Mêyi a mu Dîyi dia Nzambi adi apetesha bena tshimuangi ditekemena!

Tshidimu tshionso, bantu miliyo ya bungi batu bamuangala bashiya nzubu yabu. Udi mumuangale pebe anyi? Biobi nanku, umanye ne: kudi muntu udi mua kukuambuluisha. Nzambi udi ufila ditekemena dia nsombelu Mulenga; longa Bible bua kumanya ditekemena adi.

Christos Stylianides munenea wa Nsangilu wa matunga a ku Mputu wakamba ne: “Bena tshimuangi ne bantub badi bashiya nzubu yabu badi dijinga ne diambuluisha dia lukasa lukasa ne ditekemena bua matuku atshilualua.” Bantu badi ne ditekemena badi ne mmuenenu muimpe wa malu bua matuku abu atshilualua. Kadi pa kumbusha ditekemena, bidi bikengela kukolesha kabidi bena tshimuangi.

“Pamvua mumuangale mushiye ditunga dietu ne bena mu dîku dietu, ngakadimona nkaya menemene. Mvua ne buôwa, dibungama, ne kanyinganyinga ka bungi.”​—Emmanuel wa mu Haïti.

Udi pebe umvua bu Emmanuel anyi? Biwikala mumuangale, bidi bikengela upete busambi ne ditekemena. Mmunyi mudi Bible Dîyi dia Nzambi mua kukuambuluisha?

Busambi bua mu Dîyi dia Nzambi

Bible udi wamba: “Yehowac . . . mmunange muntu udi musombe buenyi.”​—Dutelonome 10:17, 18.

Bible udi wamba ne: “Yehowa udi pabuipi ne bonso badi bamubila.”​—Misambu 145:18.

Bible udi wamba ne: “Kabiena mua kuenzeka bua Nzambi mulelela kuenza malu mabi to . . . Wa Bukole Buonso katu ukonyangaja kulumbuluisha kuakane nansha.”​—Yobo 34:10, 12.

Bidi biumvuija ne: ki nNzambi udi ukukebela makenga to. Kena ukunyoka, anyi ukuteta bua wikale ne nsombelu mukole to.

Ditekemena didi Dîyi dia Nzambi difila

Bible udi uleja malu atuenzela Nzambi kumpala eku. Mona mudi ditekemena adi diambuluisha bantu badi bamuangale bashiye nzubu yabu.

Bible udi wamba ne: “[Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.”​—Buakabuluibua 21:4.

Bidi biumvuija ne: netupete disulakana ku makenga etu. Nzambi mmulaye bua kujikija ntatu yonso idi ikupangisha bua kuikala ne ditekemena lelu.

“Mu katupa kîpi emu, Nzambi neajikije kansungansunga ne malu mabi onso adi enzeka muaba utudi. Ditekemena adi didi dingambuluisha bua kutuma meji anyi onso ku dituku diajika makenga onso.”​—Karla wa mu Salvador.

Bible udi wamba ne: “Malu a kale kaakubavuila kabidi mu lungenyi, anyi kubabanda kabidi ku muoyo to.”​—Yeshaya 65:17.

Bidi biumvuija ne: katuakuvuluka kabidi tunyinganyinga to. Nzambi neenze bua kutuikadi tumvua bibi, tuvuluka malu mabi avua matufikile to.

“Bible mmulaye ne: katuakuvuluka nansha tunyinganyinga ne ntatu itudi bapete to. Ditekemena adi didi dingambuluisha bua kutantamena ntatu itudi nayi bualu ndi mumanye ne: malu onso neakane mu katupa kîpi emu.”​—Natalia wa mu Ukraine.

Bible udi wamb ne: ‘Nzambi wa mu diulu neajadike bukalenge bukuabu buikala mua kuzaza makalenge aa onso ne nebuatuishe ku ndekelu.’​—Danyele 2:44.

Bidi biumvuija ne: mbulamatadi mupuangane wa mu diulu neakokeshe buloba bujima. Mu katupa kîpi emu, Nzambi neumbushe mbulamatadi yonso ya bana ba bantu bua kuteka mbulamatadi wende wa mu diulu. Mbulamatadi au neenze bua kuikale ditalala dilelela ne bukubi, neenzele bantu bonso malu makane, ne kakuakuikala bapele to.​—Mika 4:3, 4.

“Bidi binkolesha bua kumanya ne: ntatu bu mudi dikengeshangana, dielelangana meji mabi, ne kansungansunga mbia tshitupa tshîpi, mmumue ne: Bukalenge bua Yehowa nebujikije ntatu yonso ayi mu matuku makese emu.”​—Mustafa wa mu Moyen-Orient.

Meji a mu Dîyi dia Nzambi

Meji mimpe a mu Bible adi mua kukuambuluisha paudi wenda utantamena ntatu iudi nayi. Adi mua kukuambuluisha kabidi bua kupita ne nsombelu uudi nende mpindieu, bu mudi dijimija bintu bia ku mubidi. Mona mudi mêyi manene adi alonda aa ambuluisha bena tshimuangi:

Bible udi wamba ne: “Nansha padi muntu ne bintu bia bungi, muoyo wende kawena ufumina ku bintu bidiye nabi to.”​—Luka 12:15.

Mudi mêyi mimpe aa mua kukuambuluisha: Pamuapa mbikutonde bikole bua malu adi makufikile ne udi mubungame bikole bua bintu biudi mujimije. Kadi wewe muelangane meji a mushinga udi nawu muoyo webe, bidi mua kukuambuluisha bua kubenga kumvua bibi menemene bua bintu abi.

“Muoyo udi ne mushinga wa bungi kupita bintu bia ku mubidi. Mu nsombelu mikuabu, bintu anyi makuta kabiena anu mua kukuambuluisha to.”​—Natalia wa mu Ukraine.

Bible udi wamba ne: “Kuebeji ne: ‘Bua tshinyi matuku a kale avua mimpe kupita a lelu?’”​—Muambi 7:10.

Mudi mêyi mimpe aa mua kukuambuluisha: Nsombelu webe wa mpindieu udi mua kuikala mukole menemene, kadi kumufuanyikiji ne wa kale to bualu udi mufuane kumvua bibi.

“Kuitaba nsombelu undi nende mpindieu kudi kungambuluisha bua kuikala ne mmuenenu muimpe wa malu.”​—Eli wa mu Rwanda.

Bible udi wamba ne: “Bu mutudi ne biakudia ne bilamba, tusanke ne bintu ebi.”​—1 Timote 6:8.

Mudi mêyi mimpe aa mua kukuambuluisha: Dienzeja bua kusanka ne bintu biudi nabi. Wewe usanka ne biudi nabi, kuakuikala pamuapa usamisha mutu to. Kuenza nanku kudi mua kukuambuluisha bua kutukija.

“Bible udi ungambuluisha bua kumona malu mushindu mukuabu, bua tshimanyinyi pa bintu bitudi bajimije to. Meme ne mukajanyi tudi ne disanka bua mutudi ne muoyo ne mu muaba wa bukubi.”​—Ivan wa mu Ukraine.

Bible udi wamba ne: “Nunku, malu onso anudi basue bua bantu banuenzele, nudi ne bua kubenzelawu penu.”​—Matayi 7:12.

Mudi mêyi mimpe aa mua kukuambuluisha: Udi mufuane kusomba ne bakuabu bimpe wewe wenza muebe muonso bua kuikala ne lutulu ne muoyo muimpe. Wewe muenze nanku, bidi mua kubapepejila malu bua kukuitaba ne kubenga kukuenzela malu ne kansungansunga.

“Bantu ba bungi mbasue bua ubanemeke, ubenzele malu mimpe, ne ubanange. Ngikadilu ayi idi mua kukufikisha ku didia bulunda buimpe ne bantu ba muaba uudi musombele.”​—Angelo wa mu Sri Lanka.

Bible udi wamba ne: “Numanyishe Nzambi milombu yenu; ne ditalala dia Nzambi . . . nedilame mioyo yenu ne bieledi bienu bia meji.”​—Filipoyi 4:6, 7.

Mudi mêyi mimpe aa mua kukuambuluisha: Sambila wambile Nzambi muudi umvua, majinga ebe, malu adi akuenza buôwa, ne adi akusamisha mutu. Masambila a nanku adi mua kukuambuluisha bua kubenga kusamisha mutu bua nsombelu uudi nende mpindieu.

“Ntu ndomba Nzambi mu disambila dîba dionso dindi ne ntatu, utu ungandamuna. Malu andi mulonge mu Bible mmapeteshe ditalala dilelela mu muoyo.”​—Yol wa mu Soudan du Sud.

“Mibelu mimpe ya mu Bible idi ingambuluisha bua kuikala ne ditalala mu muoyo bua mmone mua kutantamena ntatu.”​—Valentina wa mu Ukraine.

“Bidi binkolesha bua kumanya ne: Yehowa Nzambi mmulaye nsombelu muimpe menemene.”​—Emmanuel wa mu Haïti

Udi musue kumanya malu makuabu adi atangila milayi ya mu Bible idi itukolesha ne itupetesha ditekemena ne bua tshinyi mbimpe kuyitaba anyi? Lomba bua Bantemu ba Yehowa balue kukutangila kuyi ufuta makuta to. Nebikale ne disanka dia kukuambuluisha.