Udi muvuluke anyi?

Uvua mubale bibejibeji bia Tshibumba tshia Nsentedi bia tshidimu etshi bimpe bimpe anyi? Tangilaku ni udi mua kuandamuna nkonko eyi:

Ntshinyi tshidi tshitusaka bua kupesha Yehowa butumbi?

Tudi tutumbisha Yehowa bualu tudi tumunemeka bikole ne tudi bamunange bikole. Tudi tumutumbisha kabidi bualu tudi basue bua bakuabu bamumanye.​—w25.01, dib. 3.

Muntu yeye mutuenzele bualu bubi, ntshinyi tshitudi mua kuenza bua kumufuila luse ne muoyo mujima?

Katuenji anu bu ne: ki mbitutonde to, kadi mbimpe tulekele kumukuatshila tshiji ne kumulamina munda, dîba adi nebituambuluishe bua kuepuka ntatu.​—w25.02, dib. 15-16.

Bua tshinyi muyidi Mâko udi tshilejilu tshimpe kudi bana betu ba balume batshidi bansonga?

Mâko wakitaba bua kuenza mudimu uvuabu bamupeshe. Nansha muvua bualu buvua buenzeke musangu kampanda mua kuikala bumunyingalaje ne bumuele mâyi ku makasa, kakalekela kuenza mudimu au to. Wakadia malanda mimpe ne Paulo ne bena Kristo bakuabu bashindame mu nyuma.​—w25.04, dib. 27.

Ntshinyi tshivua Yezu musue kuamba pavuaye musambile ne: “Ndi mubamanyishe dîna diebe”? (Yone 17:26)

Bayidi bende bakavua bamanye dîna dia Nzambi. Yezu wakabalongesha bua bamanye Yehowa bimpe menemene. Mu malu avuaye mubalongeshe au mudi tshivua Nzambi mulongolole bua buloba ne bua bantu, malu akadiye muenza ne enzaye, ne ngikadilu yende.​—w25.05, dib. 20-21.

Budipuekeshi budi mua kutusaka bua kuitaba tshinyi?

Budi butusaka bua kuitaba ne: kudi amue malu atudi katuyi bamanye to. Tshilejilu, katuena bamanye dituku dialua nshikidilu anyi muenza Yehowa malu tshikondo atshi to. Katuena nansha bamanye tshienzeka malaba anyi mudi Yehowa mutumanye bimpe to.​—w25.06, dib. 15-18.

Ntshinyi tshitudi mua kuenza bua tshiena-bualu kampanda anyi muyuki kampanda wa patoke kutuambuluisha?

Tudi mua kudiebeja ne: ‘Mbualu kayi budibu bambamu bua kulenga muoyo wa bantu? Mudi tshilejilu tshimpe ntshindi mua kufila pandi ndongesha anyi? Mbantu kayi badi tshiena-bualu etshi mua kusankisha?’​—w25.07, dib. 19.

Mushindu uvua Yehowa muenzele Davidi malu udi utulongesha tshinyi bua difuilangana diende dia luse?

Nansha muvua Davidi muenze mpekatu munene, Yehowa wakamufuila luse pavuaye munyingalale ne muoyo mujima. (1 Bak. 9:4, 5) Padi Yehowa ufuila muntu luse, kakumubadila kabidi mpekatu wende au to.​—w25.08, dib. 17.

Mulongi wa Bible yeye kayi mumvue bualu kampanda bimpe, ntshinyi tshiudi mua kuenza?

Biobi bimukolele bua kumvua bualu kampanda pebe mumane kumumvuijabu bimpe ne Bible, anji pita, ulue kubupinganyina pashishe.​—w25.09, dib. 24.

Bible udi wamba ne: mpekatu udi ne “bukole bua dishima.” (Eb. 3:13) Bidi biumvuija tshinyi?

Mpekatu udi mua kutufikisha ku dienza malu mabi. Udi kabidi mua kutusaka bua kuikala ne dielakana, tudiebeja bikala Nzambi mutunange bushuwa.​—w25.10, dib. 16.

Mmalu kayi asatu atudi ne bua kuenza bua masambila etu atusemeje pabuipi ne Yehowa?

1) Tuelangane meji a ngikadilu ya Yehowa. 2) Tuele meji a bualu budi bututatshisha, bu mudi bua kufuila muntu luse; pashishe tubutele mu disambila. 3) Tudi mua kusambila mutantshi mule. Dîba adi nebituambuluishe pamuapa bua kuambila Yehowa yetu yonso ya munda.​—w25.10, dib. 19-20.

Mmunyi mutudi mua kuambuluisha bakulakaje?

Tudi mua kuya kubamona anyi kubabikila ku telefone. Tudi kabidi mua kuya kubafila ku lupitadi ne kuikala kuyisha nabu mu mishindu mishilashilangane.​—w25.11, dib. 6-7.

Mmalu kayi adi mua kuenza bua tshibilu tshia dibaka tshikale tshia kunemekibua?

Tumikilayi mikenji ya mbulamatadi. Dienzejayi bua malu enzeka dituku dia dibaka dienu aleje munudi ne ngikadilu ya nyuma wa Nzambi. Ikalayi ne bupuekele, nudienzeja bua kubenga kukoka ntema ya bantu kunudi to. Epukayi bilele bidi bibengangana ne Bible. Ikalayi nuyukidilangana bimpe panudi nulongolola malu.​—w25.12, dib. 21-24.