25 DAVIDI
Uvua ne dikima kuenzaye tshivua tshiakane
DAVIDI uvua unyemakana mukalenge Shaula. Kumpala Shaula uvua munange Davidi ne uvua umueyemena ne muoyo mujima. Uvua mumuambuidi wa bia mvita ne mfumu wa tshiluilu tshiende. Mpindieu ukavua umunyema bua kusungila muoyo wende. Yehowa ukavua mulaye bua kumuteka mukalenge. Nansha nanku uvua anu wenda usokoma mu tshipela bua kudikuba, yeye ne bantu 600 bavuaye nabu.
Shaula ukavua mulue mukalenge mubi. Bu muvuaye umvuila Davidi mukawu, uvua nende tshiji tshia bungi ne ukavua ukeba kumushipa. Umue musangu Davidi wakapeta mushindu wakushipa Shaula, kadi kakamushipa to. Pamutu pa Shaula kumuleja dianyisha, wakatungunuka ne kukeba bua kumushipa. Bena mu tshimenga tshia Zifa muvua Davidi mulue kusokomena bakamuyila mu tshitungu, kulejabu Shaula muaba uvuaye musokome. Tshivua musangu muibidi uvuabu bamuyile mu tshitungu. Shaula ne tshiluilu tshiende bakamulondakaja.
Davidi wakumvua ne: Shaula uvua mu tshipela amu, kutumaye bantu bua kumanya muaba uvuaye. Shaula uvua ne basalayi 3 000. Ntshinyi tshiakenza Davidi? Kakapampakana to. Mu kuamba kuimpe, mu tshikondo atshi ke muakafundaye mêyi a ne: “Monayi! Nzambi udi muambuluishi wanyi; Yehowa udi ne badi bankuatshisha.” (Mis. 54:4; bala kabidi mutu wa mukanda.) Nanku Davidi wakangata dipangadika bua kuya mu tshitudilu muvua Shaula butuku. Wakebeja bantu bende babidi ni kuvua muntu uvua mua kuya nende.
Abishai wakitaba bua kuya nende. Uvua muana wa muanabu ne Davidi. Uvua musalayi wa dikima, ne kuvua misangu ivuaye wenza malu kayi ne luse to. Pavua Davidi ne Abishai babuele bitekete bitekete mu tshitudilu muvua Shaula, bakapeta bantu bonso balale. Mu bulelela Yehowa ke uvua mubaladike tulu tukole. Ndekelu wa bionso bakafika muaba uvua mukalenge Shaula. Yeye pende uvua mufue tulu, kakuyi muntu mumulame, ne difuma diende divua diasa mu buloba lua ku mutu kuende.
Ntshinyi tshiakenza Davidi? Bivua bipepele bua yeye kushipa Shaula. Bu yeye mumushipe, kavua mua kuikala kabidi umunyemakana to; uvua mene mua kulua mukalenge. Abishai kavua mumvue bua tshinyi Davidi ukavua mubenge bua kushipa Shaula musangu mukuabu to. Wakambila Davidi ne: “Lelu Nzambi mmufile muena lukuna webe mu tshianza tshiebe. Mpindieu, itaba koku mmulamatshishe ne difuma mu buloba anu musangu umue tshianana, kabiakundomba bua kuenza nanku misangu ibidi to.”
Davidi wakavuluka musangu mukuabu uvuaye mupete mpunga wa kushipa Shaula. Pavuaye musokome mu nyongolo wa mu tshipela tshia Ene-gedi, Shaula wakalua kubuelamu pende. Bu muvuaye kayi mumone Davidi, bivua bipepele bua Davidi kumushipa. Kadi kakamushipa to, wakakosa anu luzembe lua tshilamba tshiende. Nansha nanku kondo kende ka muoyo kakamulubakaja bikole bua muvuaye kayi munemeke Shaula mukalenge muela manyi wa Yehowa.
Kadi musangu eu kabivua anu bipepele bua Davidi kupangisha Abishai bua kushipa mukalenge to. Davidi uvua mumanye ne: Abishai uvua pende unyema Shaula. Bantu bonso bavua ne Davidi bavua bajinga bua Shaula alekele kubakengesha. Nansha nanku, Davidi wakabenga kudisombuela. Wakashintulula ngelelu wa meji wa Abishai, kumulombaye bua ashale ne lutulu. Wakambila Abishai ne: “Yehowa nkayende neamushipe, anyi diende dituku nedilue yeye kufua, peshi udi mua kupueka ku mvita yeye kufua.” Kumuambilaye kabidi ne muoyo mujima ne: “Ku mêsu kua Yehowa kabiena mua kuenzeka bua meme kujula tshianza tshianyi bua kuluisha muela manyi wa Yehowa to!”
Pavua Abishai muambile Davidi bua kushipa Shaula muena lukuna wende munene, ntshinyi tshiakenza Davidi?
Davidi uvua mumanye ne: Yehowa uvua ne bua kunyoka Shaula mu tshikondo tshikumbanyine. Wakafunda kabidi bua Yehowa mu musambu utukadi batele ne: “Yeye neapingajile baluishi banyi bubi buabu.” (Mis. 54:5) Nunku Davidi ne Abishai bakumbuka mu tshitudilu amu, kuyabu pa mukuna. Davidi kuelaye Shaula ne basalayi bende dîyi. Wakatandisha basalayi abu bua muvuabu kabayi balame mukalenge wabu, kutandishaye kabidi Shaula bua muvuaye ujimija dîba diende wenda umulondakaja, bualu uvua udibikila ne: “mutole wetu wa tshianana eu” uvua kawuyi mua kuenzela mukalenge bualu to. Shaula wakumvua bibi menemene, kuambaye ne: “Ndi muenze malu ne bupote ne ndi muenze tshilema tshibi tshitambe.”
Shaula wakaluaku kushintulula ngelelu wende wa meji anyi? Tòo. Davidi uvua pamuapa mumanye ne: Shaula kavua mushintuluke to. Nansha nanku uvua ne disanka bua muvuaye musankishe Yehowa ne muangate dipangadika dimpe ne dikima. Panyima pa matuku, Yehowa wakabenesha Davidi mutendeledi wende wa lulamatu uvua ne dikima au mu mushindu uvuaye kayi muelele meji to.
Bala bualu ebu mu:
Lukonko lua kuelela meji:
Anu mutudi balonge mu nshapita eu, mmushindu kayi uvua Davidi muenze malu ne dikima?
Buela mu buondoke
1. Nansha muvua Abishai muntu uvua wenza malu kaayi melela meji ne kayi ne luse, mmunyi muvuaye muimanyine bantu ba Nzambi ne muambuluishe Davidi? (it “Abishai” §3-5-wcgr)
2. Bua tshinyi Davidi uvua mudifuanyikije ne: “nkuadi mu mikuna”? (1 Sam. 26:20; it “Nkuadi” §4-wcgr) A
Ekaterina Kolomeets/stock.adobe.com
Tshimfuanyi tshia A
3. Bua tshinyi bivua bilomba Davidi lutulu? (w17.08 6 §14-15)
4. Mmunyi muvua Davidi mutungunuke ne kunemeka bumfumu bua Yehowa bidimu bia bungi pashishe? (w21.09 10 §8) B
Tshimfuanyi tshia B
Keba malongesha
Nansha muvua Shaula muenze bilema bia bungi, Davidi wakanemeka bumfumu buende. Mmunyi mutudi mua kumuidikija mu mushindu utudi tuenzela bantu badi balonda aba malu:
baledi betu? C
Tshimfuanyi tshia C
bakokeshi ba mbulamatadi? D
Tshimfuanyi tshia D
bakulu? E
Tshimfuanyi tshia E
Davidi wakakeba tshivua mua kusankisha Yehowa, kuangataye dipangadika dimpe ne dikima. Mmu nsombelu kayi mudibi mua kutulomba bua kuikala ne dikima ne kuangata mapangadika mimpe?
Tudi bamone mu nshapita eu muvua Davidi muenze malu ne dikima, mmu mushindu kayi mukuabu muudi mua kumuidikija?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Pabishibua Davidi ku lufu, mmalu kayi avua mamuenzekele atudi balonge mu nshapita eu angamuebeja?
Bia kutangila kabidi
Mona filme udi uleja muvua malu atudi balonge aa menzeke.
Wavuluka mudi dinanga—Didi dikolesha muoyo mu malu onso (1:29)
Shaula uvua ne budipuekeshi pakatuadijaye kukokesha, kadi wakapeta lutambishi ku ndekelu kua bukokeshi buende. Ntshinyi tshidi tshilejilu tshiende mua kulongesha bana?
“Mukalenge Shaula” (Fishi ya bantu ba mu Bible ya mu jw.org-wcgr)