Mutubu balongesha Bantemu ba Yehowa bua kuyisha

Bantemu ba Yehowa badi batungunuka ne kulongeshibua mu bibadi bionso bia nsombelu wa buena Kristo, bu mudi mudimu wabu wa diyisha. Mudimu eu ke uvua Yezu muambile bayidi bende bua kuenza, mmumue ne: kuyisha lumu luimpe lua Bukalenge bua Nzambi ne kululongesha. (Matayi 24:14; 28:19, 20) Batu batulongesha nanku mu bisangilu bietu bia ku lumingu, mu mpuilu ne mu mpungilu yetu ya ku tshidimu. Bantemu ba Yehowa badi ne midimu mu tshisumbu anyi mu bulongolodi batu babalongesha malu makuabu mu tulasa tua malu a mu Bible tusunguluke.

Mu tshiena-bualu etshi

Mmalu kayi atubu balongesha Bantemu ba Yehowa?

Bisangilu bia tshisumbu. Lumingu luonso, tutu tubuela mu bisangilu bibidi mu miaba yetu ya ntendelelu idibu babikila ne: Nzubu ya Bukalenge. Pa tshibidilu, tshimue tshitu tshienzeka munkatshi mua lumingu; tshikuabu ku ndekelu kua lumingu. Bantu bonso badi babuelamu; kabatu basangamu makuta to.

Tshisangilu tshia munkatshi mua lumingu. Tudi tupeta mibelu ya mua kubala bimpe, kuyukila ne bantu, kuakula kumpala kua bantu, kuyisha ne kulongesha. Batu balongesha malu aa ku diambuluisha dia miyuki, diyukidilangana, manaya, ne filme. Bidi bituambuluisha bua kuambila bakuabu malu a mu Bible bimpe menemene ne kulombola malonga a Bible. Malu au adi ambuluisha bantu bonso badi babuela mu bisangilu bietu. Kupita bionso, bisangilu bietu bidi bikolesha ditabuja dietu ne dinanga ditudi banange Nzambi ne bena Kristo netu.
Tshisangilu tshia ku ndekelu kua lumingu. Tshisangilu tshia bitupa bibidi etshi tshidi tshituadija ne muyuki wa malu a mu Bible utubu benza nangananga bua bantu bonso. Tshitupa tshibidi tshia tshisangilu etshi ndikonkonona dia tshiena-bualu tshitubu bapatula mu Tshibumba tshia Nsentedia tshia kulonga; batshikonkonona mu nkonko ne mandamuna. Biena-bualu ebi bidi biakuila malu a mu Bible ne biumvuija mêyi manene adimu adi atuambuluisha mu mudimu wetu wa diyisha ne mu nsombelu wetu wa ku dituku ne ku dituku.

Mpuilu ne mpungilu. Tshidimu tshionso tutu tuenza bisangilu binene bisatu; mu tshisangilu tshionso mutu mubuela bisumbu bia bungi. Mu bibilu bia disanka ebi, batu balongolola tshiena-bualu kampanda tshisunguluke tshiangatshila mu Bible. Batu benzamu miyuki, manaya a bilejilu, diela bantu nkonko, ne filme. Anu bu bisangilu bietu bia tshisumbu, mpungilu ne mpuilu yetu idi ivudija dimanya dietu dia malu a mu Bible ne ituvuija bambi ba lumu luimpe bimpe menemene. Emu kabidi, bantu bonso badi babuelamu; kabena basangamu makuta to.

Tulasa tua malu a mu Bible tua Bantemu ba Yehowa

Batu babikila bamue Bantemu ba Yehowa mu tulasa tua malu a mu Bible tushilashilangane bua kubalongesha malu makuabu. Ntulasa kayi atu? Tudi ne tshipatshila kayi? Tudi tuenza matuku bungi munyi? Mbanganyi badi babuelamu?

Kalasa ka bampanda-njila

Tshipatshila: Kulongesha bambi ba ku dîba ne ku dîba badibu babikila ne: bampanda-njila,b bua bapiluke bikole mu mudimu wa diyisha ne wa dilongesha. Mu kalasa aka mudi diyukidilangana, dienza manaya, miyuki, ne tshitupa tshia dipeshangana ngenyi.
Matuku: Matuku asambombo.
Malu malomba: Bonso bakadi bampanda-njila kukadi tshidimu tshimue badi babuelamu. Bampanda-njila ba kale badi kabayi babuele mu kalasa aka kukadi bidimu bitanu badi mua kubuela kabidi.

Kalasa ka bamanyishi ba Bukalenge

Tshipatshila: Kupesha bamanyishi bapiluke badi mu mudimu wa ku dîba ne ku dîba dilongesha dia pa buadi. Balongi badi balengeja mushindu wabu wa kuyisha ne kulongesha; badi balonga bimue biena-bualu bia malu a mu Bible mu buondoke. Ba bungi badi bajikija kalasa aka, badi babatuma miaba idibu dijinga ne bamanyishi ba bungi.
Matuku: Ngondo ibidi.
Malu malomba: Bampanda-njila badi bakumbaja amue malu malomba badi mua kuwuja dilomba. Nsombelu wabu udi ne bua kubanyishila bua kuya muaba wonso udibu nabu dijinga.

Kalasa ka bakulu ba mu bisumbu

Tshipatshila: Kuambuluisha bakuluc bua kuenza midimu yabu mu tshisumbu, bu mudi kulongesha ne kutabalela bena Kristo nabu. Kalasa aka kadi kabambuluisha kabidi bua kunanga Nzambi ne bena Kristo nabu bikole.—1 Petelo 5:2, 3.
Matuku: Matuku atanu.
Malu malomba: Bakulu batshidi bapiabapia ne ba kale badi kabayi babuele mu kalasa aka kukadi bidimu bitanu badi babuelamu.

Kalasa ka batangidi ba bijengu ne bakaji babu

Tshipatshila: Kulongesha batangidi bena ngendu badibu babikila ne: batangidi ba bijengud bua kuenza mudimu wabu bimpe menemene. (1 Timote 5:17) Kalasa aka kadi kambuluisha kabidi bakulu aba ne bakaji babu bua kujingulula Dîyi dia Nzambi bimpe menemene.
Matuku: Ngondo umue.
Malu malomba: Batangidi ba bijengu bapiabapia ne bakaji babu badi babuelamu bobu bamane kuenza tshidimu tshijima mu mudimu wabu. Pashishe badi babuelamu kabidi mu bidimu bionso bitue ku bitanu.

Kalasa ka mudimu wa Bukalenge

Tshipatshila: Kuambuluisha bakulu ne basadidi ba mudimue bua kuenza midimu yabu mu tshisumbu bilondeshile nsombelu, mashintuluka, ne majinga adiku. (2 Timote 3:1) Kalasa aka katu kenzeka mu bidimu bionso bibidi anyi bisatu.
Matuku: Atu ashilangana, misangu ya bungi dituku dimue.
Malu malomba: Batangidi ba bijengu, bakulu, ne basadidi ba mudimu.

Kalasa ka mudimu wa ku Betele

Tshipatshila: Kuambuluisha bena ku Betelef bua kuenza mudimu wabu bimpe ne kunanga Nzambi ne bena Kristo nabu bikole.
Matuku: Matuku atanu ne tshitupa.
Malu malomba: Bena ku Betele bapiabapia badi babuelamu. Bakadi ne bidimu bia bungi ku Betele badi kabayi babuele mu kalasa aka kukadi bidimu bitanu badi mua kubuelamu kabidi.

Kalasa ka malu a mu Bible ka Gilada

Tshipatshila: Kuambuluisha balongi bua kunanga Dîyi dia Nzambi bikole ne kutumikila malu adibu balonge. (1 Tesalonike 2:13) Balume ne bakaji badi babuela mu kalasa ka Gilada mbena Kristo bakole mu nyuma badi balua kuambuluisha kabidi bikole bulongolodi bua Yehowa ne mu mudimu wa dilongesha malu a mu Bible wa pa buloba bujima. Padi bana betu bajikija kalasa aka badi mua kubatuma bu bamisionere anyi bena ku Betele mu ditunga diabu anyi mu ditunga dikuabu.
Matuku: Ngondo itanu.
Malu malomba: Biro bia filiale bidi bilomba bamue bana betu badi mu mudimu wa ku dîba ne ku dîba bua kuwuja dilomba. Kalasa aka kadi kenzekela ku Patterson, mu New York, mu États-Unis (Mu muaba wa dilongeshangana wa Watchtower).

Kalasa ka bena mu Komite ya filiale ne bakaji babu

Tshipatshila: Kulongesha bena mu Komite ya filialeg bua kutangila mudimu udi wenzeka ku filiale yabu ne malu a mu nyuma a Bantemu ba Yehowa mu ditunga anyi matunga adi filiale yabu itangila.
Matuku: Ngondo ibidi.
Malu malomba: Biro binene bidi bilombola mudimu wa Bantemu ba Yehowa pa buloba bujima bidi bibikila bamue bena mu Komite wa filiale ne bakaji babu bua kubuela mu kalasa aka. Kadi kenzekela ku Patterson, mu New York (Mu muaba wa dilongeshangana wa Watchtower).

Nkuepi kudibu bangatshila malu adibu balongesha Bantemu?

Malu adibu balongesha Bantemu ba Yehowa, batu baangatshila anu mu Bible. Tudi tuitaba ne: Bible mmufundisha kudi Nzambi ku bukole bua nyuma wende ne udi ne mibelu mimpe mitambe idi itangila bibadi bionso bia nsombelu wa buena Kristo.—2 Timote 3:16, 17.

Bantemu ba Yehowa batu bafuta makuta bua malu adibu babalongesha anyi?

Tòo. Batu babalongesha tshianana. Midimu ya Bantemu ba Yehowa itu yenzeka ku diambuluisha dia mapa a budisuile.—2 Kolinto 9:7.

a Bible, filme ne bintu bietu bia kulonga nabi Bible bidi mu site wetu wa jw.org.

b Mpanda-njila nNtemu mubatijibue (mulume anyi mukaji) udi tshilejilu tshimpe kudi bakuabu, udi muangate dipangadika dia kuambila bakuabu malu a mu Bible mêba bungi kampanda bukosa ku ngondo.

c Bakulu mbena Kristo bakole mu nyuma badi balongesha ku diambuluisha dia Bible ne balama bantu ba Yehowa padibu babambuluisha ne babakankamija. Kabatu babafuta makuta bua mudimu wabu to.

d Mutangidi wa tshijengu mmuena mudimu wa ku dîba ne ku dîba udi ukumbula bisumbu bishilashilangane bia mu tshijengu tshiende lumingu luonso. Udi ukankamija bana babu ba mu nyuma ku diambuluisha dia miyuki ya malu a mu Bible ne padiye uyisha nabu.

e Basadidi ba mudimu batu benza midimu mishilashilangane bua kuambuluisha bena Kristo nabu. Nunku badi bambuluisha bakulu bua kuikala ne dîba dia bungi dia kulongesha ne kutabalela tshisumbu.

f Betele ndîna dinyika filiale ya Bantemu ba Yehowa. Bena mudimu wa ku dîba ne ku dîba badimu badi benza mudimu udi wambuluisha Bantemu ba mu teritware wa filiale wabu.

g Komite wa filiale mmuenza ne bakulu basatu anyi ba bungi badi bakumbane ne bakole mu nyuma.

Malu adibu balongesha Bantemu ba Yehowa mmabambuluishe mushindu kayi?

“Bu muntu muena lumamamama, bivua bikole bua meme kuambila bantu bandi tshiyi mumanye malu a mu Bible. Kadi malu andi mulonge mu bisangilu bia munkatshi mua lumingu mangambuluishe bua kuvudija dikima ne kuakaja nyishilu wanyi. Ndi ngakula kabidi ne bakuabu tshiyi kajilu mu tshisumbu nansha ku mudimu.”—Natasha wa mu États-Unis.
“Kubuela mu Kalasa ka bamanyishi ba Bukalenge nkungambuluishe bua kuikala ne ngikadilu mimpe, bu mudi dinanga, lutulu, ne bulenga. Mpindieu ndi ndiumvua mulue muena Kristo muimpe, mulunda muimpe, ne muena mutumba muimpe. Kalasa aka nkandongeshe kabidi mua kuenza makebulula mu biena-bualu bia malu a mu Bible ne mua kumvuija Dîyi dia Nzambi mu mushindu udi ulenga mioyo ya bantu.”—Stephen wa mu Nigéria.
“Kalasa ka bakulu ba mu bisumbu nkangambuluishe bua kuikala ne budipuekeshi bundi nkengela bua kuikala mukulu muimpe. Miyuki mmivuluije mushinga wa kulonda tshilejilu tshia Yezu.”—Luka wa mu Italie.
“Kalasa ka mudimu wa Bukalenge nkandoshe ne: mbimpe ngikale muntu wa kukuatshila malu, muena bulenga, ne musangelu mu malanda anyi ne bakuabu. Mbandongeshamu ne: dinanga ke didi ne bua kunsaka bua kuenzela bakuabu malu, kadi ki nganu bualu ndi muenzejibue to.”—Samuel wa mu Royaume-Uni.
“Kalasa ka Gilada nkatuambuluishe bua kudikonkonona tuditangila mu lumuenu lua mu Dîyi dia Nzambi. (Yakobo 1:22-25) Tuvua bamone miaba ituvua ne bua kulengeja mu bumuntu buetu ne mu mudimu utudi tuenzela Yehowa. Kabidi mbatulongeshe bua kuikala kumona bakuabu bu batupite ne kuenza bua dinanga ditusake mu bionso bitudi tuamba ne tuenza.”—Elnathan ne Princesse ba mu Philippines.