46 MARIYA WA KU MAGADALA
“Ndi mumone Mukalenge!”
MARIYA wa ku Magadala uvua mukenge bikole be! Nyuma mibi ivua mimukuate ivua mimukengeshe bikole. Kadi pakaluaye kutuilangana ne Yezu, nsombelu wende wakashintuluka bikole. Bible udi wamba ne: Yezu uvua mumupatule “bademon muanda mutekete” munda. Bu muvuaye ne dianyisha dia bungi kudi Yezu, wakalua muyidi wende, kudifilaye bua kumuambuluisha mu mishindu yonso.
Mariya wa ku Magadala uvua munange Yezu ne uvua umunemeka bikole, ke bualu kayi uvua umubikila ne: Mulongeshi. Yezu ne bayidi bende 12 bavua bendakana mu bimenga bua kulongesha bantu malu a Bukalenge bua Nzambi. Mariya wakajingulula ne: bavua balekele midimu yabu bua kudifila bikole mu mudimu wa dilongesha au. Ntshinyi tshiakenzaye bua kubambuluisha?
Nansha muvua Mariya wa ku Magadala mukenge bikole, wakadifila ne muoyo mujima bua kuambuluisha Yezu ne bayidi bende pakatuilanganaye nabu
Bible udi wamba ne: Mariya wa ku Magadala uvua umue wa ku bakaji “bavua babambuluisha ne bintu biabu.” Bakaji abu bavua batula makuta abu bua kubasumbila bintu bivuabu nabi dijinga. Bavua benza ngendu ne Yezu, baya “mu tshimenga ne mu tshimenga, mu musoko ne mu musoko.” Bua bantu bakuabu, kabivua bikumbane bua muvua bakaji abu bendakana ne Yezu ne bayidi bende to, bualu tshikondo atshi bantu bakaji kabavua bendakana ne balongeshi ba malu a Nzambi to. Nunku bavua mua kuikala babambe malu mabi a bungi. Nansha nanku, Mariya ne bakaji nende bavua bamona diambuluisha Yezu ne bayidi bende bu diakalenga dinene. Bavua ne dikima dia kuambuluisha Yezu nansha muvua bantu bakula bibi bua bualu buabu.
Mariya uvua ne bua kuikala mumvue bibi menemene pakakuatabu Yezu butuku, dituku dia Pasaka mu Yelushalema. Uvua mumvue nanku bualu bavua bashiminyine Yezu ne: uvua mupende Nzambi, bamukosele tshibawu tshia lufu ku mutshi wa makenga. Nansha nanku uvua anu ne dikima. Wakaya ne mamuende wa Yezu ne bakaji bakuabu ba lulamatu muaba uvuabu ne bua kushipela Yezu. Nunku pakatangila Yezu panshi, wakamona ne: bakaji abu kabavua bamushiye to, kujingululaye ne: bavua bamunange bikole. Bakamona ne: Yezu uvua ne lulamatu too ne ku lufu ne uvua muenze bionso bivua Tatuende mumuambile bua kuenza. Mariya wakashala muaba au too ne pakakuula Yezu muoyo. Bakaji ba dikima abu bakadidila anu muaba au, kabayi batshina basalayi ba bena Lomo ne bamfumu ba bena Yuda to.
Pakakumbana tshikondo tshia kujiika Yezu, bakamujiika bilondeshile mikenji ya buena Yuda. Bakalaba tshitalu tshiende bintu bia dipembu dimpe ne mafuta a mupuya muimpe. Tshikondo atshi luya lukole luvua mu Yudaya luvua lubolesha bitalu ne lukasa. Nanku bantu bavua balaba tshitalu bintu bia dipembu dimpe ne mafuta a mupuya muimpe kumpala kua kutshijiikabu. Bivua biambuluisha bua tshitalu katshinunki too ne pavua benatshi balua bua kutshidila. Kadi bu muvuabu babienze lubilu lubilu bua tshitalu tshia Yezu, Mariya uvua musue kutshilaba kabidi bintu abi. Uvua mudisuike bua kuenzela mukalenge wende uvuaye munange bualu abu. Nunku pakapita Nsabatu, yeye ne bakaji bakuabu bakaya kusumba bintu bia dipembu dimpe, kuyabu nabi mu dinda menemene ku lukita lua Yezu.
Mariya wakafika pamuapa kumpala kuabu, kusanganaye lukita lukangula, luikale munda mutupu. Wakaya lubilu bua kuambila Petelo ne Yone bualu abu. Pakapinganaye ku lukita, bakaji bakuabu abu bakavua baye. Wakatangila mu lukita, “kumonaye banjelu babidi bavuale bilamba bitoke, basombe muaba uvua tshitalu tshia Yezu.” Wakabambila ne: uvua ukeba mubidi wa Yezu. Pashishe wakakudimuka, kumonaye muntu mulume muimane muaba au; wakela meji ne: uvua muena mudimu wa mu budimi. Muntu au wakamuebeja ne: “Mukaji, udi udila bua tshinyi?” Wakamuandamuna ne: “Mukalenge, biwikala mumumbushe, ngambilaku muaba uudi mumuteke, nemmuangate.” Mariya kavua nansha usamisha mutu bua kumanya ni uvua mua kukumbana bua kuambula muntu mulume wa bukole abu to. Uvua mudisuike bua kuenza tshionso tshivuaye mua kuenza bua kuleja muvuaye munange Yezu.
Pakavuaye muele nyima bua kuya, muntu au wakamuela dîyi ne: “Mariya!” Wakamanya musangu umue dîyi adi, kuelaye lubila ne: “Laboni!” yeye kumupukila. Yezu kakamulekela ushala mumukuate mutantshi mule to. Wakamuambila ne: “Ndaku kudi bana betu.” Yezu uvua mumupeshe mudimu wa kuya kuambila bapostolo bende bualu bua mushinga bua ne: Mukalenge wabu uvua mubishibue ku lufu. Wakaya musangu umue! Pakabambilaye bakanji kumuela mpata. Bible udi wamba ne: “Mêyi aa akamueneka kudibu bu mêyi a tshianana.” Nansha nanku, Mariya kakalekela mpata yabu ayi imupangisha bua kuambila bantu bakuabu lumu luimpe lua dibishibua dia Yezu to. Kuenza nanku kuakamulomba dikima dia bungi.
Bala bualu ebu mu:
Lukonko lua kuelela meji:
Mmushindu kayi uvua Mariya wa ku Magadala muenze malu ne dikima?
Buela mu buondoke
1. Mmushindu kayi uvua Mariya wa ku Magadala ne bakaji bakuabu bambuluishe Yezu ne bayidi bende? (ijwia tshiena-bualu 6 §5-6) A
Tshimfuanyi tshia A
2. Bua tshinyi Mariya uvua muanji kupanga Yezu panyima pa dibishibua diende ku lufu? (ijwia tshiena-bualu 6 §16-wcgr)
3. Bua tshinyi Yezu uvua muambile Mariya wa ku Magadala bua alekele kumulamata? (w08 15/4 32 §6)
4. Bapostolo bakela meji ne: lumu lua dibishibua dia Yezu luvua Mariya wa ku Magadala mubatuadile luvua bu bualu bua “tshianana.” Tshivua mua kuikala tshibafikishe ku diela meji nanku ntshinyi? (Luka 24:11; w12 1/9 10 §4-5-wcgr)
Keba malongesha
Mariya wa ku Magadala uvua mudiakaje bua kuenza tshionso tshivua tshikengela bua kuambuluisha bakuabu. Mmunyi mutudi mua kumuidikija? B
Tshimfuanyi tshia B
Mmunyi mutudi mua kuidikija Mariya wa ku Magadala padi bantu babenga kuitaba mukenji wa mu Bible utudi tubayisha? (Luka 24:10, 11)
Mmunyi muudi mua kuenza malu ne dikima bu Mariya wa ku Magadala?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bidi bimueneka ne: Yehowa uvua musungule Mariya wa ku Magadala bua aye kukokesha ne Kristo mu diulu. Biobi nanku, mmunyi muudi umvua? Udi umvua nanku bua tshinyi?
Bia kutangila kabidi
Fuanyikija mianu idi bantu bela bua Mariya wa ku Magadala ne malu malelela adibu balonde mu Bible.
“Mariya wa ku Magadala uvua nganyi?” (ijwbq tshiena-bualu tshia 172)
Mushindu uvua Yezu muenzele Mariya wa ku Magadala ne bakaji bakuabu malu udi utulongesha tshinyi bua mutudi ne bua kumona bantu bakaji ne mutudi ne bua kubenzela malu?
“Bakaji bena nkristo mbakanyine lumu ne kanemu” (w95 15/7 15-18 §3-8)