DIUMVUIJA DIA MVESE YA MU BIBLE
Matayi 6:33—‘Kebayi tshia kumpala Bukalenge bua Nzambi’
“Nunku, tungunukayi ne kukeba tshia kumpala Bukalenge ne buakane buende, ne nebanusakidile bintu bikuabu bionso ebi.”—Matayi 6:33, Nkudimuinu wa bulongolodi bupiabupia.
“Kadi diambedi kebai bukelenge buandi ne buakane buandi, nunku nebanuhe bintu ebi bionso.”—Matayi 6:33, Mukanda wa Nzambi.
Diumvuija dia Matayi 6:33
Bukalenge bua Nzambi mmbulamatadi wa mu diulu wikala ne bua kukumbaja disua dia Nzambi pa buloba. (Matayi 6:9, 10) Muntu udi ukeba tshia kumpala Bukalenge bua Nzambi padiye ubuteka kumpala kua malu ende onso.a Mmusue kumanya malu onso adi atangila Bukalenge bua Nzambi, mmusue kabidi kumanyisha bakuabu malu mimpe ikalabu ne bua kukumbaja. (Matayi 24:14) Muntu udi ukeba Bukalenge udi kabidi usambila bua bulue.—Luka 11:2.
Buakane bua Nzambi mmikenji yende idi ileja bikadilu bimpe ne bibi. (Misambu 119:172) Nunku, tudi tukeba buakane bua Nzambi patudi tutumikila mikenji yende ya bikadilu idi miela anu bua diakalenga dietu.—Yeshaya 48:17.
Tshiambilu tshia ne: nebanusakidile bintu bikuabu bionso ebi tshidi tshileja ne: Nzambi neakumbaje majinga a bantu badi bateka Bukalenge buende ne mikenji yende pa muaba wa kumpala mu nsombelu wabu.—Matayi 6:31, 32.
Malu adi Matayi 6:33 wakuila
Yezu wakamba mêyi au mu muyuki wende wa pa mukuna, utudi tupeta mu Matayi nshapita 5 too ne wa 7. Kakuyi mpata, bateleji bende ba bungi bavua bapele. Pamuapa bavua bela meji ne: bivua bikengela banji badifile bikole mu dikeba dia bintu bia kudiambuluisha nabi, nunku balua kushala ne dîba dikese dia kukeba Bukalenge. Kadi Yezu wakabakankamija bua kutangila mushindu udi Nzambi utabalela bikunyibua ne nyama. Nzambi mmulaye bua kuenzela bantu badi bakeba tshia kumpala Bukalenge bia muomuomue.—Matayi 6:25-30.
Mutu bamue babuejakaja Matayi 6:33
Mutu bamue babuejakaja: Muntu udi ukeba Bukalenge udi ulua mubanji.
Bulelela bua bualu: Yezu wakaleja ne: bantu badi bakeba tshia kumpala Bukalenge bua Nzambi nebapete bintu bidibu bakengela, bu mudi biakudia ne bilamba. (Matayi 6:25, 31, 32) Kadi kavua mulaye bintu bia mushinga mukole anyi ne: dikala ne bintu bia bungi ntshijadiki tshia ne: Nzambi udi utubenesha bikole to. Wakadimuija too ne bantu bavua bamuteleja bua kubenga kukeba bua kulua babanji bualu kuvua mua kubapangisha bua kukeba tshia kumpala Bukalenge. (Matayi 6:19, 20, 24) Mupostolo Paulo uvua mukuate mudimu wa bungi bua Bukalenge bua Nzambi, kadi kuvua misangu uvuaye anu ne bintu bikese bia mubidi bia kudiambuluisha nabi. Anu bu Yezu, wakadimuija bantu bakuabu bua njiwu ya kudienzeja bua kulua babanji.—Filipoyi 4:11, 12; 1 Timote 6:6-10.
Mutu bamue babuejakaja: Bena Kristo ki mbenzejibue bua kuenza mudimu bua kukumbaja majinga abu to.
Bulelela bua bualu: Bible udi uleja ne: bena Kristo badi ne bua kuenza mudimu bua kukambaja majinga abu ne a bena mu dîku diabu. (1 Tesalonike 4:11, 12; 2 Tesalonike 3:10; 1 Timote 5:8) Yezu ki mmuambe ne: bayidi bende badi ne bua kukeba anu Bukalenge bua Nzambi to, kadi mmubambile bua bakebe tshia kumpala Bukalenge.
Bantu badi bakeba tshia kumpala Bukalenge bua Nzambi ne benza mudimu bua kukumbaja majinga abu bikale bajadike ne: Nzambi neabambuluishe bua kukumbaja majinga au.—1 Timote 6:17-19.
a Tshiambilu tshia “tungunukayi ne kukeba” ntshikudimuina ku muaku wa pa muanda wa mu tshiena Greke udi uleja bualu budi muntu utungunuka ne kuenza; badi mua kukudimuna kabidi tshiambilu atshi ne: “kebayi misangu yonso.” Nunku Bukalenge budi ne bua kuikala pa muaba wa kumpala, ki mbualu budi muntu wenza anu bua tshitupa tshîpi to.