Bakapanduka mu tshikutu tshia kapia

BAVUA bakuate bena Ebelu basatu aba: Hananiya ne Mishaele ne Azaya, baye nabu mu Babilona. Bena Babilona bavua binyike Hananiya dîna dia Shadalaka, Mishaele dîna dia Meshaka, ne Azaya dîna dia Abedenego. Bavua balunda ba Danyele muntu wa lulamatu. Kadi Danyele kavua nabu bua kubakuba ne kubakolesha pavuabu mu njiwu to. Tumonayi tshivua tshienzeke.

Mukalenge Nebukadenesâ uvua muenzeje lupingu lunene lua bule bua metre matue ku 27. Wakenzeja difesto dinene bua kulubanjija, kutuminaye banene bonso ba mu bukalenge buende dîyi bua balue kubuelamu. Bena Ebelu basatu abu bakatumikila dîyi dia mukalenge adi.

Muena mudimu wa mukalenge wakambila bantu bonso bavuapu tshivuabu ne bua kuenza. Tshia kumpala, bavua ne bua kumvua miadi ya biombelu bivua bimbi ne bua kuimba pamuapa bua kubasaka ku dienza tshivua mukalenge ujinga. Pashishe, bavua ne bua ‘kutua mpala panshi ne kutendelela lupingu’ alu. Bu muvua bena Ebelu basatu abu bamanye ne: Yehowa uvua mukandike ditendelela dia mpingu, ntshinyi tshiakenzabu?​—Ekes. 20:4, 5.

Pakatuadijabu kuimba biombelu, bantu bonso bakatua mpala panshi, kutendelelabu lupingu alu. Kadi bena Ebelu basatu abu bakashala bimane; bantu bonso bavua ne bua kuikala babatangile. Bamue ba kudibu bakaya kubafunda kudi Nebukadenesâ ne: “Bantu aba ki mbakuleje kanemu nansha kakese, mukalenge wetu. Kabena benzela nzambi yebe mudimu, ne badi babenga kutendelela lupingu lua or luudi muimanyike.” Mukalenge wakamba kutayika ne tshiji, kubabikidishaye bua kubakonka bualu abu. Kumpala mene kua bobu kumuandamuna, wakabafunyina bua kubenzela bibi. Kuambaye ne: uvua ne bua kubapesha mpunga wa bobu kumutumikila, pavuabu babenga bavua ne bua ‘kuedibua diakamue mu tshikutu tshia kapia kakole.’ Wakabajadikila ne: nzambi nansha umue kavua mua kubasungila to.

Busatu buabu kabakazakala to. Bakambila Nebukadenesâ ne: ‘Biobi ne bua kuikala nanku, Nzambi wetu neatusungile.’ Kumuambilabu kabidi ne: “Kadi, nansha yeye kayi mutusungile, mukalenge wetu, umanye ne: katuakuenzela nzambi yebe mudimu peshi kutendelela lupingu lua or luudi muimanyike to.” Nebukadenesâ wakumvua luonji lua dikema! Kutumaye dîyi bua basonsole tshikutu tshia kapia kupita mututshi matuku onso ne bua basuike bena Ebelu abu ne babelamu. Bu muvua tshikutu tshia kapia tshikale ne kapia kakole menemene, bantu bavua babelamu ke bakashipabu kudi ndimi ya kapia!

Pashishe Nebukadenesâ wakamona tshintu tshiakamuenza buôwa bua bungi. Pakatangilaye mu tshikutu tshia kapia, bantu bavuaye muelamu kabatshivua basatu to, bakavua banayi. Bavua batua eku ne eku munkatshi mua kapia kabayi buoshika to! Muntu muinayi uvuaye mumone uvua umueneka “bu muana wa banzambi.” Nebukadenesâ wakasemena ku tshikutu tshia kapia atshi, kubambilaye bua bapatukamu.

Ela meji a muvua bantu bonso bakeme pavua bena Ebelu basatu abu bapatuke mu kapia! Kapia kakavua kabuoshe bobu anyi bilamba biabu to; kabavua nansha banunka muishi to. Anu mionji ivuabu babasuike ke ivua mioshike. Nebukadenesâ pende wakakema bikole. Wakabela kalumbandi bua muvuabu batumikile Nzambi wabu. Kuambaye ne: “Bavua bamueyemene ne babenge kulonda dîyi dia mukalenge, ne bavua bitabe bua kufua pamutu pa kuenzela nzambi mukuabu mudimu anyi kumutendelela pa kumbusha anu Nzambi wabu bobu.”

Mukokeshi wa lutambishi au wakela mukenji bua bashipe muntu yonso wa mu buloba buvua ku bukokeshi buende uvua wakula bibi bua Yehowa. Wakabandisha bena Ebelu basatu abu mianzu. Kadi Yehowa wakabenzela yeye bipitshile apu: kavua mubapue muoyo to. Tshilejilu, bidimu bitue ku 700 pashishe, pavua mupostolo Paulo ufunda bua bantu bavua ne ditabuja dikole, wakakula bua bantu ‘bakajima bukole bua kapia.’ Uvua ne bua kuikala wakula bua balume ba dikima aba: Hananiya, Mishaele, ne Azaya.

Bala bualu ebu mu:

• Danyele 3:1-30

• Ebelu 11:33, 34

Lukonko lua kuelela meji:

Mmushindu kayi uvua Hananiya ne Mishaele ne Azaya benze malu ne dikima?

Buela mu buondoke

1. 1. Mmunyi mudi bintu bidi bakebuludi bapete muaba uvua tshimenga tshia Babilona wa kale bijadika mudi malu adi mu Danyele nshapita 3 majalame? (w23.07 31) A

   Andamuna

   

   © The Trustees of the British Museum. Licensed under CC BY-NC-SA 4.0. Source. Modifications: Box added.

2. 2. Mêna avua bena Babilona binyike bena Ebelu basatu avua mua kuikala umvuija tshinyi? (dp 36 §14)

   Andamuna

3. 3. Ntshinyi tshidi tshileja ne: Nebukadenesâ uvua munange malu a nzambi bikole? (dp 69 §3) B

   Andamuna

   

4. 4. Bantu ba mu “bukua bantu buonso, bisamba, ne bisumbu bia miakulu” bavua pamuapa batendelela nzambi mikuabu. Ntshinyi tshivua mua kuikala tshibasake bua kutendelela lupingu luvua Nebukadenesâ muimanyike? (Dan. 3:7; dp 73 §10)

   Andamuna

Keba malongesha

• Bena Ebelu basatu bakashala ne lulamatu kudi Yehowa pavuabu babenge bua kudia biakudia bivuaye mubakandike. Panyima pa matuku, bakashala kabidi bamulamate pavuabu kumpala kua lufu. Ntshinyi tshidi bualu ebu butulongesha? (Luka 16:10) C

  Andamuna

  

• Padibu batukengesha, mmunyi mutudi mua kuleja ngikadilu ivua bena Ebelu basatu baleje eyi: (Dan. 3:16-18)

  • Budipuekeshi.

    Andamuna

  • Bupole.

    Andamuna

  • Lulamatu.

    Andamuna

• Mmunyi muudi pebe mua kuenza malu ne dikima bu bena Ebelu basatu?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Hananiya ne Mishaele ne Azaya pabishibuabu ku lufu?

  Andamuna

Bia kutangila kabidi

Mmunyi mudi muena Kristo mua kuleja kanemu padiku kuenzeka bilele bia buena ditunga kadi kayi ubuelakanamu?

Padi malu a bantu mu tshibungi enzeka, kuikadi ne luseke luudi to (4:25)

Difuanyikijila ne: uvua umue wa ku bena Ebelu basatu abu ne ukebe malongesha makuabu audi mua kupeta.

“Basungila ku tshikutu tshia kapia!” (Biena-bualu bia mu jw.org “Midimu ya mu dilonga dia Bible”-wcgr)