“Ndaku kudi Palô”

MOSE ukavua mushintuluke bikole. Bidi bimueneka bu ne: katshivua kabidi muvuluke ne: nyeye ke uvua ne bua kuya kupatula bena Isalele mu bupika mu Ejipitu. Uvua ne bidimu 80, muikale ne mukaji ne bana babidi. Uvua musombele mu buloba bua bena Midiyana. Wakenza bidimu 40 ulamina tatuende muenu mikoko mu tshipela muvua luya lua bungi. Wakalonga mua kuikala ne budipuekeshi munkatshi mua tshikondo atshi.

Yehowa uvua mumone mukavua Mose mushintuluke amu. Dimue dituku, pavua Mose ku mukuna wa Holeba, Yehowa wakenza bua kamutshi ka mêba kalakuke kapia kadi kakayi kuoshika to. Pakasemenaye pabuipi ne kamutshi aku, Yehowa wakatuadija kuakuila nende mu kapia amu ku diambuluisha dia muanjelu wa bukole. Wakamuambila bua apingane mu Ejipitu aye kupatula bantu bende mu bupika. Nanku wakamukankamija, kumulejaye tshidi dîna diende dia tshijila diumvuija. Wakamuambila ne: “Nendue tshindi nsungula bua kulua.” Yehowa uvua mua kulua Musungidi wa bantu bende bavuabu bakengesha, wenza tshionso tshivua tshikengela bua kubapatula mu bupika ne kubavuija tshisamba tshia bukole.

Nansha nanku Mose utshivua anu welakana. Kavua mudimone mukumbane bua kulombola bantu ne kuya kuakula ne Palô wa mu Ejipitu to. Yehowa wakamupesha bukole bua kuenza bishima bua kuakaja mmuenenu wende ne kukolesha ditabuja diende. Eu ke musangu wa kumpala udi Bible uleja mudi Yehowa mupeshe muntu bukole bua kuenza bishima. Wakamutuma ne muanabu Alona bua amuambuluishe ne ikale muleji mpala wende. Mose wakitaba mudimu au nansha mutshivuaye ne dielakana. Uvua mpindieu masiya, mmumue ne: muntu uvua Yehowa musungule bua kusungila bantu bende.​—Eb. 11:26.

Mose wakatuilangana ne Alona ku mukuna wa Holeba, kupinganabu mu Ejipitu bua kuya kuakula ne Palô. Bakamulomba bua alekela bena Isalele bua baye kutendelela Yehowa Nzambi wabu mu tshipela. Kadi bualu abu buakamufiikisha munda bikole, kutumaye dîyi bua benzeje bena Isalele midimu mikole. Pashishe Yehowa wakatuma kabidi Mose kudi Palô bua amuambile bua tshipupu tshia kumpala tshivua ne bua kukuata bena Ejipitu. Tshipupu atshi tshiakabakuata! Mâyi a musulu wa Nile akandamuka mashi. Nansha nanku Palô kakalekela bena Isalele to. Yehowa uvua anu utuma Mose bua apingane kudi Palô. Musangu wonso Mose kavua utshina to, uvua uya kudi Palô bua kumumanyisha tshipupu tshivua ne bua kubakuata. Kadi mukalenge muena lutambishi au kavua uteleja to.

Tshipupu tshionso tshivua tshileja muvua banzambi ba mu Ejipitu, Palô ne bakuidi bena majimbu bende kabayi ne bukole bua kubimanyika. Yehowa uvua ukuba bena Isalele ku bipupu abi, kadi bivua bikuata anu bena Ejipitu. Nansha nanku, Palô wakatungunuka anu ne kupapisha muoyo wende kayi ulekela bena Isalele to. Tshipupu tshia 9 tshiakabueja Ejipitu mujima mu mîdima, kadi ku nzubu ya bena Isalele koku kuvua anu kutoke. Palô wakanji kuitaba bua kulekela bena Isalele kadi wakashintulula dipangadika diende mu mupodi wa dîsu. Kuambilaye Mose ne: yeye mupingane kabidi kudiye neamushipe.

Pakabuela tshipupu tshia ndekelu, muanabute yonso wa mu Ejipitu wakafua, kutuadijila ku wa muntu too ne ku wa tshimuna. Nansha wa Palô muine wakafua pende. Bundu buakamukuata kubikidishaye Mose. Ke Yehowa kutuma Mose bua musangu wa ndekelu, yeye kuya. Palô wakitaba bua kulekela bena Isalele, kulombaye Mose bua amubeneshe. Bakapatuka mu bupika panyima pa bidimu 430, Abalahama mumane kubuela mu Buloba Bulaya! Bakaya ne “tshisumbu tshinene tshia bantu basambakane.” Ba bungi ba kudibu bavua bena Ejipitu. Pashishe Palô wakashintulula kabidi meji. Kusangishaye tshiluilu tshinene tshia basalayi kuyabu balonde bena Isalele!

Mose ne bena Isalele bakenda kufikabu ku Mbuu Mukunze. Biakamueneka bu ne: kabavua ne mushindu wa kunyema to. Buôwa buakabakuata! Ke Mose kulombaye diambuluisha kudi Yehowa. Yehowa wakamuandamuna, kuenzaye tshimue tshia ku bishima bia dikema bikadi bienzeke. Mâyi a Mbuu Mukunze akapanduluka mu bitupa bibidi, bena Isalele kuendelabu pa buloba bume munkatshi mua mbuu. Pakamona Palô ne: bena Isalele bakavua pa kufika dia muamua dia mbuu, yeye ne tshiluilu tshiende bakabalondakaja. Diakamue pakafikabu bimpe ku luseke lukuabu lua mbuu, Yehowa wakenza bua mâyi a mbuu apingane ne abuikile tshiluilu tshia bena Ejipitu tshionso. Tshiluilu tshivua ne bukole bua bungi tshikondo atshi tshiakabutuka!

Mose kakapua malu a dikema aa muoyo to. Ditabuja diende diakalua dikole kupita kuonso eku. Mose uvua munange bantu ba Nzambi bavuaye mulombole munkatshi mua bidimu 40, tuambe ne: too ne pakafuaye ne bidimu 120. Uvua ne ditabuja ne dikima dia bungi. Tudi petu mua kumuidikija.

Bala bualu ebu mu:

• Ekesode 2:15–5:23; 7:1–11:10; 12:29-41; 13:17–14:31

• Dutelonome 29:2, 3; 34:5-7

Lukonko lua kuelela meji:

Anu mutudi balonge mu nshapite eu, mmushindu kayi uvua Mose muenze malu ne dikima?

Buela mu buondoke

1. 1. Katuena bamanye dîna dia Palô udibu bakuile mu nshapite eu, ne kakuena mifundu ya bena Ejipitu idi yakula bua Tshimuangi to. Kadi bua tshinyi mbikumbane bua tuetu kuitaba muyuki wa mu Bible eu? (g04 8/4 7 §3–8 §2-wcgr)

   Andamuna

2. 2. Bua tshinyi bantu bavua batshina Palô? (w14 15/4 8 §1) A

   Andamuna

   

   PRISMA ARCHIVO/Alamy Stock Photo

3. 3. Mmunyi muvua Bipupu dikumi bileje muvua nzambi ya bena Ejipitu bintu bia tshianana? (it “Banzambi balume ne bakaji” §24-26-wcgr)

   Andamuna

4. 4. Ntshinyi tshidi tshileja ne: Yehowa wakapanda njila munene mu Mbuu Mukunze, ne mmunyi muvua bena Isalele ba bungi bapitshilamu? (it “Tshimuangi” §46–51-wcgr) B

   Andamuna

   

Keba malongesha

• Mmunyi mudi tshilejilu tshia Mose mua kutuambuluisha patudi tudimona katuyi bakumbane bua kuenza mudimu udi Yehowa mutupeshe? (Ekes. 4:10; 7:6, 7)

  Andamuna

• Mmunyi mutudi mua kuambuluisha bena Kristo netu lelu eu bua kukumbaja midimu yabu anu muvua Alona muambuluishe Mose bua kukumbaja mudimu wende ne dikima? (Ekes. 4:14-16) C

  Andamuna

  

• Mmunyi muudi mua kuenza malu ne dikima bu Mose anu bu mutudi bamone mu nshapita eu?

  Andamuna

Lepesha meji

• Ntshinyi tshidi bualu ebu bundongesha bua Yehowa?

  Andamuna

• Mmunyi mudi bualu ebu bupetangana ne disua dia Yehowa?

  Andamuna

• Mbualu kayi bungebeja Mose pabishibuaye ku lufu?

  Andamuna

Bia kutangila kabidi

Mona mudi diumvuija dia dîna dia Yehowa mua kuambuluisha bana bua kuikala ne dikima.

Dîna dia Yehowa (1:54)

Ntshinyi tshivua malu avua mafikile Mose mamulongeshe bua ngikadilu ya Yehowa?

“Tulonge mua kumanya njila ya Yehowa” (w05 15/5 20-25)