47 MARIYA MUANABU NE LAZALO
“Mmuenze tshivuaye mua kuenza”
MARIYA uvua ne dianyisha dia bungi kudi Yezu. Yezu uvua mubenzele yeye ne Mâta ne muanabu wa balume Lazalo malu mimpe a bungi. Uvua uya kuabu misangu ne misangu bua kubalongesha malu a bungi. Uvua mubanange bonso buabu bikole, kubishaye too ne Lazalo ku lufu.
Bu muvua Mariya ne dianyisha dia bungi kudi Yezu, uvua ujinga kumuenzela bualu bua mushinga mukole. Wakamupesha dipa dia pa buadi dia “litela wa mafuta a mupuya muimpe, nare mulelela, wa mushinga mukole” uvua mu kalondo kakese. Tshikondo atshi, bivua bilomba muntu bua kuenza mudimu tshidimu tshijima bua kupeta makuta makumbane a kusumba nawu kalondo kakese ka mafuta a mushindu au. Bible ki mmuleje tshikondo anyi mushindu uvua Mariya mupete mafuta au to, kadi bidi bimueneka ne: owu ke tshintu tshia mushinga tshivuaye natshi.
Uvua musue kupesha Yezu dipa dia pa buadi, kadi uvua mumanye ne: pavuaye umupeshadi, bamue bantu bavua mua kuakula bibi bua bualu buende
Dimue dituku, pavua Yezu udia kua muntu mukuabu mu Betania, Mariya wakamona ne: tshivua tshikondo tshimpe tshia kumupeshaye dipa diende. Wakaya kudiye, kukangulaye kalondo kende, yeye kumupongoluela mafuta avuamu mu mutu ne ku makasa. Pashishe wakasulula tshilamba tshiende tshia ku mutu, kumukupulaye ku makasa ne nsuki yende. Bamue bena Yuda ba matuku au bavua mua kuikala bele meji ne: Mariya uvua muenze bibi bua muvuaye mumbushe tshilamba tshia ku mutu. Kadi bua Mariya, tshivua bantu mua kuamba katshivua tshimuambila bualu to. Uvua mupongoluele Yezu mafuta au ku makasa bualu uvua ne budipuekeshi ne musue kumupesha bunême.
Mupuya wa mafuta au wakakuatakana mu nzubu mujima. Kadi biakafiikisha Yudasa Isakaliote munda. Bidi mene bimueneka ne: wakafikisha too ne bapostolo bakuabu ku difiikila Mariya munda. Wakamba ne: “Bua tshinyi kabavua mua kupana mafuta a mupuya muimpe aa ku ndenaliyo 300 ne kuyipesha bapele?” Difuanyikijila muvua Mariya mua kuikala mumvue! Uvua mupeshe Yezu dipa adi ne muoyo mujima. Kadi pamutu pa bapostolo kumuelabu kalumbandi, bakamufiikila munda. Bushuwa bivua ne bua kuikala bimutonde bikole.
Kadi Yezu yeye wakakuila Mariya, kuambilaye bapostolo ne: “Mulekelayi.” Kakuyi mpata bakalekela kumutatshisha. Yezu wakamba kabidi ne: “Mmungenzele bualu buimpe menemene.” Wakamba mêyi aa bua kuleja ne: Mariya uvua mumunange. Bualu buvuaye mumuenzele buvua ne mushinga mukole kudiye bua tshikavua pa kumuenzekela. Nansha muvua Mariya kayi mumanye ne: Yezu ukavua pa kufua, Yezu wakamba ne: mafuta avuaye mumupongoluele au avua amulongolola bua dijiikibua diende. Ke bualu kayi wakamba bua Mariya ne: uvua ‘muenze tshivuaye mua kuenza.’ Kuambaye kabidi ne: “Bulelela ndi nnuambila ne: miaba yonso idibu bayisha lumu luimpe elu pa buloba bujima, nebambe kabidi tshidi mukaji eu muenze bua kumuvuluka.” Yezu uvua mumone ne: Mariya uvua mumunange ne tshivuaye muenze atshi tshivua tshimulombe dikima. Nunku uvua wa kuela diboko muulu bua muoyo wende wa kupa.
Yezu mumane kuamba malu au, bakalekela kutatshisha Mariya. Pashishe Yudasa wakapatuka mu nzubu muvuabu amu, kuyaye kulongolola bua kutungila Yezu tshitungu. Kadi mêyi a Yezu avua ne bua kuikala malenge Mariya ku muoyo bikole. Panyima pa matuku makese, pakakumbana tshivua Yezu muambe bua dijiikibua diende, Mariya wakashisha kumvua bimpe tshikavuaye muambe atshi. Bakakuata Yezu, kumushiminyinabu malu, kumushipabu, ne ndekelu wa bionso kumujiikabu anu mukavuaye muambe. Mukaji wa malu mimpe uvua uditeka pa muaba wa bakuabu eu uvua ne bua kuikala mumvue kanyinganyinga kakole bua muvua Yezu mukenge ne mufue. Kadi pakavulukaye mêyi mimpe avua Yezu mumuambile, uvua ne bua kuikala mudiumvue mukoleshibue.
Matuku asatu Yezu mumane kufua, bualu bua dikema buakenzeka! Yezu wakabishibua ku lufu. Katupa kakese pashishe wakamuenekela tshisumbu tshia bayidi bapite pa 500. Bidi bimueneka ne: tshikondo atshi ke tshiakabapeshaye mudimu wa kuambila “bantu ba mu bisamba bionso” lumu luimpe. (Mat. 28:19, 20) Yezu wakamba ne: muaba wonso uvua “lumu luimpe” ne bua kuyishibua, bantu bavua kabidi ne bua kumanya bualu bua muvua Mariya mudipuekeshe ne mumuenzele bualu buvua buleje muvuaye mumunange. Mariya uvua ne bua kuikala anu usanka bua muvuaye muenze malu ne dikima ne mupeshe Yezu dipa dia mushinga mukole. Kavua mupue muoyo ne: Yezu uvua mumutue mushinga bua ditabuja diende ne dikima diende ne muambe bua bualu buende ne: uvua ‘muenze tshivuaye mua kuenza.’
Bala bualu ebu mu:
Lukonko lua kuelela meji:
Mmushindu kayi uvua Mariya muanabu ne Lazalo muenze malu ne dikima?
Buela mu buondoke
1. Mmalu kayi adi atangila Mariya ne Mâta atudi bamanye? (Luka 10:39, 40; Yone 11:20; ia 173 §5-6; 176 §17) A
Tshimfuanyi tshia A
2. Nku tshinyi kuvua Yezu mushilangane ne balongeshi bakuabu ba tshikondo tshiende? (w99 1/9 30 §1-4)
3. Ntshinyi tshivua tshivuije mafuta avua Mariya mupongoluele Yezu ne mushinga? (w08 1/5 31-wcgr) B
Indian nard: © Haijie Lu, licensed under CC BY-NC 4.0. Source; dried jatamansi: wasanajai/stock.adobe.com; alabaster jar: © The Trustees of the British Museum. Licensed under CC BY-NC-SA 4.0. Source
Tshimfuanyi tshia B: Tshilongo ne miji ya mutshi ivuabu pamuapa benze nayi mafuta avua Mariya mupongoluele Yezu, ne kalondo ka alabasta ka mafuta a mupuya muimpe
4. Mu tshikondo tshivuabu bafunda Bible, pavua muntu upongoluela muntu mukuabu mafuta mu mutu ne ku makasa bivua biumvuija tshinyi? (w10 1/11 6 §4, dim.)
Keba malongesha
Yezu wakamba ne: “Mariya yeye mmusungule tshitupa tshimpe,” tuambe ne: uvua muteke malu a mu nyuma pa muaba wa kumpala. (Luka 10:42) Mmunyi mutudi mua kumuidikija? C
Tshimfuanyi tshia C
Yezu wakela Mariya kalumbandi bualu uvua ‘muenze tshivuaye mua kuenza.’ Bidi bitulongesha tshinyi bua tshidi Yehowa umona ne mushinga kutudi? (Mâko 12:29, 30; 14:8)
Mmunyi muudi mua kuenza malu ne dikima bu Mariya?
Lepesha meji
Ntshinyi tshidi bualu ebu bundongesha bua Yehowa?
Mmunyi mudi bualu ebu bupetangana ne disua dia Yehowa?
Bidi bimueneka ne: Yehowa uvua musungule Mariya muanabu ne Lazalo bua aye kukokesha ne Kristo mu diulu. Biobi nanku, mmunyi muudi umvua? Udi umvua nanku bua tshinyi?
Bia kutangila kabidi
Tshilejilu tshia Mariya ne Mâta ne Yezu tshidi tshilongesha bana tshinyi bua bantu badibu ne bua kudia nabu bulunda?
Yezu uvua muanyishe dipa dia mushinga mukole dia Mariya ne tukuta tubidi tukese tua binjanja tua mukaji mukamba. Bualu ebu budi bukulongesha tshinyi?