Dienzelangana malu mabi bua lukinu nedijike—Ntshinyi tshidi Bible wamba?

Lelu, bantu ba bungi bakadi benzela bakuabu malu mabi bualu mbabakine. Badi babenzela malu au pamuapa bua dikoba diabu, bua tshitendelelu tshiabu, bua tshisamba tshiabu, bua mudibu bantu bakaji anyi bantu balume, peshi bua malu makuabu. Malu mabi au mmashiye bantu ba bungi ne buôwa ne tunyinganyinga; bakuabu bine mbafike too ne ku dijimija mioyo yabu.

Bible ukavua muleje ne: tshikondo tshitudi etshi bantu ba bungi nebikale “bena luonji, kabayi banange malu mimpe, kabayi banange bana babu.” (2 Timote 3:1-5) Nunku malu mabi adi bantu benzela bakuabu bua mudibu babakine neajike anyi?—Ntshinyi tshidi Bible wamba?

Muajika malu mabi adi bantu benzelangana bua lukinu

Bible udi utujadikila ne: Nzambi neajikije malu a tshikisu adi bantu benzela bakuabu ne ke tshienzaye.

• ‘Bantu babi nebabutudibue. Kadi bena bupuekele nebapiane buloba, nebikale ne disanka dipite bungi mu ditalala divule.’ (Misambu 37:9-11) Nzambi kakuitaba bua bantu babi batungunuke ne kukengesha bakuabu to.

• “[Nzambi] neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha mbila ya miadi, nansha bintu bidi bisama kabiakuikalaku kabidi.” (Buakabuluibua 21:4) Nzambi neumbushe tshintu tshionso tshidi tshikebele bantu tunyinganyinga ne ntatu.

• “Nekuikale dibishibua dia bantu ku lufu.” (Bienzedi 24:15) Nzambi neabishe bantu miliyo ya bungi ku lufu, too ne aba bavua bafue anu bua malu mabi avuabu babenzele kudi bantu bavua babakine.

Tshia kuenza padibu batukine anyi patudi bakine bakuabu

Bible udi utupesha ditekemena ne utuambuluisha kabidi bua kumanya tshia kuenza padibu batukine anyi patudi bakine bakuabu. Udi mua kupeta mandamuna adi Bible ufila bua nkonko eyi:

• Ntshinyi tshitudi mua kuenza bua kulekela lukinu ludi mua kutufikisha ku dienzela bakuabu malu mabi? Tangila diandamuna didi Bible ufila bua lukonko elu mu Tshibumba tshia Nsentedi tshidi ne tshiena-bualu tshia ne: “Mua kuimanyika lukuna.”

• Bua tshinyi Nzambi mmulekele bantu batungunuka ne kukenga mushindu eu? Mona diandamuna dimpe didi Bible ufila bua lukonko elu mu filme wa Nzambi mmulekele makanga bua tshinyi?