidi ne: Ntshinyi tshimvua muenze bua kuikala kuenza malu aa pamvua mu tulasa tua bikadilu? Biobi ne: kuvua muenze malu muvuabi bikengela, ntshinyi tshiudi mua kuenza bua kulongolola malu musangu eu? Disuika bua kuikala anu ne bia bungi bia kuenza mu mudimu wa Yehowa paudi wenda ulonga tulasa atu. Difila bua kukuata kalasa, kadi kabikupangishi dîba dia kutungunuka ne kuenzela Yehowa mudimu to.a​—Mat. 6:24.

6. Nnkonko kayi iudi ne mua kudiela bua kumanya ni utshidi uteka malu a Yehowa pa muaba wa kumpala? (Tangila kabidi tshimfuanyi.)

⁶ Paudi utuadija kulonga tulasa tukuabu, ikala udikonkonona bua kumanya ni utshidi uteka malu a Yehowa pa muaba wa kumpala, wenza nanku pamuapa ngondo yonso anyi pa tshibidilu. Tshilejilu, diebeja ne: ‘Ntshidi anu nteka malu a Yehowa pa muaba wa kumpala anyi? Ntu ne tshibidilu tshia kupumbisha mu bisangilu anyi kufikamu panyima pa dîba anyi? Ntu ntuma meji ku malu a mu kalasa padi bisangilu bienda bienzeka anyi? Nkadi mutuadije kulondela bisangilu ku biamu pamutu pa kuya ku Nzubu wa Bukalenge anyi?’ Udi mua kudiebeja kabidi ne: ‘Nkadi mulekele kusambila ne kudilongela Bible bikole bu mumvua ngenza kumpala anyi? Nkadi nya mu buambi anu bua kuwuja mukenji ne mbukosa pa lukasa anyi?’ Wewe muandamune lukonko nansha lumue ne: eyowa, mbimpe ushintulule ngenzelu webe wa malu. Tulasa tuebe katukupangishi bua kuteka malu a Yehowa pa muaba wa kumpala to.

‘LAMA BUKOKESHI BUEBE BUA KUNANA LUNGENYI’

7. Mmunyi mudi kulonga tulasa tukuabu mua kushintulula mushindu webe wa kuela meji?

⁷ Lutatu ludi mua kumueneka. Bilondeshile tulasa tuudi ulonga, badi mua kukulongesha malu a nkindi. Tshilejilu, badi mua kunulongesha ne: malu adi Bible ulongesha ki mmalelela, Nzambi kenaku, anyi ne: bintu mbindienzekele. (Kolos. 2:8) Malongesha au adi mua kukufikisha ku didieyemena pamutu pa kueyemena Yehowa. Muanetu wa balume kampanda udi wamba ne: “Bavua batulongesha bua tupete mamanya kampanda ne bua tupete ngelelu wa meji kansanga uvua ubengangana ne ngelelu wa meji wa Yehowa. Tshilejilu, bavua batulongesha ne: bua kupeta disanka, mbimpe tuetu tudieyemene tuetu ne mamanya etu. Ngelelu wa meji eu wakamfikisha ku dimona ne: kabiena ne mushinga bua kueyemena Yehowa bua meme kupeta disanka to. Bikavua mbinkolele bua kumueyemena.”

8. Bua tshinyi bidi ne mushinga bua “ulame bukokeshi buebe bua kunana lungenyi”? (Nsumuinu 5:1, 2)

⁸ Bala Nsumuinu 5:1, 2. Bible udi ukubela bua “ulame bukokeshi buebe bua kunana lungenyi.” Kudi misangu itubu balama tshintu bua kutshikuba anyi bua muntu kalu kutunyengatshi to. Ke tshitudi ne bua kuenza ne bukokeshi buetu bua kunana lungenyi. (1 Pet. 5:8) Mushindu udi bena panu bela meji a tshidi tshimpe ne tshidi tshibi, tshidibu bamba bua mudi muoyo mutuadije ne mudi Nzambi kayiku bidi mua kubanga kutupetesha dielakana bua malu adi Yehowa utulongesha. Balongeshi ne bantu bakuabu badi mua kukufikisha ku dimona ne: tshidibu bamba bobu bua malu au ntshimpe kupita tshidi bantu bakuabu bamba. Kadi mu bulelela, bidibu bamba abi mbintu bia “bupote kumpala kua Nzambi.”​—1 Kol. 3:18-20.

9. Ntshinyi tshiudi mua kuenza bua kukuba meji ebe?

⁹ Tshia kuenza kumpala kua kutuadija kulonga tulasa tukuabu. Bua kukuba meji ebe, dienzeja bua kuikala mutuishibue ne: tshidi Bible ulongesha ntshilelela kumpala kua wewe kutuadija kulonga tulasa tukuabu. Diebeja ne: ‘Bua tshinyi ndi ngitabuja ne: Nzambi udiku? Ntshinyi tshidi tshinjadikila ne: Bible nDîyi diende? Ntshinyi tshidi tshinjadikila kabidi ne: mikenji ya malu a bikadilu idi mu Bible mmipite ya bena panu?’ Wewe muvuluke tshivua tshikufikile pauvua mu tulasa tua bikadilu nebikuambuluishe bikole. Diebeja ne: Pavua bakuabu bitaba dilongesha dia ne: bintu mbidienzekele, bivuaku bitekeshe ditabuja dianyi dia ne: Nzambi udiku anyi? Mvua mubange kupeta dijinga dia kuenza malu mabi anu bu balongi betu anyi? Biobi ne: kuvua muenze malu muvuabi bikengela, ntshinyi tshiudi mua kuenza mpindieu bua wikale anu mutuishibue ne: tshidi Bible ulongesha ntshilelela? Enza muebe muonso bua bidi bakuabu bamba kabikupeteshi dielakana bua malongesha audi mumanye ne: mmalelela to.​—2 Tim. 2:16-18.b

10. Ntshinyi tshiudi mua kuenza bua kutungunuka ne kukuba meji ebe?

¹⁰ Paudi ulonga tulasa tukuabu atu, ikala udikonkonona. Diebeja ne: ‘Nkadi mutuadije kumona ne: malu mabi adi bantu bakuabu benza mmimpe nansha mudiwu kaayi asankisha Yehowa anyi? Patubu batulongesha, ntu nkumbana bua kujingulula ne: bualu budibu batulongeshe ebu ndilongesha dia malu a nkindi anyi? Ndi mutuishibue ne muoyo mujima ne: anu Bukalenge bua Nzambi ke buajikija ntatu ya bantu anyi?’ Tungunuka ne kudilongela Dîyi dia Nzambi bikole bua ukube meji ebe. Kudilongela Dîyi dia Nzambi ne kuelangana meji a malu adimu, nekutambe kukujadikila ne: Bible utu wamba anu bulelela.​—1 Tim. 4:15.

ENZA MALU BIMPE NE DÎBA DIEBE

11. Bua tshinyi bidi mua kukukolela bua kuenza malu bimpe ne dîba diebe paudi ulonga tulasa tukuabu?

¹¹ Lutatu ludi mua kumueneka. Tulasa atu tudi mua kukudia dîba dia bungi, nangananga panudi nudilongolola bua kuenza mateta anyi padibu banukosele matuku a kujikija mudimu kampanda udibu banupeshe. Wewe kuyi wenza malu bimpe ne dîba diebe, udi mua kudikebela tunyinganyinga tua patupu ne kudiumvua muzengele. Bushuwa, mbimpe kulonga, kadi ikala kabidi uditabalela.

12. Mmalu kayi audi mua kutabalela bua kuenza malu bimpe bitambe ne dîba diebe? (Efeso 5:15, 16)

¹² Bala Efeso 5:15, 16. Bidi mua kukukolela bua ‘kuenza malu bimpe bitambe ne dîba diebe.’ Nunku ikala ne nkatshinkatshi. Tshilejilu, nansha mudi kudifila ku malu a mu kalasa kuikale ne mushinga, mbimpe wikale kabidi ne dîba dia kusomba ne bena Kristo nebe ne bena mu dîku dienu. (Mis. 133:1; Nsu. 18:1) Kadi manya ne: malu ebe a mu nyuma ke adi ne mushinga wa bungi menemene. (Mat. 6:33) Pamuapa udi kabidi mua kuikala ne midimu ya kumbelu anyi ne mudimu wa bianza uudi wenza. Bidi bikengela wikale kabidi wikisha bikole ne wibidija mubidi bua ulame makanda ebe a mubidi. (Muam. 4:6; 1 Tim. 4:8) Neufike ku dienza malu onso aa anu wewe wenza mudimu bimpe ne dîba diebe.

13. Ntshinyi tshiudi mua kuenza bua ufike ku dienza malu bimpe ne dîba diebe?

¹³ Tshia kuenza kumpala kua kutuadija kulonga tulasa tukuabu. Bible udi utuambila ne: tuetu badianjile kudilongolola, malu etu neende bimpe. (Nsu. 21:5) Ke bualu kayi, mbimpe wenze programe muimpe kumpala kua kutuadija kulonga tulasa tukuabu. Nunku mbimpe udiebeje ne: ‘Tshikondo tshimvua mu tulasa tua bikadilu, mvua ngenza malu bimpe ne dîba dianyi anyi?’ Bikalabi ne: kabivua nanku, ntshinyi tshiudi mua kuenza mpindieu bua kuakaja malu? Dienzeja bua kuikala ne programe muimpe bua kufiki ku dimona ne: kuena ne dîba dia kuenza malu onso to.c

14. Nnkonko kayi idi mua kukuambuluisha bua kudikonkonona?

¹⁴ Paudi mu tulasa tukuabu atu, ikala utangila muudi wenza malu ne dîba diebe. Udi mua kudiebeja ne: ‘Ntu mpeta dîba dia kuikisha ne dia kuibidija mubidi anyi? Ntshitu anu ne dîba dia kusomba ne bena Kristo nanyi anyi? Ndi ne mushindu wa kuenza devuare idibu batupesha mu kalasa pa dîba anyi? Biobi kabiyi nanku, mbualu ndi ne bia bungi bia kuenza anyi mbualu ndi ndadikija malu? Bena mu dîku dietu ne balunda banyi badi bamona ne: bidi bikengela nshintulule amue malu anyi?’ Wewe mumone ne: bidi bikengela kuakaja malu adi mu programe webe anyi kualonda anu mudiwu amu, kuladikiji malu to. Udi mua kulomba kabidi diambuluisha kudi bana betu batu benza malu bimpe ne dîba diabu.​—Nsu. 11:14.

TUNGUNUKA NE ‘KUENDA NE BENA MEJI’

15. Ndutatu kayi luudi mua kupeta paudi mu tulasa tukuabu?

¹⁵ Lutatu ludi mua kumueneka. Balongi benu badi mua kukulomba bua uye kusomba nabu muaba kampanda panudi nupatuka mu kalasa. Muoyo udi mua kukusaka bua kuitaba, pamuapa bualu mba mulongo webe, nudi banange bonso malu a muomumue, anyi bualu nudi nabu mu kalasa dîba dionso. Udi mene mua kuela meji ne: udi mufuanangane nabu ku malu a bungi kupita muudi mufuanangane ne bena mu tshisumbu tshienu. Kadi ikala mudimuke. Nansha muudi mufuanangane nabu ku amue malu, udi mushilangane nabu bualu wewe udi musue kusankisha Yehowa. Wewe utamba kusomba nabu, neutuadije kuela meji bu bobu. (1 Kol. 15:33) Ke tshivua tshifikile muanetu Michael uvua mulonge malu a nzembu munkatshi mua bidimu binayi. Udi wamba ne: “Mvua mpitshisha mêba mapite pa 40 lumingu luonso pamue ne bena mudimu nanyi. Bavua ne ngakuilu mubole, bateleja mijiki mibi, ne kabavua banemeka bantu bakaji to. Nunku ngakatuadija kumona ne: bivuabu bamba ne benza kabivua anu bibi to.”

16. ‘Kuenda ne bena meji’ kudi kumvuija tshinyi? (Nsumuinu 13:20)

¹⁶ Bala Nsumuinu 13:20. Bible udi utudimuija ne: malunda mabi adi mua kutukebela ntatu. Kadi utu kabidi wamba ne: “Muntu udi wenda ne bena meji nealue muena meji.” Dilongesha didi ne: Tuetu tusomba ne bantu bimpe tudi tubafuana, tuetu tusomba ne bantu babi, tudi tubafuana kabidi. Nunku mbimpe usombe ne bantu badi banange Yehowa anu bu wewe ne badi basue bua wikale ne disanka.​—Mis. 101:6, 7; 119:63.

17. Ntshinyi tshiudi mua kuenza bua kuepuka malunda mabi?

¹⁷ Tshia kuenza kumpala kua kutuadija kulonga tulasa tukuabu. Dikosela bungi bua mêba a kusomba ne balongi benu panyima pa kalasa. Ntemu wa Yehowa mukuabu, diende Trenton, udi wamba ne: “Ntu bimpe ne balongi betu, kadi patutu tupatuka mu kalasa, tshitu nshala mpitshisha nabu dîba pamue to. Ntu mbamona anu bu balongi betu, ki mbu balunda banyi banene to.” Ntshinyi tshiudi mua kuenza bua kutambi kupitshisha nabu dîba pamue? Bua kuandamuna lukonko elu, diebeja ne: ‘Mvua mudikosele bungi bua mêba a kusomba ne balongi betu anyi?’ Biwikala kuvua muenze nanku, ntshinyi tshiudi mua kuenza bua kuakaja malu mpindieu? Ikala mudisuike bua kutungunuka ne ‘kuenda ne bena meji’ ne bua kubenga kusomba ne bantu badi kabayi banange Yehowa to.d

18. Nnkonko kayi iudi ne bua kudiela? (Tangila kabidi tshimfuanyi.)

¹⁸ Paudi mu tulasa tukuabu atu, ikala udiebeja ne: ‘Nkadi mutuadije kulamakanangana bikole ne balongi betu anyi? Nkadi mutuadije kuakula, kuela meji ne kuenza malu bu bobu anyi? Meme mudie nabu bulunda, Yehowa neasanke anyi?’ (Mis. 1:1) Wewe mumone ne: kudi tshia kuakaja, kuladikiji malu to. Dienzeja bua kushemesha bulunda ne bantu badi banange Yehowa bu wewe. Bualu bukuabu, kuelakanyi bua kuyisha balongi benu to. Bu mudibu bakumanye, udi ne mpunga wa kubambila malu a Yehowa.

IKALA MUDILONGOLOLE

19. Mmunyi muudi mua kudilongolola bua kutantamena malu adi mua kutekesha ditabuja diebe paudi ulonga tulasa tukuabu? Fila tshilejilu.

¹⁹ Tuangate tshilejilu etshi. Muntu udi ne meji yeye musue kuenza luendu lule mu dîtu ku makasa, utu wanji kudilongolola. Nansha mudiye kayi mua kumanya malu onso atuilanganaye nawu, udi udienzeja bua ikale ne bukole bua kuenza luendu alu. Udi uvuala bilamba bidi mua kumukuba padi kuulu kubi. Udi wenza bionso abi anu bua ne: afike kudiye uya. Ke tshiudi pebe mua kuenza paudi ulonga tulasa tukuabu. Kulesha ditabuja diebe, vuala “bia mvita bionso bia kudi Nzambi,” ne ikale ne tshipatshila tshia kutumbisha Yehowa mu malu onso audi wenza pamutu pa kukeba lumu anyi kukeba bua kulua mubanji.​—Ef. 6:11-13; 1 Kol. 9:26, 27; 10:31.

20. Mmunyi muudi mua “kuditeta bua kumanya ni udi mu ditabuja”?

²⁰ Bible udi utuambila ne: “Tungunukayi ne kuditeta bua kumanya ni nudi mu ditabuja; tungunukayi ne kupima tshinudi nuenu bine.” (2 Kol. 13:5) Enza tshidi mvese wamba paudi ulonga tulasa tukuabu. Ikala udiela nkonko idi ilonda eyi bua kudikonkonona. Utshidi anu ne programe wa malu a Nzambi udi ukuambuluisha bua kuikala mukole mu nyuma anyi? Utu udienzeja bua meji a bena panu kaanyangi ngelelu webe wa meji anyi? Utu wenza malu bimpe ne dîba diebe anyi? Utu udia bulunda ne bena Kristo nebe, eku wepuka malunda mabi anyi? Eyi nnkonko idi Ntemu yonso mua kudiela patshidiye ulonga kalasa, padiye ku mudimu anyi muaba mukuabu. Ikala mudisuike bua ushale mushindame mu ditabuja nansha wewe mutuilangane ne nsombelu kayi. Ikala mutuishibue ne: Yehowa neakuambuluishe bua wikale ne nsombelu muimpe bua muudi udienzeja bua kushala pabuipi nende.​—Nsu. 3:5, 6.