31 MUANA WA BAKAJI MUTEKETE MUENA ISALELE
Muana uvuabu bakuate wakakula
KUVUA muana wa bakaji mukuabu mutekete musombele mu Isalele tshikondo tshivua Yeholama mukalenge. Bible ki mmutele dîna diende to. Kadi udi utuambila bualu bua mushinga buvua bumuenzekele patshivuaye mupuekele bikole. Mukalenge Yeholama ne bena Isalele bavua batombokele Yehowa. Ke Yehowa kulekela bena Sulia balua kubela mvita, babanyenga maloba abu, ne bakuata bamue ba kudibu baya nabu. Dituku dikuabu, bena Sulia bakalua, kukuatabu muana wa bakaji au, kuyabu nende mu Sulia kule ne dîku diabu.
Muana wa bakaji au uvua ne bua kuikala mumvue buôwa bua bungi ne bivua ne bua kuikala bitonde bena mu dîku diabu bikole. Wakalua mupika wa Nâmana ne wa mukajende. Nâmana uvua mfumu wa tshiluilu tshia bena Sulia. Muana wa bakaji au uvua ne bua kuikala muenze muende muonso bua kuibidilangana ne nsombelu wa kuntu aku. Uvua pamuapa mumone ne: bantu ba mu nzubu wa Nâmana bavua ne dibungama dikole. Nâmana uvua ne disama dikole dia nsudi. Disama adi divua dinyanga mubidi wa bantu bavua nadi, ne kuvua misangu ivuabu kabayi mua kudiondopa to.
Nansha muvuabu baye nende ku bukole mu ditunga muvua bantu batendelela nzambi ya dishima, uvua uditeka pa muaba wa bakuabu ne wakakula bua Yehowa ne dikima
Muana wa bakaji au uvua ne muoyo muimpe wa dikema! Uvua mumanye ne: Nâmana uvua muluishi wa bena Isalele. Nansha nanku, wakabumvuila yeye ne mukajende luse. Uvua mumanye ne: Nâmana uvua mua kumvua bimpe. Baledi bende bavua pamuapa bamulondele malu a dikema avua Yehowa muambuluishe muprofete wende Elisha bua kuenza. Kadi kavua mumanye bualu nansha bumue buvua mua kumujadikila ne: Elisha ukavua muondopangane disama dia nanku musangu mukuabu to. Kadi muana wa bakaji au uvua mutuishibue ne: Yehowa Nzambi wende uvua mua kupesha Elisha bukole bua kuondopa Nâmana.
Uvua ne bua kuikala mudiebeje ni uvua ne bua kuambila bena mu dîku dia Nâmana bualu bua Yehowa. Uvua mumanye ne: kuakula bua Yehowa kuvua mua kumukebela njiwu. Nâmana uvua mutendeledi wa Limona nzambi wa bena Sulia, ne uvua pa tshibidilu uya kushiya mukalenge wa Sulia ku ntempelo wa Limona bua kutendelela. Bidi bimueneka ne: bena Sulia bavua bela meji ne: nzambi wabu au uvua ne bukole bua kukebesha mvula mukole wa tshipepele ne makubakuba. Muana wa bakaji au kavua mumanye tshivua Nâmana mua kuenza bu yeye mumuambile bualu bua Yehowa Nzambi wende to. Bu yeye mumuambile ne: Yehowa uvua mua kumuondopa, pamuapa uvua mua kufiika munda bualu nzambi wende kavua ne bukole bua kumuondopa to. Muana wa bakaji au uvua ne bua kuikala mulombe Yehowa dikima. Wakambila mukaji wa Nâmana ne: “Bu mfumuanyi mua kuya nansha kumonangana ne muprofete wa mu Samalea! Dîba adi udi mua kumuondopa nsudi yende.”
Mêyi au ke onso a muana wa bakaji au adibu bafunde mu Bible. Kadi akapatula bipeta bia dikema. Muana wa bakaji au mumane kuambila mukaji wa Nâmana mêyi au, Nâmana wakaya kudi mukalenge Bene-Hadada bua kumuambila tshivua muana wa bakaji au muambe. Nunku mukalenge au wakamutuma mu Isalele ne mukanda wa kupesha mukalenge Yeholama, umulomba bua amuondope disama diende dia nsudi.
Pakaya Nâmana, bantu ba mu nzubu muende bakashala bamuindile ne muoyo kuulu kuulu bua kumona tshivua mua kumuenzekela. Muana wa bakaji au uvua ne bua kuikala musambile misangu ne misangu, usengelela Yehowa bua enze tshienzedi ne aleje Nâmana ne: anu yeye ke Nzambi mulelela. Pamuapa Nâmana wakenza matuku anyi mbingu ya bungi kuvuaye muye aku. Ndekelu wa bionso, wakapingana. Difuanyikijilabi disanka divua ba mu nzubu muende bumvue pavuabu bamumone. Bakamona ne: uvua muondopibue, ukavua bimpe ne tshimuenekelu tshimpe anu bu tshia muana mutekete.
Elabi meji a muvua muana wa bakaji au uteleja ne ntema yonso pavua Nâmana ulonda muvua malu mamuenzekele. Pakafika Nâmana kua Elisha, Elisha wakamutumina muntu ne mukenji uvua mumupeshe tshiji. Wakamuambila bua aye kudiela misangu muanda mutekete mu musulu wa Yadene, kadi kavua musue kutumikila tshivuabu bamuambile atshi to. Ke bena mudimu bende kumusengelelabu bua atumikile mukenji au. Wakamona ne: bivua bikengela adipuekeshe. Nunku wakaya kudiina misangu muanda mutekete mu musulu wa Yadene, kuondopibuaye disama diende. Kadi bualu buvua butambe kusankisha muana wa bakaji au mbuakenzeka Nâmana mumane kuondopibua. Kutuadijila anu dîba adi, Nâmana wakalua pende mutendeledi wa Yehowa Nzambi!
Malu a dikema onso aa akenzeka anu bualu muana wa bakaji mutekete au wakenza malu ne dikima, kuakulaye bua Nzambi wende ne bua muprofete wende. Katuena bamanye dîna diende to, kadi Yehowa yeye mmudimanye. Tuetu benze petu malu ne dikima anu bu muana au, netumumone mu bulongolodi bupiabupia pamubisha Yehowa ku lufu. Elabi meji disanka dituikala nadi patuamonangana nende, patuamanya dîna diende, ne patuambilaye malu makuabu adi amutangila!
Bala bualu ebu mu:
Lukonko lua kuelela meji:
Mmushindu kayi uvua muana wa bakaji mutekete muena Isalele muenze malu ne dikima?
Buela mu buondoke
1. Bua tshinyi muana wa bakaji mutekete au uvua mua kuikala mumvue bena Sulia buôwa ne mutekete ku muoyo? (w96 15/5 8 §3) A
Ne dianyisha dia Musée du Louvre, Paris
Tshimfuanyi tshia A: Lupingu lua kale lua bena Sulia, pamuapa lua nzambi Limona
2. Umvuija tshidi disama dia nsudi mua kuenzela muntu udi nadi. (it “Nsudi” §3-5-wcgr)
3. Bua tshinyi Elisha kakitaba dipa dia Nâmana? (w05 1/8 9 §2)
4. Bua tshinyi Elisha uvua mutuishibue ne: Yehowa uvua ne bua kufuila Nâmana luse bua muvuaye winamina nzambi Limona? (2 Bak. 5:18, 19; w05 1/8 9 §3) B
Tshimfuanyi tshia B
Keba malongesha
Nâmana uvua mfumu wa tshiluilu tshia bena Sulia bavua baye kuela bena Isalele mvita. Nansha nanku Yehowa wakamuondopa. Ntshinyi tshidi bualu ebu butulongesha bua luse lua Yehowa ne bua mudiye kayi ne kansungansunga? C
Tshimfuanyi tshia C
Mmushindu kayi udi tshilejilu tshia muana wa bakaji mutekete muena Isalele tshikupesha dikima dia kuyisha nansha paudi ne buôwa?
Mmu mushindu kayi mukuabu muudi pebe mua kuenza malu ne dikima bu muana wa bakaji mutekete muena Isalele?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja muana wa bakaji mutekete muena Isalele pabishibuaye ku lufu?a
Bia kutangila kabidi
Ki mbafunde dîna dia muana wa bakaji mutekete muena Isalele mu Bible to. Bidiku biumvuija ne: Yehowa kavua umuangata ne mushinga anyi?
“Bua tshinyi Bible kena utela mêna a bamue bantu?” (w13 1/8 10)
Mona mudi bansonga mua kuenza malu ne dikima lelu anu bu muana wa bakaji mutekete muena Isalele.
a Biobi ne: muana wa bakaji au wakakola, neikale muntu mukole pabishibuaye ku lufu.