33 YEHOYADA
Wakakuba mukalenge uvua Yehowa musungule
KUVUA muakuidi munene mu ntempelo wa mu Yelushalema. Dîna diende divua Yehoyada. Uvua ne mudimu wa kuambuluisha bantu bua batendelele Yehowa mu mushindu uvuaye wanyisha. Kadi bu muvua bantu ba bungi batendelela nzambi ya dishima ne benza malu mabi, kabivua bipepele to. Nansha mukavuaye mukulakaje bikole, uvua ne makanda ne tshisumi tshia bungi bua Yehowa.
Mamu mukuabu diende Atalaya uvua usaka bantu ku dienza malu mabi. Uvua muana wa Yezabele ne Ahaba mukalenge wa Isalele. Bu muvuabu benza malu mabi, Yehowa wakalaya bua kubashipa bobu ne ndelanganyi yabu yonso. Nansha muvua bayende wa Atalaya muikale mukalenge wa Yuda, Atalaya uvua mukine ntendelelu mukezuke. Pakafua bayende, muanende wa balume wakatuadija kukokesha, kadi Yehowa wakamushipesha. Pakamona Atalaya ne: muanende uvua mufue, wakadishiya mukalenge mu Yuda. Kadi kabiakasankisha Yehowa to, bualu bakalenge bavuaye uteka bavua ne bua kuikala bantu balume ba mu ndelanganyi ya Davidi. Atalaya wakangata dipangadika dia kushipa muntu yonso uvua mua kulua mukalenge bua yeye ashale mukalenge. Biikulu bende ba balume ke bavua bapianyi ba bukalenge, kadi wakatuma dîyi bua babashipe bonso.
Muakuidi munene ne mukajende bakaditeka mu njiwu pakakubabu muana mutekete uvua mukalenge mukaji mubi ukeba kushipa
Dîna dia mukaji wa Yehoyada divua Yehosheba. Uvua mukaji wa dikima. Uvua muana wa umue wa ku bakalenge ba mu Yuda. Yeye ne bayende kabavua mua kulekela Atalaya ushipa bana ba balume bonso ba mu ndelanganyi ya Davidi to. Yehowa ukavua mulaye bua kuteka muntu wa mu ndelanganyi ya Davidi bua kukokesha bua kashidi! (2 Sam. 7:12, 13) Yehosheba wakakuba muana umue wa mu ndelanganyi ya Davidi ivuabu ne bua kushipa ayi, uvua kayi muanji kukumbaja tshidimu to. Wakenza malu ne dikima, kumbushishaye muana au mu dibalasa dia mukalenge; kuyaye nende ne ndeji wende kudi Yehoyada muakuidi munene. Yehoyada ne Yehosheba bakasokoka muana au mu nzubu wa bulalu wa munda mua ntempelo.
Dîna dia muana au divua Yoasha. Yehoyada wakamusokoka mu nzubu wa Nzambi ne kumukubaye mu bidimu bisambombo. Kabuvua bualu bua bilele to. Bualu bu Atalaya mumanye tshivua Yehoyada ne Yehosheba benze atshi, uvua ubashipa. Pashishe Yehoyada wakenza bualu bukuabu ne dikima: wakabikidisha bamfumu batanu ba basalayi bavua ne lulamatu kudi Yehowa. Kubambilaye ne: kuvua muana wa balume wa mu ndelanganyi ya Davidi uvua ne bua kulua mukalenge wa Isalele. Kubambilaye kabidi bua bateke basalayi 500 bua balame ntempelo ne miaba ya pabuipi ne ntempelo. Basalayi bakimana banyunguluke muana au, bambule ngabu ne bia mvita, pavua eku Yehoyada uteka Yoasha mukalenge. Bantu bakatuta bikashi bikole, Atalaya kuluaye ku ntempelo aku wenda unyema.
Pakabuelaye mu lubanza lua ntempelo, kumonaye diakamue tshivua tshienzeka, wakateta bua kupangisha Yoasha bua kulua mukalenge. Kuelaye lubila ne: “Mbantungile tshitungu! Mbantungile tshitungu!”—pende yeye ke uvua mutungilangane tshitungu. Bikalabi ne: uvua mutekemene bua bantu baditue ku tshiende, uvua muele bua tshiombe musabu. Yehoyada kakazakala to. Wakatumina bamfumu dîyi bua bakuate mukalenge mukaji mubi au ne bamupatule pambelu pa ntempelo. Pakamupatulabu, bakamushipa. Yehowa ukavua muele mukenji bua kubutula “nzubu mujima wa Ahaba.” (2 Bak. 9:8) Pamuapa Atalaya eu ke uvua mushale wa ndekelu wa mu nzubu eu.
Yehoyada mumane kushipesha Atalaya, wakenza bualu bukuabu bua mushinga wa bungi. Wakambuluisha bantu ne mukalenge utshivua muana au bua baditshipe kudi Yehowa Nzambi bua bashale ne lulamatu kudiye. Pashishe wakatuma dîyi bua bupule ntempelo wa Bâla ne bashipe muakuidi wa mu ntempelo au. Yehoyada wakatungunuka ne kuenza muende muonso bua kulongesha Yoasha bua alue mukalenge muimpe wa lulamatu. Tshikondo tshionso tshivuaye ne muoyo, Yoasha uvua ne lulamatu kudi Nzambi. Ndekelu wa bionso, Yehoyada wakafua ne bidimu 130. Bakamujiika ne lumu lua buena luvuabu bajiika nalu bakalenge bavua bakokesha mu Isalele.
Bia dibungama, Yoasha kakashala ne lulamatu kudi Yehowa to. Wakalonda bakokeshi babi ba mu Yuda, kufikishaye ne bena Isalele ku ditendelela nzambi ya dishima. Baprofete ba Yehowa bakamubela, kubengaye bua kubateleja. Umue wa kudibu wakamubela n’Zekâya, muana wa Yehoyada. Zekâya wakebeja bantu ne: “Bua tshinyi nudi nushipa mêyi a Yehowa?” Bualu abu buakafiikisha Yoasha munda, kutumaye dîyi bua bamushipe! Zekâya wakafua ne lulamatu anu bu tatuende. Panyima pa bidimu nkama ya bungi, Yezu wakamba ne: Zekâya uvua muntu muakane. Yezu ne tatuende Yehowa kabatu bapua dikima dia bantu ba lulamatu muoyo to.
Bala bualu ebu mu:
Lukonko lua kuelela meji:
Mmushindu kayi uvua Yehoyada muenze malu ne dikima?
Buela mu buondoke
1. Bamue bamanyi batu bamba ne: “balami ba mukalenge bena Kala” bavua Yehoyada mutume bua kushipa Atalaya bavua banganyi? (2 Bak. 11:4, 19; it “Balami ba mukalenge bena Kala”-wcgr)
2. “Bujadiki” buvua mua kuikala tshinyi? Bua tshinyi Yehoyada uvua mubuteke pa mutu pa Yoasha? (2 Bak. 11:12, dim.; w91 1/2 31 §5-6-wcgr) A
Tshimfuanyi tshia A
3. Bua tshinyi Yoasha uvua mutume dîyi bua balongolole Nzubu wa Yehowa? (2 Kul. 24:4-7, 11-14; it “Yoasha” No. 1 §5-wcgr)
4. Zekâya uvua muana wa Yehoyada. Bua tshinyi Yezu wakamubikila ne: “muana wa Balakiya”? (it “Zekâya” No. 12 §2-wcgr)
Keba malongesha
Yehoyada uvua mua kuikala ne bidimu bipite pa 100 pavuaye musokoke Yoasha. Mmunyi mudi tshilejilu tshiende mua kukankamija batendeledi ba Yehowa bakadi bakulakaje bikole? (Mis. 92:12, 14) B
Tshimfuanyi tshia B
Pavua Yoasha uteleja Yehoyada, uvua wangata mapangadika mimpe. Bualu ebu budi bulongesha bansonga tshinyi?
Mmu mushindu kayi muudi mua kuidikija dikima dia Yehoyada?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Mbualu kayi bungebeja Yehoyada pabishibuaye ku lufu?
Bia kutangila kabidi
Muyuki wa Yoasha udi ulongesha bana tshinyi bua bantu badibu ne bua kudia nabu bulunda?
“Balunda babi bakapangisha Yoasha bua kushala ne lulamatu kudi Yehowa” (w09 1/4 24-25-wcgr)
Mona mudi bulongolodi buetu buidikija tshilejilu tshia Yehoyada tshia mua kupeta mapa, kualama, ne kuenza nawu mudimu.