Mbasemeje kalonda ka dîba dia kabutu ka buloba pabuipi menemene ne dîba dia mundankulu

Mu dia 27/1/2026, bamanyi ba bia panu mbasemeje kalonda ka dîba dia ku tshimanua pabuipi menemene ne dîba mundankulu didi dileja dituku dikala bantu mua kudibutula bobu nkayabu ne kubutula buloba.

• “Bamanyi ba bia panu ba mu tshisumbu kampanda tshia bamanyi bapiluke mbasemeje kalonda ka dîba didi dileja dituku dikala buloba ne bua kubutuka pa tusunsa 85 pabuipi menemene ne dîba mundankulu; dîba mundankulu didi dileja tshikondo tshidi malu ne bua kuenzeka.”—Bulletin of the Atomic Scientists.

• “Bamanyi ba bia panu batu bakuata mudimu ne kalonda ka dîba adi bua kutumanyisha bualu kampanda. Malu adi akebesha njiwu adi anu enda avula pa buloba, bantu mbapangile mua kusomba bua kukeba tshia kuenza bua kujikija ntatu idibu nayi, ne malu adi enda anu anyanguka bikole menemene. Bantu mbasue bua malu ashintuluke, ne kudi mushindu wa owu kushintuluka. Kadi bua owu kushintuluka bidi bikengela bele badi bakokesha mitoyi bua bakebe tshia kuenza ne lukasa.”—Alexandra Bell, mulombodi ne mutangidi wa Bulletin of the Atomic Scientists.

Bantu ne dibulunge dietu dia buloba edi bikadi pa kubutuka anyi? Mbimpe tutshine malu enzeke kumpala eku anyi? Ntshinyi tshidi Bible wamba?

Malu enzeka kumpala eku

Bible udi wamba ne: “buloba budi bushalaku kashidi” ne bantu “nebasombapu bua kashidi.” (Muambi 1:4; Misambu 37:29) Nunku bantu kabakubutula buloba anyi kubuvuija muaba udi bantu kabayi mua kusombela nansha.

Nansha nanku, Bible udi uleja bimpe ne: nekuikale nshikidilu. Tshilejilu, udi wamba ne: “buloba budi bupita.”—1 Yone 2:17.

• Bua kumanya tshidi Bible usua kuamba padiye wakula bua nshikidilu wa buloba, bala tshiena-bualu tshia “Tudi batangile ku nshikidilu wa bionso bia panu anyi? Bible mmulaye kabutu ka bionso bidiku anyi?”

• Bua kumanya tshidi Bible wamba bua malu enzeke kumpala eku, bala tshiena-bualu tshia “Quand la fin du monde viendra-t-elle?”

Ikala anu umona malu mu mushindu muimpe

Bible udi mua kutuambuluisha bua kumona malu mu mushindu muimpe nansha mudiku ntatu pa buloba. Mushindu kayi?

• Bible udi utupesha mibelu mimpe. (2 Timote 3:16, 17) Tshilejilu, bala tshiena-bualu tshia “Mua kupita ne malu adi asamisha mutu” bua umone mudi Bible mua kukuambuluisha bua wikale umona malu mu mushindu muimpe nansha mudiku ntatu.

• Bible udi ufila ditekemena dilelela dia matuku atshilualua. (Lomo 15:4) Udi umvuija menemene tshitudi mua kutekemena lelu ne matuku atshilualua; dîba adi netushale anu ne ditekemena nansha malu a mushindu kayi mua kuenzeka pa buloba.

Bua wewe kumvua Bible bimpe menemene, tudi tukulomba ne muoyo mujima bua utete programe wetu wa dilonga dia Bible dia ulonga ne mulongeshi lelu kuyi ufuta makuta.