DIUMVUIJA DIA MVESE YA MU BIBLE
Yoshua 1:9—“Ikala ne dikima ne bukole”
“Tshiena mukutumine dîyi anyi? Ikala ne dikima ne bukole. Kuikadi ne buôwa anyi kutshinyi to, bualu Yehowa Nzambi webe udi nebe kuonso kuudi uya.”—Yoshua 1:9, Nkudimuinu wa bulongolodi bupiabupia.
‘Tshiakukuambila, anyi? Ikala ne bukole ne mutshima wa dikima; kutshinyi, kukuatshiki buôwa, bualu bua Yehowa, Nzambi webe, udi nebe kuonso kuwaya.’—Yoshua 1:9, Mukanda wa Nzambi.
Diumvuija dia Yoshua 1:9
Mu mvese au, Yehowaa wakajadikila mutendeledi wende Yoshua uvua ne lulamatu bua ikale “ne dikima ne bukole” nansha pavuaye upeta nsombelu anyi ntatu ivua imueneka bu mikole bua kutantamena. Yoshua kavua ne tshintu tshia kumvuila buôwa mu matuku avua alua kumpala pavuaye utumikila mikenji ya Nzambi to, bualu bivua bienze anu bu ne: Yehowa uvua anu ku luseke luende bua kumupesha diambuluisha divuaye nadi dijinga. Nzambi uvua ne Yoshua pavuaye umupesha mêyi a kulonda ne umuambuluisha bua kutshimuna bena lukuna bende.
Yoshua uvua mua kupeta “dikima ne bukole” mushindu kayi? Uvua upeta dikima ne bukole ku diambuluisha dia mifundu ivua Yehowa mufundishe ku bukole bua nyuma wende ivuaku tshikondo atshi. Mu mifundu ayi muvua ‘Mikenji yonso ivua Mose muena mudimu wa Yehowa mutumine Yoshua dîyi bua kutumikila.”b (Yoshua 1:7) Yehowa wakambila Yoshua bua ‘kuyibala ne dîyi dia panshi panshi [“kuelelanganapu meji,”] Nkudimuinu wa bulongolodi bupiabupia] munya ne butuku.’ (Yoshua 1:8) Dibala ne dielangana meji bia nanku biakakolesha didisuika dia Yoshua dia kuenza disua dia Nzambi. Nunku Yoshua uvua ne bua ‘kutumikila ne muoyo mujima malu onso avuabu bafundamu,’ mmumue ne: kutumikila malu avuaye ulonga mu Dîyi dia Nzambi. Pavuaye wenza nanku, dîba adi uvua wenza malu ne meji ne malu ende avua enda bimpe. Ke tshiakenzeka menemene. Nansha muvua Yoshua mupete ntatu, uvua ne nsombelu muimpe muule tente ne disanka mu mudimu wa Yehowa.—Yoshua 23:14; 24:15.
Mêyi avua Yehowa muambile Yoshua adi atukolesha kabidi lelu. Adi aleja patoke ne: Yehowa udi uditatshisha bikole bua batendeledi bende bonso, nangananga padibu bapeta ntatu. Mmusue bua malu abu ende bimpe anu bu Yoshua. Anu bu Yoshua, badi mua kupeta “dikima ne bukole” padibu babala Bible Dîyi dia Nzambi pa tshibidilu ne belanganapu meji, pashishe batumikila mibelu idimu.
Malu adi Yoshua 1:9 wakuila
Panyima pa lufu lua Mose, Yehowa wakambila Yoshua bua alombole tshisamba tshia Isalele. (Yoshua 1:1, 2) Tshikondo atshi, bena Isalele bakavua pa kubuela mu Buloba Bulaya, anyi mu ditunga dia Kanâna. Kadi bivua bikengela batshimune bena lukuna babu ba bukole. Tshilejilu,Yoshua wakaluangana mvita ne bena Kanâna bavua bantu babi menemene.c (Dutelonome 9:5; 20:17,18) Bena Kanâna bavua kabidi ba bungi ne bavua ne bia mvita bipite bia bena Isalele. (Yoshua 9:1,2; 17:18) Abi kabiakapangisha Yoshua bua kutumikila ne dikima mêyi a kulonda a kudi Yehowa to. Nzambi wakamuambuluisha, bualu bena Isalele bakatshimuna bena lukuna babu ba bungi anu mu bidimu bisambombo patupu.—Yoshua 21:43, 44.
a Mbakudimune dîna dia Nzambi dia mu tshiena Ebelu mu Tshiluba ne: Yehowa. Maleta anayi aa יהוה (YHWH) badi baabikila ne: Tétragramme. Mu Bible wa New International Version mbakudimune dîna edi ne: “MUKALENGE.” Bua kumanya malu makuabu adi atangila Yehowa ne bua tshinyi nkudimuinu mikuabu ya Bible kayena itela dîna adi, bala tshiena-bualu tshia “Yehowa nnganyi?”
b Mifundu mifundisha ku bukole bua nyuma wa Nzambi ivua nayi Yoshua, ne itudi petu nayi lelu mu Bible ivua pamuapa mienza ne mikanda itanu ya Mose (Genese, Ekesode, Lewitiki, Nomba, ne Dutelonome), mukanda wa Yobo, ne mukanda umue wa misambu anyi ibidi.
c Bua kumanya bua tshinyi bena Isalele bavua baluangana mvita, bala tshiena-bualu tshia “Pourquoi Dieu a-t-il ordonné l’extermination des Cananéens?” mu Tshibumba tshia Nsentedi tshia dia 1/1/2010 mu Mfualansa.