Yezu ubuela mu Yelushalema mubande pa mpunda bu Mukalenge

Milayi ya buprofete ya bualu bua Masiya idi ijadika ne: Yezu ke Masiya au anyi?

Diandamuna dia mu Bible

Eyowa. Pavua Yezu pa buloba, uvua mukumbaje milayi ya bungi ya buprofete ya bualu bua “Masiya Mulombodi,” uvua ne bua kulua “Mupandishi wa ba pa buloba.” (Danyele 9:25; 1 Yone 4:14) Nansha panyima pa lufu luende, wakatungunuka anu ne kukumbaja milayi ya buprofete ya bualu bua Masiya.—Misambu 110:1; Bienzedi 2:34-36.

Muaku “Masiya” udi umvuija tshinyi?

Muaku wa mu tshiena Ebelu wa ne: Mashiach (Masiya) udi upetangana ne wa mu tshiena Greke wa ne: Khristos (Kristo). Yonso ibidi idi yumvuija ne: “Muela Manyi.” Nunku “Yezu Kristo” udi umvuija “Yezu Muela Manyi,” anyi “Yezu Masiya.”

Misangu ya bungi ku kale, bavua bela muntu manyi mu mutu pavuabu bamupesha bukokeshi kampanda bua pa buabu. (Lewitiki 8:12; 1 Samuele 16:13) Nzambi ke uvua muteke Yezu Masiya, mmumue ne: uvua mumupeshe bukokeshi bunene. (Bienzedi 2:36) Wakamuela manyi a nyuma muimpe pamutu pa kumuela mafuta mu mutu.—Matayi 3:16.

Bantu ba bungi badi mua kukumbaja milayi ya buprofete ya bualu bua Masiya anyi?

Tòo. Anu mutu tushonyi tukese tua ku munu tusunguluja muntu ne mukuabu, milayi ya buprofete ya mu Bible idi ikumbanyina anu Masiya umue, anyi Kristo. Bible ukavua mutudimuije ne: “ba-Kristo ba dishima ne baprofete ba dishima nebajuke, ne nebenze bimanyinu binene ne malu a kukema bua kupambuisha, kuoku mushindu, too ne basungula.”—Matayi 24:24.

Masiya udi ne bua kumueneka mu matuku atshilualua anyi?

Tòo. Bible ukavua mudianjile kuamba ne: Masiya uvua ne bua kuikala wa mu ndelanganyi ya Davidi mukalenge wa Isalele. (Misambu 89:3, 4) Kadi mikanda ivua ne malu a dilondangana dia bankambua ba bena Yuda kutuadijila anu ku Davidi, yakajimina, bimueneka ne: bakayibutula dîba divua bena Lomo bakuate Yelushalema mu 70 B.B.a Katshia anu ku tshikondo atshi, kakutshivua kabidi mushindu wa muntu kujadikila bakuabu mudiye wa mu dîku dia bukalenge dia Davidi to. Kadi mu tshikondo tshivua Yezu pa buloba, mikanda ayi ivuaku, nansha nanku baluishi bende bakela mpata kabayi bitaba ne: ngua mu ndelanganyi ya Davidi to.—Matayi 22:41-46.

Milayi ya buprofete ya bualu bua Masiya idi bungi kayi mu Bible?

Mbikole bua kumanya bungi busunguluke bua milayi ya buprofete ya bualu bua Masiya. Mushindu wa kubala milayi ya buprofete udi mua kushilangana, nansha bua mvese mine idi yakula bua Masiya payi. Tshilejilu, mu Yeshaya 55:2-7 mbalejamu mulongolongo wa malu adi atangila Masiya. Bamue badi mua kubala mvese yonso eyi bu mulayi umue wa buprofete, padi eku bakuabu pabu mua kumona malu adibu bambamu bu milayi ya buprofete mishilangane.

Imue milayi ya buprofete ya bualu bua Masiya ivua Yezu mukumbaje

Mulayi wa buprofete	Udi mu	Dikumbana
Wa mu ndelanganyi ya Abalahama	Genese 22:17,18	Matayi 1:1
Wa mu ndelanganyi ya Izaka muana wa Abalahama	Genese 17:19	Matayi 1:2
Mulelela mu Isalele mu tshisa tshia Yuda	Genese 49:10	Matayi 1:1, 3
Wa mu dîku dia bukalenge dia mukalenge Davidi	Yeshaya 9:7	Matayi 1:1
Mulela kudi nsongakaji utshivua kamama	Yeshaya 7:14	Matayi 1:18, 22, 23
Mulelela mu Beteleheme	Mika 5:2	Matayi 2:1, 5, 6
Bamubikila ne: Emanueleb	Yeshaya 7:14	Matayi 1:21-23
Ntuadijilu mukese	Yeshaya 53:2	Luka 2:7
Bashipa bana panyima pa diledibua diende	Yelemiya 31:15	Matayi 2:16-18
Bamubikila bua apatuke mu Ejipitu	Hoshea 11:1	Matayi 2:13-15
Bamubikila ne: muena Nazaleta c	Yeshaya 11:1	Matayi 2:23
Bamudianjidila kudi mutuadi wa mukenji	Malaki 3:1	Matayi 11:7-10
Bamuela manyi, ulua Masiya mu 29 B.B.d	Danyele 9:25	Matayi 3:13-17
Nzambi ujadika ne: mMuanende	Misambu 2:7	Bienzedi 13:33, 34
Muikale ne tshisumi bua nzubu wa Nzambi	Misambu 69:9	Yone 2:13-17
Muyishi wa lumu luimpe	Yeshaya 61:1	Luka 4:16-21
Mudimu wende wa kuyisha mu Galela mbutoke bunene	Yeshaya 9:1, 2	Matayi 4:13-16
Muenji wa bishima anu bu Mose	Dutelonome 18:15	Bienzedi 2:22
Wakula malu adi afumina kudi Nzambi anu bu Mose	Dutelonome 18:18, 19	Yone 12:49
Wondopa babedi ba bungi	Yeshaya 53:4	Matayi 8:16, 17
Kayi ukoka ntema ya bantu kudiye to	Yeshaya 42:2	Matayi 12:17, 19
Umvuila bakengi luse	Yeshaya 42:3	Matayi 12:9-20; Mâko 6:34
Umanyisha kulumbuluisha kuakane kua Nzambi	Yeshaya 42:1, 4	Matayi 12:17-20
Mufidi wa Mibelu wa Dikema	Yeshaya 9:6, 7	Yone 6:68
Umanyisha dîna dia Yehowa	Misambu 22:22	Yone 17:6
Wamba malu mu bilejilu	Misambu 78:2	Matayi 13:34, 35
Mulombodi	Danyele 9:25	Matayi 23:10
Ba bungi kabakamuitabuja to	Yeshaya 53:1	Yone 12:37, 38
Dibue dia kutondokaku	Yeshaya 8:14, 15	Matayi 21:42-44
Bantu bamubenga	Misambu 118:22, 23	Bienzedi 4:10, 11
Bamukina kakuyi bualu	Misambu 69:4	Yone 15:24, 25
Ubuela mu Yelushalema mubande pa mpunda bu Mukalenge	Zekâya 9:9	Matayi 21:4-9
Bamutumbisha kudi bana	Misambu 8:2	Matayi 21:15, 16
Ulua mu dîna dia Yehowa	Misambu 118:26	Yone 12:12, 13
Bamutungile kudi mulunda uvuaye weyemena	Misambu 41:9	Yone 13:18
Bamutungile ku bitupa bia arjan 30e	Zekâya 11:12, 13	Matayi 26:14-16; 27:3-10
Balunda bende bamulekela	Zekâya 13:7	Matayi 26:31, 56
Bantemu ba dishima bamushiminyina malu	Misambu 35:11	Matayi 26:59-61
Mushale mupuwe kumpala kua bavua bamubanda ne malu	Yeshaya 53:7	Matayi 27:12-14
Bakamutuila mate	Yeshaya 50:6	Matayi 26:67; 27:27, 30
Bamukuma bintu ku mutu	Mika 5:1	Mâko 15:19
Bamuela mfimbu	Yeshaya 50:6	Yone 19:1
Kayi muluishe bantu bavua bamukuma to	Yeshaya 50:6	Yone 18:22, 23
Bamfumu ba mbulamatadi bamuelela tshifufu	Misambu 2:2	Luka 23:10-12
Bapopela bianza ne makasa ende ku mutshi	Misambu 22:16	Matayi 27:35; Yone 20:25
Bantu belela bilamba biende nshobo	Misambu 22:18	Yone 19:23, 24
Ubadibua pamue ne benji ba mpekatu	Yeshaya 53:12	Matayi 27:38
Bamukina, bamupenda	Misambu 22:7, 8	Matayi 27:39-43
Ukenga bua benji ba mpekatu	Yeshaya 53:5, 6	1 Petelo 2:23-25
Umueneka mulekelela kudi Nzambi	Misambu 22:1	Mâko 15:34
Bamupesha mvinyo wa buanji ne bintu bia bululu bua kunua	Misambu 69:21	Matayi 27:34
Muikale ne nyota kumpala kua kufua	Misambu 22:15	Yone 19:28, 29
Ushiya nyuma wende mu bianza bia Nzambi	Misambu 31:5	Luka 23:46
Ukula muoyo	Yeshaya 53:12	Mâko 15:37
Ufila tshia kupikulangana natshi bua kumbusha mpekatu	Yeshaya 53:12	Matayi 20:28
Mifuba yende ki mmitshibuke to	Misambu 34:20	Yone 19:31-33, 36
Bamutubula	Zekâya 12:10	Yone 19:33-35, 37
Bamujiika pamue ne babanji	Yeshaya 53:9	Matayi 27:57-60
Bamubisha ku lufu	Misambu 16:10	Bienzedi 2:29-31
Muntu mukuabu upingana pa muaba wa mumutungidi	Misambu 109:8	Bienzedi 1:15-20
Musomba ku tshianza tshia balume tshia Nzambi	Misambu 110:1	Bienzedi 2:34-36

a Mukanda kampanda (McClintock and Strong’s Cyclopedia) udi wamba ne: “Kakuena mushindu wa kuela mpata ne: mikanda ivua ne malu a bisa ne a mêku a bena Yuda yakajimina pakabutulabu Yelushalema, kadi ki nkumpala to.”

b Dîna dia mu tshiena Ebelu dia ne: Emanuele didi diumvuija ne: “Nzambi udi netu,” didi dileja mudimu udi nawu Yezu bu Masiya. Dikalanganaku diende pa buloba ne malu avuaye muenze, bidi bileja ne: Nzambi udi ne batendeledi bende.—Luka 2:27-32; 7:12-16.

c Muaku “Nazaleta” udi pamuapa ufumina ku muaku wa mu tshiena Ebelu netser, udi umvuija “Lutonga.”

d Bua kumanya malu makuabu a mudi dilondangana dia malu a mu Bible dileja ne: tshidimu tshia 29 B.B. ke tshidimu tshivua Masiya ne bua kulua, tangila tshiena-bualu tshia “Mudi mulayi wa Danyele umanyisha dilua dia Masiya.”

e Mulayi wa buprofete eu udi mu mukanda wa Zekâya. Tshibi, Matayi mufundi wa Bible udi wamba ne: ‘muprofete Yelemiya ke uvua muambe mulayi wa buprofete au.’ (Matayi 27:9) Bidi bimueneka ne: mukanda wa Yelemiya ke uvuabu bateke imue misangu kumpala kua mikanda mikuabu ivuabu babikila ne: “Baprofete.” (Luka 24:44) Matayi uvua pamuapa mutele Yelemiya bua kuakula bua mikanda yonso ayi, mu mikanda ayi mudi kabidi mukanda wa Zekâya.