Misambu 37:4​—“Disanka diebe dikale amu kudi [Mukalenge]”

“Ikala ne disanka dipite bungi mu Yehowa, yeye neakukumbajile majinga a muoyo webe.”​—Misambu 37:4, Nkudimuinu wa bulongolodi bupiabupia.

“Disanka diebe dikale amu kudi [Mukalenge]. Nanku neakupeshe bionsu biudi umulomba.”​—Misambu 37:4, Mukanda wa Mvidi Mukulu (Mishonyi).

Diumvuija dia Misambu 37:4

Mufundi wa misambu udi ukankamija batendeledi ba Yehowa bua kuikala ne disanka bua mudibu mu malanda mimpe nende. Bimpe bonso badi mu malanda mimpe ne Yehowaa batuishibue ne: neakumbaje majinga abu.

“Ikala ne disanka dipite bungi mu Yehowa.” Badi mua kukudimuna kabidi tshiambilu etshi ne: “ikala usanka bikole menemene mu Yehowa,” “ikala ne disanka dia kuenzela MUKALENGE mudimu,” anyi “ikala ne disanka mu tshidi MUKALENGE mukulaye.” Mu ngumvuilu mukuabu, tudi ne bua ‘kusanka bikole menemene’ mu mudimu utudi tuenzela Nzambi mulelela. (Misambu 37:4, dimanyisha dia kuinshi kua dibeji) Bua tshinyi tudi tuamba nanku?

Bantu badi batendelela Yehowa badi bamona malu mudiye uamona, anu mudiwu maleja mu Bible. Mbamanye Nzambi, mbamanye kabidi ne: mbia meji bua kumutumikila. Ke bualu kayi, badi ne kondo ka muoyo kimpe ne badi bepuka ntatu ya bungi. (Nsumuinu 3:5, 6) Tshilejilu, padi bena lukuka anyi bantu badi kabayi ne bululame bamueneka bu ne: mbatante, bantu ba Nzambi kabena balekela tshiji anyi dialakana binyanga ditalala diabu to. (Misambu 37:1, 7-9) Bantu ba Nzambi badi ne disanka bualu mbamanye ne: Nzambi neajikije ntatu yonso mu katupa kîpi emu ne neafute bena lulamatu bua bikadilu biabu bimpe. (Misambu 37:34) Badi kabidi ne disanka dipite bungi bualu mbamanye ne: Tatu wabu wa mu diulu udi ubanyisha.​—Misambu 5:12; Nsumuinu 27:11.

“Neakukumbajile majinga a muoyo webe.” Tudi mua kukudimuna kabidi mêyi aa ne: “neandamune masambila ebe” anyi ne: “neakupeshe tshidi muoyo webe ukeba.” Tudi bamanye ne: Yehowa kakutupesha bionso bitudi tumulomba to. Anu bu muledi muimpe, mmumanye tshidi tshitambe buimpe bua bana bende. Malu atudi tumulomba ne nsombelu wetu bidi ne bua kupetangana ne mikenji yende ne disua diende. (Nsumuinu 28:9; Yakobo 4:3; 1 Yone 5:14) Tuetu tuenza nanku, tudi mua kulomba “Muteleji wa masambila” batuishibue ne: neatuteleje ne ntema yonso.​—Misambu 65:2; Matayi 21:22.

Malu adi Misambu 37:4 wakuila

Davidi mukalenge wa Isalele wa kale ke uvua mufunde musambu wa 37. Wakafunda musambu eu bilondeshile dilondangana dia maleta.b

Davidi wakatuilangana ne ntatu ya bungi. Mukalenge Shaula ne bantu bakuabu bakakeba bua kumushipa. (2 Samuele 22:1) Nansha nanku, Davidi uvua mueyemene anu Nzambi wende ne muoyo mujima. Uvua mumanye ne: ndekelu wa bionso Yehowa neanyoke bantu babi. (Misambu 37:10, 11) Nansha bantu babi bobu bamueneka bu ne: badi batanta bu “tshisonsa tshibishi tshitshidi tshitolokelaku” nebalue anu kujimina.​—Misambu 37:2, 20, 35, 36.

Musambu wa 37 udi uleja tshiafikila bantu badi batumikila mikenji ya Nzambi ne aba badi bayipepeja. (Misambu 37, 16, 17, 21, 22, 27, 28) Nunku musambu eu udi utuambuluisha bua kupeta meji ne kuikala bantu badi Nzambi wanyisha.

Tangila kafilme aka bua kumona kadiosha ka mukanda wa Misambu.