Nemeka mapangadika a bakuabu

1-2. Bua tshinyi mapangadika etu adi mua kushilangana ne a bakuabu?

KUDI misangu ikadibu bakule bibi bua ba bungi ba kutudi bua mapangadika avuabu bangate anyi itukadi tuetu bine petu bakule bibi bua bakuabu bua mapangadika avuabu bangate.

² Bu mutudi bashilangane, bidi anu mua kuenzeka ne: tuangate kabidi mapangadika mashilangane ne a bena Kristo netu bakuabu. Yonso wa kutudi utu ne wende mmuenenu wa malu. Tutu tuela meji bilondeshile bilele bia kuetu, muaba utudi bakolele, dîku ditudi bafumine anyi bilondeshile malu adi matufikile mu nsombelu wetu. Kadi katulekedi bionso abi binyanga ditalala ne buobumue bua tshisumbu to.​—Ef. 4:3.

3. Ntshinyi tshidi mua kutufikisha ku dilumbuluisha muena Kristo netu bua dipangadika didiye muangate?

³ Muena Kristo netu yeye muangate dipangadika ditudi katuyi tusanka nadi, tudi mua kumvua muoyo utusaka bua kumuambila bua adishintulule anyi tudi bafuane kuambila bakuabu mudiye muangate dipangadika ditudi tuetu tumona ne: ndibi. Pamuapa tudi mua kuikala ne meji mimpe. Tutu banange bena Kristo netu ne tutu tubajingila diakalenga. (Nsu. 17:17) Ke bualu kayi katutu basue bua bangate mapangadika adi mua kunyanga malanda abu ne Yehowa anyi adi mua kuenza bua balue kudiela meji to.

4-5. Ntshinyi tshitudi mua kuenza muena Kristo netu yeye muangate dipangadika ditudi tuetu tumona ne: ndibi?

⁴ Tuetu tuela meji ne: muena Kristo netu mmuangate dipangadika dibi, mbimpe tumuambile anyi? Kudi misangu itudi mua kumuambila ne itudi katuyi mua kumuambila. Tshilejilu, tuetu bumvue ne: udi ukeba kuenza bualu budi bushipa mukenji kampanda wa mu Bible, mbimpe dinanga ditusake bua kumuambuluisha bua alekele tshidiye ukeba kuenza atshi. (Nsu. 27:5, 6) Kadi yeye mupangadije bua kuenza bualu budi kabuyi bushipa mikenji ya Nzambi, tshibi bualu abu bushilangane ne butuvua tuetu mua kuenza, netuenze tshinyi? Bible udi utuambila ne: ‘Katulumbuluishanganyi bua ngelelu ya meji idi mishilangane’ to.​—Lomo 14:1.

⁵ Nansha nanku bidi anu mua kutukolela bua kunemeka dipangadika diende adi. Mu tshiena-bualu etshi netuakule bua tshidi tshitusaka bua kunemeka mapangadika a bakuabu ne mutudi mua kufika ku dianemeka. Kadi tuanjayi kumona imue nsombelu idi mua kutufikisha ku dilumbuluisha bakuabu bua mapangadika adibu bangate.

TSHIDI MUA KUTUSAKA BUA KULUMBULUISHA BAKUABU

6-7. Fila bilejilu bia mutudi mua kufika ku dilumbuluisha bakuabu bua mapangadika abu.

⁶ Anu mutukadi bamone, tutu tukeba anu bua malu enzeke mu mushindu kampanda bualu ke muvuawu enzeka muaba utudi bakolele anyi bualu tuvua batuilangane ne nsombelu kansanga. Dîba adi tudi bafuane kuamba ne: bakuabu badi pabu bamona malu bu tuetu. Kadi kabiena anu mua kuikala nanku to. Tumonayi bimue bilejilu. Tshilejilu tshia 1: Kumpala kua muanetu wa balume kampanda kulonga bulelela, uvua mukolele kudi tatuende uvua kanuayi. Dimue edi pavuabu bapitshisha dîba pamue ne bena Kristo nende, wakamona bena Kristo bakuabu banua maluvu makole; wakumvua bibi, kubambilaye ne: kunua maluvu nkubi. Tshilejilu 2: Muanetu wa bakaji kampanda uvua ne disama dikole, kadi pashishe kumvuaye bimpe. Panyima pa matuku, bakamuambila ne: bavua bakuate muanetu wa bakaji mukuabu disama dia muomumue ku lupitadi. Bu mudi muanetu wa bakaji uvua mumvue bimpe au musue kumuambuluisha muinende, udi usumisha bua anue pende manga avua mamuondope anyi bua adie pende anu biakudia kampanda. Tshilejilu 3: Muanetu wa balume uvua mu tshitendelelu kampanda kumpala. Kadi mpindieu ki mmusue kabidi kuenza bualu nansha bumue budi butangila tshitendelelu atshi to. Padiye umvua ne: muena Kristo nende kampanda mmubuele mu tshitanda tshia nzambi kansanga mudibu baye ne muntu udi mufue kumpala kua kumujika, bidi bimutonda.a

⁷ Tuangatayi bilejilu bikuabu. Tshilejilu 4: Muanetu wa balume kampanda mmukolele muaba uvua bantu ba bungi bamona ne: ki mbimpe bua bantu balume bikale ne miedi anyi bua bantu bakaji bavuale mipanu padibu baya mu bisangilu, mu mpuilu anyi mu buambi to. Nansha mudiye mumanye ne: bulongolodi bukadi bushintulule malu mu tshilumbu etshi, yeye udi anu usumisha, wambila bakuabu ne: ki mbimpe bua bana betu ba balume bikale ne muedi anyi bua bana betu ba bakaji bikale bavuala mipanu padibu baya mu buambi, mu bisangilu, ne mu mpuilu to. Tshilejilu 5: Mukulu kampanda mmumanye ne: muanetu wa balume kansanga uvua mubuele mu tulasa tukuabu wakalua kulekela kuenzela Yehowa mudimu. Mpindieu nsonga mukuabu wa mu tshisumbu tshiabu udi upangadija pende bua kulonga tulasa tukuabu. Bidi bisamisha mukulu au mutu ne udi uya kuambila nsongalume au ne baledi bende bua bashintulule dipangadika diabu adi.

8. a) Ntshinyi tshidi mua kufikisha muledi kampanda ku diakula bibi bua baledi bakuabu? b) Ntshinyi tshidi mua kuenzeka tuetu tuakula bibi bua malu adi bena Kristo netu benza?

⁸ Tuakule bua tshidi mua kufikila baledi. Tshilejilu 6: Baledi batu benza muabu muonso bua kukolesha bana babu “ne mibelu ne didimuija bia Yehowa.” (Ef. 6:4) Kadi bamue baledi bena Kristo badi mua kuanyishila bana babu bua kuenza amue malu audi wewe mukandike bebe bana. Tshilejilu, badi banyishila bana babu bua kupingana kumbelu mêba mapite, bua kunaya manaya a video adi kaayi a tshikisu, anyi badi babasumbila telefone patshidibu bapuekele. Ke bualu kayi, bana benu badi bela meji ne: nudi nubakoleshile malu. Badi mua kutuadija kunuambila ne: “Bua tshinyi kanuena mua kuikala koku bu baledi ba balunda betu?” Nsombelu eu udi mua kunufikisha ku diakula bibi bua baledi bakuabu abu. Mu bulelela, padi muntu wangata dipangadika didi dishilangane ne ditudi tuetu bangate, bidi mua kututonda ne tudi mua kutuadija kumujana. Tshilejilu, tudi mua kutuadija kuakula bibi bua mudiye utula makuta, mutuye wenza ngendu pa tshibidilu, anyi bua mishindu ya dipitshisha kapepe ituye usungula. Kadi tuetu tuimanyina anu pa mushindu utudi tuetu tumona malu, bidi mua kunyanga buobumue bua tshisumbu.

9. Ntshinyi tshitudi ne bua kuvuluka? (Tangila kabidi tshimfuanyi.)

⁹ Muena Kristo yeye muangate dipangadika dishilangane ne dia mukuabu, kabiena anu biumvuija ne: dipangadika diende adi ndimpe, dia mukuabu ndibi to. (Lomo 14:5) Nansha mudibu balongeshe bena Kristo bonso bua “kuikala ne lungenyi lumue,” mmumue ne: bua kutumikila mikenji ya Yehowa, kabiena biumvuija ne: tuetu bonso tudi ne bua kuela meji mu mushindu wa muomumue mu malu onso to. (2 Kol. 13:11) Tudi mua kufuanyikija mapangadika atudi tuangata ne njila itudi tuyila bua kufika muaba kampanda. Pa tshibidilu, kutu njila ya bungi mishilangane itu ifikisha bantu muaba umue. Nunku muntu yonso udi ne bua kusungula njila udiye musue ne udi muimpe menemene buende yeye. Bia muomumue, bena Kristo badi mua kuangata mapangadika mashilangane mu malu adi abatangila, kadi bonso buabu badi anu ne tshipatshila tshia kusankisha Yehowa. Ke bualu kayi, katuena tulumbuluisha bakuabu bua mapangadika adibu bangata mu malu adi abatangila to.​—Mat. 7:1; 1 Tes. 4:11.

BUA TSHINYI MBIMPE KUNEMEKA MAPANGADIKA A BAKUABU?

10. Bilondeshile Yakobo 4:12, mbukokeshi kayi butudi katuyi nabu? Bua tshinyi?

¹⁰ Mu Bible mudi malu a bungi adi atusaka bua kunemeka mapangadika a bakuabu. Tuakulayi bua amue a kudiwu. Bua kumpala, Katuena ne bukokeshi bua kulumbuluisha bakuabu bua malu adi abatangila to. (Bala Yakobo 4:12.) Yehowa ke mulumbuluishi muakane ne mutueledi wa mikenji muakane. Anu yeye ke udi ne bukenji bua kutuelela mikenji. Nunku, muena Kristo yonso udi ne bua kubadila Yehowa malu bua mapangadika adiye wangata, kakutubadilawu tuetu to. (Lomo 14:10) Katuena ne bukokeshi bua kulumbuluisha bakuabu anyi kuakula bibi bua mapangadika adibu bangate, tuela meji ne: bavua ne bua kuenza malu mu mushindu mukuabu to.b

11. Ntshinyi tshitudi mua kuenza petu bua tshisumbu tshikale anu mu buobumue? (Tangila kabidi tshimfuanyi.)

¹¹ Buibidi, Yehowa mmusue bua bantu bende bikale mu buobumue, kena ukeba bua bikale bafuanangane mu malu onso to. Yehowa mmunange mutudi bashilangane amu. Tudi tumuenena bualu ebu mu bintu bidiye mufuke. Tshilejilu, mabeji abidi a ku mutshi umue kaatu anu mafuanangane menemene to. Ela kabidi meji bua bantu. Mu bantu miliyare ya bungi badi pa buloba, wewe muangate bantu babidi, kuakubamona bafuanangane menemene mu bionso to. Yehowa mmutufuke bashilangane. Kena ukeba bua yonso wa kutudi ikale mufuanangane menemene mu bionso ne mukuabu to. Kadi mmusue bua tuikale mu buobumue. Nunku mbimpe tulame ditalala, katulekedi dishilangana adi ditutapulula to. Tshidi ne mushinga wa bungi menemene kutudi mbuobumue bua tshisumbu, ki mmuenenu wetu ne bitudi tuetu basue bua bakuabu benze to.​—Lomo 14:19.

MUA KUNEMEKA MAPANGADIKA A BAKUABU

12-13. Ntshinyi tshitudi ne bua kuvuluka tuetu bamone ne: muanetu kampanda ‘mmusesuke mu njila’? (Galatiya 6:1; tangila kazubu ka “Padi dipangadika dia mukuabu kadiyi dikusankisha.”)

¹² Padi bakuabu bangata mapangadika a malu adi abatangila. Diebeja ne: ‘Muanetu eu udi wenda “usesuka mu njila” anyi udi wenza bualu bumvua meme mua kuenza mushindu mukuabu?’ Bikalaye wenza bualu budi bushipa mukenji kampanda wa mu Bible, diebeja ne: ‘Meme ke udi ne bua kumuambuluisha anyi mmuntu mukuabu, bu mudi mukulu?’ Wewe mukumbane bua kumuambuluisha, mueleshisha meji ne bupole. (Bala Galatiya 6:1.) Kadi misangu mikuabu, bualu budiye wenza abu ki mbubi to, kadi udi umona ne: wewe kuvua mua kubuenza nanku to. Biobi nanku, kumuangatshi bibi anyi kuakudi bibi bua bualu budiye wenza abu to. Nemeka bukenji buende bua kudiangatshila mapangadika, kumulumbuluishi to.​—Lomo 14:2-4.

¹³ Tuangatabi tshilejilu etshi: Nuenu baye mu restoran ne mulunda webe, neusumishe bua alombeshe anu biakudia biudi wewe mulombeshe anyi? Tòo. Neunemeke bukokeshi buende bua kudisunguila bia yeye kudia. Tuamba eku tuele eku, bidiye usungula bua kudia kabiakukuenzela bualu to, bualu ki nguewe wabidia to. Nansha wewe kuakujinga bua yeye pende akusunguile bia wewe kudia to, kadi neujinge ne: anemeke bukokeshi buebe bua kudisunguila tshiakudia. Bia muomumue, mbimpe tunemeke mapangadika a bakuabu, katubenzeji bua benze malu atudi tuetu basue to.

14. Paudi wangata mapangadika, ntshinyi tshiudi mua kuenza bua kulama buobumue mu tshisumbu? (1 Kolinto 8:12, 13)

¹⁴ Paudi wangata mapangadika a malu adi akutangila. Bua kulama buobumue mu tshisumbu, dienzeja bua kubenga kunyingalaja bakuabu. (Bala 1 Kolinto 8:12, 13.) Pamuapa udi mua kumona ne: dipangadika diudi ukeba kuangata ki ndibi to; kadi diodi mua kulua kunyingalaja bakuabu, netuambe ne: ndimpe menemene anyi?c (1 Kol. 10:23, 24) Pamutu pa kudiambila anu ne: ndi ngenza tshindi musue, mbimpe kuela meji a tshidi dipangadika diebe adi mua kuenzela bakuabu. (Lomo 15:1) Kadi katukavua bambe ne: bakuabu badi ne bua kunemeka mapangadika adi atutangila anyi? Ke mutudi bambe; badi ne bua kunemeka mapangadika etu, tuetu petu tunemeka abu. Kadi mbimpe tuvuluke mubelu udi mu Lomo 12:18 eu: “Bikalaku mushindu, enzayi tshionso tshinudi nuenu mua kuenza bua kuikala mu ditalala ne bantu bonso.” Nunku, tudi tuenza muetu muonso mua kuenza bua kulama ditalala ne bakuabu ne kubenga kuenza bualu budi mua kubanyingalaja.

15. Ntshinyi tshidi bakulu mua kuenza bua bena mu tshisumbu bikale anu mu buobumue? (1 Kolinto 4:6)

¹⁵ Bakulu batu banemeka mapangadika a bakuabu. Bua kulama buobumue mu tshisumbu, kabatu belela benamu mikenji ya malu adi abatangila, ne kabatu baya “dia muamua dia malu adi mafunda” mu Bible to. (Bala 1 Kolinto 4:6.) Mêyi aa adi umvuija kabidi ne: kabatu bamba malu adi abengangana ne mibelu idi mu mikanda yetu to. Bualu bukuabu, patu muena Kristo ubalomba diambuluisha, batu batabalela bua kubenga kumuambila bua enze anu tshidibu bobu bamona ne: ntshimpe. Kadi batu bangatshila mibelu yabu mu Dîyi dia Nzambi.​—Yesh. 48:17, 18.

16. Mmunyi mudi mukulu mua kunemeka mapangadika adibu bangata kudi kasumbu ka bakulu?

¹⁶ Mukulu yonso utu kabidi unemeka mapangadika adi kasumbu ka bakulu kangata. Patu bakulu badisangisha bua kuangata mapangadika, batu banji kulomba nyuma muimpe bua abambuluishe ne batu bakonkonona bimpe bimpe tshidi Bible wamba. Dîba adi mukulu yonso udi ne bua kutua mapangadika au mpanda nansha bakulu bakuabu bobu kabayi bitabe lungenyi luende. (Ef. 5:17) Bakulu batu badienzeja kabidi bua kutumikila buludiki budi mu Bible ne mu mikanda yetu. Kabatu bakeba anu bua buludiki abu bulonde tshidibu bobu basue to. Tshilejilu, mukulu kena ne bua kuendela pa tshiambilu kampanda tshia mu mikanda yetu, ukebe anu bua balonde tshidi yeye musue to.

17. Patudi tunemeka mapangadika a bakuabu, bidi mua kutuambuluisha mushindu kayi mu tshisumbu?

¹⁷ Tudi balonge ne: Yehowa mmutufuke bashilangane. Yonso wa kutudi udi ne wende mmuenenu wa malu ne bidiye musue. Kuikala bashilangane nanku nkuimpe be! Bu mudi mu tshisumbu muikale bantu ba miaba mishilangane ne ba ngikadilu mishilangane, tudi tudiumvuamu bimpe. Nunku mbimpe tuenze bua tuikale mu ditalala pamutu pa kulekela dishilangana dietu adi ditutapulula. Tudi tutabalela bua katunyingalajanganyi to. Tudi tunemeka mapangadika adi bakuabu bangata bua malu adi abatangila. Dîba adi bionso bitudi tuenza kabiakuya mu mâyi to. Netuikale ne disanka ne tshisumbu tshijima netshikale mu buobumue.​—Mis. 133:1; Mat. 5:9.