NKONKO IDI BANSONGA BADIELA

Mmushindu kayi udi Bible mua kungambuluisha?—Tshitupa 3: Umvua buimpe bua biudi ubala mu Bible

Paudi ubulula Bible, neumone ne: udi ne miaku ya bungi. Kadi kabikutekeshi mu maboko to! Mona Bible bu biakudia bimpe menemene bishilashilangane bidibu bateke pa mêsa. Kuena mua kudia biakudia bionso biudi umona abi to. Kadi udi mua kusungula biakudia bungi bukumbane biudi mua kudia bimpe.

Bua wewe kumvua buimpe bua malu adi mu Bible, mbimpe utume lungenyi luebe ku biudi ubala. Ke tshikala tshiena-bualu etshi mua kukuambuluisha bua kuenza.

Mu tshiena-bualu etshi

Bua tshinyi mbimpe utume lungenyi luebe ku biudi ubala mu Bible?

Wewe udienzeja bikole bua kubala Bible, biudi ubala abi nebikuambuluishe kabidi bikole. Tuangatabi tshilejilu etshi: Wewe muele kabuki ka tshiayi mu tumayi tua kapia anu sekonde mikese tshianana kuakumvua muenya watshi wonso to. Kadi bua wewe kumvua muenya watshi wonso, mbimpe ukalekele mu mâyi amu nansha bua minite ndambu.

Dikopo dia tshiayi dikale ne kamushonyi kapitshilapu. Ku luseke lumue kudi tshiayi tshitokoloke, ku lukuabu kudi tshiayi tshibu belamu kukadi kamutantshi.

Ke mudibi kabidi bua dibala dia Bible. Pamutu pa wewe kubala pamutu pamutu, tuma lungenyi luebe ne muoyo webe ku biudi ubala. Ke tshivua mufundi wa misambu 119 wenza. Wakamba bua mikenji ya Nzambi ne: “Ndi ngelangana meji ayi dituku dijima.”—Misambu 119:97.

Kabiena bisua kumvuija ne: udi ne bua kupitshisha dituku diebe dijima ubala anu Bible ne welangana meji a biudi ubala to. Kadi dilongesha didi ne: mufundi wa misambu uvua ukeba dîba dia kuelangana meji a Dîyi dia Nzambi. Kuenza nanku kuvua kumuambuluisha bua kuangata mapangadika mimpe.—Misambu 119:98-100.

“Musangu mukuabu mamuanyi wakangambila ne: ‘Lumingu ludi ne matuku muanda mutekete, ne mu lumingu lujima udi wenza malu a bungi buebe wewe nkayebe. Bua tshinyi kuena mua kupesha Yehowa mêba ndambu? Ke bualu buimpe bua kuenza!’”—Melanie

Wewe welangana meji a mêyi manene a mu Bible, newikale mukumbane menemene bua kuangata mapangadika mimpe—tshilejilu, paudi usungula balunda anyi padibu bakuteta bua kuenza bualu bubi.

Mmushindu kayi uudi mua kumvua buimpe bua biudi ubala mu Bible?

Funda malu a kuenza. Nsonga kampanda diende Julia udi utubela ne: “Enza programe wa dibala dia Bible. Manya tshia wewe kubala, dîba dia kutshibala, ne muaba wa wewe kubadila.”

Nsongakaji ufunda programe wende wa dibala dia Bible mu kalandriye.

Keba muaba muimpe. Nsonga mukuabu diende Gianna udi uleja ne: “Keba muaba mutalale, wambile bena mu dîku diebe dîba diudi mulongolole bua kubala Bible bua kabakutatshishi to.”

Wewe ubadila mu kamu, kanga muaba utubu bakutumina mesaje bua kubuedi mu ditanaji to. Udi nansha mua kubala Bible wa pa mabeji. Kabidi makebulula adibu benze adi aleja ne: kubala mukanda wa pa mabeji kudi mua kukuambuluisha bua kumvua bimpe biudi ubala. Kadi bidi mua kuikala bikole bua kutumaku lungenyi luebe luonso wewe ubadila mu kamu.

“Pantu mbandila mu kamu, bitu bipepele bua meme kutuma ntema kua tshianana. Ndi mpeta mesaje, bateri ujika midilu anyi Enternete ukoseka. Kadi meme ne mukanda wa pa mabeji, tshionso tshindi nkengela nkuikala ne bukenke bukumbane.—Elena.

Banga ne disambila. Lomba Yehowa bua akuambuluishe bua kumvua biudi mulongolole bua kubala, bua kubivuluka, ne kubiteka mu tshienzedi.—Yakobo 1:5.

Bua kuenza malu mu diumvuangana ne disambila diebe, buela mu buondoke bua biudi ubala. Udi mua kuenza nanku mushindu kayi? Wewe ne programe wa JW Library anyi wewe ubadila Bible ku Enternete, udi mua kutua pa mvese bua kupeta malu makuabu anyi biena bualu bidi bimumvuija.

Diela nkonko. Tshilejilu: ‘Bualu ebu budi bundongesha tshinyi bua Yehowa? Bualu abu budi ne ngikadilu wende kampanda undi mua kuidikija anyi?’ (Efeso 5:1) ‘Ndilongesha kayi dindi mupete mu bualu abu dindi mua kutumikila?’ (Misambu 119:105) ‘Ndi mua kuambuluisha muntu ne bindi mubale anyi?’—Lomo 1:11.

Diela kabidi lukonko elu: ‘Ndipetangana kayi didi pankatshi pa bindi mfuma ku dibala ne tshiena-bualu tshia mu Bible?’ Lukonko alu ludi ne mushinga wa bungi. Bua tshinyi? Bualu bintu bionso bidi mu Bible, kubangila ku mukanda wa Genese too ne ku Buakabuluibua bidi bipetangana mu mushindu kampanda ne tshiena-bualu tshinene etshi: Yehowa neajidile dîna diende ku diambuluisha dia Bukalenge buende bua mu diulu ne nealeje ne: yeye ke udi ne bukenji bua kulombola ne mushindu wende wa kulombola mmuimpe menemene.

Tshidi bena mulongo nebe bamba

“Biwikala munange malu a kale, longa bikondo anyi bishadile bia ku bintu bia kale bidi biakula bua bisamba bidibu batele mu Bible. Wewe munange kumanya bantu, longa bantu bu mudi Davidi. Kudi bantu ba mishindu yonso. Bidi bikengela anu wele meji a baudi wewe musue kumanya.”—Judah.

“Pantu mbala bualu kampanda bua mu Bible, ntu musue kulonga muntu yonso udi mu bualu abu nansha yeye muenze malu mimpe anyi mabi; ntu ndikonka ne: ‘Tshidi tshifikile muntu au ntshinyi? Uvua mudituale mushindu kayi? Mbipeta kayi bivuaye mupete?’ Pashishe ntu ndikonka ne: ‘Bualu ebu budi mua kungambuluisha mushindu kayi?’”—Mackenzie.

“Ntu ndienzeja bua kukeba malu adi mvese wakuila. Tshilejilu, mukanda wa mu Bible eu bavua bawufunde tshikondo kayi? Uvua muwufunde nganyi? Udi ne tshipatshila kayi? Malu a bungi adi Bible ulonda adi mua kutangila matuku etu aa, kadi kubuela mu buondoke kutu kungambuluisha bua kumanya mushindu uvua mianda ya mu Bible milenge bantu bavua ne muoyo tshikondo atshi.”—Elle.

“Pantu mbala mvese kampanda, ntu ndiambila ne: nemmumvuije muntu. Mmunyi mundi mua kumuambuluisha bua kumumvua bimpe? Ntshilejilu kayi tshidi mua kungambuluisha bua kupatula lungenyi lunene? Pantu ndiela nkonko ayi bitu bingambuluisha bua kumvua bimpe bindi mbala. Anu mutubu bamba, “kulongesha ke mushindu muimpe wa kulonga.”—Owen.