Mmunyi mutu Bantemu ba Yehowa bamona bantu bakadi balekele buntemu?

Tutu tuenza muetu muonso bua kunanga bantu bonso, kubenzela malu mimpe, ne kubanemeka. Ntemu wa Yehowa yeye katshiyi uyisha anyi ubuela mu bisangilu, tudi tuyukila nende, tumujadikila ne: tudi bamunange, ne tumuambuluisha bua asemene kabidi pabuipi ne Yehowa.—Luka 15:4-7.

Misangu mikuabu, malu adi muntu wenza adi mua kumufikisha ku diumbushibua mu tshisumbu. (1 Kolinto 5:13) Kadi bu mutudi banange muena Kristo netu au bikole, tudi tudienzeja bua kudianjila kumuambuluisha bua kabafiki ku dimumbusha mu tshisumbu to. Nansha bobu bamumbushamu, tudi tutungunuka anu ne kumunanga ne kumunemeka anu mudi Bible utulomba bua kuenza.—Mâko 12:31; 1 Petelo 2:17.

Ntshinyi tshidi tshifikisha muntu ku diumbushibua mu tshisumbu?

Bible udi uleja patoke ne: muena Kristo yeye muenze mpekatu munene, ubenga bua kushintuluka, badi ne bua kumumbusha mu tshisumbu.a (1 Kolinto 5:11-13) Bible udi uleja patoke mpekatu minene idi mua kufikisha muntu ku diumbushibua mu tshisumbu. Tshilejilu, udi uleja mpekatu bu mudi kuenda masandi, kukuatshika kua maluvu, kushipa, kukengeshangana mu dibaka, ne buivi.—1 Kolinto 6:9, 10; Galatiya 5:19-21; 1 Timote 1:9, 10.

Kadi muntu yeye muenze mpekatu munene, katutu tumumbusha anu musangu umue mu tshisumbu to. Bakulub ba mu tshisumbu badi banji bakeba bua kumuambuluisha bua kushintulula bikadilu biende. (Lomo 2:4) Badi benza muabu muonso bua kulenga muoyo wende, benza nanku ne bupole, bukalanga, ne bulenga. (Galatiya 6:1) Kuenzela muntu udi muenze mpekatu malu mushindu au, kudi mua kumufikisha ku dijingulula bilema biende ne ku dinyingalala. (2 Timote 2:24-26) Kadi yeye mutungunuke ne kuenza malu adi Bible mukandike, ubenga kushintuluka nansha mudi bakulu bamuambuluishe njila ne njila, badi ne bua kumumbusha mu tshisumbu. Bakulu badi bamanyisha anu tshisumbu patupu ne: muntu au katshiena kabidi Ntemu wa Yehowa to.

Bakulu babidi bumvuija nsongalume mvese ne lutulu luonso. Umue wa kudibu muteke tshianza tshiende pa dikaya dia nsongalume au padiye uyukila nende. — Bakulu benza muabu muonso bua kulenga muoyo wa muntu udi muenze mpekatu, benza nanku ne bupole, bukalanga, ne bulenga

Mbipeta bimpe kayi bidi bipatuka padibu bumbusha muntu udi muangate dipangadika dia kuenza mpekatu mu tshisumbu? Tshia kumpala, tshisumbu tshidi tshilamata ku mikenji ya Nzambi idi yakula bua bukezuke bua mu bikadilu; tshidi tshidikuba ku buenzeji bubi bua muntu au. (1 Kolinto 5:6; 15:33; 1 Petelo 1:16) Tshibidi, bidi mua kufikisha muntu udi muenze mpekatu au ku dilekela njila wende mubi ne ku dienza muende muonso bua kushintuluka.—Ebelu 12:11.

Mmunyi mutu Bantemu ba Yehowa bamona bantu badibu bumbushe mu tshisumbu?

Bible udi uleja ne: bena Kristo badi ne bua ‘kulekela kusomba’ ne muntu udibu bumbushe mu tshisumbu, kabayi ‘badia nansha ne muntu wa mushindu au to.’ (1 Kolinto 5:11) Nunku katuena tusomba ne muntu udibu bumbushe mu tshisumbu to. Tshidibi katuena tumulengulula bua kashidi to. Tudi tumunemeka. Tudi tumujingila difika dilenga mu bisangilu bietu, mudi Bantemu ba Yehowa pamuapa mua kumuela muoyo.c Udi mua kulomba kabidi bakulu bua bamuambuluishe bua kupingana mu tshisumbu.

Muanetu wa balume ne mukajende bakidila ne disanka dionso muanetu wa bakaji uvuabu bumbushe mu tshisumbu. — Tudi tujingila bantu badibu bumbushe mu tshisumbu difika dilenga mu bisangilu bietu

Tshidi tshienzeka ntshinyi padibu bumbusha mulume mu tshisumbu eku mukajende ne bana bende bikale anu Bantemu ba Yehowa? Kabakuenza kabidi malu a mu nyuma pamue to, kadi malanda ende ne bena mu dîku diende kaakukoseka to. Bu mudibu basombele mu nzubu umue, dibaka diabu kadiakufua to, nebatungunuke ne kuenza malu abu a mu dîku bu pa tshibidilu, ne nebikale anu banangangane.

Muntu udibu bumbushe mu tshisumbu udi mua kulomba bakulu bua balue kumutangila. Nebamupeshe mibelu ya mu Bible ne dinanga ne nebamukankamije ne disanka dionso bua anyingalale bua mpekatu wende ne apingane kudi Nzambi. (Zekâya 1:3) Yeye mulekele tshikadilu tshiende tshibi, muleje ne muoyo mujima ne: mmusue kuikala ne nsombelu udi umvuangana ne mikenji ya mu Bible, badi bamupingaja mu tshisumbu. Bena mu tshisumbu ‘nebamufuile luse ne bulenga buonso ne nebamukoleshe,’ anu muvua bena Kristo ba mu Kolinto benze pavua muntu uvua muenze mpekatu mulekele kuenza mpekatu.—2 Kolinto 2:6-8.

Tshidi bantu bavuabu bumbushe mu tshisumbu ku kale bamba

Mona tshidi Bantemu ba Yehowa bakuabu bavuabu bumbushe mu tshisumbu, pashishe balue kupingana kudi Nzambi bamba:

“Pangakangata dipangadika dia kupingana mu tshisumbu, ngakela meji ne: bakulu nebakebe bua kumanya kalu ne kalu konso kamvua muenze munkatshi mua bidimu bionso bivuabu bangumbushe mu tshisumbu. Kadi bakangambila anu ne: ‘Tudi basue bua utume meji ebe onso ku tshiudi mua kuenza mpindieu.’ Pakangambilabu nanku, ngakumvua disulakana dia bungi.”—Maria wa mu États-Unis.

“Bena mu tshisumbu bavua bindile dipingana dianyi mu tshisumbu ne muoyo mujima. Meme kudimona ne mushinga. Bena Kristo nanyi bakangambuluisha bua kumona ne: Yehowa ne bena mu tshisumbu bakavua bamfuile luse; biakangambuluisha kabidi bua kuya kumpala. Bakulu bakangambuluisha anu bua ngikale kabidi mu malanda makole ne Yehowa. Bakankolesha ku muoyo ne bakamfikisha ku dimona ne: Yehowa utshidi anu untua mushinga ne munnange.”—Malcom wa mu Sierra Leone.

“Ndi ne disanka dia bungi bua mudi Yehowa munange bantu bende bikole, wenza bua bulongolodi buende buikale anu bukezuke. Nansha mudi bantu badi kabayi bamanye bualu ebu bimpe mua kumona bu ne: mbibi bua kumbusha benji ba mpekatu mu tshisumbu; kuenza nanku kudi ne mushinga ne kudi kuleja mutudi babanange bikole. Ndi ne dianyisha dia bungi kudi Tatu wetu wa mu diulu bua mudiye Nzambi udi mutunange ne utufuila luse.”—Sandi wa mu États-Unis.

Malu adi bamanyi bapiluke ba mikenji badi kabayi Bantemu ba Yehowa bamba

Ntshinyi tshidi bena ku tubadi ne bamanyi bapiluke ba mikenji bamba bua mudi Bantemu ba Yehowa bumbusha benji ba mpekatu badi kabayi banyingalale mu bisumbu biabu? Mona malu adibu bamba:

“Tudi batekemene ne: tshisumbu tshia malu a Nzambi tshidi tshilombola kudi mêyi manene a mu Bible ne tshikeba kuatumikila, tshikale ne bukokeshi bua [kumbushamu muenji wa mpekatu padibi biakanyine]. Dipangadika adi ndia meji ne didi ne mushinga, bualu muntu yeye kayi mukumbane bua kulonda mikenji ya mu Bible anyi kayi musue kuyilonda ki mmkumbane bua kuikala mu tshisumbu atshi to; bobu kabayi bamumbushamu mmufuane kunyanga bena lulamatu.”—Haute Cour de justice d’Angleterre et du Pays de Galles, 7/6/2019.
“Tubadi tua ku Mputu ne tua miaba mikuabu ntufike ku dimona ne: mapangadika a [kumbusha muntu mu tshisumbu] . . . adi mu diumvuangana ne mikenji idi ipesha Bantemu ba Yehowa bukenji bua kuangata mapangadika a ntendelelu wabu . . . anyi tubadi tua mu ditunga katuena nansha ne bukenji bua kubuelakana mu bualu ebu to.”—Mulongeshi Paulo Pinto de Albuquerque, nzuji wa kale ku kabadi ka ku Mputu ka manême a bantu.

a Ku kale, tuvua tuakula bua muntu udi muenze mpekatu kayi munyingalale ne: uvua muipata mu tshisumbu. Kadi lelu, bilondeshile mêyi a mu Bible, tudi tuamba anu patupu ne: muntu udi muenze mpekatu au mmumbushibue mu tshisumbu.

b Bakulu mbena Kristo bakole mu nyuma badi balongesha ku diambuluisha dia Bible ne balama bantu ba Yehowa padibu babambuluisha ne babakankamija. Kabatu babafuta makuta bua mudimu wabu to.—1 Petelo 5:1-3.

c Mu nsombelu mikuabu mikole, muntu udi mua kumbuka mu tshisumbu, utuadija kuakula bibi bua tshisumbu anyi kusaka benamu bua kuenza malu mabi. Dîba adi, tudi tutumikila mukenji wa mu Bible wa ne: “kanumuedi muoyo to.”—2 Yone 9-11.