Mbulamatadi muimpe udi mua kufila ditalala pa buloba anyi?

TSHIDI TSHISAKA BAMUE BUA KUITABA BUALU EBU

Badi bamba ne: mbulamatadi ya bungi mmisue ditalala. Bua kukumbaja tshipatshila etshi, matunga a bungi mmabuele pawu mu Bulongolodi bua matunga masanga, budi ne mudimu wa kufila ditalala ne bukubi pa buloba bujima.

Badi bamba ne: bantu ba bungi mbasue bua kuikale ditalala. Bakebuludi mbebeje bantu batue ku 42000 ba mu matunga 17 ne: koku kuikale mbulamatadi udi ukokesha buloba bujima ne udi mua kujikija malu bu mudi mvita, masama ne bupele, badi mua kumutua mpanda anyi? Bantu ba bungi bavua bitabe lungenyi alu.

BUALU BUA KUELELA MEJI

Bua kupeta ditalala pa buloba bujima, mbulamatadi yonso idi ne bua kuenza mudimu pamue.

Bualu ebu budi mua kuenzeka anyi?
Ntshinyi tshidi ngumu yamba bua malu adi enzeka pa buloba?

Mu 2024, Comité international de la Croix-Rouge wakamba ne: “Kudi mvita miaba mipite pa 120 pa buloba bujima,” ne bantu ba bungi badi “bayiluangana kabena batumikila mikenji itu ikuba bantu badi kabayi ne bualu to.”

Foto: Malu adi mvita mikebeshe. 1. Tshisumbu tshia bantu bele bingoma muulu, benda bela mbila. 2. Bantu bakole ne bana benda bafuilakana bua kuangata biakudia. Kudi kana ka balume kadi kadila. 3. Bantu benda bendela muaba udi mishiki ya bintu bia tshimenga tshidibu babutule ne bombe.

Nansha mbulamatadi mimpe kayena mua kujikija malu adi mu mioyo ya bantu to

TSHIDI BIBLE WAMBA

“Muntu udi wenda eu kena ne bukokeshi bua kuludika nansha dikasa diende to.”—Yelemiya 10:23.

Bua kumanya tshidi mvese eu umvuija, difuanyikijilabi mudi baledi mua kumvua padibu bamona muanabu wambulula dikasa bua musangu wa kumpala bua kuenda. Ku kakese ku kakese, udi mua kutuadija kuenda kayi ukuluka to. Kadi udi mua kudiyila miaba yonso idiye musue kayi ujimina anyi? Udi mua kusambuka njila yeye nkayende kayi upeta njiwu anyi?

Bia muomumue, bantu badi pabu anu bu bana. Badi ne mikalu mu malu adibu basungula bua kuenza ne kabavua bafukibue ne bukokeshi bua kuludika dikasa diabu, mmumue ne: kudilombola to. Kadi bivua bikengela bua Mufuki wabu abambuluishe.

‘Muntu udi ukokesha muntu mukuabu bua kumukengesha.’—Muambi 8:9.

Nansha mbulamatadi mimpe kayena mua kujikija malu adi mu mioyo ya bantu bu mudi lukuka, lutambishi, budinangi ne kansungansunga to. (Yelemiya 17:9) Malu adi enzeka adi aleja ne: bintu bitudi batele ebi bidi bikebesha tshikisu tshia bungi ne makenga. Ke bualu kayi Bible udi wamba ne: “Bua diakalenga dienu, lekelayi kueyemena muntu wa patupu.”—Yeshaya 2:22.

“Bukalenge buebe bulue. Disua diebe dienzeke kabidi pa buloba muomumue ne mu diulu.”—Matayi 6:9, 10.

Mêyi aa adi aleja mudi Bible wakula bua mbulamatadi wakokesha buloba bujima, mmumue ne: Bukalenge bua Nzambi. Bukalenge abu mbulamatadi mulelela wakokesha buloba bujima. (Danyele 7:13, 14; Buakabuluibua 11:15) Patuadijabu kukokesha pa buloba, nsombelu nealengele kupita mudiye lelu.

Mona malu adi Bible mutulaye kumpala eku:

Danyele 2:44: ‘Nzambi wa mu diulu neajadike bukalenge bukuabu buikala kabuyi mua kubutudibua nansha kakese. Buobu nkayabu nebushalaku kashidi.’
Misambu 46:9: “[Nzambi] udi ujikija mvita pa buloba buonso bujima.”
Yeshaya 11:9: ‘Bantu kabakuenzelangana bibi anyi kukebesha tshinyangu to, bualu buloba nebuwule tente bushuwa ne dimanya dia Yehowa.’a

Kakuena mbulamatadi wa bana ba bantu udi mua kuenza malu aa to, anu Mufuki wetu.

BUA KUMANYA MALU MAKUABU

Tetabi programe wetu wa dilonga dia Bible kuyi ufuta, peshi lomba bua Ntemu wa Yehowa alue kukutangila.

a Bible udi uleja ne: Yehowa ke dîna dia Nzambi. Bala tshiena-bualu tshia ne: “Yehowa nnganyi?”