27 MEFIBOSHETA
Kakashala muena biji to
MEFIBOSHETA uvua muikulu wa Shaula, mukalenge wa Isalele. Uvua muana wa Yonatana, muntu wa dikima ne mutendeledi wa Yehowa wa lulamatu. Patshivuaye ne bidimu bitanu, ntatu mikole yakamufikila. Bakatapa kakuende Shaula mu mvita pashishe kudishipaye. Bakashipa kabidi tatuende Yonatana mu mvita ayi. Pakapeta ndeji wende mukenji wa lufu lua Shaula ne Yonatana, wakumvua buôwa bua ne: bantu bavua mua kulua kuenzela Mefibosheta bibi. Nanku wakamuambula, kudituaye nende lubilu. Muana au wakamubafuka mu maboko kukulukaye, kutshibukaye mikolo. Wakashala mulema too ne pakafuaye.
Bidi bimueneka ne: Mefibosheta kakalua muena biji bua malu avua mamuenzekele au to. Muena Isalele mukuabu diende Makî wakamuteka kuende. Davidi wakalua kuvuluka ne: uvua mulaye mulunda wende Yonatana bua kutabalela muntu yonso wa mu dîku diende. (1 Sam. 20:14-17) Nanku wakatuma dîyi bua bamutuadile Mefibosheta.
Mefibosheta uvua ne buôwa. Bu muvuaye wa mu dîku dia Shaula mukalenge mubi, uvua mua kuikala muele meji ne: Davidi uvua ujinga kumushipa pende. Nansha nanku wakatumikila dîyi dia mukalenge, kuyaye kuvuaye. Davidi wakakula nende ne dîyi dimpe, kumupingajilaye buloba bua Shaula, kumuambilaye kabidi ne: “Wewe newikale anu udia ku mêsa anyi.” Bu muvua Mefibosheta ne dianyisha dia bungi, wakebeja mukalenge bua tshinyi uvua umuenzela bualu ebu, pende muikale muntu wa tshianana. Wakafika too ne kudidifuanyikija ne mbua mufue!
Mefibosheta uvua mulema ne muana wa nshiya katshia ku buana buende, bakalua kumuyila mu tshitungu ne kumuenzela kabidi malu mabi makuabu
Pakapita matuku, lutatu lukuabu luakamufikila. Davidi wakanyema mu Yelushalema bualu muanende Abashaloma uvua mumutombokele. Siba, muena mudimu wa Mefibosheta, wakamushiya, kuyaye kuambuluisha Davidi. Mefibosheta kavua mua kuya nende to. Kadi wakenza bualu buvua buleja ne: uvua ne lulamatu kudi Davidi ne tshivua tshifikile Davidi tshivua tshimutonde. Kakadibeya muedi to. Atshi tshivua tshimanyinu tshia muntu uvua mu tshinyongopelu. Pakafua Abashaloma mu mvita ivuaye uluisha tatuende, Davidi wakapingana mu Yelushalema mu ditalala. Kadi uvua mukuatshile Mefibosheta tshiji. Bua tshinyi?
Siba uvua mumushiminyine malu kudi Davidi. Pavua Siba wambuluisha Davidi, wakamuambila ne: Mefibosheta uvua mumuyile mu tshitungu, mushale mu Yelushalema bualu uvua ne dijinga dia kulua mukalenge. Ela meji a muvua Davidi mua kuikala mumvue. Batshivua bamuyilaku mu tshitungu kudi muanende mulela ne kudi Ahitofele mumupeshi wa mibelu uvua kabidi mulunda wende wa kueyemena. Ke bualu kayi wakitaba ne: Mefibosheta uvua pende mumuyile mu tshitungu. Bua bualu abu wakatuma dîyi bua bamunyenge bumpianyi buende, buloba bua mukalenge Shaula, ne babupeshe Siba.
Pakamanya Mefibosheta bualu buvua Siba mumushiminyine abu, wakalua kuya kumonangana ne mukalenge Davidi uvua mumukuatshile tshiji ne meji a kumuambila tshivua tshienzeke. Davidi wakamuebeja tshivuaye mushadile mu Yelushalema. Mefibosheta kumuvuluijaye ne: “Muena mudimu webe mmulema,” kumulejaye kabidi muvua Siba mumushiminyine malu kudiye. Pamuapa Davidi uvua mumone ne: Mefibosheta uvua ne kanyinganyinga bua muvuaye kayi mudibeya muedi to. Tshienzedi atshi tshivua tshileja muvua lutatu lua Davidi lumutonde ne muvuaye kayi musue kulua mukalenge pa muaba wende to. Nansha nanku Davidi uvua ne tshiji. Katshivua kabidi musue kuteleja bivua Mefibosheta umuambila to. Wakalua kupangadija bua kupingajila Mefibosheta tshitupa tshia buloba buvuaye mumunyenge abu. Kuambaye ne: Mefibosheta ne Siba bavua ne bua kuabanyangana buloba bua Shaula abu.
Mefibosheta uvuaku mufiike munda bua muvuaye ne bua kuabanyangana bumpianyi buende ne muena mudimu wende uvua mumushiminyine malu anyi? Tòo. (Dut. 19:18, 19) Nansha muvuabu bamuenzele bibi, kakadisombuela, kushala muena biji, anyi kuteketa mu mikolo to. Uvua muena dikima bualu uvua muimanyine pa malu avua ne mushinga, ke difuilangana luse ne didienzeja bua kukeba ditalala ne bakuabu.
Wakandamuna Davidi ne budipuekeshi buonso, kumuambilaye bua Siba ne: “Abuangate buonso mpindieu udi mfumu mukalenge wanyi mupingane ku nzubu kuende mu ditalala.” Mefibosheta muena budipuekeshi au, uvua usamisha mutu bikole bua mukalenge Davidi uvua Yehowa musungule. Nansha muvuabu bamushiminyine malu ne bamunyenge buloba buende, wakashala ne disanka, utungunuka ne kuenzela Yehowa mudimu ne lulamatu. Nansha muvuaye kayi mulue musalayi, wakenza malu ne dikima kupita divua basalayi ba bungi nadi.
Bala bualu ebu mu:
Lukonko lua kuelela meji:
Mmushindu kayi uvua Mefibosheta muenze malu ne dikima?
Buela mu buondoke
1. Kumpala kua kuyabu ne Mefibosheta kua Davidi, uvua “mu nzubu wa Makî.” Mmalu kayi makuabu adi aleja ne: Makî uvua muntu wa lulamatu ne muakididianganyi? (2 Sam. 9:3, 4; it “Makî” No. 2-wcgr)
2. Bua tshinyi Mefibosheta uvua mudifuanyikije ne “mbua mufue”? (2 Sam. 9:8; it “Mbua” §5-wcgr) A
PhotoStock-Israel/Photodisc via Getty Images
Tshimfuanyi tshia A: Mu Isalele wa kale, bavua bamona mbua bu tshintu tshikoya tshivua tshiangulula biakudia
3. Ntshinyi tshitudi bamanye bua Mefibosheta tshidi tshitujadikila ne: kavua musue kunyenga Davidi bukalenge? (w02 15/2 14 §11, dim.) B
Tshimfuanyi tshia B: Yonatana uvua pamuapa muambile muanende muntu ukavua Yehowa musungule bua kulua mukalenge
4. Mmunyi muvua Yehowa mubeneshe Mefibosheta panyima pa malu atudi balonge mu dilongesha edi? (w22.03 13 §4-5)
Keba malongesha
Bana betu ba bungi badi ne kanyinganyinga kakole anyi ntatu idi bena Kristo netu bakuabu kabayi mua kumvua menemene to. Bualu bua Mefibosheta ebu budi mua kubakankamija mushindu kayi?
Davidi wakanyenga Mefibosheta bumpianyi buende pavuaye muteleje anu mukana mua muntu umue. Bua tshinyi ki mbia meji bua kukosa tshilumbu ne lukasa patudi katuyi bamanye muvua malu onso menzeke to? C
Tshimfuanyi tshia C
Mmunyi muudi pebe mua kuenza malu ne dikima bu Mefibosheta?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Mefibosheta pabishibuaye ku lufu?
Bia kutangila kabidi
Mona mutudi mua kuenza malu bu Mefibosheta patudi tumona ne: mbatuenzele malu bibi.
Muana yeye udiumvua ne: bantu bakuabu ki mbamunange, mmunyi mudi baledi bende mua kumukankamija ne bualu buvua buenzekele Mefibosheta?
“Utu udiumvua bu mudiombola anyi? (Te sens-tu parfois rejeté ?)” (w11 1/6 26-27-wcgr)