NKONKO IDI BANSONGA BADIELA
Mmushindu kayi undi mua kulekela kuikala muena mpala ibidi?
Imue misangu batendeledi ba Nzambi batu bajinga kumanya ni bidi ne mushinga bua kutumikila mikenji ya mu Bible. (Misambu 73:2, 3) Bamue batu bafika too ne ku dibanga kuenza malu adi abengangana ne mikenji ya Yehowa ne ku dishima batendeledi bakuabu ba Nzambi pa kusokoka bikadilu biabu bibi.
Tshiena bualu etshi ntshienza bua kuambuluisha bantu badi basue kulekela kuikala bena mpala ibidi.
Mu tshiena bualu etshi
Kuikala muena mpala ibidi kudi kumvuija tshinyi?
Kuikala muena mpala ibidi kudi kumvuija ne: paudi ne bansonga nebe badi kabayi batumikila mikenji ya Yehowa, udi wenza malu audi mumanye ne: mmabi; kadi paudi ne bena Kristo nebe, udi uleja muudi musue kuenzela Yehowa mudimu. Mbienze anu bu ne: udi ne nsombelu ibidi, ne udi usokoka malu mu nsombelu yonso wa kudiyi.
“Muena mpala ibidi, udi usokoka malu ende, nanku mbikole bua muntu kumumanya bimpe. Mu bulelela, kuikala muena mpala ibidi nkuenze anu bu kutungilangana misangu ibidi.”—Erin.
Udi mumanye anyi? Kuikala muena mpala ibidi kudi mua kumvuija kabidi kuenza malu audi mumanye ne: Yehowa mmuakine paudi nkayebe.
“Pamvua ne bidimu 14, ngakabanga kutangila bindidimbi bia malu a diangatangana ku Enternete. Pandi ne bantu bakuabu mvua ndeja mumvua tshiyi musue bindidimbi abi, kadi mu muoyo wanyi mvua mumanye ne: kabiena nanku to.”—Nolan.
Mêyi manene a mu Bible: “Muntu nansha umue kena mua kuikala mupika udi wenzela bamfumu babidi mudimu to; bualu neakine umue ne neanange mukuabu, anyi nealamate umue ne neapetule mukuabu.”—Matayi 6:24.
Kuikala muena mpala ibidi kudi kuleja ne: ndi muntu mubi anyi?
Kabiena nanku to. Tudi bamanye ne: kudi bantu badi bangate dipangadika dia kubenga kulonda mikenji ya mu Bible. Ke dipangadika diudi muangate pebe anyi? Peshi kudi bualu bukuabu, bu mudi:
Udi utshina bua kuenza malu adi mashilangane ne a bansonga bakuabu.
Udi udiumvua bimpe paudi ne balunda bebe ba mu kalasa kupita paudi ne bena mu tshisumbu.
Udi wela meji ne: kuena ne bukole anyi kuena ukumbana bua kutumikila mikenji yonso ya Nzambi to.
“Ndi ngela meji ne: bamue bansonga badi ne mpala ibidi batu badiumvua bimpe padibu ne bantu badi kabayi bena Kristo bualu badi ne dijinga dia kuikala nabu, nansha bobu bantu babi.”—David
Bushuwa, kakuena bualu nansha bumue bua ku malu au budi bushindikila muntu bua kuikala muena mpala ibidi to. Kadi adi aleja mushindu udi nansha bantu bimpe mua kukuluka mu buteyi. Biobi nanku buebe wewe, ntshinyi tshiudi mua kuenza?
Ndi mua kulekela kuikala muena mpala ibidi mushindu kayi?
1. Ela meji a nsombelu uudi nende patudi tuakula apa. Diebeja ne: ‘Ndi musue kuikala muntu wa mushindu eu anyi? Meme mutungunuke nanku, mbipeta kayi bingapeta?’
Mêyi manene a mu Bible: “Muntu mudimuke udi umona njiwu . . . , kadi badi kabayi ne dimanya badi batungunuka ne kuyaku ne badi bakenga bua malu abakuata.”—Nsumuinu 27:12.
2. Amba bulelela. Ambila baledi bebe anyi mulunda mushindame udi unemeka mikenji ya Yehowa bualu buudi nabu. Kakuyi mpata nebikale ne disanka bua muudi mubalombe diambuluisha. Nebasanke bua kumona ne: udi musue kuenza malu adi mimpe!
Biwikala mukuluke mu buteyi bua kuikala muena mpala ibidi, lomba diambuluisha
“Bivua bikole menemene bua meme kuambila bakuabu bilema bimvua ngenza, kadi ngakadiumvua musulakane bikole pamvua mubambilabi.”—Nolan.
Mêyi manene a mu Bible: “Muntu udi usokoka matomboka ende kakupeta diakalenga to, kadi muntu udi uatonda ne ualekela nebamufuile luse.”—Nsumuinu 28:13.
3. Itaba dinyoka. Vuluka ne: baledi bebe anyi bakulu mu tshisumbu kabakukueyemena kabidi to bobu bumvue ne: udi mubasokoke bualu kampanda buuvua muenze. Baledi bebe anyi bakulu badi pamuapa mua kukupesha manyoka kampanda. Itaba manyoka au, udisuike bua “kuenda mu bululame mu malu onso.”—Ebelu 13:18.
Mêyi manene a mu Bible: “Teleja mubelu ne itaba dinyoka, bua ulue muena meji mu matuku ebe atshilualua.”—Nsumuinu 19:20.
4. Kolesha dishindika diebe dia ne: Nzambi mmukunange. Bu mudi Yehowa mukunange, mmumanye bimpe menemene malu onso audi wenza. Nunku wewe muikale muena mpala ibidi, mmumanye, ne bidi bimuenza kanynganyinga. Kadi bu mudiye ‘ukutabelela,’ udi ne dijinga dia kukuambuluisha bua ulongolole nsombelu webe.—1 Petelo 5:7.
Mêyi manene a mu Bible: “Mêsu a Yehowa adi akenzakana pa buloba bujima bua kuleja bukole buende kudi bantu badi ne muoyo mujima kudiye.”—2 Kulondolola 16:9.