Lomo 12:2​—“Nushintuluke pa kukudimuna meji enu”

“Lekelayi kuikala nufumbibua kudi ndongoluelu wa malu eu, kadi nushintuluke pa kukudimuna meji enu, bua nudijadikile nuenu nkayenu disua dia Nzambi didi dimpe, didi dianyishibue ne didi dipuangane.”​—Lomo 12:2, Nkudimuinu wa bulongolodi bupiabupia.

“Kanudifuanyikishi ku malu a mu tshikondo etshi, kadi nuandamuke ku dikudimuna dia meshi enu bu meshi mahia-mahia bua nuenu nujingulule mudi disua dia Nzambi didi dimpe, didi dimusankisha, ne didi diakane tshishiki.”​—Lomo 12:2, Mukanda wa Nzambi.

Diumvuija dia Lomo 12:2

Bantu badi basue kusankisha Nzambi badi ne bua kulekela malu mabi ne kushintulula kabidi bumuntu buabu. Nzambi kena ubenzeja bua kushintuluka to; badi benza nanku bualu mbamunange ne mbajadike ne: mikenji yende mmimpe, ki mmikole to ne idi ibapetesha mabenesha.​—Yeshaya 48:17.

“Lekelayi kuikala nufumbibua kudi ndongoluelu wa malu eu.” “Ndongoluelu wa malu eu,” mmumue ne: bukua bantu ne bikadilu biabu, malu adibu benza, ne ngenyi yabu kabiena bipetangana ne mikenji ya Nzambi ne meji ende to. (1 Yone 2:15-17) Udi ne buenzeji bukole kudi bantu, budi mua kubafumba, anyi kubashintulula, kufumba bikadilu ne bumuntu buabu. Muntu udi musue bua Nzambi itabe ntendelelu wende udi ne bua kukandamena buenzeji bua ndongoluelu wa malu eu. Tshianana udi wangata bikadilu bidi bifuane kumuenzela bibi ne bidi kabiyi bisankisha Nzambi to.​—Efeso 2:1-3; 4:17-19.

“Nushintuluke pa kukudimuna meji enu.” Bidi bilomba kabidi kudienzeja bua kushintulula meji etu ne mutudi tudiumvua munda menemene. Dishintuluka edi didi ne bua kuikala dia mushindu kayi? Muaku wa mu tshiena Greke udibu bakudimune ne: “nushintuluke” udi uleja dishintuluka dia buena dia dishi didi dilua tshibeyibeyi. Batendeledi ba Nzambi badi ne bua kuvuala “bumuntu bupiabupia.”​—Efeso 4:23, 24; Kolosayi 3:9, 10.

“Nudijadikile nuenu nkayenu disua dia Nzambi didi dimpe, didi dianyishibue ne didi dipuangane.” Nzambi mmusue bua batendeledi bende bikale batuishibue ne muoyo mujima bua malu adibu bitabuja. Badi bafika ku dituishibua nanku padibu balonga Dîyi diende, batumikila malu adidi diamba, ne badimuenena nkayabu mudi kulonda mikenji ya Nzambi kubapetesha mabenesha. Ke mushindu udibu badijadikila nkayabu ne: mêyi a Nzambi mmatambe buimpe.​—Misambu 34:8.

Malu adi Lomo 12:2 wakuila

Lomo nshapita wa 12 udi uleja mushindu utudi mua kutendelela Nzambi bua anyishe ntendelelu wetu. Ntendelelu eu udi utangila malu onso a mu nsombelu, udi ulomba bua muntu enze mudimu ne ‘tshieledi tshiende tshia meji’ pamutu pa kuitabakana malu tshianana tshianana anyi kulonda majinga ende mabi. (Lomo 12:1, 3) Nshapita wa 12 udi ufila mibelu ya mushindu wa kuidikija ngikadilu ya Nzambi, kudituala ne bakuabu, ne tshia kuenza padibu batuenzela bibi.​—Lomo 12:9-21.